नेकपा अध्यक्ष नाप प्रधानमन्त्री केपी शर्मा ओलीं ११९९ सदस्यीय महाधिवेशन आयोजक कमिटी घोषणा याःगु दु ।

थौं मंगलवाः बालुवाटार जुगु केन्द्रीय कमिटीया बैठक आःतक कायम जूपि ४४६ म्ह सदस्यीय केन्द्रीय कमिटीयात ५५६ म्ह थपेयासे महाधिवेशन आयोजक कमिटी घोषणा याःगु दु।

कमिटीइ बाँकी १९७ म्ह लिपा थपे याये कथं जुइ धका छम्ह नेता धाःगु दु। उगु बैठकय् पूर्वमाओवादी निकट नेकपा स्थायी कमिटी सदस्य टोपबहादुर रायमाझी व मणि थापा न सहभागी जूगु दु। रायमाझी व थापा सोमवाः तक गन खुले जुया मवपि खः।

तर, थौं बालुवाटारया भेलाय् उपस्थित जूगु दु । बैठकय् स्वागत मन्तव्य बिउसे रायमाझीं कार्यकारी अध्यक्ष पुष्पकमल दाहालया कारण थः न्हापानिसे याःगु ताः हाकःगु सहयात्रा तोडे यायेत बाध्य जूगु धका धाःगु खः।

थौंया भेलाय् नेकपा उपाध्यक्ष वामदेव गौतम व सचिवालय सदस्य रामबहादुर थापा धाःसा सहभागी जूगु मदुनि।

बेलायतय् कोरोना भाइरस न्हुगु व अप्वो सङ्क्रामक समस्या उत्पन्न जुइवं भारत बेलायतय् जुयाच्वंगु दक्को उडानयात अस्थायी रूपं स्थगित यायेगु निर्णय याःगु दु।

बेलायतय् जुयाच्वंगु उडानयात अस्थायी रूपं यूरोपेली मुलुकपिन्स याये थे निर्णय भारत न याःगु खः। बेलायतय् कोभिड–१९ या आः याःगु अवस्थायात ध्यानय् तया भारत सरकारं बेलायतपाखे वनेगु दक्को उडानयात थुगु दँया डिसेम्बर ३१ तक स्थगित यायेगु निर्णय याःगु दु धका

उड्डयन मन्त्रालयं ट्वीटयासे जानकारी बिःगु दु। उडान स्थगित यायेगु निर्णय मङ्गलबार चान्ह्य १२ बजेनिसे लागु जुइ धका धाःगु खः।

भारतय् कोरोना संक्रमितपि छगु करोड स्वया अप्वो जुइ धुकुगु दु।

वःगु २४ घण्टाय् जक २५ हजार १५२ म्हेसित कोरोना भाइरसया संक्रमण पुष्टि जुइवं आः संक्रमितपि छगू करोड स्वया अप्वो जुगु दु।

भारतया स्वास्थ्य तथा परिवार कल्याण मन्त्रालयया कथं भारतय् थौं सुथय् तक कोरोना भाइरस संक्रमित जूपि छगु करोड ४ हजार ८२५ म्ह थ्यःगु दु।

अथेहे कोरोना संक्रमणं सीपि १ लाख ४५ हजार १३६ म्ह थ्यःगु दु। वःगु २४ घण्टाय् जक ३४७ म्ह सी धुकुगु दु।

भारतय् आःतक ९५ लाख ५० हजार ७१२ म्ह कोरोनामुक्त जुइ धुकुगु दु ।

विश्वन्यक कोरोना सीपि १६ लाख ४३ हजार स्वया अप्वो जुइ धुकुगु दु ।

विश्व स्वास्थ्य संठगनया तथ्यांक कथं आःतक १६ लाख ४३ हजार ३३९ म्ह कोरोना संक्रमितपि सी धुकुगु दु।

वःगु २४ घण्टाय् जक १२ हजार ४०७ म्ह कोरोना संक्रमितपि सी धुकुगु दु।

उगु हे इलय् ६ लाख ४२ हजार ७३८ म्ह कोरोना संक्रमितपि थपे जूगु दु।

थ्व नाप आःतक विश्वन्यकं कोरोना संक्रमितपि ७ कारोड २८ लाख ५१ हजार ७४७ म्ह थ्यःगु दु ।