Display Style:
Column Style
बेलायतय् लकडाउन ४गूगु झ्वलं छ्वासुकेगु प्रधानमन्त्री जोनसनया घोषणा
सिल्लाथ्व एकादशी ११४१, फागुन ११ मंगलवाः
बेलायतं ताः ई निसें कायम दूगु लकडाउन छसिकथं छ्वासुकेगु न्ह्यथंगु दु । देशवासीयात सम्बोधन यासें प्रधानमन्त्री बोरिस जोनसनं ४ गू झ्वलय् लकडाउन चायेकेगु घोषणा यानादीगु खः ।
लकडाउन चिइकेगु योजनाबारे प्रधानमन्त्री जोनसनं संसदयात जानकारी बिइधुंकुगु बीबीसीं न्ह्यथंगु दु । न्हूगु घोषणा कथं मार्च ८ निसें ब्वनेकुत चालिगु जूगु दु ।
अथेहे , मार्चया २९ निसें पार्क, निजी केवः लिसेंया थासय् ६ म्ह तक्क वा निगू छँेजःयापिन्त मुनेत अनुमति बिइ । टेनिस, बास्केटबल लिसेंया आउटडोर कासा म्हितेगु थाय् नं सुचारु जुइ ।
अप्रिल १२ निसें न्ह्याइगु लकडाउन चायेकेगु निगूगु झ्वलय् आः बन्द दूगु अत्यावश्यक बाहेकया फुक्क कथंया तच्वकं जमघट जुइगु व्यवसाय सुचारु जुइ ।
अनलिं सर्वसाधारणया तच्वकं जमघट जुइगु सार्वजनिक थाय्त चालिइ । लिपांगु संस्कारय् ३०म्ह व वैवाहिक समारोहस १५म्ह तक्कया नियम धाःसा कायम जुयाच्वनिइ ।
३गूगु झ्वलय् मे १७ निसें आपालं व्यवसायत चायेकेगु नापं ‘सामाजिक सम्पर्क’ च्वयेय्या अप्वः धैथें बन्देज चिइकिगु जूगु दु । पब, रेष्टुरेन्ट लिसेंया क्षे्त्र नं थुगु हे झ्वलय् सुचारु जुइ ।
थुगु झ्वलय् आउटडोर ६म्ह तक्कया जमघट जुइ फइगु थ्वयान्ह्यःया छुटयात बुलुहुँ ३०म्ह तक्कया जमघटयात छुट बिइ । खेलकुदया धेधेंबल्लास १०द्वःम्ह स्वकुमि दुथ्यायेफइ ।
अथेहे ४गूगु झ्वलय् जुन २१ निसें आः लागू जूगु फुक्क प्रतिवन्धत चिइकेज्या जुइ व बेलायत लकडाउनमुक्त जुइगु प्रधानमन्त्री जोनसनया योजना दु ।
भारताय् हाकनं खनेदत कोरोना
सिल्लाथ्व दशमी ११४१, फागुन १० सोमवाः
कोरोना संक्रमणा लहरायात रोकेयाःगु उद्देश्यं भारतया महाराष्ट्र सरकारं थौंनिसे दक्को प्रकारका राजनीतिक, धार्मिक र सामाजिक ज्याझ्वः भेलाया रोक याःगु दु ।
मुख्यमन्त्री उद्धव ठाकरे नं टेलिभिजन सम्बोधन यासे महाराष्टया दक्को राज्यय् मनू तयेगु भेलाय् बन्देज लगे याःगु जानकारी बिःगु दु। वयकलं धयादीगु दु, ‘महामारीं जिमिगु राज्यय् हाकनं खनेदुगु दु। लकडाउनपाखे जक कोभिड–१९ समाधान जुइ मखु तर भाइरस फैलै जुइत रोके यायेगु थ्व हे छगु जक विकल्प खः ।’भारतया महाराष्ट्र कोरोना भाइरस संक्रमणपाखे दकलय् अप्वो प्रभावित जुगु राज्यमध्ये छगु खः ।
हाकनं संक्रमणया लहर खने दयेवं सरकारं प्रतिबन्धात्मक उपाय पालना यायेत आम नागरिकपिन्त इनाप याःगु दु । थ्व कोरोना संक्रमणया मेगु खः वा मखु धइगु ८ निसे १५ दिं दुने सिदइ धका मुख्यमन्त्री ठाकरें न धाःगु दु । भारतया महाराष्ट्रय् कोरोना संक्रमण अप्वोया वनेवं अमरावती व अकोला जिल्लाय् छगु वाः दुने लागि लकडाउन सुरु यायेत्यःगु दु ।
लकडाउन एक मार्चनिसे लागु जुइ। संक्रमण अप्वा वःगुलि पुणेय् चान्ह्य कर्फ्यु ल याःगु दु । भारतया ९१ जिल्लाय् कोरोना भाइरस संक्रमणया दर अप्वो जुगु दु । उकि मध्ये ३४ गु जिल्ला महाराष्ट्रया व १६ गु जिल्ला कर्नाटकय् खः । अथेहे हरियाणा, पन्जाब, छत्तीसगढ, गुजराज व बिहारया प्यगु प्यगु जिल्ला व केरलाय् निगु जिल्लाय् न कोरोना संक्रमणया अप्वो जुयावःगु दु ।
विवादास्पद सीमा क्षेत्रं सैनिक लितकायेत भारत व चीन सहमत
