छगः यात्रुवाहक बसय् मिँच्यायेवं क्यामरुनय् ५३ म्ह मनू सीगु दु। अथेहे २९ म्ह मनूत गम्भीर घाःपाः जूगु दु।

पेट्रोलियम पदार्थ ज्वना वःगु ट्यांकर नाप ल्वाना बसय् तक मिँ च्याःगु खः ।उगु दुर्घटनाय् सीपिनिगु शव च्याना म्हसिइके हे थाकूगु दु धका स्थानीय अधिकारीपिन्स धाःगु दु ।

देय् या मध्य पश्चिमी थासय् क्लिफ अफ डिस्चाङ धइगु थासय् स्थानीय ई कथं म्हिगः बुधवाः न्हिनसिया ३ः३० बजे दुर्घटना जूगु धका अधिकारीपिन्स धाःगु खः। उगु दुर्घटना जूगु बसय् ७० गू सिट दुगु खः ।

सरकारी अधिकारीपिन्स दुर्घटनाया बारेय् अनुसन्धान जूयाच्वंगु जानकारी बिःगु दु। प्रारम्भिक विवरण कथं पेट्रोलियम पदार्थ ढुवानी याइगु ट्यांकरया चालकं नियन्त्रण गुमे यायेवं दुर्घटना जूगु धका धाःगु दु ।

भारतय् कोरोना भाइरस नियन्त्रणया लागि जारी याःगु निर्देशिका लागू जुयाच्वंगु ई क्वचात्यःलि हानं थपे याःगु दु।

भारतीय केन्द्रीय सरकारं निर्देशिका कार्यान्वयनया ई लच्छि थपे यायेगु घोषणा याःगु दु । छेँय् पिहावयेत हरेक नागरिकपिन्स मास्क अनिवार्य तये माःगु, सामाजिक दूरी कायम यायेमाःगु, स्यानिटाइजर छ्यले माःगु व सावः लखं ल्हासिले माःगु लगायत नियमया पालना यायेमाःगु व्यवस्था उगु निर्देशिकाय् दु।

थ्व स्वयान्हयःया निर्देशिकाय् थ्व हे जनवरीइ तक लागू यायेगु निर्णय जुगु खः । आः थुगु निर्देशिका फेब्रुअरी २८ तारिख तक लागू यायेगु निर्णय याःगु खः। भारतय् लिपागु छु महिनानिसे कोरोना भाइरसपाखे सङ्क्रमित जूपि म्हो जुया वःगुलि सरकारं निर्देशिकायात कडा कथं लागू यायेगु निर्णय याःगु खः।

भारतय् आः सङ्क्रमितपिनिगु अवस्थाय् दु व न्हुपिं थपे जुपि सङ्क्रमित आः म्हो जुया वयाच्वंगु दु। 

दक्षिण कोरियाय् न्हापागु पटक छम्ह भउचायात कोरोना भाइरस सङ्क्रमण पुष्टि जूगु दु । अनया ख्याङ्सान जिन्जुया छगु बस्तीइ छम्ह छेँ लहिनातःम्ह भउचायात कोरोना भाइरस सङ्क्रमण खनेदुगु दु।

दक्षिण कोरियाय् मनूबाहेक जनावरपिन्त कोरोना सङ्क्रमण खनेदुगु थ्व न्हापागु घटना खः। लिपागु इलय् उगु बस्तीइ कोरोना महामारी फैलै जुगु खः । उउगु थासय् कन्ट्याक्ट ट्रेसिङया आधारय् परीक्षण याःगु इलय् उम्ह भउचायात तक सङ्क्रमण लुगु खः । उम्ह भउचायात नाप उगु परिवारया स्वम्ह सदस्यपिन्त भाइरस पुष्टि जूगु खः।

उगु थासय् मनू बाहेक मेपि जनावरयात तक भाइरस खनेदुगुलि सकसित सचेत जुइत दक्षिण कोरिया सरकारं इनाप याःगु दु। कोरिया सरकारं कोभिड–१९ विरुद्ध खोपया तयारी जुयाच्वंगु दु । सावर्जनिक थासय् प्यम्ह मनू स्वया अप्वो भेला जुइ मदुगु, सामाजिक दूरी पालना याये माःगु व ‘नो मास्क नो राइड’ नियमयात कडाइ याःसा सङ्क्रमण फैल जइगु धाःसा रोके जुगु मदुनि ।