ब्राजिलया न्यायाधीशं पूर्वराष्ट्रपति जैर बोल्सनारोयात सामाजिक संजाल प्रतिबन्ध उल्लंघन याःगु द्वपनय् छेँय् हे नजरबन्द तयेत आदेश ब्यूगु दु।

सोमवाः वःगु थ्व फैसलां अदालत व दक्षिणपन्थी राजनीतिज्ञ दथुइ तनाव अझ अप्वःगु एएफपीं जानकारी ब्यूगु दु। बोल्सनारोयात वामपन्थी उम्मेदवार लुइज इनासिओ लुला दा सिल्भालिसेया चुनावय् बुइ धुंकाः सन् २०२२ य् सत्ता कब्जा यायेगु षडयन्त्र याःगु द्वपं बियातःगु दु।

अमेरिकाया पुलांम्ह राष्ट्रपति डोनाल्ड ट्रम्पया सहयोगी नं जुयाच्वंम्ह बोल्सनारोयात सर्वोच्च अदालतय् मुद्दा न्ह्याकेत्यंगु दु। वंगु महिनाय् वय्कःया तुतिइ इलेक्ट्रोनिक अनुगमन उपकरण (ब्रेसलेट) तयेत आदेश बिउगु खःसा सामाजिक संजाल छ्यलेगुलिइ प्रतिबन्ध तःगु खः। काय्पि व सहायकतय्सं सामाजिक संजालय भडके याःगु भाषणपाखें मुद्दायात प्रभावित यायेत स्वःगु द्वपं ब्यूगु खः।

एएफपीं सोमवाः वःगु छगू फैसला पौ न्यायाधीश अलेक्जेन्डर डी मोरेसं सुं नं प्रतिवादीं थःगु राजनीतिक व आर्थिक शक्ति छ्यला न्यायपालिकायात धोखा बीमज्यूगु धाःगु दु।अदालतया आदेश बारम्बार पालना मयाःगुलिं वयात राजधानी ब्राजिलय् च्वंगु थःगु हे छेँय् नजरबन्द तयेगु आदेश ब्यूगु खः।

बंगलादेशया अन्तरिम सरकारं न्हापाया सरकार सत्ताच्युत जूगु दच्छि पूवंगु व भदौ ५ गते लोकतान्त्रिक सुधारया धलः सार्वजनिक यायेगु धाःगु दु।

थ्यंमथ्यं १७ करोड जनसंख्या दुगु बंगलादेशय् विद्यार्थी नेतृत्वय् जूगु विद्रोहं राजनीतिक हिउपाः हःगु दु। तत्कालीन प्रधानमन्त्री शेख हसिनायात सत्तां लिकायेधुंकाः २०२४ अगष्ट ५ तारिखय् न्हूगु सरकार गठन जूगु खःसा थुकिं १५ दँया शासनया अन्त्य याःगु खः।चुनाव मजूतले नोबेल शान्ति पुरस्कार विजेता ८५ दँया मुहम्मद युनुसं केयरटेकर सरकारया प्रमुख सल्लाहकारया रुपय् नेतृत्व यानाच्वंगु दु।

युनुसं थ्व स्वयां न्ह्यः लोकतान्त्रिक संस्थाय् सुधारया निंतिं ‘भव्य प्याकेज’ सार्वजनिक यायेगु प्रतिबद्धता प्वंकूगु खः। सन् २०२६ या सुरुइ जुइत्यंगु चुनाव न्ह्यः राजनीतिक दलतय्सं सत्ताया निंतिं जकी यानाच्वंगुलिं सहमतिया कुतः सुस्त जूगु दुसा युनुसया सरकारं राजनीतिक सत्ताया संघर्षं प्राप्त जूगु लाभयात खतराय् लाकेफुगु चेतावनी बिउगु दु।

