Display Style:
Column Style
कोरोनाविरुद्वया न्हूगु मापदण्डयात कया विरोध प्रदर्शन
दिल्लाथ्व पंचमी ११४१,असार ३१ बिहीवाः
सरकारं जारी याःगु कोभिड–१९ विरुद्धया न्हूगु स्वास्थ्य मापदण्डयात फ्रान्सेली जनतां विरोध याःगु दु ।
राष्ट्रपति इम्यानुयल म्याक्राेंनं बार, रेष्टुरेन्ट व सिनेमा हलय् दुहाँवनेत खोप काःगु प्रमाणपत्र वा पीसीआर परीक्षणया नेगेटिभ रिपोर्ट आवश्यक जुइगु प्रावधानयात न्ह्याकेत स्वयेधुंका विरोध जूगु दु ।
सरकारी योजना विरूद्ध कुहाँवःपिं ब्वज्यामि व प्रहरी दथुइ ल्वापु नं जूगु दु । ब्वज्यामितये भीड पनेत प्रहरीं अस्रु ग्यांस छ्यलेमाःगु खः । राष्ट्रपति म्याक्रोनं कोरोना भाइरस विरुद्व न्ह्यायेत स्वास्थ्यकर्मीतयेर्त अनिवार्य खोप लिसें आम जनताया नितिं न्हूगु स्वास्थ्य नियमया घोषणा यानादीगु खः ।
राष्ट्रपति म्यांक्रोया आलोचकतयेसं शपिंग मल, क्याफे, बार व रेष्टुरेन्टय् स्वास्थ्य पास जाँचया व्यवस्थां मनूतय् स्वतन्त्रतायात क्वत्तय्गु द्वपं बिउगु दु । खोपया अनिवार्यता सरकारया मनमानी व पूवंक अलोकतान्त्रिक व्यवहार धासें उमिसं भिंकेत इनाप याःगु दु ।
उखे राष्ट्रपति म्याक्राेंनं धाःसा खोपं फ्रान्सयात सामान्य स्थितिइ हयेगु पायेछि पहः जूगु दावी यानादीगु दु । फत्तले आपालं मनूयात खोप कायेत प्रोत्साहित यानाच्वनागु वयेकया धापू दु ।
अमेरिकां दोभाषेया रुपय् ग्वहालि याःपिन्त सुरक्षित थासय् यंकिगु
दिल्लाथ्व पंचमी ११४१,असार ३१ बिहीवाः
संयुक्त राज्य अमेरिकां ल्वापुया इलय् अफगानिस्तानय् थः सैनिकयात दोभाषेया रुपय् ग्वहालि चूलाकुपिं अनुवादकतयेत सुरक्षित थासय् यंकिगु जूगु दु ।
इमित थ्वहे जुलाईया लिपांगु वालंनिसें अमेरिका वा मेगु छुं नं देशय् यंकिगु जूगु खः । वंगु छुं वालय् तालिबानं देय्या थी थी थासय् तच्वकं थःगु पकड दयेकावयाच्वंगु दु ।
ह्वाइट हाउसया प्रवक्ता जेन सासाकीं दोभाषेतयेत बहादुर मनूया छुमां बिउसें उमिगु वंगु आपालं दँ निसें म्हितुगु भूमिकाया मू पुलेत थःपिं तयार दूगु धयादील । झण्डै २५सःम्ह मनूत अमेरिका वा ३गूगु देशय् सैन्य सुविधाया नितिं प्रतिरक्षारत दूगु धाःगु दु ।
अमेरिकीलिसेंया सैनिक लितयंकेगु झ्व लिपांगु चरणय् थ्यंबलय् इमगिु ग्वहालिमिया कथं ज्या याःपिं अनुवादकत जोखिमय् लानावःगु चिउता थप जूगु खः । अमेरिकाया नेतृत्वय् सन् २००१ थुखे जुयावःगु नेटो सैनिकया अभियान अफगानिस्तानय् अन्त्य जुइत्यंगु दु ।
सेप्टेम्बर ११ तक्क फुक्क विदेशी सैनिक अफगानिस्तानं पिहाँवनिगु ई सीमा दु । अमेरिकी राष्ट्रपति जो बाइडेनं वइगु अगस्ट अन्तिम तक्क थःपिनि सैनिक लिहाँवइगु घोषणा यानादीगु दु ।
क्यूवाया नागरिकपिं आन्दोलित
दिल्लाथ्व चतुर्थी ११४१,असार ३० बुधवाः
क्युवाय् सरकार विरोधी ज्यापहः अप्वःगु दु । देय्या थी थी थासय् सरकारया विरोधय् थी थी ब्वज्या जुयाच्वंगु दु ।
