संयुक्त राष्ट्रसंघया इनापय् दक्षिण सुडानय् शान्ति स्थापनाया निति वनाच्वपि चण्डीप्रसाद गणया २ सय ११ म्ह डप्फा वंगु चान्ह्यः उखे पाखे वःगु दु।

सेनानी मिलन आचार्यया नेतृत्वय् उगु टोली कार्यस्थलपाखे वःगु दु धका नेपाली सेनाया जनसम्पर्क लिसे सूचना निर्देशनालयं धाःगु दु। प्रमुख सेनानी महेश्वर सिलवाल नेतृत्वया  २ सय १३ सदस्यीय अरिदमन गण सेनानी आचार्य नेतृत्वया फौज दक्षिण सुडानया राजधानी जुभापाखे वःगु खः।

आः दक्षिण सुडानय् नेपाली सेनापाखे ‘सेक्टर कमाण्डर,’ सैनिक पर्यवेक्षक, ‘स्टाफ’ अधिकृत व निगु गण लिसे छगु गुल्म याना १ हजार ७ सय ५६ म्ह शान्ति सैनिक ज्या यानाच्वंगु दु।

अमेरिकाया राष्ट्रपति डोनाल्ड ट्रम्पं रुस, अमेरिका व चीनया रक्षा बजेट निगू भाग कटौती यायेमाःगु सुझावयात रुसी राष्ट्रपति भ्लादिमिर पुटिनं समर्थन याःगु दु।

तर, चीनं धाःसा थःगु रक्षा खर्च ‘अत्यन्त आवश्यक’ जूगु धाःगु दु। सन् २०२२ स युक्रेनय् आक्रमण याये धुंकाः रुसं सैनिक खर्च तःधंगु ल्याखय् अप्वयेकूगु दु। अथेहे, लिपांगु दँय् एसिया प्रशान्त क्षेत्रय् तनाव कायम जुया च्वंगुलिं चीनय् नं खर्च अप्वःगु दु।

चीनया विदेश मन्त्रालयया प्रवक्ता लिन जियानं नियमित पत्रकार सम्मेलनय् धयादी, “चीनं न्ह्याबलें निष्ठापूर्वक शान्तिपूर्ण विकासया लँपुइ पालन यानाच्वंगु दु।” वय्कलं थप धयादी, “राष्ट्रिय सार्वभौमसत्ता, सुरक्षा व विकासया हितया रक्षा यायेत व विश्व शान्ति कायम यायेत सीमित रक्षा खर्च अनिवार्य रुपं आवश्यक जुइ।”

युक्रेनया राष्ट्रपति भोलोडिमिर जेलेन्स्कीें युक्रेनय् शान्ति स्थापनाया निति थःम्हेसिया राष्ट्रपति पद त्वःत्येत तयार दु धका धाःगु दु। जेलेन्स्कीें युक्रेनय् नेटो सदस्यताया निति पद त्वःत्येत तयार दु धका धाःगु दु।

म्हिगः राजधानी किभय् २०२५ फोरमय् पत्रकारपि नाप खँ ल्हायेगु झ्वलय् जेलेन्स्कीें युक्रेनयात युरोप व अमेरिका निम्हेसिगु न समर्थन माः धका धासे अमेरिकाया राष्ट्रपति डोनाल्ड ट्रम्पं तःगु दुर्लभ खनिज साझेदारी यायेगु प्रस्ताव माने यायेत थः तयार दु धका बीबीसीं धाःगु दु।

थ्व स्वया न्ह्यः जेलेन्स्कीें थःम्हेसिया राज्य मिइत तयार मदु धका उगु प्रस्ताव खारेज याःगु खः। जेलेन्स्कीं अमेरिकां रुसयात युद्ध अन्त्य यायेत धाल धाःसा अमेरिकानाप खनिजया विषय खँ ल्हायेत तयार दु धका धाःगु दु। अथे हे, शान्ति सम्झौताया निति युरोपेली देय्या नेता तयेगु बैठक थौनिसे युक्रेनय् च्वने त्यःगु दु।

बैठकं वइगु दँया निति थःथःगु देशया रणनीति व  युक्रेनया सुरक्षा ग्यारेन्टीया बारेय् सहलह यायेगु तयारी दु।

श्रीलंकाया हबरानाय् यात्रुवाहक रेल किसियात थकर नया खुम्ह किसि सीगु दु। दुर्घटनाय् लानाः घाःपाः जूपिं निम्ह किसिया वासः जुयाच्वंगु दु।

