अमेरिकाया राष्ट्रपति डोनाल्ड ट्रम्पं इरानया आणविक केन्द्र अमेरिकां याःगु बम विस्फोटं ‘पूर्ण रुपं ध्वस्त’ जुगु दु धका धाःगु दु।

अन्तर्राष्ट्रिय समाचार एजेन्सी एएफपीया कथं ट्रम्पं थःगु ट्रुथ सामाजिक प्लेटफर्मय् थःगु दाबी दोहोरे याःगु दु, ‘इरानया स्वंगू हे आणविक केन्द्र पूर्ण रुपं नष्ट जूगु दु वा नष्ट जूगु दु।

जुन २२ य् अमेरिकां इरानया विवादास्पद आणविक कार्यक्रमय् हवाई आक्रमण याःगु खः। थ्व आक्रमणं तेहरानया दक्षिणय् च्वंगु फोर्डोय् च्वंगु युरेनियम संवर्धन केन्द्रया लिसें इस्फाहान व नातान्जय् च्वंगु आणविक केन्द्रयात नं तःधंगु क्षति याःगु खः।

इरानया आणविक व सैन्य पूर्वाधार विरुद्ध इजरायलं याःगु अभियानया छगू ब्व कथं जूगु थ्व बम विस्फोटयात अमेरिकां दँ दँतकया आणविक हतियार दयेकेगु गोप्य कुतःयात “नकआउट”या रुपय् काःगु खः। इरानं थःगु नागरिक आणविक शक्ति कार्यक्रमयात हतियार दयेकेगु कुतः मयाःगु खँ धाःगु दु।

ट्रम्पं पूर्ण सफलताया दाबी याःसां नं अमेरिकाया छुं छुं संचार माध्यमं लिक जूगु गुप्तचर सुचंया हवाला बियाः थ्व आक्रमणं इरानया फुक्क आणविक व सैन्य पूर्वाधार स्यंके मफुगु दाबी याःगु दु।

क्यानडाया फरवार्ड ओलिभिया स्मिथ हलिमयया हे दकलय् थिकेम्ह फुटबलर जूगु दु। बिहीवाः आर्सनलं स्मिथयात आःतक हे दकलय् अप्पोे कीर्तिमानी रकम पूला थःगु टिमय् दुकागु दु।

आर्सनलं स्मिथयात १ मिलियन पाउन्डय् प्यदँया निति अनुबन्ध याःगु दु। थ्व स्वया न्ह्यः अमेरिका व इंग्लिस क्लब चेल्सीया रक्षक नाओमी गिर्मा दकलय् अप्पो ध्यवां अनुबन्धित याःगु खः।

क्लबं वंगु जनवरीइ गिर्मायात ९ लाख पाउन्डय् दुकाउगु खः। २० दँया कीर्तिमान रेकर्ड तम्ह स्मिथं सन् २०२२ य् क्यानेडियन क्लब अर्थ टोरोन्टो निट्रोसपाखे व्यवसायिक फुटबलमा डेब्यु याम्ह खः।

अमेरिकाया राष्ट्रपति डोनाल्ड ट्रम्पं ची चीधंगु अफ्रिकी व क्यारिबियन मुलुकपाखें आयात जुइगु सामानय् १० प्रतिशत स्वयां अप्वो कर लगे यायेगु धयादीगु दु। दक्वं देसय् छगू हे दर लागु यायेगु धाःम्ह ट्रम्पं थ्व दर १० प्रतिशतसिबें भचा च्वय् जूगु एसोसिएटेड प्रेसया जानकारी ब्यूगु दु।

वय्कलं म्होतिं नं १०० गू देय्या सामानय् थ्व कर लगे यायेगु योजना दूगु धयादीगु दु।अमेरिकाया वाणिज्य मन्त्री हावर्ड लुटनिकं थुगु शुल्कं अप्वो लिच्वः लाइगु सम्भावना दूगु देय्त अफ्रिका व क्यारिबियन जुइगु धयादीगु दु।

