इरानया राष्ट्रपति मसूद पेजेस्कियनं मंगलवाः झिंन्हुया युद्ध क्वचाःगु दु धका घोषणा यानादीसे दक्को सरकारी निकाय लगायतया संस्थायात पुनर्निर्माणय् थःगु दक्को कुतः जुइ धका धयादीगु दु।

पेजेस्कियनं युद्धविराम लागु जुइ धुका इरानया जनतायात ब्यूगु सन्देशय् धःगु दु, ‘थौ छिकपिनिगु साहस व ऐतिहासिक ग्वहालिं जिमिसं युद्धविराम व इजरायलं इरानविरूद्ध लादं याःगु १२ दिंया युद्ध क्वचायकेत ताःलागु दु।’ इजरायल आणविक सुविधा नष्ट यायेत व आणविक ज्ञानयात कमजोर यायेत नाप सामाजिक उत्तेजना यायेगु लक्ष्य असफल जूगु दु धका धयादीगु खः।

वंगु जुन १३ य् इजरायलं आणविक व सैन्य स्थल इरानया थीथी थासय् हवाई आक्रमण यागुलि वरिष्ठ कमान्डर, आणविक वैज्ञानिक व नागरिकत सीउगु खः। इरानं इजरायलय् मिसाइल व ड्रोन आक्रमण यागु खः।

इरानया आक्रमण लिपा अमेरिकाया राष्ट्रपति डोनाल्ड ट्रम्पं निगु पक्ष दथुइ युद्धविराम मङ्गलवाः निसे सुरु जुइ धका घोषणा याःगु खः। उकियात इरान व इजरायल निगु पक्षं स्वीकार याःगु खः। घोषणा नापं आः युद्धविराम सुरु जुगु दु। 

इजरायलया प्रधानमन्त्री बेन्जामिन नेतान्याहुं अमेरिकाया राष्ट्रपति डोनाल्ड ट्रम्पया युद्धविराम प्रस्ताव स्वीकार यासें इजरायलं चाहे जूगु स्वयां अप्वः उपलब्धि हासिल याःगु प्रतिक्रिया बियादीगु दु।

नेतान्याहुं ‘अपरेशन राइजिङ लायन’या फुक्क लक्ष्य पूवंगु जक मखु, इजरायली मन्त्रिपरिषदया बैठक लिपा उलि स्वयां अप्वः नं पूवंगु धाःगु दु । नेतान्याहुं जारी याःगु विज्ञप्तिइ धयातःगु दु, ‘इजरायलं आणविक व ब्यालिस्टिक मिसाइल क्षेत्रं ब्वलंकूगु निगू तत्काल अस्तित्वया खतरायात मदयेकूगु दु ।’

इजरायली सेनां ‘तेहरानया आकाशय् पूर्ण हवाई नियन्त्रण स्थापित याःगु, इरानया सैनिक नेतृत्वयात गम्भीर क्षति याःगु व दर्जनौं मू केन्द्र सरकारया संरचना स्यंकूगु’ दाबी याःगु दु।

विज्ञप्तिइ धयातःगु दु, ‘अपरेशनया लक्ष्य प्राप्त जूगुया प्रकाशय् इजरायलं राष्ट्रपति ट्रम्पलिसे पूर्ण समन्वयय् निगू पक्षीय युद्धविरामया प्रस्तावयात स्वीकार याःगु दु। इजरायल सरकारं चेतावनी बिउगु दु, ‘यदि युद्धविराम उल्लंघन जुल धाःसा इजरायलं कठोर प्रतिक्रिया बी ।’

अमेरिकाया राष्ट्रपति डोनाल्ड ट्रम्पं अमेरिकां इरानया स्वंगू मू आणविक केन्द्र फोर्डाे, नातान्ज व इस्फहानय् हवाई आक्रमण याःगु धका धाःगु दु।

थुगु आक्रमणं क्षेत्रीय तनाव व युद्धया ह्वःताः अप्वयेकुगु दु। थ्व घटनां विश्व अर्थतन्त्र व चिकंया कारोबारय् नं लिच्वः लाकीगु ह्वःताः दुगु विश्लेषकतय्सं धाःगु दु। राष्ट्रपतिं थःगु सामाजिक सञ्जाल पाखें धयादिल, “फुक्कं विमानत आः इरानया सर्गपाखें पिने दु। फोर्डाेय् मू थासय् पूवंकं बमबारी यानागु जुल।

वय्कलं न्ह्यने धाःगु दु, “सामान्य कथं बमबारी यानागु दु व मू यानाः फोर्डाेयात तातुनाः यानागु दु।” थ्व घटनां हलिंन्यंकं न्हू तनाव सिर्जना जूगु दु। अमेरिकी अधिकारीतय् कथं, थुकिं इरानया आणविक ज्याझ्वःयात कडा धक्का लावंगु खः। राष्ट्रपति ट्रम्पया थ्व धापू लिपा इरानं लिसः बिइगु तयारी यानाच्वंगु खनेदु।