Display Style:
Column Style
इरानी कूटनीतिज्ञ असदुल्लाह असादीयात बेल्जियमया अदालतं विल २०दँ या सजाय
पोहेलागा अष्टमी ११४१, माघ २३ शुक्रवाः
फ्रान्सया इरानी कूटनीतिज्ञ असदुल्लाह असादीयात बेल्जियमया अदालतं २०दँ तकया जेल सजाय न्यंकूगु दु ।
वियनास्थित इरानी दूतावासय् ज्या याइम्ह ४९दँया असादीयात फ्रान्सय् निर्वासित विपक्षी पुचलं याःगु ज्याझ्वलय् बम तयेगु योजना दयेकूगु द्वपं ब्यूगु दु ।
असादीयात बम तःगु दोषी ठहर यानाः सजाय न्यंकूगु खः । असादीयात सन् २०१८ या जुलाई महिनाय् ज्वंगु खः ।
सुं न इरानी अधिकारीयात सन् १९७९ या क्रान्तिलिपा युरोपेली संघय् थन्यागु द्वपं ब्यूगु थ्व न्हापांगु घटना खः । असादीबाहेक मेपिं स्वम्हेसित न बम बिस्फोट याकेगु योजनाया दोषी ठहर याःगु दु ।
इमित जर्मनी, फ्रान्स व बेल्जियमया प्रहरीं मंका अपरेशनया झ्वलय् ज्वंगु खः । फ्रान्सं इरानया गुप्तचर विभागय् योजना दयेकाः प्रहार यायेगु योजना दयेकूगु द्वपं ब्यूगु दु ।
थुखय् इरानं द्वपंयात अस्वीकार यानावःगु दु । द्वपंयात थःपिं विरुद्धया षड्यन्त्र जूगु प्रतिक्रिया ब्यूगु दु ।
१७दँ पुवन फेसबुक
पोहेलागा सप्तमी ११४१, माघ २२ बिहीवाः
सोसल मिडिया साइट फेसबुकं थौं १७दँ पूवंकूगु दु । हावर्ड युनिभर्सिटीया ४म्ह ब्वंमिपिं मार्क जुकरबर्ग, एडुआर्डाे सेभरिन, डस्टिन मोस्कोवित्ज, क्रिस ह्यूजं ४ फेब्रुअरी २००४ य् लञ्च याःगु खः ।
न्हापां थुकिया नां “द फेसबुक” तःगु खः । थ्वः साइट हावर्ड युनिभर्सिटीया ब्वनामिपिनिगु नितिं पिकाःगु खः । सुरुवातय् थ्वः अमेरिकाया कलेजय् फेसबुक एप न्ह्याकूगु खः ।
थुकिया क्रेस खना पेपलया फाउण्डर पिटर थीलं फेसबुकय् ३५५ करोड ध्यबा लाय् तल । २०१२ य् फेसबुक छ्यलिपिंनिगु ल्याः १गू अर्ब थ्यन, गुकिंयाना हलिंया हे तःधंगु सोसल मिडिया प्लेटफर्म जूल ।
क्यालिफोर्नियाया मेनलो पार्कय् फेसबुकया मू ज्याकूथि दु ।
सैनिक ‘कु’ या विरोध अन्तर्राष्ट्रिय समुदायं नं यायेमा ः महासचिव गुटरेज
पोहेलागा सप्तमी ११४१, माघ २२ बिहीवाः
संयुक्त राष्ट्रसंघया महासचिव एन्टोनियो गुटरेजं म्यानमारय् जूगु सैनिक ‘कु’ या विरोध यानादीगु दु ।
उगु घटनाया अन्तर्राष्ट्रिय समुदायं नं विरोध यायेमाःगु वयेकया तर्क दु । चुनावयात अःखः यायेगु ‘अस्वीकार्य’ जूगु धासें ‘कु’ याम्हसित देशय् शासन यायेगु पहः थथे मखु धका थुइकेमाःगु ई वःगु वयेकलं धयादील ।
संयुक्त राष्ट्रसंघया सुरक्षा परीषदया वइगु मुँज्याय् थुगु खँय् सहलहया तयारी जुयाच्वंगु इलय् महासचिव गुटरेजया थुकथं प्रतिक्रिया वःगु खः ।
