Display Style:
Column Style
स्वीट्जरल्यान्डया मिसापिन्सं ख्वाः त्वपुइ म्वाल
सिल्लागा दशमी ११४१, फागुन २४ सोमबाः
स्वीट्जरल्यान्डया मिसापिन्सं ख्वाः त्वपुइगु वसः पुनेम्वालिगु जूगु दु । थौं कन्हय् जूगु जनमत संग्रहं ख्वाः त्वपुइगु वसःतय् तःगु प्रतिवन्धया विपक्षय् मतदान याःगु खः ।
उगु जनमत संग्रहलय् मिसापिन्सं ख्वाः त्वपुइगु वसःतय् प्रतिबन्ध तयेगु प्रस्तावयात तसकं म्हो जक बहुमतं समर्थन न्ह्यथंगु दु । दक्षिणपन्थी स्वीस पिपल्स पार्टीं न्ह्यब्वगु प्रस्तावय् जनमत संग्रह याःगु बीबीसीं न्ह्यथंगु दु ।
आधिकारिक परिणामय् उगु प्रस्तावया समर्थनय् ५१ गू फुति २गू प्रतिशत मनूखं भोट तःगु खःसा विपक्षय् ४८ गू फुति ८ गू प्रतिशत मनूखं मतदान याःगु खः ।
तर स्वीस इस्लामिक पुचःलं थुकियात मुस्मांतय् नितिं ‘छगू खिउँगु दिं’ जूगु टिप्पणी याःगु दु । स्वीस सरकारं प्रतिबन्धया प्रस्तावया विरोध यासें मिसापिन्सं छु पुनेगु धइगु खँय् राज्यं निर्देशन बिइ मफइगु न्ह्यथंगु खः ।
गुलिखय् आलोचकपिन्सं उगु प्रस्तावयात इस्लामप्रति ग्याचिकु न्यंकेगु कथंया जूगु धाःगु दु । स्वीट्जरल्यान्डया ४गू मुस्मां समुदायया मनूत मध्ये छुं दर्जनं जक अज्यागु वसः पुनेगु याःगु उमिसं न्ह्यथंगु दु ।
आः उगु प्रतिबन्ध स्वीस संविधानय् उल्लेखित जुइ । स्वीट्जरल्यान्डय् मनूतयेत उमिगु मामिलाय् निर्णयया प्रत्यक्ष अधिकार दु । उमित तक्वःमछि थी थी मुद्दाय् निर्णय बिइत राष्ट्रिय व क्षेत्रीय जनमत संग्रहस दुथ्याकेगु याः ।
सार्वजनिक थासय् ख्वाः त्वपुइगु इस्लामिक वसःया विषय मेगु युरोपेली देशय् नं विवादीत दु । फ्रान्सं सन् २०११य् ख्वाः पूवंक त्वपुइगु वसःतय् प्रतिबन्ध तःगु खः ।
बिदेशय् निम्ह नेपाली कोरोना मन्त
लहनान्युज | सिल्लागा नवमी ११४१, फागुन २३ आइतवाः
वःगु लिपागु इलय् कोरोना संक्रमणपाखे निम्ह नेपाली सीउगु दु ।
गैरआवासीय नेपाली संघया स्वास्थ्य समितिया संयोजकया कथं कोरोना संक्रमणं निम्ह बेलायतय् च्वना वयाच्वपि मदुगु खः। शनिवाः बहनि तक २१ गु देशय् च्वनाच्वपि ३४१ म्ह नेपालीपि कोरोना संक्रमणं सी धुकुगु दु धका धाःगु दु ।
आःतक विदेशय् च्वनाच्वपि थीथी देशय् ५३ गु देशय् च्वपिन्त नेपाली सङ्क्रमित जुइ धुकुगु दु । संघया कथं कोरोनाया कारण आःतक दकलय् अप्वोे साउदी अरबय् ८८म्ह, बेलायतय ८६ म्ह व युएईय् ५० म्ह नेपालीपि सीउगु दु धका ‘कोभिड–१९’ उच्चस्तरीय समितिया प्रेस संयोजकं धाःगु दु ।
शनिवाः बहनि तक थीथी देशय् ६२ हजार ९८१ म्ह नेपाली कोरोना सङ्क्रमण पुष्टि जुइ धुकुगु दु । उकि मध्ये ६० हजार ६२८ म्ह कोरोनामुक्त जुइ धुकुगु दु ।
१९गू खर्ब डलरया कोरोना राहत प्याकेज सम्बन्धी विधेयक पारित
लहनान्युज | सिल्लागा नवमी ११४१, फागुन २३ आइतवाः
अमेरिकी सिनेटं १९गू खर्ब डलरया राहत प्याकेज सम्बन्धी विधेयक पारित याःगु दु । कोरोना महामहारीया हुनिं समस्याय् लाःपिनि नितिं राष्ट्रपति जो बाइडनं हःगु राहत प्याकेज सम्बन्धी विधयेक पारित जूगु खः ।
