भारतय् कोरोना सङ्क्रमणया दर अस्वाभाविक थहा वःगु दु। वःगु २४ घण्टाय् जक भारतय् ४३ हजार ८१५ म्हेसित सङ्क्रमण पुष्टि जुगु दु ।

थ्व धइगु सन् २०२१ या लिपा आःतक या हे दकलय् अप्वो जुगु धका भारतीय सञ्चारमाध्यमं धाःगु दु। थ्व नाप भारतय् जम्मा सङ्क्रमितपि १ करोड १५ लाख ९८ हजार स्वया अप्वो जुइ धुकुगु दु ।

भारतया केन्द्रीय स्वास्थ्य मन्त्रालयया कथं वःगु २४ घण्टाय् जक २३ हजार ६५३ म्ह कोरोनामुक्त जुया डिस्चार्ज जुगु दु।

वःगु २४ घण्टाय् जक भारतय् १९६ म्हेसिगु ज्यान वःगु दु । थ्व नाप आःतक १ लाख ५९ हजार ७९० म्ह स्वया अप्वो सी धुकुगु दु ।

जापानय् मौसम विज्ञान निकायं म्हिगः शनिवाः ६.९ रेक्टर स्केलया भुखाय् ब्बःगुलि सुनामी वये फइगु चेतावनी बिउसे उत्तरपूर्वी सामुद्रिक तटीय क्षेत्रया च्वपिन्त सचेत च्वनेत धाःगु दु।

सुरूइ ७.२ रेक्टर स्केल कम्पन जुगु अनुमान याःगु खःसा जापानी अधिकारीं ६.९ रेक्टर स्केलया पुष्टि जुगु धका धाःगु खः।

अमेरिकी भूगर्व विभागं जापानय् शनिवाः वःगु भुखाया धक्का ७.० रेक्टर स्केल खः धका धाःगु खः।

स्थनीय ई कथं शनिवाः सनिलया ६ बजे जुया ९ मिनेट वःगु इलय् महशुस याःगु धका केन्द्रबिन्दु मियागी क्षेत्रया प्रशान्त महासागरीय क्षेत्रया जमिन सतहपाखे करिब ६० किलोमिटरया गहिराइ दुगु जापानी मौसम विज्ञान निकायं धाःगु खः ।

फ्रान्सय् कोरोना भाइरसया स्वक्वःगु लहर सुरु जुइवं हाकन लच्छिया लागि लकडाउन सुरु जूगु दु।

फ्रान्सया राजधानी पेरिस नाप मेगु १५ गु थासय् थौंनिसे लागू जुइ कथं लच्छिया निति लकडाउनया घोषणा याःगु दु ।

आः लकडाउन न्हापा थे लकडाउन कडा जुइ मखु धका फ्रान्सया प्रधानमन्त्री जीन कास्टेक्सं  धाःगु दु ।

लकडाउनया इलय् अति आवश्यक बाहेक मेगु रोजगारीया ज्या बन्द जुइगु जुसा  विद्यालय धाःसा खुले जुइ धका फ्रान्सया सरकारं धाःगु दु ।

थुगु इलय् अति आवश्यक जूसा १० किलोमिटर तक दूरीइ वयेगु वनेगु याये दइ सा छगु थासं मेगु थासय् वयेगु वनेगु धाःसा बन्द याःगु दु ।

फ्रान्सय् वःगु २४ घण्टाय् जक ३५ हजार स्वया अप्वो कोरोना सङ्क्रमित थपे जूगु दु ।