बेलायती प्रधानमन्त्री केयर स्टार्मरं रुसी राष्ट्रपति भ्लादिमिर पुटिन याकनं वार्ताय् वयेमाःगु खँ धयादीगु दु। युक्रेनय् शान्ति सुनिश्चित यायेगु निंतिं जूगु भर्चुअल बैठकय् बेलायती प्रधानमन्त्री स्टार्मरं विश्वया नेतातय्त पुटिनयात याकनं स्वयां याकनं वार्ता टेबुलय् वयेमाःगु खँ धयादीगु बीबीसीं जानकारी ब्यूगु दु।

वय्कलं युक्रेनय् जुइगु सम्भावित शान्ति सम्झौताया रक्षा यायेत विश्वया नेतातय्त तयार जुइत नं इनाप यानादीगु दु। थ्वसिबें न्ह्यः बेलायती प्रधानमन्त्री स्टारमरं रुसी राष्ट्रपति पुटिनयात शान्तिप्रति गम्भीर मजूगु द्वपं बिसें विश्वया नेतापिन्त रुसयात निरन्तर दबाब बिइत इनाप याःगु खः। वय्कलं अमेरिका राष्ट्रपति डोनाल्ड ट्रम्पया युद्धविराम प्रस्तावलिसे पुटिनयात कासा म्हिते बी मफइगु धासें युक्रेनया निंतिं सुरक्षा ग्यारेन्टी बीत थः समकक्षीतय्त इनाप यानादीगु खः।

युक्रेनय् शान्ति सुनिश्चित यायेगु निंतिं जूगु भर्चुअल बैठकय् युरोपेली साझेदार, इयु कमिशन, नेटो, युक्रेन, क्यानाडा लगायतया थ्यं मथ्यं २५ म्ह नेतात उपस्थित जूगु बेलायती प्रधानमन्त्री स्टार्मरया ज्याकुथिं जानकारी ब्यूगु दु।

युक्रेनया राष्ट्रपति भोलोदिमिर जेलेन्स्कीं अमेरिकां प्रस्ताव याःगु ३० न्हुया युद्धविरामयात समर्थन याःसां नं रुसी राष्ट्रपति पुटिनं धाःसा उकियात स्वीकृति बिउगु मदुनि। अमेरिकाया राष्ट्रपति ट्रम्पं छगू सम्झौताया निंतिं आशावादी जूगु व पुटिनलिसे बांलाःगु व उत्पादनशील खँल्हाबल्हा जूगु खँ बीबीसीया रिपोर्टय् न्ह्यथनातःगु दु।

अमेरिकां दक्षिण अफ्रिकाया राजदूत इब्राहिम रसूलयात निष्कासन याःगु दु। अमेरिकाया विदेशमन्त्री मार्को रुबियों दक्षिण अफ्रिकी राजदूतयात अमेरिका व राष्ट्रपति डोनाल्ड ट्रम्पप्रति घृणा याःगु द्वपं धका धासे बीबीसीं जानकारी ब्यूगु दु।

राजदूतयात निष्कासन याःगु घोषणा यासें अमेरिकाया विदेशमन्त्री रुबियों सामाजिक संजाल प्लेटफर्म एक्सय् दक्षिण अफ्रिकाया राजदूतयात आः अमेरिकाय् लसकुस मजुइगु च्वःगु दु। वय्कलं इब्राहिम रसूल अमेरिकायात घृणा याइम्ह नश्लवादी राजनीतिज्ञ जूगु खँ न्ह्यथनादिल।दक्षिण अफ्रिकालिसे तनाव अप्वया वनाच्वंगु इलय् अमेरिकां थः राजदूतयात निष्कासन यायेगु निर्णय याःगु बीबीसीया बुखँय् न्ह्यथनातःगु दु।

थ्वसिबें न्ह्यः फेब्रुअरी महिनाय् ट्रम्पं अन गोरा किसानतय्गु जग्गा जफत यायेफइगु कानूनया हवाला बियाः दक्षिण अफ्रिकायात अमेरिकी ग्वाहालि रोक्का याःगु खः। ट्रम्पं दक्षिण अफ्रिकाया किसानतय्त थःगु देशय् बसोबास यायेत लसकुस दु धकाः धाये धुंकाः वंगु वालय् निगू देय् दथुइ तनाव अप्वःगु खः।मेखे दक्षिण अफ्रिकाया राष्ट्रपति ज्याकुथिं धाःसा अमेरिकां थः राजदूतयात निष्काशन याःगु निर्णयप्रति दुःख प्वंकूगु धाःगु दु।