जुलाई २९ य् युनुसं समावेशी, सहभागितामूलक व विश्वसनीय निर्वाचनया व्यवस्था याइगु न्हूगु राजनीतिक व्यवस्थाया निंतिं व्यापक राष्ट्रिय सहमति निर्माण यायेत प्रतिबद्ध जूगु धयादीगु खः । युनुसया ज्याकुथिं म्हिगः जुलाईइ घोषणा याःगु कथं जनविद्रोहय् संलग्न फुक्क राजनीतिक दलया उपस्थितिइ राष्ट्रया न्ह्यःने न्ह्यब्वयेगु धाःगु अन्तर्राष्ट्रिय समाचार एजेन्सी एएफपीं जानकारी ब्यूगु दु।

अमेरिकां प्यालेस्टाइन प्राधिकरण (पीए) व प्यालेस्टाइन मुक्ति संगठन (पीएलओ)यात प्रतिबन्ध तयेगु घोषणा याःगु दु।

ओस्लो शान्ति सम्झौता अन्तर्गत पीए पलिस्था जूगु खः। पीएलओयात प्यालेस्टाइनी जनताया आधिकारिक प्रतिनिधिया रुपय् मान्यता ब्यूगु खः। पीएलओं हिंसा त्वःताः इजरायलयात मान्यता बीगु सहमति याःगु खः।अमेरिकाया विदेश मन्त्रालयं थ्व प्रतिबन्धं भिसा बीगु ज्या बन्द जुइगु व थुकिं यानाः प्यालेस्टाइनी अधिकारीतय्त अमेरिका वनेगु ज्या बन्द जुइगु खँ धाःगु दु।

थ्व पलाःयात ट्रम्प प्रशासनं उल्लेखनीय कूटनीतिक कडाईया रुपय् काःगु दु। फ्रान्स व साउदी अरबया नेतृत्वय् थुगु वालय् संयुक्त राष्ट्र संघय् जूगु सम्मेलनया प्रतिक्रिया कथं थ्व पलाःयात काःगु बीबीसीं जानकारी ब्यूगु दु। भविष्यया निगू राज्यया समाधानया निंतिं समर्थन दयेकेगु निंतिं थुगु ज्याझ्वः याःगु खः। इजरायलया विदेशमन्त्री गिडियन सारं अमेरिकी निर्णययात लसकुस याःगु दु।

वय्कलं सामाजिक संजालय् छगू पोष्ट यासें अमेरिकाया विदेशमन्त्री मार्को रुबियो व मुक्कं अमेरिकाया विदेश मन्त्रालययात सुभाय् बियादीगु दु। वय्कलं धयादी, “निगुलिं संगठनलिसे स्वापू दुपिं प्यालेस्टाइनी अधिकारीतय्त प्रतिबन्ध तयेगु पलाः प्रशंसनीय खः।”

अमेरिकाया राष्ट्रपति डोनाल्ड ट्रम्पं भारतपाखें आयात जुइगु सामानय् २५ प्रतिशत कर तयेगु घोषणा याःगु दु, गुगु थ्व हे वइगु भदौ १ गतेनिसें लागू जुइ।

राष्ट्रपति ट्रम्पं सामाजिक संजाल ट्रुथ सोसियलय् पोष्ट यासें भारतं रुसपाखें तःधंगु मात्राय् सैन्य उपकरण व उर्जा खरिद याःगु द्वपं बियाः थ्व स्वीकार्य मजूगु धाःगु दु। उकिया लिसलय् राष्ट्रपति ट्रम्पं भारतं २५ प्रतिशत शुल्क पुलेमाःगु धाःगु बीबीसी हिन्दीं जानकारी ब्यूगु दु।

वंगु छुं महिना न्ह्यःनिसें भारत व अमेरिका दथुइ निष्पक्ष व पारस्परिक लाभया व्यापार सम्झौताया निंतिं वार्ता जुयाच्वंगु खःसां औपचारिक सम्झौताया घोषणा धाःसा जूगु मदुनि। भारतया उद्योग वाणिज्य व वाणिज्य मन्त्रालयं थ्व घटनाया प्रतिक्रिया बिसें भारत सरकारं अमेरिकी राष्ट्रपति ट्रम्पया धापूया संज्ञान काःगु व थुकिया सम्भावित लिच्वःया अध्ययन यानाच्वंगु धाःगु दु।