ब्वज्याया ज्यापहः अराजक जूगु धासं्े सुरक्षाकर्मीं बल छ्यबलय् छम्ह सीगु दु । शवाना शहरय् जूगु ब्वज्याया झ्वलय् प्रहरीया कारवाहीलय् छम्ह सीगु लिसें आन्दोलन थप तच्वगु आन्तरिक मन्त्रालयं न्ह्यथंगु दु ।
आर्थिक असमनाता जूगु धका सर्वसाधारणं सरकारया कुँख्यसें देय्यंक ब्वज्या न्ह्याकुगु खः । कोरोना भाइरसया महामारीया हुनिं देशय् थप आर्थिक संकट वःसा नं उकिया समाधानया नितिं सरकारं प्रभावकारी पलाः न्ह्याकुगु धासें सर्वसाधारणं विरोध ब्वज्या न्ह्याकुगु अन्तर्राष्ट्रिय समाचार संस्थातयेसं न्ह्यथंगु दु ।
थुखे सरकारं धाःसा आन्दोलनय् घुसपैठ जूगु दावी याःगु दु । अमेरिकां प्रतिबन्ध तयेधुंका लिपांगु ई क्युवाय् आर्थिक संकट थप जुयावंगु सरकारी अधिकारीतयेसं न्ह्यथंगु दु् ।
दक्षिण अफ्रिकाय् हिंसात्मक प्रदर्शनय् सीपि ७२ म्ह थ्यन
लहानान्युज | दिल्लाथ्व चतुर्थी ११४१,असार ३० बुधवाः
दक्षिण अफ्रिकाय् जुयाच्वंगु हिंसात्मक प्रदर्शनय् सीपिनिगु ल्याः ७२ म्ह थ्यंगु दु।
पूर्व राष्ट्रपति ज्याकोब जुमा जेल चलान जुइवं सुरु जुगु हिंसात्मक प्रदर्शनय् ७२ म्हेसिगु ज्यान वंगु धका बीबीसीं धागु दु। ज्याकोब जुमा निर्दोष जुगु धासे वया समर्थकपिन्स रिहाइया माग यासे विरोध प्रदर्शन यागु खः।
हिंसा तच्वया वंगुलि दक्षिण अफ्रिकाय् लुटपाटया घटना न अप्वोया वंगु दु। प्रहरीं आःतक १२ सय स्वया अप्वो प्रदर्शनकारीपिन्त ज्वने धुकुगु दु।
वंगु वाःय् जुमां प्रहरी समक्ष आत्मसमर्पण यागुलि वया समर्थकपिन्स विरोध प्रदर्शन यागु खः। जुमायात भ्रष्टाचार यागु आरोप लगे जुगु खः।
दक्षिण अफ्रिकाय् ब्वज्या तच्वेवं सेना परिचालन
दिल्लाथ्व तृतीया ११४१,असार २९ मंगलवाः
दक्षिण अफ्रिकाया पूर्व राष्ट्रपति याकुब जुमायात त्वःतेत माग यानाः न्ह्यानाच्वंगु ब्वज्या तच्वःगु दु ।
थीथी थासय् ब्वज्या जूगुलिसे हिंसात्मक घटनात जूगु दु । ब्वज्यालिसलिसे लुटपाट व चोरीया घटना तकं जुइवं थीथी शहरय् सेना परिचालन याःगु दु । पूर्व राष्ट्रपति जुमायात भ्रष्टाचार याःगु द्वपं ब्यूगु खः ।
अनलिं न्यायालयं छानविन यायेत जुमायात अदालतय् सःतूगु खःसां वय्कलं अदालतया आदेशयात अस्वीकार यानादिल । तर अदालतं जुमायात हिरासतय् मकाःसें जेल सजाय न्यंकाब्यूगु खः ।
थ्वहे निर्णयलिसे पूर्व राष्ट्रपति जुमां प्रहरीया न्ह्यःनय् आत्मसमर्पण यानादीगु दु । अनलिं वय्कया समर्थकपिन्सं मदिक्क सडक ब्वज्या यानावःगु दु । ब्वज्यां हिंसात्मक रुप कायेवं प्रशासनं सेना परिचालन याःगु दु ।
स्थिति नियन्त्रणं पिहाँवनेत्यंगु धासें दक्षिण अफ्रिकी सरकारं सुरक्षा व्यवस्था कडा याःगु दु । लिपांगु ईलय् ब्वज्याय् सुरक्षाकःमिपिन्सं हस्तक्षेप यानाहःगु दु । थ्वहेदथुइ छवाःदुने ६म्ह ब्वज्यामि सीधुंकूगु दु ।
निसःम्ह मल्याक ब्वज्यामितय्त ज्वनायंकूगु दु । ८९दँया पूर्व राष्ट्रपति जुमा सन् २०१८ न्ह्यः गुदँ तक सत्ताय् च्वंबलय् पदीय दुरुपयोग यानाः अकुत सम्पति मुंकूगु धासें अदालतं छानविन प्रक्रिया न्ह्याकूगु खः ।
