Display Style:
Column Style
यमनय् खुदँ निसें न्ह्यानाच्वंगु युद्ध अन्त्यया नितिं साउदींपाखें शान्तिया प्रस्ताव, नाकाबन्दी चिइकेमाःगु विद्रोहीया शर्त
चिल्लाथ्व दशमी ११४१, चैत्र १० मंगलबाः
साउदी अरेबियांं युद्धविरामया नितिं यमनलिसे इनाप याःगु दु । थ्यंमथ्यं ६दँ निसें न्ह्यानाच्वंगु यमनया युद्ध अन्त्यया नितिं साउदी अरेबियां न्हूगु शान्ति योजना प्रस्ताव न्ह्यब्वगु खः ।
साउदीं थःपिं समर्थक यमनया सरकार व इरानया समर्थन दूगु हुथी विद्रोही दथुइ संयुक्त राष्ट्रसंघं सुपरीवेक्षण याइगु याना युद्धविराम यायेत प्रस्ताव याःगु दु । थुगु प्रस्तावय् राजनीतिक वार्ता न्ह्याकेत व महत्वपूर्ण हवाई लिसें जलमार्ग हाकनं चायेकेगु विषय नं कःघाःगु बीबीसीं न्ह्यथंगु दु । यमन सरकार व संयुक्त राष्ट्रसंघं साउदीया युद्धविरामया योजनाया लसकुस याःगु दु ।
तर हुथी विद्रोहीतयेसं धाःसा युद्धविरामया प्रस्तावय् न्हूगु खँ मजूगु प्रतिक्रिया बिउगु दु । हवाई व जलमार्गय् तःगु नाकाबन्दी चिइकेमाःगु उमिगु बः दु । हुथीया मू वार्ताकार मोहम्मद अब्दुसलामलं थःपिन्सं साउदी, अमेरिका व मध्यस्थकर्ता ओमानलिसे शान्ति सम्झौतया नितिं मदिक्क खँ ल्हायेु धाःगु रोयटर्सं उल्लेख याःगु दु ।
साउदी अधिकारीपिन्सं थःगु पलाःया खँय् संयुक्त राष्ट्रसंघ व अमेरिकालिसे समन्वय यानाच्वंगु धाःगु दु । थ्वयान्ह्यः वंगु फेब्रुवरीइ अमेरिकी राष्ट्रपति जो बाइडनं यमनय् जुयाच्वंगु आक्रामक कारबाहीस अमेरिकां यानावःगु समर्थन लितकायेगु ख्याच्वः बियादीगु खः । ६दँ सिव्ें ताहाकःगु ई निसें न्ह्यानाच्वंगु युद्धय् यमनय् छगू लख १० द्वः सिवें अप्वः मनू सीइधुंकुगु दु ।
मदिक्कया युद्धया हुनिं यमनया ८०गू प्रतिशत सिव्े अप्वः सर्वसाधारणयात मानविय ग्वहालि मजिमगाः दूगु संयुक्त राष्ट्रसंघं न्ह्यथंगु दु ।
अफगानिस्तानय् दुपिं अमेरिकी सेना लित सःतेत अमेरिका सकारात्मक
चिल्लाथ्व नवमी ११४१, चैत्र ९ सोमबाः
अमेरिकी रक्षासचिव लोयड अस्टिन अफगानिस्तानया आकस्मिक भ्रमणय् झाःगु दु । राजधानी काबुलय् राष्ट्रपति असरफ घानी नापलानाः विदेश सचिव लोयडं अफगानिस्तान भ्रमण यानाच्वनादीगु खः ।
वय्कलं अफगानिस्तानय् न्ह्यानाच्वंगु द्वन्द्व क्वचाकेत कुतः याइगु धयातःगु दु । नापलाय्ज्याय् अमेरिकी सेना लित सःतेगु सरकारया थ्वसिवे न्ह्यःया निर्णय पालना याकेगु विषयलय् खँ जूगु धागु दु ।
अफगानिस्तानय् न्ह्यानाच्वंगु द्वन्द्व व हिंसात्मक ज्यापहः क्वचायेकेत वय्क सकारात्मक जुयादीगु दु । हिंसा क्वचायेकेगु लिपांगु उपाय कथं शान्तिवार्ता जूगु न धागु दु । अमेरिकी रक्षासचिव अस्टिनं तालीवानी बिद्रोहीनाप न्ह्यानाच्वंगु वार्तायात निरन्तरता बीत राष्ट्रपति घानीयात छ््याता तकं बियादिल ।
सन् २०२० या फेब्रुअरीइ ल्हाःचिं तःगु सम्झौताय् तालिबानीपिन्सं थःपिनिगु प्रतिवद्धता पूवंकूसा १४लादुने अमेरिकां थः सेना लितसःतेगु धागु खः । तालिबानीपिन्सं पूवंकेमाःगु बचनय् इमिगु नियन्त्रण क्षेत्रय् अल कायदा वा मेमेपिं लडाकुपिन्त कारबाही मयाकेगु उल्लेख याःगु खः ।
