अमेरिकाया राष्ट्रपति डोनाल्ड ट्रम्पं कर व खर्च सम्बन्धी ‘वन बिग ब्यूटिफुल विधेयक’ अमेरिकाया संसदं पारित याःगु दु। थुकियात अमेरिकाया राष्ट्रिय राजनीतिइ ट्रम्पया तःधंगु विजय कथं काःगु दु।

प्रतिनिधिसभा (निम्न सदन)या बैठकं आइतवाः न्हिनय् २१८ विरुद्ध २१४ मतं पारित याःगु खः। मंगलवाः हे सिनेट (उच्च सदन)य् स्वीकृत जुइ धुंकूगु खः।राष्ट्रपति ट्रम्पं थःगु रिपब्लिकन नियन्त्रित कांग्रेसयात विधेयकय् हस्ताक्षर व लागू यायेत जुलाई ४ तकया म्याद ब्यूगु खः। थ्व विधेयकं वइगु १० दँया दुने संघीय घाटा ३.३ ट्रिलियन डलर अप्वयेके फइगु अनुमान कांग्रेसया बजेट ज्याकुथिं याःगु दु।

अथे हे लखौं मनूत स्वास्थ्य बीमापाखें बञ्चित जुइफुगु अनुमान याःगु दु। तर, ह्वाइट हाउसं थ्व दाबीयात अस्वीकार याःगु दु। विधेयक पारित जुइ धुंकाः आइतवाः बहनी पत्रकारतलिसे खँ ल्हासें राष्ट्रपति ट्रम्पं धयादी, “थ्व विधेयकं देय्यात तीव्र गतिं न्ह्यःने यंकी।”

वय्कलं थप धयादी, “थ्व देय्या निंतिं तःधंगु विधेयक जुइ।” थ्व विधेयकय् राष्ट्रपति ट्रम्पं जुलाई ४ (अमेरिकाया स्वतन्त्रता दिवस) औपचारिक कथं हस्ताक्षर यानाः कानून दयेकेगु अनुमान याःगु दु।

इरानया न्हूम्ह राष्ट्रपति मसूद पेश्मर्गां अन्तर्राष्ट्रिय परमाणु ऊर्जा एजेन्सी (आईएईए)लिसेया सहकार्य निलम्बन याइगु कानूनयात स्वीकृति ब्यूगु दु।

इरानया सरकारी प्रेस टिभी व मेमेगु इरानी समाचार संस्थां थ्व समाचारया पुष्टि याःगु दु।वंगु वा य् इरानया संसदं थ्व विधेयक पारित याःगु खः। विधेयकं सरकारयात आइएईएलिसेया सहकार्य दिकेत कानूनी आधार ब्यूगु दु।

इजरायल व अमेरिकालिसे लिपांगु इलय् सैन्य तनाव व तेहरान व संयुक्त राष्ट्र संघया आणविक निगरानी संस्था दथुइ निरीक्षणया पहुँच व पारदर्शितायात कयाः विवाद अप्वया वनाच्वंगु इलय् थ्व निर्णय याःगु खः।

इरानं थःगु आणविक कार्यक्रमया बारे पारदर्शिता कायम यायेत लिपांगु दँय् आइएईएलिसे सीमित आधारय् सहकार्य यानाच्वंगु दु। तर थ्व निर्णयं निगू पक्षया स्वापूयात अझ जटिल याइगु जूगु दु।

युक्रेनं मध्य रुसया इजेभस्क शहरय् च्वंगु छगू कारखानाय् ड्रोन आक्रमणय् स्वम्ह मनू सीगु दुसा ४५ म्ह घाःपाः जूगु दु।उद्मुर्टिया क्षेत्रया गभर्नर अलेक्जेन्डर ब्रेचलोभं घाःपाः जूपिंमध्ये खुम्हेसिगु अवस्था गम्भीर जूगु जानकारी ब्यूगु दु।

ब्रेचलोभं राष्ट्रपति भ्लादिमिर पुटिनयात आक्रमणया जानकारी ब्यूगु दु। उगु क्षेत्रय् संकटकाल घोषणा याःगु दु।ड्रोनं सतहं हवाइ क्षेप्यास्त्र व राडार स्टेशन उत्पादन याइगु सैन्य कारखाना कुपोल इलेक्ट्रोमेकानिकल प्लान्टयात लक्षित याःगु धाःगु दु।