म्यानमारया सेनां सत्ता कजय् काःबलय् निर्वाचित प्रतिनिधि आङ साङ सुची व राष्ट्रपति विन मिन्टयात नियन्त्रणय् काःगु खः ।
म्यानमारय् सेनां कू याना सत्ता लाकाकायेधुंका नियन्त्रणय् लाम्ह नेतृ आङ साङ सूचीया प्रहरीं थी थी अभियोगत दर्ता याःगु दु ।
वयेकयात देय्या कानून हाचांगाःगु , आयात व निर्यात कानूनया हाचांगाःगु लिसेंया अभियोग तःगु दु । सूचीया छेँय् छापा तयेगु झ्वलय् सैन्य अधिकारीपिन्सं अवैध कथं आयात याःगु सञ्चार सम्पर्क उपकरण लूगु न्ह्यथंगु खः ।
थुखे राष्ट्रपति विन मिन्टयात प्राकृतिक प्रकोप व्यवस्थापन कानून हाचांगाःगु प्रहरीं अभियोग तःगु दु । प्रहरीया अभियोग पौ अदालतय् दर्ता जूगु धाःगु दु ।
थुखे अन्तर्राष्ट्रिय समुदायपाखें विरोध जुयाच्वंगु इलय् नागरिक स्तरपाखें नं विरोध न्ह्यागु दु । वंगु चान्हय् राजधानीया बासिन्दां द्यय्माः थाना विरोध याःगु खःसा छुं सवारी ज्वलंया हर्न छक्वःलं न्यायेकुुगु खः ।
चिकित्सकपिन्सं तकं आन्दोलन न्ह्यागु दु । कोरोना महामारीया समयमा सैन्य शासकयात दबाब अप्वयेकेत छुं चिकित्सकं राजिनामा तकं बिउगु दु ।
सर टोम मूरे कोरोनाया हुनिं मन्त
पोहेलागा षष्ठी ११४१, माघ २१ बुधवाः
हलिंमय् कोरोना भाइरसलिसे ल्वायेगु नितिं बेलायातयात लखांैलख डलर ग्वहालि याःम्ह क्याप्टेन सर टोम मूरे कोरोनाया हुनिं मन्त ।
सच्छि दँयाम्ह टोमं ३३गू मिलियन पाउण्ड एनएचएस च्यारिटीया नितिं फण्ड मुनादीगु खः । टोम वंगु चान्हय् वासः यायेगु झ्वलय् अस्पतालय् मदूगु बीबीसीं न्ह्यथंगु दु ।
टोम मदूगुलिइ बेलायतया महारानीं समवेदना प्वंकादीगु दु । समवेदना प्वंकुसें महारानीं टोमया योगदान च्वछायेबहः जूगु व उकिं हलिंयात न्हूगु पहःलं न्ह्यायेत लँपू बिउगु उल्लेख यानादील ।
टोम छवा निसें कोरोना संक्रमणया शिकार जुयादीगु खः । तर वयेकयात कोरोना विरुद्धया खोप मबिउगु खः ।
रुसी राष्ट्रपतिया कट्टर आलोचक नाभाल्नीयात जेल सजाय
लहनान्युज | पोहेलागा षष्ठी ११४१, माघ २१ बुधवाः
रुसी राष्ट्रपति भ्लादिमिर पुटिनया कट्टर आलोचक नाप अभियानकर्मी एलेक्सी नाभाल्नीयात जेल सजाय जुइगु दु ।
वयकःयात मस्काया छम्ह न्यायाधीशं स्वदँ व खुलाया लागि जेल सजाय बिःगु दु धका बीबीसीं धाःगु दु ।
थःत जेल सजाय जुइवं नाभाल्नीं राष्ट्रपति पुटिनविरुद्ध थःम्हेसिया चुनौती बियागुलि थःगु सः दबेयायेत स्वःगु धका प्रतिक्रिया बियादीगु दु ।
वयकःयात ज्वःगुलि रुसया थीथी थासय् विरोध प्रदर्शन जुयाच्वंगु दु ।
वःगु अगष्टय् रूसया ओम्स्कपाखे मस्को वनेगु झ्वलय् विमानय् अकस्मात बिरामी जुइवं नाभाल्नीयात आकस्मिक अवतरण याना उपचारय् यकूगु खः।
