Display Style:
Column Style
बेलायतया राजकुमार ह्यारी त्यपू मान पदवी पाखें मुक्त
लहानान्युज | सिल्लाथ्व अष्टमी ११४१, फागुन ८ सनिवाः
बेलायतया राजकुमार ह्यारी मान पदवि मुक्त जूगु दु । निम्हम्ह सन्तानयात जन्म बिइगु तयारीइ दूम्ह वयेकया तिरि मेघन मर्केलं राजदरबार लिहाँवयेत अस्वीकार यायेधुंका ह्यारी व मेघनया पदवी त्वफिउगु खः ।
छुं ला न्ह्यः उमिसं हे मान पदवी त्याग यानागु घोषणा यासें अमेरिका बसाइ सरे जूसा नं दरबारया पाखें आःतक्क कायम हे तयातःगु खः ।
महारानी एलिजावेथ द्वितीयं उमिगु मान पदवी खारेज जूगु घोषणा याःगु बीबीसीं न्ह्यथंगु दु । बेलायती राजदरबार बकिङघम दरबारं आःतक्क विचाराधीन अवस्थाय् हे तःगु उमिगु मान पदवी खारेज जूगु घोषणा यायेधुंका थुकियात बेलायती राजसंस्थाया इतिहासय् अविस्मरणीय घटनाया कथं काःगु दु ।
महारानी एलिजावेथ द्वितीयं ह्यारी त्यपुलिसे बेलायती राजपरिवारया आः राजनीतिक व सार्वजनिक स्वापू मदूगु उल्लेख याःगु अधिकारीतयेसं न्ह्यथंगु दु् ।
राजपरिवारया दुजःया कथं उमिगु आः छुं नं जिम्मेवारी, दायित्व व अधिकार लिसे भूमिका नं मदइगु दरबारं न्ह्यथंगु दु ।
थगुने मार्चय् ह्यारी व मेघनं सामाजिक सञ्जालय् नं थःगु लिपांगु पोस्ट यासें बेलायती राज परिवारया वरिष्ठ दुजःया कथं थःगु भूमिका त्वःतेगु घोषणा याःगु खः ।
हलिउड अभिनेत्री मेघनलिसेया मतिना स्वापूयात ह्यारीं वैवाहिक जीवनय् हिलेधुंका उमिगु आः छम्ह काये दु ।
पाकिस्तानया केटू हिमाल आरोहणया झ्वलय तनाच्वंपिं मृत घोषणा
सिल्लाथ्व सप्तमी ११४१, फागुन ७ शुक्रवाः
पाकिस्तान सरकारं ३म्ह हिमाल आरोही सीगु न्ह्यथंगु दु ।
थ्वहे लाय् सुरुइ हलिया निगूगु तःजाःगु हिमाल केटूया आरोहणय् वंपिं पाकिस्तनी नागरिक अलि सद्पारा, आइस्ल्याण्डया जोन स्नोरी व चिलिया जुुहाल पाब्लो मोहर अझं तनाच्वंगुलिं मृत घोषणा याःगु खः ।
हलिंया हे दक्वःलय् खतरनाक नालातःगु केटू हिमाल आरोहणया झ्वलय् उपिं नागरिक थ्वहे फेब्रुअरी ५ य् स्वापुतिं छखेलाःगु अनया सरकारं न्ह्यथंगु दु ।
बाँमलाःगु मौसम व मदिक्क च्वापुं गायाच्वंगु हुनिं तनाच्वपिनि मालेज्याय् समस्या जूगु पाकिस्तानी मौसम विभागया अधिकारीतयेत उध्रित यासें अन्तर्राष्ट्रिय समाचार संस्थातयेसं न्ह्यथंगु दु ।
उमिसं तच्वक ख्वामूगु मौसम जूगुलिं ताः ई सुं नं म्वानाच्वने फइगु अवस्था मदूगुलिं तनाच्वंपिं जिवित हे लुइगु संभावना मदुगु न्ह्यथंगु खः । थ्ुखे ग्याल्टन बालिस्तान प्रान्तया छम्ह मन्त्रीं धाःसा तनाच्वंपिनि मालेज्या न्ह्यानाच्वंगु धाःगु दु ।
उपिं आरोही केटूया च्वकाय् थ्यंका लिहाँवयेगु झ्वलय् दुर्घटनाय् लाःगु जुइ फइगु अधिकारीपिन्सं ताकं याःगु दु ।
थ्वयान्ह्यः १० म्ह नेपाली पर्वतारोहीया टोलीं वंगु माघ ३ गते छक्वःलं केटू हिमालया सफल आरोहण यायेधुंकुगु दु । सन् २००८ य् उगु हिमाल आरोहणया झ्वलय् छन्हूं हे ११म्ह आरोही सीगु खः ।
पृथ्वीं ब्वःगु ७ला लिपा नासाया अन्तरिक्ष यान मंगल ग्रहलय् थ्यन
सिल्लाथ्व सप्तमी ११४१, फागुन ७ शुक्रवाः