मेखे भारतीय विपक्षी दल कांग्रेसं धाःसा सरकारं थःगु विदेश नीतिइ असफल जूगु द्वपं बियाः प्रधानमन्त्री मोदीया ट्रम्पलिसेया मित्रताया मू मुक्कं देसं हे पुलेमाःगु द्वपं बियाच्वंगु दु। सत्तारुढ भारतीय जनता पार्टीया सांसदतय्सं अमेरिकी पक्षलिसे संवाद हाकनं न्ह्याकेमाःगु खँ धाःगु दु।

थ्वसिबें न्ह्यः ट्रम्पं एयरफोर्स वानया विषयस पत्रकारतलिसे जूगु खँल्हाबल्हाय् भारतय् कडा शुल्क लगे यायेगु संकेत ब्यूगु खः।

अष्ट्रेलियाया भूमिं कक्षय् थ्यंगु अष्ट्रेलियाय् दयेकूगु न्हापांगु रकेट १४ सेकेण्ड उडान लिपा दुर्घटनाग्रस्त जूगु दु।गिलमोर स्पेस टेक्नोलोजीजं प्रक्षेपण याःगु एरिस रकेट अष्ट्रेलियां डिजाइन व निर्माण याःगु न्हापांगु कक्षीय प्रक्षेपण यान खः गुकिं उगु देसं उडान याःगु खः।

थ्व रकेट चीधंगु भूउपग्रहयात कक्षय् यंकेगु कथं दयेकूगु एपीं जानकारी ब्यूगु दु।उत्तरी क्वीन्सल्यान्ड राज्यया चिधंगु शहर बोवेन लिक्क च्वंगु अन्तरिक्ष बन्दरगाहपाखें परीक्षण उडानया निंतिं थौं सुथय् उगु रकेट प्रक्षेपण याःगु खः। रकेट दुर्घटना जूगु इलय् छुं नं कथंया मानवीय क्षति जूगु जानकारी मदुनि।

अथेहे, कम्पनीं फेसबुकय् छगु विज्ञप्ति पिथनाः लन्चयात सफल जूगु कथं लसकुस याःगु दु। गिलमोर स्पेस टेक्नोलोजीजं थ्व स्वयां न्ह्यः मे व थुगु महिना न्ह्यः हे रकेट प्रक्षेपण यायेगु योजना दयेकूगु खःसां प्राविधिक समस्या व खराब मौसमया कारणं रकेट प्रक्षेपण रद्द याःगु खः।

कम्पनीया प्रमुख कार्यकारी अधिकृत (सीईओ) एडम गिलमोरं छगू विज्ञप्ति जारी यासें रकेट लन्चप्याडं पिहां वःगु खनाः थः लय्ताःगु खँ धाःगु दु।गिलमोर स्पेस टेक्नोलोजीजया निजी समर्थक दुसा थुगु महिनाय् एरेस रकेट विकास यायेत देय्या संघीय सरकारपाखें ५० लाख अष्ट्रेलियन डलर अनुदान प्राप्त जूगु खः।

अष्ट्रेलियाय् न्हूगु अन्तरिक्ष प्रविधिया विकास व व्यवसायीकरणयात अग्रसर यायेगु निंतिं सन् २०२३ य् सरकारलिसे फर्मं ५ करोड २ लाख अष्ट्रेलियन डलर अनुदान सम्झौता याःगु लिपा थ्व जूगु खः। अष्ट्रेलियाय् सलंसः सबअर्बिटल सवारी साधन प्रक्षेपण जूगु दु, तर अष्ट्रेलियापाखें निगू जक सफलतापूर्वक कक्षय् प्रक्षेपण याःगु एयरोस्पेस समाचार प्लेटफर्म नासास्पेसफ्लाइटं जानकारी ब्यूगु दु।