युक्रेनया राष्ट्रपति भोलोदिमिर जेलेन्स्कीयात अमेरिकां याःगु व्यवहारप्रति युरोप असन्तुष्ट जूगु दु।

जेलेन्स्की व अमेरिकाया राष्ट्रपति डोनाल्ड ट्रम्प दथुइ थ्यं मथ्यं १० मिनेट तक तच्वःगु विवाद लिपा अमेरिकां जेलेन्स्कीयात ह्वाइट हाउसं पितिना छ्वःगु खः।अनंलि जेलेन्स्कीं विवाद समाधान जुइफुगु धाःगु खः, तर ट्रम्पं थः लिहां वयेगु सन्देश बियाः निम्ह नेतातय् दथुइ जुइगु निर्धारित मंकाः पत्रकार सम्मेलन रद्द याःगु खः।

थ्व बैठकयात युक्रेनया खनिजय् अमेरिकाया पहुँच सुरक्षित यायेगु व रुस व युक्रेन युद्धयात पनेगु निंतिं छगू पलाःया रुपय् काःगु खःसां लिच्वः धाःसा उल्टा हे जुल। ट्रम्प व जेलेन्स्की दथुइ जूगु वार्ता लिपा हलिन्यकं प्रतिक्रिया वयेगु सुरु जूगु दु। युरोपेली आयोगया नायः उर्सुला भन डेर लेयेनं सामाजिक संजालय् युक्रेनया समर्थनय् च्वयाः निडर जुइत इनाप याःगु दु।

युरोपेली संघया विदेश नीति प्रमुख काजा कलासं युक्रेन युरोपया जूगु व थःपिं युक्रेनया पक्षय् दना च्वनागु खँ धयादीगु दु। क्यानाडाया प्रधानमन्त्री जस्टिन ट्रुडों युक्रेनयात निरन्तर समर्थन यायेगु धयादीगु दु। फ्रान्सया राष्ट्रपति इमैनुएल म्याक्रों नं थःम्हं युक्रेनयात निरन्तर ग्वाहालि यायेगु धयादीगु दु।

जर्मनीया चान्सलर ओलाफ शोल्जं युक्रेन जर्मनी व युरोपलिसे दनेगु धाःगु दु।पोल्याण्डया प्रधानमन्त्री डोनाल्ड टस्कं नं थः युक्रेनलिसे दना च्वनागु खँ धाःगु दु। बेलायती प्रधानमन्त्री केयर स्टार्मरं ट्रम्प व जेलेन्स्कीलिसे खँ ल्हासें थःगु देसं युक्रेनयात बियाच्वंगु समर्थन निरन्तर जुयाच्वंगु धाःगु दु।

अष्ट्रेलियाया प्रधानमन्त्री एन्थोनी अल्बानेसं नं युक्रेनयात समर्थन यासें छगू विज्ञप्ति सार्वजनिक याःगु दु। अमेरिकाय् नं सांसदपिन्सं जेलेन्स्कीयात याःगु व्यवहारया विरोध याःगु दु।

अमेरिका व युक्रेन दथुइ जुइत्यःगु खजिन सम्झौता असफल जुगु दु। युक्रेनय् च्वंगु खनिज अमेरिकां छ्यले दइगु कथं सम्झौता यायेत तयारी जुगु वार्ता असफल जुगु दु।

थ्व स्वया न्ह्यः अमेरिका व युक्रेन दथुइ खनिज सम्बन्धी सम्झौता यायेगु सहमति जुगु दु। उगु बैठकय् हस्ताक्षर यायेत तयारी जुगुलि बैठक तनावपूर्ण जुगु खः।युक्रेनया राष्ट्रपति जेलेन्स्की बैठक क्वमचायेवं वःगुलि सम्झौता न्ह्यामःगु धका अन्तर्राष्ट्रिय सञ्चार माध्यमं धाःगु दु।

खनिज सम्झौता जुइगु निश्चित जुइवं अमेरिकाया राष्ट्रपति ट्रम्पं बैठक सुरु जुइ न्ह्यः जेलेन्स्कीयात प्रशंसा तक याःगु खः। तर, बैठक सुरु जुइ धुका याःगु अवस्था सामान्य धाःसा मजु। समाचार एजेन्सी रोयटर्सया कथं उगु बैठक चर्काचर्की जुइवं ट्रम्पं थुगु सम्झौता न्ह्यने यकेगु पक्षय् खनेमदुगु दु।

अमेरिकाया राष्ट्रपति डोनाल्ड ट्रम्पं युक्रेनया राष्ट्रपति भोलोदिमिर जेलेन्स्कीयात स्वंगूगु विश्वयुद्ध सुरु यायेत स्वःगु द्वपं ब्यूगु दु।ह्वाइट हाउसय् निम्ह राष्ट्रपति दथुइ बिवाद तच्वःगु दु।

उगु खल्हाबल्हाय् ट्रम्पं जेलेन्स्कीयात चेतावनी बिसें धाःगु दु, “छिं स्वंगूगु विश्वयुद्धलिसे जुवा म्हिताच्वनादीगु दु।” युक्रेन व अमेरिका दथुइ प्रस्तावित खनिज सम्झौता वार्ताय् असफल जुइवं ट्रम्प आक्रोशित जूगु खः।