ऐतिहासिक सम्झौतालिपा तालिबानीपिन्सं अन्तर्राष्ट्रिय फौजय् आक्रमण दिकूगु खःसां अफगान सरकारनापया संघर्ष मदीकूनि । अफगान सरकारनाप वार्ता न्ह्याकेगु सर्तय् तालिबानीपिन्सं थः द्वलंद्व मनूतय्त त्वःतेत माग याःगु खः ।
अनलिं सन् २०२० या सेप्टेम्बरय् दोहाय् वार्ता न्ह्याःगु खःसां अझं उकिइ ठोस निष्कर्ष पिहाँमवःनि ।
अस्ट्रलियाय् मदिक्क वाः वया जनजीवन लिच्वलय्
चिल्लाथ्व नवमी, ११४१, चैत्र ८ आइतबाः
अस्ट्रेलियाय् खुसीवाः वया अनया जनजीवन लिच्वःलय् लाःगु दु । अस्ट्रेलिया सरकारं ‘प्राकृतिक विपत’ तकं घोषणा याःगु दु ।
सिड्नीलिसें थासय् तसकं वाः वया खुसिवहाः वया न्यू साउथ वेल्स राज्यया छुं लागाय् प्राकृतिक विपत घोषणा याःगु खः । विपतया लिच्वःलय् लाःपिं जनता पिनिगु उद्धार व राहतया नितिं केन्द्र व राज्य सरकारया दक्व आपतकालीन निकाय त परिचालन याःगु दु ।
छुं दिंनिसें मदिक्क वःगु वाः या हुनिं सिड्नी शहर जलमग्न जूगु दु । प्रभावित क्षेत्रया बासिन्दापिन्त छेँय् पिहाँमवेत व आपतकालीन सेवाया सूचनय् ध्यान बिइत इनाप याःगु दु ।
तसकं वःगु वाःलं राजमार्ग व सतक बन्द जूगु दु । न्यू साउथ वेल्सय् अझं छुं दिं तसकं वाः वइगु मौसमविदपिन्सं न्ह्यथंगु दु ।
भारतया मुम्बई शहरया भीडभाड जुइगु क्षेत्रय् कोराना परीक्षण अनिवार्य यात
चिल्लाथ्व नवमी, ११४१, चैत्र ८ आइतबाः
भारतया मुम्बई शहरया भीडभाड जुइगु क्षेत्रय् कोराना परीक्षण अनिवार्य याःगु दु । संक्रमितया ल्याः अप्वया वनेधुंकाः मुम्बईया स्थानीय सरकारं थ्व व्यवस्था याःगु खः ।
सपिङ सेन्टर, रेल स्टेशन थुज्वःगु क्षेत्रय् कन्हय्निसें व्यापक ¥यापिड टेष्ट याइगु धाःगु दु । परीक्षण यायेत अस्वीकार याइम्हेसित कारवाहीया तकं व्यवस्था जूगु अधिकारीतय्सं न्ह्यथंगु दु ।
मुम्बईलय् लिपांगु २४ घौ दुने करिब ३द्वः कोरोना संक्रमित अप्वःगु दु । भारतन्यंक धाःसा म्हिगः करिब ४१द्वः कोरोना संक्रमित अप्वःगु खः । थुगु ल्याः लिपांगु प्यला दुनेया हे अप्वः खः ।
भारतय् न्हिं ३०द्वः संक्रमित अप्वःगु म्हिगः स्वन्हुगु दिं खः । भारतय् कोरोनाया हुनिं सीपिनिगु ल्याः १ लख ५९द्वः थ्यंगु दु ।
पाकिस्तानय् बलात्कारया द्वपं लाःपिं निम्हेसित मृत्युदण्डया सजायँ न्यंकल
चिल्लाथ्व नवमी, ११४१, चैत्र ८ आइतबाः
पाकिस्तानया छगू अदालतं बलात्कारया द्वपं लाःपिं निम्हेसित मृत्युदण्डया सजायँ न्यंकूगु दु ।
लाहोरया पूर्वी शहरस्थित छगू विशेष अदालतं अविद मेहली व शाफ्कत अली नांया निम्ह मिजंतय्त फ्रेन्च मुलया पाकिस्तानी मिसायात बलात्कार याःगु द्वपनय् मृत्युदण्डया सजायँ न्यंकूगु खः ।
चान्हसिया इलय् पेट्रोल मालाजूम्ह उम्ह मिसायात उमिसं निम्ह मचाया न्ह्यःने बलात्कार यानाः लुटपाट तकं याःगु खः । सन् २०२० या डिसेम्बर ९ तारीखय् जूगु घटनायात कयाः पाकिस्तानय् तच्वःगु विरोध जूगु खः ।
ब्वज्याय् कुहांवःपिन्सं पीडितयात न्याय व देशय् महिला सुरक्षाया माग याःगु खः । पाकिस्तानय् वंगु डिसेम्बरय् जक बलात्कारविरुद्धया न्हूगु कानुन पास जूगु खः ।
