भारतय् कोरोना भाइरस (कोभिड–१९) संक्रमित जूपिनिगु ल्या म्हो जुया वंना २८ हजारय् क्वहावंगु दु।

भारतया स्वास्थ्य तथा परिवार कल्याण मन्त्रालयया कथं न्हिया न्हिथं न्हुपि संक्रमित जूपि १४७ दिं लिपा दकलय् हे म्हो जुगु खः।

वंगु २४ घण्टाय् भारतय् १५ लाख ११ हजार स्वया अप्वोसिगु नमुना कोरोना परीक्षण यागु खः। अथेहे कोरोना संक्रमणं कारण ३७३ म्ह सीगु खः।

थ्व नाप आःतक भारतय् कोरोना संक्रमणं सीपिनिगु  ल्याः४ लाख २८ हजार ६८२ म्ह थ्यंगु दु। भारतय् कोरोना सक्रिय संक्रमितपिनिगु ल्याः ३ लाख ८८ हजारय् कुहावंगु दु।

आःतक भारतय् ५१ करोड ४५ लाख डोज कोरोना खोप मनूपिन्स काये धुकुगु दु।

अफगानिस्तानया मू शहर सेवरगान व निमरोजया राजधानी जराङ नियन्त्रणय् काःगु तालीवान बिद्रोहीं छन्हूं हे थप ३गू प्रान्तीय राजधानी नियन्त्रणय् काःगु दु ।

कुन्दुज, सर–ए–पुल व तालोगान शहरयात तालिबानं पुर्ण रुपय् नियन्त्रणमा काःगु खः । थ्व लिसें तालिवान बिद्रोहीं ५ गू प्रान्तीय शहर नियन्त्रणय् कायेत सुथांलाःगु दु ।

विद्रोहीया नियन्त्रणय् थ्यंगु शहरया बासिन्दा धाःसा धमाधम पलायन जुयाच्वंगु दु । कुन्दुज व लश्करगाह शहर थःगु नियन्त्रणं पिनेवनेधुंका अफगान सेनां हवाइ व स्थलगत हताः याःबलय् अन ल्वापु जुयाच्वंगु दु ।

अफगान सेनां अमेरिकी बमबर्षक बिमानं तालीवानया पकड दूगु शबरघानय् हताः हताः याःगु दु । उगु हे झ्वलय् २ सःम्ह लडाकु सीगु अफगानिस्तानया रक्षा मन्त्रालयं पुष्टि याःगु दु ।

उगु झ्वलय् सलंसः छेँ नष्ट जूगु धासें रक्षा मन्त्रालयया प्रवक्ता फवाद अमानं तालीवान बिद्रोही बिरुद्धया हताः कायम याना नियन्त्रणय् दूगु शहरत लितकायेगु न्ह्यथंगु दु ।

हेलमन्द प्रान्तय् सेनाया कारवाहीलय् सच्छि व १२म्ह विद्रोही सिइधुंका तालीवानं धमाधम शहरत नियन्त्रणय् कायेगु न्ह्याकुगु खः ।

लिपांगु ई तालीवानतयेसं ग्रामीण इलाका नियन्त्रणय् कया शहरपाखे न्ह्यागु दु । वंगु २०दँ निसें अफगानिस्तानय् दूगु अमेरिकी नेतृत्वया अन्तर्राष्ट्रिय सेना लिहाँवंगु निसें विद्रोहीया हताः अप्वयावंगु खः ।