कोरोना भाइरसपाखे सङ्क्रमित जुम्ह मनूयात म्हतिइ न मेगु न्याला तक सङ्क्रमण मजुइगु धका छगु अध्ययनं क्यःगु दु।

सङ्क्रमण मजुम्ह मनू स्वया छकः सङ्क्रमित जूम्ह मनू हाकन सङ्क्रमण जुइगु सम्भावना ८३ प्रतिशतं कम जुइगु पब्लिक हेल्थ इङ्ग्ल्यान्डया अध्ययनं क्यःगु दु। तर विज्ञपिनिगु धापू कथं कोरोना भाइरसया सङ्क्रमण जुइ फुगुगु व मेम्हसित सारे याये फइगु सम्भावना धाःसा यक्को दु धका बीबीसीं धाःगु दु। बेलायतय् झन्डै २१ हजार स्वास्थ्यकर्मी पिनिगु नियमित परीक्षणया लिच्वः कथं अथे अध्ययन याःगु खः ।

उकि मध्ये न्हापा सङ्क्रमण मजूपि मनूत मध्ये ३१८ म्ह सङ्क्रमण जूगु व सङ्क्रमित जुया लाय्धुकुपि ६६१४ म्ह मध्ये ४४ म्हेसित जक हाकन सङ्क्रमण जुगु खः। वैज्ञानिकपिन्स उपि स्वास्थ्यकर्मी पिनिगु स्वास्थ्यया अवस्था दच्छि तक अध्ययन याइ। पुनः सङ्क्रमित जुपि सू मनू तयेके छु लक्षण खने मदुसा उमिके भाइरसया मात्रा यक्को खने दुगु व मेपिन्त सारे याये फइगु धाःसा च्युताःया विषय जुगु धका हप्किन्सं धाःगु दु।

विश्व स्वास्थ्य सङ्गठन (डब्ल्यूएचओ) या टिम चीनया वुहान सहर थ्यःगु दु। थुगु टिम कोभिड–१९ या सुरुवात गये यान जुल, थुकिया बारेय् जाँच यायेत थ्यःगु खः।

विश्व स्वास्थ्य सङ्गठन व चीन दथुइ ताहाकःगु सहलह लिपा कोरोना भाइरसया जाँच, अनुसन्धानया लागि सहमति जुगु खः । १० म्ह वैज्ञानिकया थुगु टिमं अनुसन्धान संस्था, अस्पताल व सी–फुड बजारय् च्वपि व्यक्तित्वपि नाप अन्तर्वार्ता कायेगु ज्याझ्वः दु । सन् २०१९ या अन्त्यलिपा वुहानय् न्हापा कोभिड–१९ या सङ्क्रमण लुगु खः।

बिहीवाः थुगु टिम वुहान थ्यका अनया जनजीवन लगभग सामान्य जुगु व उत्तरी चीनय् कोरोनाया न्हुगु सङ्क्रमण खनेदुगु खः। विश्व स्वास्थ्य सङ्गठनया टिमं जाँच सुरु याये न्ह्यः न्हापागु निगु वाः तक क्वरेण्टीनय् च्वनी  । थुगु टिमं जाँचया झ्वलय् चिनियाँ अधिकारीपिन्स बिःगु नमुना व प्रमाणया प्रयोग याइ । थुगु टिमं सू जनावरपाखे कोरोना सुरु जुगु, उकिइ जाँच याइ।

विश्व स्वास्थ्य सङ्गठनया विश्वव्यापी सङ्क्रमण व प्रतिक्रिया इकाइया प्रमुख प्रोफेसर डेल फिशरं बीबीसीयात धाःगु दु, ‘हलियकं थुकियात छम्ह वैज्ञानिक यात्राया रुपय् काइगु विश्वास दु ।’ वयकलं धयादी,‘थुगु राजनीतिक व आरोप–प्रत्यारोपया विषय मखु बरु थ्व छम्ह वैज्ञानिकया न्ह्यसःया कथं वनेगु कुतः खः’। सुरुइ कोभिड–१९ वुहानपाखे वुहानया ला पसःपाखे फैलै जुगु खः धका धाइ ।

भारतया दिल्लीइ मेगु वाः निसे स्कूल चालेत्यःगु दु । दिल्ली सरकारं मेगु वाःनिसे स्कूल सुरु यायेगु निर्णय याःगु दु।

भारतया केन्द्रीय राजधानी तक जुगु दिल्ली प्रदेशया बोर्ड परीक्षायात ध्यानय् तया स्कूल चायेकेगु निर्णय यानागु धका भारतीय सञ्चारमाध्यम धाःगु दु । आः कक्षा १० व १२ जक पढाइ याकेयेगु निर्णय याःगु दु ।

मेमेगु कक्षाया बारेय् धाःसा छु न जानकारी बिःगु मदुनि। विद्यार्थीपिन्त स्कूल छ्वयेगु वा मछ्वयेगु बारेय् अभिभावकपिन्स हे निर्णय याये दइगु व स्कूल छ्वयेगु  अनिवार्य मदु धका न धाःगु दु।

स्कूलय् वःपि व मवःीप दथुइ छु न भेदभाव मयायेगु धका सरकारी अधिकारीपिन्स धाःगु दु। वइगु  १८ तारिखे सोमवाः निसे स्कूल चायेकगु तयारी दु ।

दिल्लीइ स्कूल सन् २०२० या मार्च निसे पठनपाठन ठप्प जुगु खः।