रुसया हवाई आक्रमण अप्वया वनाच्वंगु इलय् युक्रेनयात सैन्य ग्वाहालि हाकनं न्ह्याकेत अमेरिका तयार जूगु युक्रेनया राष्ट्रपति भोलोदिमिर जेलेन्स्कीं धयादीगु दु।वंगु वालय् दिनाच्वंगु उगु ग्वाहालि हाकनं न्ह्याःगु बीबीसीं जानकारी ब्यूगु दु।

अमेरिकाया राष्ट्रपति डोनाल्ड ट्रम्पं नेटो मार्फत युक्रेनय् पेट्रियट एयर डिफेन्स सिस्टम छ्वयेगु सम्झौता जूगु धाःगु दु। युक्रेनं थ्व स्वयां न्ह्यः १० गू प्याट्रियट सिस्टमया निंतिं इनाप याःगु खः। जर्मनी व नर्वें युक्रेनया निंतिं छुं प्रणालीया निंतिं ध्यबा पुलेगु प्रतिबद्धता प्वंकूगु जेलेन्स्कीया धापू दु।

मेमेगु युरोपेली देसं नं ग्वाहालि यायेत इच्छुक जूगु दु।अमेरिकाया विदेशमन्त्री मार्को रुबियों युरोपेली देय् तय्त थःगु प्रणाली तत्काल युक्रेनय् हस्तान्तरण यायेत इनाप याःगु दु। युक्रेनय् रकेट, ड्रोन व क्षेप्यास्त्र आक्रमणया हुनिं जुनय् जक २३२ म्ह सर्वसाधारण सीगु संयुक्त राष्ट्र संघं जानकारी ब्यूगु दु।प्याट्रियट प्रणाली छगू परिष्कृत तर थिकेगु सुरक्षा प्रणाली खः, गुकिया मू थ्यंमथ्यं छगू अर्ब डलर खः।

आः युक्रेनय् गुलि प्रणाली दु धइगु ल्याः गोप्य तयातःगु दु, तर थप प्रणालीं अप्वः शहरयात सुरक्षा बीगु विश्वास याःगु दु। युक्रेन तःधंगु देय् खःसां फुक्क क्षेत्रया संरक्षण यायेगु सम्भव मजूसां पश्चिमी देसं धाःसा अप्वया च्वंगु खतराया लिसलय् आपूर्ति अप्वयेकेगु कुतः यानाच्वंगु दु।

प्यालेस्टाइनी उग्रवादी पुचः हमासं गाजाय् इजरायलया सैनिक उपस्थितिइ दतलय् युद्धविराम असम्भव जुइ धका जूगु धाःगु दु।हमासं २०२३ अक्टोबर ७ तारिखय् इजरायलय् जूगु आक्रमणय् सीपिं १० म्ह मनूतय्त त्वःतेगु सहमति जूगु धाःगु दु।

निगू पक्ष दथुइ अस्थायी युद्धविरामया सहमतिया नितिं आइतबाःनिसें कतारय् अप्रत्यक्ष वार्ता जुयाच्वंगु खःसा अमेरिकां वइगु दिनय् ६० न्हुया युद्धविराम जुइगु आशा दुगु खँ धाःगु दु। हमासं स्थायी शान्तिया निंतिं ‘वास्तविक ग्यारेन्टी’ कथं ग्वाहालि स्वतन्त्र प्रवाह व गाजाय् इजरायली सैन्य गतिविधि अन्त्य यायेमाःगु धाःगु दु।

हमासया उच्च अधिकारी बासेम नैमं आइतवाः एएफपीयात धाःगु दु, “जिमिगु भूमि कब्जाया निरन्तरता व इजरायलया नियन्त्रणय् दुगु अलग्ग क्षेत्रय् जिमि जनतां आत्मसमर्पण याःगु जिमिसं स्वीकार यायेमफु।”वय्कलं धयादी, “दोहाय् जुयाच्वंगु वार्ताया आःया चरणय् वार्ता पुचलं आःतक न्ह्यब्वयाच्वंगु थ्व हे खः।”

मध्य गाजाया देर अल बलाहय् च्वंगु छगू चिकित्सा विन्दुइ बिहीवाः इजरायली आक्रमणय् च्यााम्ह मस्तलिसें १७ म्ह सीगु नागरिक रक्षां जानकारी ब्यूगु दु।

दक्षिण कोरियाया अदालतं बिहीवाः सुथय् पूर्वराष्ट्रपति युन सुक योलयात हाकनं गिरफ्तार यायेत अधिकृत यासें डिसेम्बरय् मार्शल ला लागू याःगु द्वपनय् वयात न्हूगु गिरफ्तारी वारेन्ट स्वीकृति ब्यूगु खः।

अदालतं विशेष अभियोजकया दाबीयात स्वीकार यासें न्हूगु गिरफ्तारीयात स्वीकृति ब्यूगु खः कि वं प्रमाण स्यंकेगु जोखिम दु।सोल केन्द्रीय जिल्ला अदालतं जारी याःगु गिरफ्तारी वारेन्टं मार्चय् पिहां वःगु च्याला लिपा युनयात राजधानी लिक्क च्वंगु हिरासत केन्द्रय् लित छ्वयाहःगु दु।व हे अदालतं वयात जनवरीइ याःगु गिरफ्तारी खारेज यानाः हिरासतय् मतसे देशद्रोहया द्वपनय् मुद्दा चले यायेत अनुमति ब्यूगु खः।

