इजरायलया प्रधानमन्त्री बेन्जामिन नेतान्याहुं अमेरिकाया राष्ट्रपति डोनाल्ड ट्रम्पया युद्धविराम प्रस्ताव स्वीकार यासें इजरायलं चाहे जूगु स्वयां अप्वः उपलब्धि हासिल याःगु प्रतिक्रिया बियादीगु दु।

नेतान्याहुं ‘अपरेशन राइजिङ लायन’या फुक्क लक्ष्य पूवंगु जक मखु, इजरायली मन्त्रिपरिषदया बैठक लिपा उलि स्वयां अप्वः नं पूवंगु धाःगु दु । नेतान्याहुं जारी याःगु विज्ञप्तिइ धयातःगु दु, ‘इजरायलं आणविक व ब्यालिस्टिक मिसाइल क्षेत्रं ब्वलंकूगु निगू तत्काल अस्तित्वया खतरायात मदयेकूगु दु ।’

इजरायली सेनां ‘तेहरानया आकाशय् पूर्ण हवाई नियन्त्रण स्थापित याःगु, इरानया सैनिक नेतृत्वयात गम्भीर क्षति याःगु व दर्जनौं मू केन्द्र सरकारया संरचना स्यंकूगु’ दाबी याःगु दु।

विज्ञप्तिइ धयातःगु दु, ‘अपरेशनया लक्ष्य प्राप्त जूगुया प्रकाशय् इजरायलं राष्ट्रपति ट्रम्पलिसे पूर्ण समन्वयय् निगू पक्षीय युद्धविरामया प्रस्तावयात स्वीकार याःगु दु। इजरायल सरकारं चेतावनी बिउगु दु, ‘यदि युद्धविराम उल्लंघन जुल धाःसा इजरायलं कठोर प्रतिक्रिया बी ।’

अमेरिकाया राष्ट्रपति डोनाल्ड ट्रम्पं अमेरिकां इरानया स्वंगू मू आणविक केन्द्र फोर्डाे, नातान्ज व इस्फहानय् हवाई आक्रमण याःगु धका धाःगु दु।

थुगु आक्रमणं क्षेत्रीय तनाव व युद्धया ह्वःताः अप्वयेकुगु दु। थ्व घटनां विश्व अर्थतन्त्र व चिकंया कारोबारय् नं लिच्वः लाकीगु ह्वःताः दुगु विश्लेषकतय्सं धाःगु दु। राष्ट्रपतिं थःगु सामाजिक सञ्जाल पाखें धयादिल, “फुक्कं विमानत आः इरानया सर्गपाखें पिने दु। फोर्डाेय् मू थासय् पूवंकं बमबारी यानागु जुल।

वय्कलं न्ह्यने धाःगु दु, “सामान्य कथं बमबारी यानागु दु व मू यानाः फोर्डाेयात तातुनाः यानागु दु।” थ्व घटनां हलिंन्यंकं न्हू तनाव सिर्जना जूगु दु। अमेरिकी अधिकारीतय् कथं, थुकिं इरानया आणविक ज्याझ्वःयात कडा धक्का लावंगु खः। राष्ट्रपति ट्रम्पया थ्व धापू लिपा इरानं लिसः बिइगु तयारी यानाच्वंगु खनेदु।

भारतं ‘अपरेशन सिन्दूर’ नां छुनाः तःगु छगू सैन्य कारबाही कथं पाकिस्तानया गुंगू थासय् हवाई आक्रमण याःगु दु। भारतीय रक्षा मन्त्रालयया कथं, थ्व फुक्कं थासय् भारतय् जुइगु आतंकी आक्रमण तयेगु योजना व निर्देशन जुयाच्वंगु खः।

थ्व कारबाही अप्रिल २२ य् भारत–नियन्त्रित कश्मीरय् जूगु आक्रमणलिपा याःगु खः, थुकी लानाः छम्ह नेपाःमि लिसें २६ म्ह पर्यटकत सीगु खः। भारतं उगु आक्रमणया द्वपं पाकिस्तानयात ब्यूगु खः। भारतया वाशिङ्टनय् च्वंगु दूतावासं पितब्यूगु विज्ञप्तिइ धयातःगु दु, “आक्रमण पूवंकं लक्षित व सटीक जूगु खः।

म्हसिकातःगु आतंकी शिविर तय्त जक निसाना दयेकूगु खः।”पाकिस्तानी प्रधानमन्त्री शहबाज शरिफं भारतया कारबाहीयात युद्धया निंतिं घ्वायेत स्वःगु धासें कडा निन्दा यानादिल व स्याचूगु लिसः बिइगु चेतावनी बियादीगु दु। संयुक्त राष्ट्रसंघं निगूलिं पक्षयात संयम जुइत इनाप याःगु दु।

संघं धाःगु दु, “निगू आणविक शक्तित दथुइया युद्ध हलिंया निंतिं तसकं ग्यानापूगु अवस्था जुइफु।”

भारत व पाकिस्तान दथुइ याःगु स्थितिबारे अमेरिकाया विदेशमन्त्री मार्को रुबियो न प्रतिक्रिया ब्यूगु दु।

भारतं याःगु आक्रमणयात कया प्रतिक्रिया ब्यूसे धाःगु दु, ‘जिमिसं थुगु स्थितियात कया स्वया च्वनागु दु।’ रुबियो न सामाजिक सञ्जाल प्लेटफर्म एक्सय् च्वंगु दु, ‘जिं भारत व पाकिस्तान दथुइ याःगु अवस्थायात गम्भीरतापूर्वक स्वया च्वनागु  दु।’  रुबियो न धाःगु दु निगु हे देय्या नेतृत्व तय्स वार्तापाखे शान्तिपूर्ण समाधान मालेगु निति कुतः जुयाच्वनिइलि सहमत दु।’

प्रधानमन्त्री केपी शर्मा ओलीं भारतया प्रधानमन्त्री नरेन्द्र मोदीलिसे नापलायेगु झ्वलय् सकारात्मक व बांलाःगु खँल्हाबल्हा जूगु धका धयादीगु दु।

नाप लानाः पिहाँवयेगु झ्वलय् राससया विशेष प्रतिनिधियात चीहाकलं लिसः बियादिसें प्रधानमन्त्री ओलीं धयादिल, “जि व भारतीय प्रधानमन्त्री मोदीनाप बांलाःगु व सकारात्मक खँल्हाबल्हा जूगु दु।

आःयात उलि हे।” थाइल्याण्डया बैङ्ककय् च्वंगु होटल माडारिन ओरियन्टलय् प्रधानमन्त्री ओली व भारतीय प्रधानमन्त्री मोदी निम्हेसिया जक थ्यं मथ्यं ४५ मिनेट खँल्हाबल्हा जूगु खः। बहुक्षेत्रीय प्राविधिक नापं आर्थिक ग्वाहालिया निंतिं बङ्गालया खाडीया कुतः (बिम्स्टेक)या खुक्वःगु शिखर सम्मेलन क्वचाये धुंकाः वय्कःपिं दथुइ क्वःछिनातःगु धलः कथं नाप लायेगु ज्या जूगु खः।

थ्व स्वयां न्ह्यः वय्कःपिं दथुइ संयुक्त राष्ट्रसङ्घया ७९ क्वःगु महासभाय् ब्वति कायेगु झ्वलय् संयुक्त राज्य अमेरिकाया न्युयोर्कय् वंगु असोज ७ गते खँल्हाबल्हा जूगु खः।