Display Style:
Column Style
भ्याक्सिन इनेज्याय् राष्ट्रसंघया असन्तुष्टि
सिल्लाथ्व षष्ठी ११४१, फागुन ६ बिहीवाः
संयुक्त राष्ट्रसंघं हलिमय् कोरोना भाइरसविरुद्धया खोप इनेज्याय् खनेदुगु असमानताया विषयप्रति असन्तुष्टि क्यंगु दु ।
राष्ट्रसंघया प्रमुख एन्टोनियो गुट्रेसं खोप इनेज्याया विषययात कयाः तच्वकं कुंखिनादीगु दु । वय्कलं खोप इनेज्या प्रणाली अन्यायपूर्ण व विभेदकारी जूगु धयादिल ।
गुट्रेसं कोभिड कुल भ्याक्सिनया ७५ प्रतिशत, जक १० देय्या नियन्त्रणय् दुगु धासें छुं देशय् भ्याक्सिन हे उपलब्ध मजूगु दुर्भाग्यं जाःगु धयादिल ।
राष्ट्रसंघीय सुरक्षा परिषद्या बैठकयात सम्बोधन यासें वय्कलं हलिंन्यंक सच्छि व ३० देय्मध्ये छुं देशय् भ्याक्सिन मथ्यंगु धासें च्यूताः प्वंकादीगु खः ।
वय्कलं थुगु महामारीया इलय् भ्याक्सिनया ज्वलिंज्वः इनेज्या विश्व समुदायया नैतिक परीक्षाया ई जूगुलिं आपतकालिन खोप अभियानया योजनाय् दक्वं देय्या साथ दयेमाःगुलिइ बः बियादिल ।
भ्याक्सिनया ज्वलिंज्वः इनेज्याया सुनिश्चितताया लागिं जी ट्वान्टीइ दुथ्याःगु तःधंगु अर्थतन्त्र दुगु राष्ट्रतय्सं आपतकालिन कार्यदल गठन जुइमाःगु व थुकिइ वासः उत्पादक कम्पनीयात नं दुथ्याकोमःगु आवश्यकता न्ह्यथनादिल ।
उत्तर कोरियाली ३म्ह नागरिकयात खुँ व लुटेराया अभियोग
सिल्लाथ्व षष्ठी ११४१, फागुन ६ बिहीवाः
अमेरिकां हलिंन्यंकया बैंकतपाखें १३ क्वःति अमेरिकी डलर खूपिं ३म्ह उत्तर कोरियाली नागरिकयात खुँ व लुटेराया अभियोग दर्ता याःगु दु ।
हलिंन्यंकया बैंकतपाखें धेबा खूपिं व लुटपाट याःपिं ३ उत्तर कोरियाली नागरिक व छम्ह क्यानेडियन नागरिकयात मनि लन्ड्रिङया अभियोग ब्यूगु दु । उमिसं कम्प्युटर छ्यलाः धेबा खूगु अमेरिकी अधिकारीतय् धापू दु ।
द्वपंमि ३ उत्तर कोरियाली नागरिकतय् सन् २०१७य् अमेरिकाय् जूगु साइबर हमलाय् तकं ल्हाः दुगु अमेरिकां न्ह्यथंगु दु ।
अमेरिकाया राष्ट्रिय सुरक्षाया सहायक महान्यायाधिवक्ता जोन डेमर्सं उत्तर कोरिया ध्वाँय्लिसेंया आपाराधिक सिन्डिकेट जूगु धयादिल ।
द्वपंमि ३ मध्ये छम्ह उत्तर कोरियाली नागरिकया सन २०१४ य् जूगु सोनी इन्टरटेन्मेन्ट पिक्चर ह्याकिङय् ल्हाः दुम्ह खःगु सीदुगु दु । द्वपंमि स्वम्हं हे हआः उत्तर कोरियाय् हे दु ।
मेम्ह द्वपंमि क्यानेडियन नागरिकं धाःसा थःत ब्यूगु द्वपं स्वीकार यायेधुंकूगु दु ।
अमेरिकाय् च्वापुफय्या हुनिं २३म्ह सीत
सिल्लाथ्व षष्ठी ११४१, फागुन ५ बुधवाः
अमेरिकाया मध्य अले दक्षिणी राज्यय् तसकं प्वँ गायेधुंकाः वःगु च्वापुफय्या हुनिं २३ सीगु दु ।
च्वापुफय्या हुनिं टेक्सास राज्यया लखौं मनूत बिजुलीं बञ्चित जूगु दु । च्वापुफय्या हुनिं कोरोना खोप वितरण नं प्रभावित जूगु दु ।
थुकिया लिच्वः आइतबाःतक्क च्वनीगु अनया मौसम विभागं न्ह्यथंगु दु । टेक्सास, लुसियाना, केन्टुकी व मिजौरी लिसेंया राज्यय् म्ह्वतिं २३ सीगु धाःगु दु । नर्थ क्यारोलाइना, ओरेगन राज्यय् नं थुकिं लिच्वः लाःगु दु ।
