प्रधानमन्त्री केपी शर्मा ओलीं भारतया प्रधानमन्त्री नरेन्द्र मोदीलिसे नापलायेगु झ्वलय् सकारात्मक व बांलाःगु खँल्हाबल्हा जूगु धका धयादीगु दु।

नाप लानाः पिहाँवयेगु झ्वलय् राससया विशेष प्रतिनिधियात चीहाकलं लिसः बियादिसें प्रधानमन्त्री ओलीं धयादिल, “जि व भारतीय प्रधानमन्त्री मोदीनाप बांलाःगु व सकारात्मक खँल्हाबल्हा जूगु दु।

आःयात उलि हे।” थाइल्याण्डया बैङ्ककय् च्वंगु होटल माडारिन ओरियन्टलय् प्रधानमन्त्री ओली व भारतीय प्रधानमन्त्री मोदी निम्हेसिया जक थ्यं मथ्यं ४५ मिनेट खँल्हाबल्हा जूगु खः। बहुक्षेत्रीय प्राविधिक नापं आर्थिक ग्वाहालिया निंतिं बङ्गालया खाडीया कुतः (बिम्स्टेक)या खुक्वःगु शिखर सम्मेलन क्वचाये धुंकाः वय्कःपिं दथुइ क्वःछिनातःगु धलः कथं नाप लायेगु ज्या जूगु खः।

थ्व स्वयां न्ह्यः वय्कःपिं दथुइ संयुक्त राष्ट्रसङ्घया ७९ क्वःगु महासभाय् ब्वति कायेगु झ्वलय् संयुक्त राज्य अमेरिकाया न्युयोर्कय् वंगु असोज ७ गते खँल्हाबल्हा जूगु खः।

बहुक्षेत्रीय प्राविधिक नापं आर्थिक ग्वाहालिया निंतिं बङ्गालया खाडीया कुतः (बिम्स्टेक) या खुक्वःगु शिखर सम्मेलन न्ह्याःगु दु।

बैङ्ककय ्च्वंगु होटल साङ्ग्रिलाय् दुजः मुलुकया सरकार प्रमुखपिनिगु मंकाः फोटोसेसन व ज्या धलः टेबल याये धुंका बिम्स्टेक सम्मेलन न्ह्याःगु खः। दुजः मुलुकया प्रतिनिधिमण्डलया नेतातय्त ग्वसाः देय् थाइल्याण्डया प्रधानमन्त्री पे थोङ् थान् शिनावात्रां लसकुस यानादीगु खः। सम्मेलनय् थौं प्रधानमन्त्री केपी शर्मा ओलीलिसें दुजः देय्या सरकार प्रमुखपिंसं सम्बोधन याइगु ज्याझ्वः दु।

शिखर सम्मेलनय् ‘बिम्स्टेक म्यारिटाइम ट्रान्सपोर्ट कोअपरेसन’य् ल्हाःचिं तयेधुंका दुजः मुलुकत थाइल्याण्ड, बङ्गलादेश, भुटान, भारत, म्यानमार, नेपाः व श्रीलङ्काया प्रधानमन्त्री (प्रतिनिधिमण्डलया नेता)तय्सं सम्बोधन यानादीत्यंगु दु।

अष्ट्रेलियाया प्रधानमन्त्री एन्थोनी अल्बनीजं शुक्रवाः मे ३ य् देशय् आम चुनाव घोषणा यानादीगु दु। आः एन्थोनी अल्बनीजं लेबर पार्टीनाप म्हो जक बहुमत दु।

ओपिनियन पोलया लिच्वः कथं अष्ट्रेलियाया निगु प्रमुख राजनीतिक दल लेबर पार्टी व लिबरल पार्टी दथुइ प्रतिस्पर्धा जुइ।

थज्यागु अवस्थाय् निगु तधःगु राजनीतिक दलयात निर्दलीय सांसद वा मेमेगु चिधःगु दल तयेगु भलसा कायेमा मालिइगु सम्भावना दु। थज्यागु स्थितिं लेबर पार्टीया निति सन् १९३१ या लिपा न्हापागु छगु–कार्यकालीय सरकारय् जोखिम जुइगु संकेत क्यःगु दु।

जर्मन रिसर्च सेन्टर फर जियोसाइन्सेस (जीएफजेड) या कथं थौ शुक्रवाः सुथय् म्यानमारय् ६.९ म्याग्निच्युडया भुखाय् ब्बःगु दु।

समाचार संस्था सिन्ह्वाया कथं भुखाय् ब्बःगु केन्द्रबिन्दु जमिनया स्वया १० किलोमिटर क्वय् पाखे ब्बःगु व उगु थाय् या २१.९० डिग्री उत्तर अक्षांश व ९५.६५ डिग्री पूर्व देशान्तरय् दुगु  प्रारम्भिक जानकारी वःगु दु।

समाचार संस्था रोयटर्सया कथं भुखाय् ब्बया थाइल्यान्डया राजधानी बैंककय् यक्को मनूत छेँ न पिहावःगु खः।

साउदी अरबय् स्वन्हुया शान्ति वार्ता लिपा रुस व युक्रेनं अमेरिकालिसे थीथी सम्झौता यानाः ब्ल्याक सीमाय् युद्धविराम यायेगु सहमति याःगु दु।

रुस व युक्रेन दथुइ व्यापारया संरक्षण व ऊर्जा क्षेत्रय् सैन्य आक्रमण पनेत सहमति जूगु बीबीसीं जानकारी ब्यूगु दु। स्वदँ सिबें अप्वः न्ह्यःनिसें न्ह्यानाच्वंगु रुस व युक्रेन दथुइ युद्ध ३० न्हुया नितिं दिकेगु सहमति जूगु बीबीसीं जानकारी ब्यूगु दु। अमेरिकाया राष्ट्रपति डोनाल्ड ट्रम्पया कूटनीतिक पहलया लिच्वः खः धकाः ह्वाइट हाउसं दाबी याःगु दु।

तर रुसं युद्धविराम लागू जुइ न्ह्यः कृषि व मल निर्यातया निंतिं विश्व बजारय् हाकनं पहुँच कायेत अमेरिकां ग्वाहालि यायेमाःगु शर्त तःगु दु। लिसें बैंक, बीमा कम्पनी, खाद्य निर्यातकर्तायात नं छुं प्रतिबन्ध चीकेमाःगु खँ धाःगु दु। युक्रेनया राष्ट्रपति भोलोदिमिर जेलेन्स्कीं निगू देसं युद्धविरामया सहमति याःसां नं रुसं थुगु शर्तयात कयाः मखुगु खँ ल्हाःगु द्वपं ब्यूगु दु।

जेलेन्स्कीयात रुसं युद्धविराम कार्यान्वयन यायेगु खँय् अझ नं शंका यानाच्वंगु खँ धाःगु दु। युद्धविराम गुकथं कार्यान्वयन जुइ, गुकथं अनुगमन जुइ धइगु नं स्पष्ट मजूनि।