थ्व महिना न्ह्यः राष्ट्रपति ट्रम्पं थ्यंमथ्यं निगू दर्जन देय् व युरोपेली संघयात पौ छ्वयाः अगस्ट १ निसें लागू जुइगु न्हूगु शुल्कया जानकारी ब्यूगु खः।

उगु इलय् शुल्क घोषणा याःगुलिं अमेरिकाया वित्तीय बजारय् उथलपुथल जूगुलिं ट्रम्पं ९० न्हुया वार्ता अवधिया घोषणा याःगु खः। उगु ई जुलाइ ९ कुन्हु क्वचाइ।

अमेरिकाय् जूगु कार दुर्घटनाय् निम्ह नेपाःमि मन्त। लुइजियाना टेक विश्वविद्यालय अध्ययन याना च्वम्ह २२ दँयाम्ह राजन यादव व २० दँयाम्ह रोजिन ओलीपि कार दुर्घटनाय् मदुगु खः।

निम्हं नेपाःया नागरिक खः धासा नेपालय् गन च्वपि सिइमदुनि। लुइजियाना राज्य प्रहरीयात उद्धृत यासे स्थानीय धाःगु कथं असार २९ गते चान्ह्यः करिब ९ बजे कार दुर्घटनाय् मदुगु धका धाःगु दु।

अमेरिकाया राष्ट्रपति डोनाल्ड ट्रम्पं युद्धविरामया नितिं निरन्तर कुतः याःसां नं रुसं युक्रेनय् आक्रमण यानाच्वगुलि अमेरिकाया राष्ट्रपति डोनाल्ड ट्रम्प भ्लादिमिर पुटिननाप असन्तुष्ट जूगु दु।

राष्ट्रपति ट्रम्पं प्याट्रियट एयर डिफेन्स सिस्टम युक्रेनय् छ्वयेगु घोषणा याःगु बीबीसीं जानकारी ब्यूगु दु।ट्रम्पं युक्रेनयात थिकेगु व अत्याधुनिक ल्वाभः छ्वयेगु घोषणा याये धुंकूगु खः। नेटो पाखे युक्रेनयात मिसाइल व गोलाबारूद आपूर्ति यायेगु धासें वय्कलं ५० दिं दुने शान्ति सम्झौता मजुल धाःसा रुसलिसे व्यापार यानाच्वंगु देसं शतप्रतिशत भन्सार लगे यायेगु ख्याच्वः बियादीगु खः।

नेटोया प्रमुख मार्क रुट्टेलिसे नापलाये धुंकाः ट्रम्पं युक्रेनयात ग्वाहालि यायेत युरोपेली देय् तय्त थःगु पेट्रियट डिफेन्स सिस्टम छ्वयाहयेत अमेरिकां इनाप याःगु धाःगु दु।रुट्टें युक्रेनयात माःगु सैन्य उपकरण आपूर्ति यायेगु व उकिया खर्च युरोपं ब्यहोरे यायेगु जानकारी ब्यूगु खँ धाःगु दु। ट्रम्पया लिपांगु घोषणा रुस तंचाःगु दु। रुसया राष्ट्रपति पुटिनयात ‘कठोर मनू’ धासें वार्तां जक छुं नं ज्या मजुइगु धाःगु दु।

युक्रेनया राष्ट्रपति भोलोदिमिर जेलेन्स्कीं ट्रम्पयात ग्वाहालि याःगुलिं सुभाय् देछासें सहकार्ययात अझ प्रभावकारी यायेगु प्रतिबद्धता प्वंकूगु दु।रुसं औपचारिक रुपं प्रतिक्रिया मब्यूसां रुसया विश्लेषकतय्सं धाःसा ट्रम्पया घोषणायात खाली ख्याच्वः धाःगु दु।