तापक्रम माइनसय् कुहांवयेधुंकाः सडकय् गाडी न्ह्याकेत नं थाकुयाच्वंगु द ु। सुपरमार्केटय् मनूतय् भीड अप्वयावःगु दु ।
छुं राज्यया ब्वनेकू बन्द याःगु दु । च्वापुफय्या लिच्वः जःलाखला मेक्सिकोय् नं खनेदत । अनया थीथी राज्यय् नं विद्युत् सेवा अवरूद्ध जूगु दु ।
अमेरिकी राष्ट्रपति जो बाइडेनं प्रभावित राज्यय् आपतकालीन ग्वाहालि यायेत थःगु प्रशासन तयार दुगु धयादीगु दु । वय्कलं टेक्सासय् आपतकाल घोषणा यानादीगु दु ।
अमेरिकाया राष्ट्रिय मौसम सेवाया कथं आः देय्या ७३ प्रतिशत ब्व च्वापुं त्वपुनाच्वंगु दु ।
भारत नाप २० लाख डोज खोप न्यायेगु निर्णय
लहानान्युज | सिल्लाथ्व षष्ठी ११४१, फागुन ५ बुधवाः
सरकारं भारतया सिरम ईन्स्टिच्युट अफ इन्डियानाप २० लाख डोज कोभिड १९ विरुद्धया खोप न्यायेगु निर्णय याःगु दु ।
मन्त्रिपरिषदया बैठकं खोप न्यायेगु लागि स्वास्थ्य सेवा विभागयात निर्देशन बिइगु निर्णय याःगु दु। १० लाख डोज खोप फेब्रुअरी लिपा तक व बाँकी १० लाख मार्च दुने हयेगु सरकारया योजना दु।
प्रतिडोज ४ डलरया दरं सिरम २० लाख डोज खोप उपलब्ध याइ । सरकारं खोप शुल्कय् ८० प्रतिशत रकम पेश्की स्वरुप उपलब्ध याइ ।
निगुगु चरणया खोप प्राथमिकतामा सुयात ?
कोभिड १९ विरुद्धया खोप अभियान अन्तरगत निगु चरणको प्राथमिकताय् सरकारं ५५ च्वय्यापि ज्येष्ठ नागरिक व ४५ वर्षया च्वय् दीर्घरोगीयात तःगु दु। खोप विभाग प्रमुख डा. झलक शर्मा गौतमं ‘कोभिड १९ पाखे सीपि दकलय् अप्वो निगु वर्गया नागरिक जुगुलि आःयाःगु चरणय् जेष्ठ नागरिक व दीर्घरोगीयात खोप बिइगु प्राथमिकताय् तःगु दु।
भारतया उत्तराखण्डय् च्वापू चलःखय् लाना सीपिनिगु ल्याः ५०म्ह थ्यन
सिल्लाथ्व चतुर्थी ११४१, फागुन ३ सोमवाः
भारतया उत्तराखण्डय् वंगु आइतबाः वःगु च्वापू चलःखय् बेपत्ता जूपिंमध्ये ५०म्ह सीम्ह लूगु दु । सिपिंमध्ये आःतक २५म्हसियागु जक पहिचान जूगु दु ।
मुक्कं सीम्हमध्ये १२म्ह आइतबाः लूगु खः । उपिंमध्ये ५म्ह तवोवनया सुरुङं लिकाःगु खः । ६म्ह रानीवन गामं व मेगु छगू सीम्ह रुद्रप्रयागय् लूगु खः । भारतीय प्रहरी ज्याकूथिं पितब्वःगु वक्तव्य न्ह्यथनातःगु दु ।
उगु घटनास्थलपाखें मेगु २३ गू मानव अंग नं लुगू प्रहरी अधिकारीपिन्सं न्ह्यथंगु दु । चमोली जिल्लाया थीथी थासं उगु मानव अंग लूगु खः ।
घटनास्थलय् लूगु सीम्हया डीएनए परीक्षण यायेगु व पहिचान याय्गु तयारी जुयाच्वंगु नं प्रहरी जानकारी ब्यूगु दु ।
मृतक व बेपत्ता जूपिं भारतया उत्तराखण्ड, उत्तर प्रदेश, पश्चिम बंगाल, विहार, झारखण्डया मनुत खः ।
अथेहे छुंछुं नेपामिपिं लाःगु अधिकारीपिन्सं धाःगु दु । वंगु सोमबाः चमोली प्रहरीं बेपत्ता जूपिंनिगु धलः सार्वजनिक याःगु खः । गुकिइ ११म्ह नेपालीपिनिगु नां वःगु खः । वय्कपिनिगु थाय्बाय् धाःसा सीदूगु मदुनि ।
हलियंकं तापमान अप्वःगु प्रभावया कारण थ्वः क्षेत्रय् हिमनदीया मुहान क्षेत्र बुलुंहु सुनावनाच्वंगु दु धाःसा जलविद्युत् निर्माण नं हिमपहिरो अप्वःयावःगु विज्ञपिनिगु धाःपु दु ।
