चीनया जोङ सनसान भारतया मुकेश अम्बानीयात लिउने लाका एसिया हे दकलय् धनी मनू जुगु दु। ब्लुमबर्ग बिलेनियर्स इण्डेक्सया कथं सन् २०२० य् सनसानया सम्पत्तिइ न्ह्यगू अर्ब डलर अप्वो जुगु खः।

थ्व नाप जोङं भारतया धनाड्य अम्बानीयात लिउने लाका नाप थःगु देशया ज्याक मायात तक लिउने लाकूगु दु। भ्याक्सिन व बोतलया लः उत्पादन याइगु कम्पनीया कारण जोङं थुगु उपलब्धि याःगु खः धका बीबीसीं धाःगु दु। जोङ नं थुगु दँय् भ्याक्सिन निर्माण कम्पनी बेइजिङ वान्टाइ बायोलोजिकल कम्पनीयात चीनया सेयर बजारय् सूचीकृत याकूगु खः।

ब्लुमबर्ग बिलेनियर्स इण्डेक्सया कथं जोङया कूल सम्पत्ति ७७.८ अर्ब डलर दुगु खः। इण्डेक्सया कथं जोङ सनसान आः विश्वया हे झीछम्ह धनी मनूखय् लाःगु दु। 

चीनय् न न्हुगु स्वरूपया कोरोना भाइरस खनेदुगु दु ।

कोरोना भाइरसया सुरुवात जुगु दँच्छि लिपा चीनय् न्हुगु भाइरस खनेदुगु दु । थौ स्वया दँच्छि न्ह्यः कोरोना भाइरस चिनं सुरु जुगु खः। थौंकन्ह्य थुगु भाइरस हलिन्यक खनेदय् धुकुगु दु।

दच्छि लिपा चीनय् २३ दँ दुम्ह छम्ह मिसायात न न्हुगु भाइरस खनेदुगु धका बीबीसीं धाःगु दु। न्हुगु स्वरुपया कोरोना भाइरस सङ्क्रमित बेलायतय् यक्को खनेदुगु दु सा मेगु देशय् न फैलै जुइगु सुरु जुइ धुकुगु दु।

बेलायतय् न्हुगु स्वरुपया कोरोना भाइरस खनेदय् वं बेलायतपाखे वयेगु वनेगु यक्को देशय् बन्द याःगु दु।

अमेरिकाय् न न्हुगु स्वरूपया कोरोना भाइरस पिहावःगु पुष्टि जुगु दु।

कोलोराडोय् छम्ह मनूयात न्हुगु प्रकारया कोरोना भाइरस खनेदुगु धका बीबीसी धाःगु दु।

उम्ह मनूयात आः आइसोलेसनय् तया निगरानी यानाच्वुं दु। अमेरिकी स्वास्थ्य अधिकारीपिन्स व नाप सम्पर्कय् दुपिन्त कन्ट्याक्ट ट्रेसिङ यानाच्वंगु दु धका धाःगु दु ।

अधिकारीपिन्स अमेरिकाय् न्हुगु स्वरूपया कोरोना फैलै जूगु आशंका याना वयाच्वंगु खः।

कोरोना महामारीपाखे दकलय् अप्वो प्रभावित देय् अमेरिकाय् आःतक १ करोड ९५ लाख स्वया अप्वोसित संक्रमण पुष्टि जुइ धुकुगु दु।

अथेहे ३ लाख ३८ हजार स्वया अप्वो मनू सी धुकुगु दु।

अमेरिकाया न्हुम्ह निर्वाचित राष्ट्रपति जो बाइडेन न थःम्हेसिया पदभार ग्रहण यानागु सच्छि दिं दुने १० करोड अमेरिकी नागरिकपिन्त कोरोना भाइरसविरुद्धया खोप उपलब्ध याकेय्गु धका घोषणा याःगु दु।

वःगु जनवरी २० य् पदभार ग्रहण याःगु दिं निसे १०० दिं दुने १० करोड मनू तयेत खोप बिइगु उपलब्ध यायेकेगु धका धाःगु खः। वयकलं थ्व स्वया न्ह्यः हे घोषणा यानागु खोपया लक्ष्य पूरा यायेगु ट्रम्प प्रशासन च्यूताः मकागु धका धाःगु खः।

कोरोना भाइरसविरुद्धको खोप वितरणय् राष्ट्रपति डोनाल्ड ट्रम्प प्रशासनं आः याना वयाच्वंगु ज्याया आलोचना यानादीगु दु।

ट्रम्प प्रशासनं डिसेम्बरया अन्त्य तक २ करोड नागरिकपिन्त खोप बिइगु लक्ष्य काःगु खः। उगु लक्ष्य कथं ज्या मजुगु धाःसे असन्तुष्टि प्वकादीगु खः ।

अमेरिकी राष्ट्रपति डोनाल्ड ट्रम्पं कोरोना भाइरस राहत प्याकेज सम्बन्धी विधेयकय् ल्हाचिं तयादीगु दु।

सदनपाखे पास जुगु प्याकेजय् अनावश्यक खर्च जुगु व तर नागरिकयात तसक कम ध्यवा जक छुटे यागु धासे ल्हाचि तयेत अस्वीकार याःगु खः ।

ट्रम्पं ल्हाचिं तयेवं कोरोना भाइरसया महामारी कारण वित्त समस्या वःगुलि अमेरिकी नागरिकया लागि तय जूगु राहत प्याकेज सम्बन्धी विधेयक कानुनय् हिलिइ। ट्रम्पं विधेयकय् ल्हाचिं मतःगुलि लाखौँ अमेरिकीपिन्स शनिवाः निसे राहत काये मखःगु खः। राष्ट्रपति ट्रम्पं धाःसा नागरिकपिन्त बिइगु ध्यवा खुसः डलरपाखे अप्वोयेका निद्धः डलर दयेकेगुलि डेमोक्राटपि तयार जूगु खः।

तर ट्रम्पया हे पार्टी रिपब्लिकनया सांसदपि विपक्षय् जुगुलि ट्रम्पया कुतः पूरा मजुगु खः। कोरोना भाइरस ग्वाहालि विधेयक धाःसा उगु विधेयकय् कोरोनानाप सम्बन्धित छु न व्यवस्था मदुगु धका ट्रम्पं आरोप बिःगु खः । अमेरिकी संसदपाखे ९ खर्ब डलर बराबरया राहत प्याकेज वःगु सोमवाः पारित जूगु खः ।

राहत प्याकेजय् समस्या वःपि नागरिकपिन्त तपिक नगद बिइगु व महामारीया कारण प्रभावित व्यवसाय सञ्चालनया लागि ग्वाहालि व बेरोजगार भत्ता समावेश दु ।