अमेरिकाय् डाइभर्ट यानाः अवतरण याःगु छुं ई लिपा हे छगः विमान मिँ नःगु खः। अमेरिकन एयरलाइन्सया छगः विमानं आइतवाः बहनी डाइभर्ट यानाः कोलोराडोया डेनभर विमानस्थलय् अवतरण याःगु छुं ई लिपा हे इन्जिनय् मिं नःगु खः।

अमेरिकन एयरलाइन्सया बोइङ ७३७–८०० विमान ४०१२ कोलोराडो स्प्रिंग्स विमानस्थलं डलास–फोर्टवर्थ अन्तर्राष्ट्रिय विमानस्थल वनाच्वंगु खः। उडानया झ्वलय् इन्जिनय् गडबडी वअनखनेदयेवं विमानयात डाइभर्ट यानाः डेनभर विमानस्थलय् अवतरण याःगु खः।

अवतरण जुइ धुंकाः यात्रु कुहां वये न्ह्यः हे विमानया इन्जिनय् मिं नःगु खःसा दुनेपाखें नं कुँ पिहां वयाच्वंगु खः।विमानस्थल कुँया सुपाँचं भुनातःगु खः। अमेरिकाया सञ्चारमाध्यम सीएनएनं यात्रुत झ्यालं कुहां वयाः विमानया पपूइ च्वनाच्वंगु खँ न्ह्यथंगु दु।

सीएनएनं सार्वजनिक याःगु छगू भिडियोय् यात्रुत विमानया पपूइ दनाच्वंगु खनेदूगु दु। इपिं पपूइ दना च्वंबलय्, जहाजं कुँ व ज्वालाया प्लम थहां वयाच्वन।

भारतया लद्दाखस्थित कारगिलय् शुक्रवाः थौ सुथय् भुखाय् ब्बःगु दु।

स्थानीय ई कथं २ बजे जुया ५० बजे मिनेतय् ५.२ म्याग्निच्युडया धक्का मापन जूगु दु धका भारतया राष्ट्रिय भूकम्प विज्ञान केन्द्रं धाःगु दु।

उगु भुखाय् याःगु धक्का जम्मु कश्मीर तक महसुस जुगु खः।

रुसी राष्ट्रपति भ्लादिमिर पुटिनं युक्रेनय् युद्धविरामया विषय थः सकारात्मक जूगु तर उकिया निति छुं शर्त तःगु दु।

अमेरिकालिसेया वार्ताय् युक्रेनं ३० न्हुया युद्धविरामया योजनाय् सहमति प्वंकूगु सन्दर्भय् रुसं थुज्वःगु प्रतिक्रिया बिउगु खः। पुटिनं युद्धविरामया विचाःयात सहमति प्वंकूगु खः, तर छुं शर्त तयाः बीबीसीं जानकारी ब्यूगु दु सा युद्धविरामया प्रकृतियात कयाः न्ह्यसः ल्यनाच्वंगु दु।

पुटिनं युद्धविरामं स्थायी शान्ति जुइमाःगु व युद्धया मूल कारणयात स्थायी रुपं मदयेकेमाःगु खँ धाःगु दु। थ्व विवादया मू कारण युक्रेनं थगुने रुसया कुस्र्क क्षेत्रय् सैन्य आक्रमण यानाः छुं भूभाग कब्जा याःगु द्वपं खः। आः रुसं उगु क्षेत्रय् पूर्ण नियन्त्रण काःगु व अनया युक्रेनी सेना अलपत्रय् लाःगु वय्कःया दाबी दु।

वय्कलं अमेरिकाया राष्ट्रपति डोनाल्ड ट्रम्पयात थः अमेरिकाया सहकर्मी व साझेदारलिसे सहलह यायेमाःगुलिं याकनं हे सम्पर्क यायेगु धयादीगु दु। रुसया प्रतिक्रिया लिपा युक्रेनया राष्ट्रपति भोलोदिमिर जेलेन्स्की युद्धविरामया योजनाप्रति पुटिनं ब्यूगु प्रतिक्रियायात शंकास्पद धाःगु दु। वय्कलं रुसं युद्धविरामया प्रस्तावयात तप्यंक अस्वीकार मयाइगु तर व्यवहारय् अस्वीकार यायेगु तयारी यानाच्वनागु धयादिल।

थ्वसिबें न्ह्यः रुसी राष्ट्रपति भ्लादिमिर पुटिनया ग्वाहालिमि युरी उशाकोभं अमेरिकां प्रस्ताव याःगु युक्रेनलिसे ३० न्हुया युद्धविरामयात अस्वीकार याःगु खः।