अमेरिकी अन्तरिक्ष एजेन्सी नासाया अन्तरिक्ष यान मंगल ग्रहय् सफल अवतरण याःगु दु । अमेरिकी पर्सिभिअरन्स नाँया अन्तरिक्ष यान पृथ्वीं ब्वःगु थ्यंमथ्यं ७ला लिपा मंगल ग्रहया सतहस अवतरण याःगु बीबीसीं न्ह्यथंगु दु ।
सफल अवतरण नापं क्यालिफोर्नियास्थित कन्ट्रोल सेन्टरय् अमेरिकी अन्तरिक्ष निकाय नासाया वैज्ञानिकपिन्सं लसता प्वंकुगु खः । सन् १९७० लिपा मंगल ग्रहय् जीवनया सम्भावना मालेगु नासाया थ्व न्हापांगु कुतः खः ।
मंगल ग्रहया सतहस सुरक्षित अवतरण याःगुयात थुगु मिसनया महत्वपूर्ण सफलता जूगु अन्तर्राष्ट्रिय समाचार संस्थातयेसं न्ह्यथंगु दु ।
थुकिं मंगल ग्रहय् गनेधुंकुगु छगू पुखु व अर्बौ दँ न्ह्यःया माइक्रो अर्गानिज्मया छुं नं चिं वा गतिविधिया नं अनुसन्धान याइगु बीबीसीं न्ह्यथंगु दु ।
मुख्यमन्त्री विप्लव कुमारया नेपालबारे अभिव्यक्तियात गलत व्याख्या जुल
लहनान्युज | सिल्लाथ्व सप्तमी ११४१, फागुन ७ शुक्रवाः
त्रिपुरा राज्यया कानुनमन्त्री रतन लाल नाथं छु दिं न्ह्यः मुख्यमन्त्री विप्लव कुमार देवं नेपालबारे बिःगु अभिव्यक्तियात गलत व्याख्या याःगु धका धयादीगु दु।
छु दिं न्ह्यः त्रिपुराया मुख्यमन्त्री अमित शाले नेपाल व श्रीलंकाय् पार्टी विस्तार याना सरकार निर्माण यायेगु योजना दयेकेगु सार्वजनिक अभिव्यक्ति बिःगु खः । उकिइ नेपाल व भारतय् तसक आलोचना जुगु खः । थुकिइ विषय नेपालं भारत नाप औपचारिक रुपं ध्यानाकर्षण यासे आपत्ती प्वकूगु खः।
त्रिपुराया कानुनमन्त्रीं भारतीय सञ्चार माध्यम नाप खँल्हासे, ‘मुख्यमन्त्रीया भनाइ याःगु गलत व्याख्या जुगु, वयकःया अर्थ भारतीय जनता पार्टी संसारया दकलय् तधःगु राजनीतिक दल खः व जनता पार्टीया विचारपाखे संसार प्रभावित जुइ।’ वयकलं थीथी देशय् भाजपाया विचार बारेय् सहलह जुइगु याः तर थुकिइ मतलव उगु देशय् भाजपा गठन जुइ मखु।
भ्याक्सिन इनेज्याय् राष्ट्रसंघया असन्तुष्टि
सिल्लाथ्व षष्ठी ११४१, फागुन ६ बिहीवाः
संयुक्त राष्ट्रसंघं हलिमय् कोरोना भाइरसविरुद्धया खोप इनेज्याय् खनेदुगु असमानताया विषयप्रति असन्तुष्टि क्यंगु दु ।
राष्ट्रसंघया प्रमुख एन्टोनियो गुट्रेसं खोप इनेज्याया विषययात कयाः तच्वकं कुंखिनादीगु दु । वय्कलं खोप इनेज्या प्रणाली अन्यायपूर्ण व विभेदकारी जूगु धयादिल ।
गुट्रेसं कोभिड कुल भ्याक्सिनया ७५ प्रतिशत, जक १० देय्या नियन्त्रणय् दुगु धासें छुं देशय् भ्याक्सिन हे उपलब्ध मजूगु दुर्भाग्यं जाःगु धयादिल ।
राष्ट्रसंघीय सुरक्षा परिषद्या बैठकयात सम्बोधन यासें वय्कलं हलिंन्यंक सच्छि व ३० देय्मध्ये छुं देशय् भ्याक्सिन मथ्यंगु धासें च्यूताः प्वंकादीगु खः ।
वय्कलं थुगु महामारीया इलय् भ्याक्सिनया ज्वलिंज्वः इनेज्या विश्व समुदायया नैतिक परीक्षाया ई जूगुलिं आपतकालिन खोप अभियानया योजनाय् दक्वं देय्या साथ दयेमाःगुलिइ बः बियादिल ।
भ्याक्सिनया ज्वलिंज्वः इनेज्याया सुनिश्चितताया लागिं जी ट्वान्टीइ दुथ्याःगु तःधंगु अर्थतन्त्र दुगु राष्ट्रतय्सं आपतकालिन कार्यदल गठन जुइमाःगु व थुकिइ वासः उत्पादक कम्पनीयात नं दुथ्याकोमःगु आवश्यकता न्ह्यथनादिल ।