सिल्लाथ्व दशमी ११४१, फागुन १० सोमबाः
भारत व चीनं विवादास्पद हिमालयन सीमापाखें थःपिनि सेना लितकायेत सहमत जूगु दु ।
निगुलिं देय्या उच्च सैनिक अधिकारीतयेसं थःथःगु क्षेत्रपाखें सीमाय् खटेजूगु सैनिक फौज लितकायेगु सहमति जूगु बीबीसीं न्ह्ययथंगु दु । भारतीय विदेश मन्त्रालयं जारी याःगु विज्ञप्ती कथं निगुिलं देय्या सैनिक अधिकारीतयेसं पाङगोङ त्सो तालं सुरक्षाकर्मी लितसःतूगु दु । अथेहे मेगु क्षेत्रय् दूगु सेना नं लितसःतेगु प्रक्रियाय् दूगु विज्ञप्तीइ उल्लेख यानातःगु दु ।
निगुलिं देय् दथुया सीमा स्वामित्वया खँय् कचवं जूबल य् थगुने तक्वःमछि ल्वापु जूगु खः । उगु ल्वापुइ लाना भारत व चीन निगुलिं पक्षय् सेना सीगु खः । चीनं उगु क्षेत्रय् ल्वापु जगु ताः ई लिपा जक थःगु सेना सीगु नालाकाःगु दु ।
वंगु जुनय् गलवान उपत्यकाय् भारतीय सैनिकलिसेया संघर्षय् थःपिनि ४म्ह सैनिक सीगु पुष्टि चीनं याःगु दु । उगु ल्वापुइ २०म्ह भारतीय सैनिक सीगु दावी याःसा नं भारतं थःपिनि पाखेया क्षति धाःसा सार्वजनिक मयाःगु खः ।
उगु ल्वापु लिपा निगुलिं पक्ष सीमया दसगजा क्षेत्रय् अनाधिकृत कथं दुहाँमवनेगु सहमति याःगु खः । निगुलिं देशं थ्वहे फेब्रुअरी ११ य् विवादास्पद सीमा क्षेत्रपाखें थःपिनि सेना लितकायेगु घोषणा यायेधुंकुगु दु ।
निगुलिं देशं लद्दाख लिसेंया मेगु क्षेत्रय् खनेदूगु कचवं ज्यंकेत नं वार्ता न्ह्याकातयेगु न्ह्यथंगु दु । विवादास्पद सीमा क्षेत्रय् शान्ति कायम यायेत निगुलिं देशं लिपांगु कतः यायेगु विज्ञप्तीइ उल्लेख यानातःगु दु ।
भारत व चीन दथुइ सीमा स्वामित्वया खँय् दँबदँनिसें कचवं जुयावःगु दु ।
अमेरिकाया छगः बोइङ ब्वयाच्वंगु अवस्थाय् च्यात
सिल्लाथ्व नवमी ११४१, फागुन ९ आइतवाः
अमेरिकाया छगः बोइङ ट्रिपल सेभेन विमान तःधंगु दुर्घटना जुइगुपाखें बचे जूगु दु ।
ब्वयाच्वंगु अवस्थाय् उगु विमानया छगः इन्जिन च्याःगु खः । च्यानाः इन्जिनया छुं ब्व जमिनय् कुतुंवंसा विमान सकुशल रुपं डेनभर विमानस्थलय् लिहांवयाः अवतरण याःगु खः ।
चालक दलया १० दुजःलिसें २सः व ३१ यात्रु कुबियाः डेनभरं होनोलुलुया लागिं ब्वःगु विमान ब्वःगु छुं ई लिपा हे जबपाखेया इन्जिन च्यायेधुंकाः आपतकालिन् अवस्थाय् अवतरण याकूगु खः ।
मि च्याःगु इन्जिनया छुं ब्व डेन्भरया छखा निजी भवन परिसरय् कुतुंवंगु खः ।
सैन्य कूया विरोधय् जूगु ब्वज्याय् हाकनं छम्ह सीत
सिल्लाथ्व नवमी ११४१, फागुन ९ आइतवाः
म्यानमारय् सैन्य कू या विरोधय् जूगु लिपांगु ब्वज्याय् म्ह्वतिं निम्ह सीगु दु । लिपांगु निवाः दुनेया हे बांमलाःगु हिंसात्मक ब्वज्याया झ्वलय् म्यानडेले शहरय् प्रहरीया गोलिं लानाः निम्ह सीगु खः ।
म्ह्वतिं २० घाःपाः जूगु दु । प्रहरीं ब्वज्यामितय्त तितरवितर यायेत अप्वः हे बल छ्यःगु खः । सैन्य अधिकारीतय्सं फेब्रुअरी १ या कू धुंकाः प्रहरीया गोलिं लानाः न्हापांगु खुसी ब्वज्यामि सीगु न्ह्यथंगु दु ।
आङ साङ सूचीया निर्वाचित सरकारयात अपदस्थ यानाः सेनां सत्ता कब्जा यायेधुंकाः म्यानमारय् मदिक्क विरोध ब्वज्या जुयाच्वंगु दु ।
ब्वज्यामितय्सं छेँय् हे नजरबन्दय् दुम्ह नेतृ सूचीलिसें ज्वनातःपिं मेपिं नेतातय् रिहाइया लिसें नागरिक सरकार पूनर्वहालीया माग याःगु दु ।