वयागु फौजदारी मुद्दा विशेष अभियोजक चो युख सुक नेतृत्वय् अनुसन्धानकर्ता पुचलं न्ह्याकाच्वंगु दु। पुचलं युनया निरंकुश कुतःया निंतिं सरकारी कर्तव्यय् अवरोध, शक्तिया दुरुपयोग व सरकारी दस्तावेज जालसाजी लिसेंया थप द्वपं बिइगु माग यानाच्वंगु दु।चोया पुचलं बिहीवाः अदालतय् गिरफ्तारी वारेन्टया निंतिं इनाप याये न्ह्यः निक्वःतक न्यनेकने याःगु खः । युनया वकिलतय्सं गिरफ्तारीया इनापयात अत्यधिक व आधारहीन धकाः धाःगु खः ।

संवैधानिक अदालतं महाभियोग कायम यायेधुंकाः अप्रिल महिनाय् औपचारिक रुपं पदं चीकूम्ह युनयात गिरफ्तार यायेत अदालतं स्वीकृति बिउगु निर्णययात कयाः इमिसं तत्काल प्रतिक्रिया मब्यूगु खः।विशेष सरकारी वकिलया इनापया पुनरावलोकनया नितिं बुधवाः न्हिनय् अदालत थ्यंके धुंकाः युनं संचारकःमिपिनिगु न्ह्यसःया लिसः मब्यूगु खः।

थ्यंमथ्यं ७ घण्टाया सुनुवाई लिपा युनयात अदालतया निर्णयया प्रतीक्षा यायेत हिरासत केन्द्रय् यंकूगु खः।युनयात न्हूगु गिरफ्तारीं महिनौं वा व स्वयां अप्वः ई तक हिरासतय् तयेमालीगु सम्भावना दु। युनयात न्हापां २० न्हु तक केन्द्रय् तयेफइगु खः। विशेष अभियोजकं वयात थप अभियोग तयेगु आज्जु तइ।

गुजरातया वडोदरा व आनन्द स्वाइगु माही खुसिइ ४५ दँ पुलांगु गांम्भीरा ताँ बुधवाः सुथय् आकाझाकां त्वधुगु दु।

बीबीसी हिन्दीया कथं दुर्घटना जुया आःतक १५ म्ह मनू सी धुंकूगु दु।वडोदरा जिल्लाया प्रमुख जिल्ला अधिकारी (कलेक्टर) अनिल धमेलियाया कथं दुर्घटनाय् लानाः १५ म्ह मनूत सीगु दु। आः नं प्यम्ह बेपत्ता जुयाच्वंगु दुसा प्यम्ह घाःपाः जूगु दु।

धमेलियां धाःगु दु, “थौं सुथय् माही खुसिया दुर्घटनाय् लानाः स्वम्ह सीम्ह बरामद जूगु दुसा सीपिनिगु ल्याः १५ म्ह थ्यंगु दु।” वय्कलं थप धयादी, “सुथय् ७ बजेनिसें उद्धार ज्या न्ह्याकूगु दु, घटनास्थलय् एनडीआरएफलिसेंया मेमेगु पुचः परिचालन जूगु दुसा उद्धार व राहतया ज्या जुयाच्वंगु दु।”

वय्कःया कथं अप्वः धइथें सीम्ह लिकाये धुंकूगु दुसा आःतक १५ म्हेसिया सीम्ह लिकाःगु दु।उगु उद्धारय् १० गू स्वयां अप्वः सरकारी निकाय व संघसंस्थाया संलग्नता दु।

एलोन मस्कया स्वामित्वय् दूगु सोसियल मिडिया कम्पनी एक्सया प्रमुख कार्यकारी अधिकृत (सीईओ) लिण्डा याकारिनों थःगु पदं राजीनामा बियादीगु दु।

वय्कलं जुन २०२३ निसें थ्व पदय् च्वनादीगु खः। याकारिनों एक्सया बारे छगू पोस्टय् मस्कयात सुभाय् बियादिसें धयादी, “अभिव्यक्ति स्वतन्त्रताया संरक्षण, कम्पनीयात रुपान्तरण याःगु व एक्सयात एभरीथिङ एप दयेकेगु जिम्मेवारी बियादीगुलिं जि एलोनप्रति आभारी जुयाच्वना।”

राजीनामाया घोषणा यासें वय्कलं च्वयादीगु दु, “निदँ असाधारण लिपा जि थ्व भूमिकापाखें राजीनामा बीगु निर्णयय् थ्यनागु दु।” लिसें वं एलोन मस्कलिसे न्हापांगु नापलायेगु झ्वलय् एक्सया भविष्य व सम्भावना थुइकेत थः उत्साहित जूगु नं धाःगु दु। याकारिनोया राजीनामायात कयाः एलोन मस्कं आःतक छुं टिप्पणी याःगु मदुनि।

याकारिनों थ्व स्वयां न्ह्यः अमेरिकी मिडिया कम्पनी एनबीसी युनिभर्सलया विज्ञापन विभागया प्रमुख जुयाः ज्या यानादीगु खः।याकारिनोया कार्यकालय् एलोन मस्क नं थीथी विवाद जूगु खः। हिटलरयात समर्थन याःगु धाःगु सामग्री सार्वजनिक जुइधुंकाः नकतिनि हे जक मस्कया एआई च्याटबोट ‘ग्रोक’या आलोचना जूगु खः।