युक्रेनया संचार माध्यमया कथं थ्व प्लान्ट ओसा वायु प्रतिरक्षा प्रणाली उत्पादनय् नं विशेषज्ञता कयाच्वंगु दु। थुकिं थी थी कथंया ड्रोन नं विकास याःगु दु।बीबीसीं युक्रेनया छम्ह अधिकारीयात उद्धृत यासें युक्रेनया सुरक्षा सेवाया निगः ड्रोनं थ्यंमथ्यं १३०० किलोमिटर तापाःगु कुपोल कारखानाय् आक्रमण याःगु धाःगु दु।नोभेम्बर २०२४ लिपा कुपोल कारखानाय् युक्रेनया ड्रोन आक्रमण थ्व निक्वःगु खः।

अमेरिकां युक्रेनयात बीगु सैन्य ग्वाहालि कटौती यानाच्वंगु इलय् हे युक्रेनं रुसयात आक्रमण याःगु समाचार वःगु दु।

इजिप्तया राजधानी कायरोय् च्वंगु नेपाली राजदूतावासया समन्वयय् अनया ओपेरा हाउसय् ‘फेसेस फ्रम नेपाल’ नामं स्वन्हूयंकं किपा ब्वज्या ग्वसाः ग्वःगु दु। इजिप्टया निंतिं नेपाली राजदूत सुशीलकुमार लम्सालं म्हिगः उलेज्या यानादीगु ब्वज्याय् इजिप्टया फोटो पत्रकार यासेर आला मुबारकं सन् २०२४ या शिलाच¥हे येँया पशुपति लागाय् कयातःगु ३० गु किपा दुथ्याकातःगु दु।

कायरोय् च्वंगु नेपाली दूतावासया कथं उगु इलय् राजदूत लम्सालं नेपाः व इजिप्ट दथुया निगू पक्षीय स्वापू क्वातुकेत जनस्तरया स्वापू महत्वपूर्ण जूगु धयादिल। वय्कलं विश्व सम्पदा धलखय् लाःगु पशुपतिइ देगः लागाया महत्वबारे धयादिसें किपा ब्वज्यां स्वकुमितय्त नेपाःया मौलिक नापं प्राचीन सांस्कृतिक सम्पदाया लू न्ह्यब्वःगु विचाः प्वंका दिल।

फोटो पत्रकार मुबारकं नेपालय् किपा कयागु इलया थःगु अनुभव न्यंकादिसें तःमिगु व विविधतां जाःगु सांस्कृतिक सम्पदां तःमि जूगु हुनिं नेपाः फोटोग्राफरतय् निंतिं तःधंगु आकर्षणया केन्द्र कथं जुयाच्वंगु धयादिल।

वय्कलं किपा ब्वज्या थेँ जाःगु गतिविधिं नेपाः इजिप्ट सांस्कृतिक कालबिल पाखें निगू देय् दथुया स्वापू अझं क्वातुनाः वनीगु भलसा प्वंकादिल।उलेज्या ज्याझ्वलय् फोटोग्राफरलिसें पत्रकार, कलाकार, कूटनीतिक नियोगया प्रतिनिधि, विद्यार्थीनापं थ्यंमथ्यं सच्छिम्हेस्यां ब्वति काःगु दूतावासं धाःगु दु। किपा ब्वज्या थ्व हे असार १९ गते तक सञ्चालन जुइ।

फ्रान्सया राजधानी पेरिसय् तापक्रम अप्वोया वनाच्वंगुलिं मंगलवाः रेड अलर्ट जारी याःगु खः, गुकिया हुनिं आइफेल टावर बन्द जूगु खः।

युरोपया आपालं थासय् तांन्वःगु वना च्वंगु दु। फ्रान्सया मौसम एजेन्सी मेटेओ फ्रान्सं सोमवाः १६ गू क्षेत्रय् तापक्रमया चेतावनी जारी याःगु खः।

फ्रान्सया शिक्षा मन्त्रालयं तसकं तां न्वया थ्यंमथ्यं १३५० गू पब्लिक स्कूल पूर्ण वा आंशिक रुपं बन्द जुइगु घोषणा याःगु दु।