तालिवानी हमला नियन्त्रणया लागिं अफगानिस्तान सरकारं कफ्र्यु आदेश जारी याःगु दु ।

अमेरिकी सेना लिहां वनेधुंकाः अफगानस्तानय् सक्रिय जूगु तालीवानया ज्याखँ पनेत कफ्र्यु आदेश जारी याःगु खः । अफगानस्तानया ३४ प्रान्तमध्ये ३१ प्रान्तय् चान्हय् १०ताः इलंनिसें सुथय् ४ताः ईतक्क कफ्र्यु लागू याःगु खः ।

तालिबान पुचलं मुख्य सीमा नाका पुलीगु अप्वःथे जिल्लाय् कब्जा याःगु दु । हिंसा पनेत व तालिबानी आन्दोलनयात सीमित यायेत काबुललिसें देय्न्यंकया ३१ प्रान्तय् रात्रीकालीन कफ्र्यु लागू जूगु अफगानिस्तान सरकारं न्ह्यथंगु दु ।

तालीवानी बिद्रोहीं अफगानिस्ताया बागू ब्वय् कब्जा यायेधुंकाः अफगान सरकार तँसा मारय् लाःगु दु । थ्व हे दथुइ, अफगानिस्तानया कन्दहारय् जूगु झडपय् ३० स्वयां अप्वः सीगु दु ।

भारतय् वंगु २४ घण्टाय् ४८३ म्ह कोरोना संक्रमितपि सीउगु दु।

अथेहे ३५ हजार ३४२ म्ह संक्रमित पुष्टि जुगु दु।

भारतय् आःतक ४ लाख १९ हजार ४७० म्ह कोरोना संक्रमणया कारण सी धुकुगु दु।

भारतय् ३ करोड १२ लाख ९३ हजार ६२ म्ह कोरोना संक्रमण जुइ धुकुगु दु।

भारतय् म्युकरमाइकोसिस (हाकुगु ढुसी) या संक्रमण कारण ४३ सय स्वया अप्वो मनूत सीगु दु।

वंगु इलय् भारतय् हाकूगु ढुसीया संक्रमितपिनिगु ल्या तसकं अप्वोगु दु सा सीपि न अप्वोगु दु। भारतया स्वास्थ्य मन्त्री मन्सुख मन्दाभियाया कथं आःतक भारतय् हाकूगु ढुसीया कारणं ४५ हजार ३७४ म्ह संक्रमित जुइ धुकुगु दु।

उकि न बच्छिपिन्स जक उपचार याकाच्वंगु दु। हाकूगु ढुसीया संक्रमणं न्ह्याय्, मिखाँ व गुवलय् गुवलय् न्ह्यपूइ न असर याः। हाकूगु ढुसीया संक्रमण खनेदुपि अप्वोयाना कोरोना लायेधुकूपि मनू तयेत खनेदुगु खः।

कोरोना उपचारया झ्वलय् स्टेरोइडया प्रयोग याइपि व चिनि ल्वय् दूपिकें दकलय् अप्वो खनेदुगु धका डाक्टरपिन्स धाःगु दु। डाक्टरपिनिगु कथं कोरोनामुक्त जूपि १२ निसे १८ दि दुने हाकूगु ढुसीया संक्रमण खनेदुगु दु।

भारतया महाराष्ट्र, गुजरात, तामिलनाडु व राजस्थानय् अप्वो संक्रमितपि पिहावंगु खः। महाराष्ट्र व गुजरातय् जक संक्रमितपि १ हजार ७८५ म्ह दु।