इटालीइ तान्वया वना च्वंगु दु। यक्को तान्वया अप्पो थे शहरय् रेड अलर्ड जारी जुयाच्वंगु दु।स्वास्थ्य सेवा केन्द्रय् बिरामीत अप्पो वंगु दु।

बुधवाः तक इटालीइ तान्वया सीपिनिगु ल्याः न्याम्ह थ्यःगु दु।रोमया, अधिकारी तयेस पर्यटकीय हटस्पट व यातायात केन्द्रय् रेडक्रसपाखे कर्मचारी तय्त जलपान स्थलय् तैनाथ याःगु दु।

शहरया कमजोर व छेँ मदुपि मनूतय्त विशेष ग्वहालि यायेगु ज्या जुयाच्वंगु दु।थुगु वाःया लिपागु इलय् तक नीगू शहरय् रेड अलर्ट जारी जुइ धुकुगु दु।

अमेरिकाया राष्ट्रपति डोनाल्ड ट्रम्पं युक्रेनय् रुसं याःगु लिपांगु ड्रोन व क्षेप्यास्त्र आक्रमणप्रति गम्भीर चिउताः प्वंकूगु दु। राष्ट्रपति ट्रम्पं रुसी राष्ट्रपति भ्लादिमिर पुटिनलिसेया फोनय् प्रतिबन्धबारे गम्भीर सहलह जूगु धाःगु दु।

युक्रेनया राष्ट्रपति भोलोदिमिर जेलेन्स्कीं ट्रम्पलिसे खँ ल्हानागु व सुरक्षा सुदृढ यायेगु सहमति जूगु धाःगु दु। रुसी आक्रमण लिपा युक्रेन न्यंकं हवाई आक्रमणया साइरन न्याःगु खः। राजधानी कीभलिसें आपालं थासय् विस्फोटया सः वःगु खः।

युक्रेनया सुरक्षाकर्मीं ५३९ ड्रोन व ११ क्षेप्यास्त्र मध्ये अप्वः धइथें ध्वस्त याःगु दु।कीभय् २६ म्ह सर्वसाधारण घाःपाः जूगु दु। कीभय् च्वंगु पोल्याण्डया दूतावासय् नं क्षति जूगु दु। ज्याकःमित सुरक्षित दु।रुसं थःगु लक्ष्य शान्तिपूर्ण रुपं प्राप्त यायेगु इच्छा दुगु धाःगु दु।

रुसं आवश्यक जुल धाःसा थःगु ‘विशेष सैन्य अभियान’यात निरन्तरता बीगु धाःगु दु। उगु हे दिं युक्रेन व रुस दथुइ कैदी आदानप्रदान नं जूगु खः। व ज्या न्हापाया खँल्हाबल्हाया निरन्तरता खः।

अफगानिस्तानय् तालिवान शासनयात औपचारिक कथं मान्यता ब्यूगु न्हापांगु देय् रुस जूगु दु। बीबीसीया कथं अफगान विदेशमन्त्री अमीर खान मुत्ताकीं थुकियात ‘साहसिक निर्णय’ धाःगु दु।

आइतवाः काबुलय् अफगानिस्तानया निंतिं रुसी राजदूत दिमित्री झिर्नोभलिसे जूगु नापलायेगु झ्वलय् मुत्ताकीयात रुसी सरकारं इस्लामया कानूनया शासनय् आधारित राज्य इस्लामिक अमीरात अफगानिस्तानयात मान्यता बीगु निर्णय याःगु औपचारिक जानकारी ब्यूगु खः।

मुत्तकीं थ्व पलाःयात “सकारात्मक सम्बन्ध, आपसी सम्मान व रचनात्मक साझेदारीया न्हूगु अध्याय” धकाः वर्णन यानादीगु दु। लिसें वय्कलं थ्व हिउपाःया कारणं मेमेगु देय्या निंतिं नं “उदाहरण” जुइगु दाबी यानादीगु दु।

सन् २०२१ अगस्टय् सत्ताय् लिहां वयेधुंकाः तालिबानं मानव अधिकार उल्लंघनया द्वपं अप्वया वनाच्वंगु जूसां नं अन्तर्राष्ट्रिय मान्यता व लगानीया निंतिं माग यानाच्वंगु खः।

अमेरिकाया राष्ट्रपति डोनाल्ड ट्रम्पं कर व खर्च सम्बन्धी ‘वन बिग ब्यूटिफुल विधेयक’ अमेरिकाया संसदं पारित याःगु दु। थुकियात अमेरिकाया राष्ट्रिय राजनीतिइ ट्रम्पया तःधंगु विजय कथं काःगु दु।

प्रतिनिधिसभा (निम्न सदन)या बैठकं आइतवाः न्हिनय् २१८ विरुद्ध २१४ मतं पारित याःगु खः। मंगलवाः हे सिनेट (उच्च सदन)य् स्वीकृत जुइ धुंकूगु खः।राष्ट्रपति ट्रम्पं थःगु रिपब्लिकन नियन्त्रित कांग्रेसयात विधेयकय् हस्ताक्षर व लागू यायेत जुलाई ४ तकया म्याद ब्यूगु खः। थ्व विधेयकं वइगु १० दँया दुने संघीय घाटा ३.३ ट्रिलियन डलर अप्वयेके फइगु अनुमान कांग्रेसया बजेट ज्याकुथिं याःगु दु।

अथे हे लखौं मनूत स्वास्थ्य बीमापाखें बञ्चित जुइफुगु अनुमान याःगु दु। तर, ह्वाइट हाउसं थ्व दाबीयात अस्वीकार याःगु दु। विधेयक पारित जुइ धुंकाः आइतवाः बहनी पत्रकारतलिसे खँ ल्हासें राष्ट्रपति ट्रम्पं धयादी, “थ्व विधेयकं देय्यात तीव्र गतिं न्ह्यःने यंकी।”

वय्कलं थप धयादी, “थ्व देय्या निंतिं तःधंगु विधेयक जुइ।” थ्व विधेयकय् राष्ट्रपति ट्रम्पं जुलाई ४ (अमेरिकाया स्वतन्त्रता दिवस) औपचारिक कथं हस्ताक्षर यानाः कानून दयेकेगु अनुमान याःगु दु।

इरानया न्हूम्ह राष्ट्रपति मसूद पेश्मर्गां अन्तर्राष्ट्रिय परमाणु ऊर्जा एजेन्सी (आईएईए)लिसेया सहकार्य निलम्बन याइगु कानूनयात स्वीकृति ब्यूगु दु।

इरानया सरकारी प्रेस टिभी व मेमेगु इरानी समाचार संस्थां थ्व समाचारया पुष्टि याःगु दु।वंगु वा य् इरानया संसदं थ्व विधेयक पारित याःगु खः। विधेयकं सरकारयात आइएईएलिसेया सहकार्य दिकेत कानूनी आधार ब्यूगु दु।

इजरायल व अमेरिकालिसे लिपांगु इलय् सैन्य तनाव व तेहरान व संयुक्त राष्ट्र संघया आणविक निगरानी संस्था दथुइ निरीक्षणया पहुँच व पारदर्शितायात कयाः विवाद अप्वया वनाच्वंगु इलय् थ्व निर्णय याःगु खः।

इरानं थःगु आणविक कार्यक्रमया बारे पारदर्शिता कायम यायेत लिपांगु दँय् आइएईएलिसे सीमित आधारय् सहकार्य यानाच्वंगु दु। तर थ्व निर्णयं निगू पक्षया स्वापूयात अझ जटिल याइगु जूगु दु।