सिनेटया फुक्क रिपब्लिकन सिनेटरं विपक्षय् मत बिउसां नं राहत योजना पारित जूगु खः । बाइडनया हे पार्टी डेमोक्र्याटया नियन्त्रण दूगु क्वयेय्या सदन हाउस अफ रिप्रिजेनटेटिभं मंगलबाः विधेयक पारित याइगु अनुमान याःगु दु ।
बाइडन प्रशासनया न्हूगु योजना कथं सेप्टेम्बर ६ तक्क बेरोजगार भत्ता बिइत्यंगु दु । उगु भत्ता वालय् ४ सः डलरं क्वकाना ३ सः डलर याःगु दु । राष्ट्रपति जो बाइडनं चुनावय् थःपिन्सं वचं बिउ कथं अमेरिकी जनतायात ग्वहालि यायेगु लँपूइ सिनेटं विधेयक पारित याःगु तःधंगु उपलब्धी जूगु धयादील ।
हलिंमय् हे दक्वःलय् अप्वः कोेरोना प्रभावित अमेरिकाय् ५गू लख २३द्वः सिवें आपा सीगु व निगू कोति ९०गू लख सिवें आपा संक्रमित दु । महामारीया हुनिं अमेरिकी अर्थतन्त्रय् बाँमलाक्क लिच्वः लाःबलय् बेरोजगारी दर ६ गू फुति २ गू प्रतिशत थ्यंगु दु ।
न्युजिल्यान्डय् ७ दशमलव २ म्याग्नेच्युडया शक्तिशाली भुखाय् ब्वल, भुखाय् लिपा सुनामी वय्फइगु ख्याच्वः
लहनान्यूज | सिल्लागा सप्तमी ११४१, फागुन २१ शुक्रबाः
न्युजिल्यान्डय् ७ दशमलव २ म्याग्नेच्युडया शक्तिशाली भुखाय् ब्वःगु दु ।
भुखाचंया केन्द्रविन्दु जिस्बन शहरपाखें सच्छि व ७८गू किलोमिटर तापाःगु जमिनया क्वःय् लाःगु धाःगु दु ।
स्वक्वःतक्क वःगु भुखाचंया धक्का लिपाः उगु क्षेत्रय् सुनामी वय्फइगु ख्याच्वः बिउगु दु ।
उत्तरी क्षेत्रया टापुया तटीय क्षेत्रय् सुनामीया सम्भावना दूगु धासें सर्वसाधारणपिन्त सुरक्षित च्वनेत इनाप यानागु अनया सरकारं न्ह्यथंगु दु ।
उगु क्षेत्र सुनामीया ख्याच्वः बिइवं दक्वः सर्वसाधारण सुरक्षित थासय् वंगु दु । भूखाचंया हुनि न्यू क्यालेन्डोनिया व भानुआटुया दक्षिणी क्षेत्रय लःया छाल व सतह अप्वःगु धाःगु दु ।
उगु क्षेत्रय् १०गू फिट सिबें अप्वः च्वय् लःया छाल वःगु हुनिं क्षति जुइके मबिइत स्थानीय प्रशासनं सर्वसाधारणपिन्त सुरक्षित थासय् यंकूगु दु ।
भुखाच लिपा दक्षिण अमेरिकाया पेरु इक्वेडर व चिलीलिसेंया देय्त सुनामीया लिच्वःलय् लायेफाइगु धाःगु दु ।
वंगु वाः जक न्यूजिल्याण्डय् ६ दशमलव ३ म्याग्निच्यूडया भुखाय् ब्वःगु १० क्वःगु स्मृति दिवस हंगु खः । उगु भूखाचय् दक्षिणी टापुइ च्वंगु चर्चय् क्षतिग्रस्त जुबलय् १८५म्ह सीगु खः ।
अस्ट्रेलियां आपतकालीन यात्रा प्रतिबन्ध ३ला थप यात
लहनान्युज | सिल्लागाः षष्ठी ११४१, फागुन २० बिहीवाः
अस्ट्रेलियां वंगु मार्चनिसें तःगु आपतकालीन यात्रा प्रतिबन्ध ३ला थप याःगु दु ।
अस्ट्रेलियन स्वास्थ्य संरक्षण प्रमुख कमिटी (एएचपीपीसीं) सरकारयात विदेशय् दूगु कोभिड–१९ या हुनिं अझं जोखिम दूगु धका वइगु जुन १७ तक्क थ्वयान्ह्यःया प्रतिबन्धयात निरन्तरता बिइगु स्वास्थ्य मन्त्री ग्रेग हन्टं जानकारी बियादील ।
थः नागरिकयात विशेष कारण बाहेक सरकारया अनुमति मदयेकं यात्रा यायेगुलिइ प्रतिबन्ध तःगु दुसा विदेशी नागरिकयात अष्ट्रेलिया प्रवेशय् नं रोक तःगु दु ।
वंगु दच्छि निसें बन्द दूगु अन्तर्राष्ट्रिय सीमाया हुनिं द्वलंद्वःम्ह अस्ट्रेलियन नागरिक विदेशय् तक्यनाच्वंगु दु ।