ट्रम्पं जेलेन्स्कीयात शान्तिया निंतिं तयार जुयाः जक मेगु वार्ताय् वयेत धाःगु खः। ट्रम्पं तःधंगु बयान बिइ धुंकाः जेलेन्स्कीया बैठक ईसिबें न्ह्यः हे पिहां वंगु ख ।उगु बैठकया मू एजेण्डा अमेरिकां युक्रेनलिसे याःगु खनिज स्रोत सम्झौता खः ।

ट्रम्पं थ्व सम्झौतायात युद्धविरामया न्हापांगु शर्त कथं काःगु खः। तर, उपराष्ट्रपति जे.डी.नेतृत्वय् जुगु कूटनीतिक दबाबया कारण वार्ता तनावपूर्ण जुगु धका धाःगु दु।थ्व घटनां अमेरिका व युक्रेनया स्वापूयात अझ जटिल यानाब्यूगु दु।

अले युक्रेनयात अमेरिकी सैन्य ग्वाहालिया निरन्तरता नं अनिश्चित दु।

प्यालेस्टाइनया विद्रोही संगठन हमासं रेडक्रस पाखे प्यम्ह इजरायली बन्धकतय् सीम्ह इजरायलयात लःल्हाःगु दु।

रेडक्रसं इजिप्टया मध्यस्थकर्तापाखें इजरायली रक्षा सेनायात सीम्ह लःल्हाःगु खः। इजरायलया प्रधानमन्त्री बेन्जामिन नेतान्याहुया ज्याकुथिं बन्धकतय् अवशेष दुगु धाःगु प्यंगू बाकस प्राप्त जूगु पुष्टि याःगु सीएनएनं जानकारी ब्यूगु दु। आः सीम्ह म्हसीकेगु प्रक्रिया न्ह्याःगु बुखँय् न्ह्यथनातःगु दु।

हमासं लःल्हाःगु प्यम्ह सीम्हया म्हसीका पुष्टि मजूगुलिं बन्धकतय् छेँजःपिंलिसे निरन्तर सम्पर्कय् दुगु व सीम्हया पूर्ण पहिचान लिपा सरकारी जानकारी बिइगु तयारी संगठनं यानाच्वंगु दु। थ्वहे झ्वलय् इजरायलं सलंसः प्यालेस्टाइनी कैदीतय्त त्वःतेगु ज्या न्ह्याकूगु दु। इजरायलं पश्चिमी तटया जेलं ६०० स्वयां अप्वः प्यालेस्टाइनी कैदीतय्त त्वःतेगु ज्या न्ह्याकूबलय् हमासं सीम्ह लःल्हाःगु खः।

थुकियात युद्धविराम सम्झौता अन्तर्गत न्हापांगु चरणया अन्तिम आदान प्रदान धाइ। न्हापांगु चरणया युद्धविराम सम्झौता क्वचाइगु जूगु दु। थ्व स्वया न्ह्यः इजरायलं बन्धक हस्तान्तरणयात अपमानजनक धासें विरोध यासें कैदी त्वःतेत लिबाका वयाच्वंगु खः। हमासलिसे छुं नं समारोह मयासे सीम्ह लःल्हायेगु सहमति जुइ धुंकाः कैदी त्वःतेगु लँपु चाःगु इजरायली अधिकारीपिन्सं धाःगु दु।

रुस व अमेरिकाय कूटनीतिज्ञत थौं इस्तानबुलय् नापलायेत थःथःगु दूतावास सम्बन्धी विषय समाधान यायेत्यंगु दु।लिपांगु इलय् निगू देय्या स्वापूइ सुधार जूगु इलय् रुसी व अमेरिककाया अधिकारीत इस्तानबुलय् नापलानाः थ्व विषय थप सहलह जुयाच्वंगु रुसी विदेशमन्त्री सर्गेई लाभ्रोभं धयादीगु दु।

अमेरिकी राष्ट्रपति डोनाल्ड ट्रम्पं वंगु महिनाय् पदभार ग्रहण याये धुंकाः अमेरिकाया विदेश नीतिइ पूर्णरुपं हिउपाः हःगु दु। वं रुसी राष्ट्रपति भ्लादिमिर पुटिनलिसे स्वापू तयाः स्वदँ स्वयां अप्वः ई लिपा न्हापांखुसी रुसलिसे उच्चस्तरीय वार्ता न्ह्याकूगु खः।अ

मेरिकाया पुर्व राष्ट्रपति जो बिडेनया प्रशासनय् निगुलिं देसं छम्हं मेम्हं दूतावासया कर्मचारीयात पितिना छ्वयेधुंकाः लिपांगु बैठकय् कूटनीतिक मुद्दा समाधान यायेगु विषय केन्द्रीत जुइगु बीबीसीं जानकारी ब्यूगु दु।लाभ्रोभ व अमेरिकाया विदेशमन्त्री मार्को रुबियो दथुइ फेब्रुअरी १८ तारिखय् साउदी अरबया राजधानी रियादय् भेटवार्ता जूगु खः।

अन इमिसं युक्रेन मदयेक युक्रेन युद्धया बारे वार्ता न्ह्याकेगु सहमति यात। उबलेनिसें निगुलिं पक्ष लिक्क वःगु दु, गुकिं युक्रेनयात छखे तयातःगु दु।