संयुक्त राष्ट्र संघया मानव अधिकार परिषदया विशेष प्रतिनिधि फ्रान्सेस्का अल्बानेसयात ट्रम्प प्रशासनं प्रतिबन्ध तःगु दु।

वय्कः गाजाय् इजरायलया सैन्य आक्रमणया आलोचक खः।विदेशमन्त्री मार्को रुबियों अल्बानिजं अन्तर्राष्ट्रिय फौजदारी अदालत (आईसीसी)यात समर्थन याःगुलिं थुज्वःगु पलाः न्ह्याकूगु धाःगु दु। अमेरिकां अदालतय् प्यम्ह न्यायाधीशतय्त प्रतिबन्ध तयेधुंकूगु दु।

रुबियों अल्बानिजयात अमेरिकी वा इजरायली नागरिकतय्त मुद्दा चले यायेगु आईसीसीया कुतःया प्रत्यक्ष संलग्नता दुगुलिं संयुक्त राष्ट्र संघया विशेष प्रतिनिधिया रुपय् ज्या यायेत अयोग्य जूगु द्वपं ब्यूगु दु।थ्व प्रतिबन्धं अल्बानिजयात अमेरिका वनेगुलि पनेगु सम्भावना दु।

अमेरिकाय् च्वंगु वयागु सम्पत्ति फ्रिज जुइगु जूगु दु।वंगु दँय् इजरायलया प्रधानमन्त्री बेन्जामिन नेतान्याहु व तत्कालीन रक्षामन्त्री योआभ ग्यालान्टयात गाजाय् युद्ध अपराध याःगु द्वपनय् अदालतं गिरफ्तारी वारेन्ट जारी यायेधुंकाः अदालतय् प्यम्ह न्यायाधीशविरुद्ध अमेरिकां कारवाही याःगु खः।

भारतया राजस्थानय् वायुसेनाया लडाकु विमान दुर्घटनाय् लानाः निम्ह सीगु दु।राजस्थानया रतनगढय् भारतीय सेनाया लडाकु विमान दुर्घटनाय् लानाः पाइलटलिसें निम्ह सीगु भारतीय सञ्चारमाध्यमं जानकारी ब्यूगु दु।

दुर्घटनाया खबर वयेवं हे प्रहरी व प्रशासनया पुचः घटनास्थलय् थ्यंकूगु खः।स्थानीय मनूतय् कथं लडाकु विमान आकाशय् तसकं सः पिकयाः विस्फोट जुयाः कुतुं वनाः बुँइ मिं व धुँया प्लम छ्वयाहःगु खः।

एनटीभीं दुर्घटनाय् लाःगु विमान एयरफोर्सया जग आरया जूगु जानकारी ब्यूगु दु।

अमेरिकाया राष्ट्रपति डोनाल्ड ट्रम्पं युक्रेनय् जुयाच्वंगु युद्धयात कयाः मस्कोयात थप प्रतिबन्ध तयेगु बारे बिचाः यानाच्वनागु खँ धाःगु दु।

ह्वाइट हाउसय् च्वंगु मन्त्रिपरिषदया बैठकय् न्ववासें ट्रम्पं द्वन्द्वया लिसलय्  रुसयात थप प्रतिबन्ध तयेगु सिनेट विधेयकयात समर्थन यायेगु वा मयायेगु बारे बिचाः यानाच्वनागु धाःगु दु।

विधेयकय् रुसपाखें ऊर्जा आयात याइगु देसय् तच्वःगु शुल्क लगे यायेगु नापं रुसी ऊर्जा उत्पादनयात ग्वाहालि याइगु विदेशी कम्पनीयात प्रतिबन्ध तयेगु व्यवस्था नं दुथ्याकातःगु दु। ट्रम्पं मंगलवाः अमेरिकाया रक्षा विभागं ल्वाभःया तयारीया समीक्षा लिपा अस्थायी रुपं निलम्बित रक्षात्मक ल्वाभः युक्रेन ढुवानी हाकनं न्ह्याकेगु स्वीकृति ब्यूगु नं घोषणा याःगु दु।

इजरायलया प्रधानमन्त्री बेन्जामिन नेतान्याहुं अमेरिकाया राष्ट्रपति डोनाल्ड ट्रम्पयात नोबेल शान्ति पुरस्कारया नितिं औपचारिक रुपं सिफारिस याःगु दु।

वासिङ्टन डिसीइ राष्ट्रपति ट्रम्पलिसे जूगु नापलायेगु झ्वलय् नेतान्याहुं नोबेल समितिं छ्वयाहःगु पौ लःल्हानाः थीथी देसय् शान्ति स्थापित यायेत ट्रम्पया भूमिका महत्वपूर्ण जूगु खँ बिबिसीं जानकारी ब्यूगु दु। नेतान्याहुं आः ट्रम्पं छगू लिपा मेगु देशय् शान्ति पलिस्था यानाच्वंगु खँ धाःगु दु।

थ्वसिबें न्ह्यः पाकिस्तानं नं ट्रम्पयात नोबेल शान्ति पुरस्कारया नितिं सिफारिस याःगु खः। मेखे राष्ट्रपति ट्रम्पं गाजाय् जुया च्वंगु युद्ध अन्त्य यायेत सकारात्मक प्रगति जुयाच्वंगु संकेत बियादीगु दु।

ह्वाइट हाउसय् ग्वसाः ग्वःगु पत्रकार सम्मेलनय् ट्रम्पं हमासं युद्धविराम चाहे जूगु धाःगु दु। इजरायलया प्रधानमन्त्री नेतान्याहुं अमेरिकालिसे जानाः इजरायलं प्यालेस्टाइनी जनताया उज्ज्वल भविष्यया इच्छा दुगु प्रतिवेदनय् न्ह्यथनातःगु दु।

अमेरिकाया टेक्सास राज्यय् खुसिबाः वयाः सीपिनिगु ल्याः १०४ म्ह थ्यंगु दुसा अन्तर्राष्ट्रिय सञ्चारमाध्यमया कथं आः नं आपालं मनूत बेपत्ता जुयाच्वंगु दु।

सीपिंमध्ये क्याम्प मिस्टिक नांया क्रिश्चियन मिसामस्तय्गु समर क्याम्पया २७ म्ह मिसामस्त व कर्मचारी नं दु। मेपिं १० म्ह मिसामस्त व छम्ह क्याम्प काउन्सिलर तनाच्वंगु समाचार वःगु दु। उद्धारकर्मीतय्सं इमित मालाच्वंगु दु।

अमेरिकाय मौसम सेवायात याःगु बजेट कटौतीयात थुगु घटनालिसे स्वानाः अमेरिकाया सरकारया आलोचना जुयाच्वंगु दु। तर ह्वाइट हाउसं थ्व आलोचनायात अस्वीकार यासें घटनायात प्राकृतिक प्रकोप धाःगु दु।