श्रीलंकाय् इलय् ब्यलय् रेल व किसि दथुइ थज्याःगु दुर्घटना जुइगु याः। तर बीबीसीं थ्व श्रीलंकाय् आःतकया दकलय् ग्यानापुगु दुर्घटना जूगु बुखँ पिथंगु दु। दुर्घटनाय् मानवीय क्षति मजूगु प्रतिवेदनय् न्ह्यथनातःगु दु। श्रीलंकाया वन्यजन्तु संरक्षण संगठनया कथं दँय् दसं रेल दुर्घटनाय् लानाः २० म्ह किसि सीगु यानाच्वंगु दु।

थ्व बाहेक वंगु दँय् मनू व किसिया द्वन्द्वय् १७० म्ह स्वयां अप्वः मनूतय्गु ज्यान वंगु खःसा ५०० म्ह किसिया ज्यान वंगु खः। वन कटान व प्राकृतिक श्रोतया अभावया कारणं आः किसि मानवीय क्षेत्रय् दुहां वनेत बाध्य जुयाच्वंगु दु, गुकिं यानाः रेलया ट्रयाक, बुँया जग्गा, व गामय् दुहां वनाः दुर्घटना जुइगु जुयाच्वंगु दु।

रेल दुर्घटना बाहेक आपालं किसित विद्युत प्रहार, विषाक्त नसा, शिकारया कारणं नं सीगु यानाच्वंगु दु।

अमेरिकाया राष्ट्रपति डोनाल्ड ट्रम्पं रुस व युक्रेन युद्ध अन्त्य यायेगु शक्ति थःके दुगु खँ धयादीगु दु। मंगलवाः साउदी अरबय् अमेरिका व रुस दथुइ जूगु नापलाये ज्या लिपा ट्रम्पं युक्रेनय् जुयाच्वंगु युद्ध अन्त्य यायेगु शक्ति थःके दुगु खँ धाःगु खः। ट्रम्पं युक्रेनय् शान्ति सम्झौता यायेफइगु खँय् थःत विश्वास अप्वया वनाच्वंगु खँ धाःगु दु।

तर मंगलवाः जूगु वार्ताय् युक्रेनी पक्षयात दुमथ्याकूगु खः । निगुलिं देय्या विदेशमन्त्रीया नेतृत्वय् जूगु वार्ताय् रुस व अमेरिका दथुइ युक्रेनय् जुयाच्वंगु युद्ध अन्त्य यायेगु सहमति जूगु खः । रुसी विदेशमन्त्री सर्गेई लाभ्रोभं उकिया निंतिं निगू देसं उच्चस्तरीय वार्ता यायेगु निर्णय याःगु खँ धयादीगु दु ।रुसी पक्षय् लाभ्रोभलिसे रुसी राष्ट्रपति भ्लादिमिर पुटिनया विदेश नीतिया सल्लाहकार युरी उशाकोभ नं सहलह जूगु खः।

विदेशमन्त्री मार्को रुबियोया नेतृत्वय् दूगु अमेरिकी पुचलय् राष्ट्रिय सुरक्षा सल्लाहकार माइक वाल्ट्ज व मध्यपूर्वया निंतिं अमेरिकी विशेष दूत स्टीभ विटकफ दुगु खः । अथे हे वार्ताय् आयोजक साउदी अरबया राजकुमार व विदेशमन्त्री फैसल बिन फरहान अल साउद व राष्ट्रिय सुरक्षा सल्लाहकार मुसैद बिन मोहम्मद अल ऐवानया ब्वति दुगु खः।

२०२२ फेब्रुअरी २४ कुन्हु रुसं युक्रेनय् आक्रमण यायेवं हःताः न्ह्याःगु खः। स्वदँया युद्धय् निगुलिं देय्यात तःधंगु क्षति जूगु दु। थ्व अवधिइ रुसं म्होतिं नं २० प्रतिशत भूभाग थःगु नियन्त्रणय् काःगु दु। युक्रेनं रुसी जहाज, सैनिक सवारी साधन व छुं शहरय् नं ड्रोन आक्रमण यानाच्वंगु दु।

रुसया आक्रमणया हुनिं कम्ती नं ४० हजार युक्रेनी सीगु दु। ६८ लाख युक्रेनीत देय् त्वःतेत बाध्य जूगु दुसा ४० लाख युक्रेनीत आन्तरिक रुपं विस्थापित जूगु दु। १ करोड ४६ लाख मनूत मानवीय ग्वाहालिया आवश्यकताय् लानाच्वंगु समाचार वःगु दु।