Display Style:
Column Style
अमेरिकी राष्ट्रपतिया थौं शपथ ग्रहण
लहनान्युज | पोहेलाथ्व सप्तमी ११४१, माघ ७ बुधवाः
अमेरिकाया ४६ म्ह राष्ट्रपतिया रुपय् निर्वाचित जुयादीपि जो बाइडेन व उपराष्ट्रपति निर्वाचित कमला ह्यारिस न थौंनिसे पदभार ग्रहण यायेत्यःगु दु।
नेपाःया ई कथं थौं बहनि १० बजे जुया १५ मिनेटय् शपथ ग्रहण यासे कार्यकाल सुरु याये त्यःगु खः । पदभार ग्रहण यायेवं हे बाइडेन आः प्यदँया लागि ह्वाइट हाउसय् च्वनि । वःगु जनवरी ६ य् राष्ट्रपति डोनाल्ड ट्रम्पया समर्थकपिन्स अमेरिकाया संसदय् आक्रमण यायेवं सत्तारोहण समारोहय् सुरक्षा व्यवस्थाय् कडा याःगु खः। थौं वासिङ्टन डिसीया नाप यक्को थाय् बन्द जुगु दु ।
अमेरिकी गुप्तचर निकाय न सुरक्षाया नेतृत्व याःगु दु सा हजारौँ प्रहरीया ग्वाहालि यायेत न्यान्शल गार्डया १५ हजारं मल्याक सुरक्षाकर्मी खटे याःगु दु । अथेहे बहिर्गमन जुइ त्यम्ह राष्ट्रपतिं थःगु उत्तराधिकारीया सपथ ग्रहण याःगु स्वयेगु परम्परा दु सा बाइडेनया सत्तारोहणय् राष्ट्रपति ट्रम्प सहभागि जुइ मखु धका बीबीसीं धाःगु दु ।
डब्लुएचओया चेतावनी
डंगोल | पोहेलाथ्व षष्ठी ११४१, माघ ६ मंगलवाः
विश्व स्वास्थ्य संगठन, डब्लुएचओं असमान कोभिड खोप नीतिया हुनिं कोराना नियन्त्रणया ज्या अपेक्षा याःकथं ताःमलाःगु धाःगु दु ।
डब्लुएचओया प्रमुख टेड्रेस अडानोम गेबेरियससं धनि राष्ट्रया सक्षम मनूतय्सं जक खोपय् पहुँच दयेकूगु धयादीगु दु ।
अथेहे गरिब राष्ट्रय् कोराना नियन्त्रणया कुतः ताःमलाःगु टिप्पणी यानादिल । वय्कलं गरिब देय्या ज्याथःपिं व जोखिम उप्वः दुगु बर्गयात प्राथमिकता बिइमाःगु धयादीगु खः ।
आःतक हलिंया स्वंगु कोती ९०गु लख डोज खोप तयेकूगु दु । उकि मध्ये ४९गु धनी देय्या मनूत खः । अथेजुयाः प्रमुख गेब्रियससं थन्यागु ज्यां थप हाथ्या फयेमालीगु सम्भावना दुगुप्रति सचेत याकादीगु दु ।
युवातय्त स्वयां ज्याथपिं व जोखिम दुगु बर्गयात लक्षित यानाः खोप तयेकेमाःगु धयादीगु दु । आःतक चीन, भारत, रुस, बेलायत व अमेरिकां कोरोनाविरुद्धया खोप विकास याःगु दु ।
थुपिं देशं थःगु देय्या नागरिकपिन्त जक प्राथमिकता ब्यूगु दु । कोरोनाविरुद्धया खोप तयेकेगुलिइ समान मजूसा थुकिया मू थत्थें गरिब देशं पुलेमालीगु धासें डब्लुएचओं धागु दु ।
थ्व अवस्था जूसा खोपया मू झं अप्वइगु, महामारी तच्वइगु अले प्रतिबन्धया हुनिं आर्थिक समस्या जुइफइगु धागु दु ।
विश्व स्वास्थ्य संगठनं हलिंमय् खोपया वितरण याये न्ह्यः कोभ्याक्स ज्याझ्वःया नितिं प्रतिबद्धता प्वंकेत आह्वान याःगु खः ।
थ्व ज्याझ्वः वइगु महिनानिसें न्ह्याइ । डब्लुएचओं वइगु अप्रिल ७ तारिखय् विश्व स्वास्थ्य दिवस हनीबलय् फुक्क देशय् खोप अभियान न्ह्यायेधुंकीगु अपेक्षा याःगु दु ।
बेलायतय् कोरोनाया खोप बिइगु तच्वयेकल
डंगोल | पोहेलाथ्व पंचमी ११४१, माघ ५ सोमवाः
बेलायतं कोरोना विरुद्धया खोप इनेगुयात तच्वकं न्ह्याकुगु दु । कोरोना संक्रमण वृद्धिदर सिवें नं तच्वगु गतिइ कोरोना विरुद्धया भ्याक्सिन इनेज्या जुयाच्वंगु नेशनल हेल्थ सर्भिस (एनएचएस) यात न्ह्यथसें बीबीसीं न्ह्यथंगु दु । लिपांगु तथ्यांक कथं छगू मिनेटय् सच्छि व ४०म्हसित कोरोना विरुद्धया खोप बिउगु नेशनल हेल्थ सर्भिस (एनएचएस) या प्रमुख सर साइमन स्टिभेन्सं धयादील । खोप अझं तच्वगु गतिइ न्ह्याकेत वइगु १०न्हू दुने वालय् ७न्हू २४ घौ हे खोप बिइगु जूगु दु । ७०दँ च्वयेय् वैंशया ५०ब्व सिनं खोप कायेधुंकुगु स्वास्थ्यमन्त्री म्याट ह्यान्ककं जानकारी बियादील । आः तक्क ४३ गू लख ७ द्वः सिवें अप्वः खोप इनेज्या जुइधुकुगु सरकारं न्ह्यथंगु दु । उगु मध्ये ३८ गू लख ५७द्वः २सः व ६६ म्हसिनं न्हापांगु डोज काःगु दुसा ४गू लख ४९द्वः ७सः व ३६म्हसिनं निगूगु व लिपांगु डोज काःगु दु । खोप इनेया नितिं थौं निसें १० गू सिवें अप्वः केन्द्र सञ्चालनय् वइगु जूगु दु । बेलायतय् कोरोना संक्रमण, मृत्युदर व अस्पताल भर्ना जूपिनि ल्याःया लिधंसाय् लिपांगु निवा दुने महामारी जूगु थुखेया हे न्हूगु रेकर्ड कायम जूगु दु । सन् २०२१ या सुरुवातलिसें बेलायतय् छन्हूं हे सीपिनि ल्याः १५ सः पुलावंगु दुसा थ्यंमथ्यं ७०द्वःम्हसिया ल्याःखय् संक्रमित थप जूगु दु । अथेहे अस्पतालय् वासः याकाच्वंपिं संक्रमितया ल्याः वंगु अप्रिलया उच्च विन्दुया सिवें आः निदुगं थ्यंगु दु ।
भारतय् निगू लखः मनुतय्सं खोप काल
राम डंगोल | पोहेलाथ्व चौथी ११४१, माघ ४ आइतवाः
भारतय कोरोनाविरुद्धया खोप अभियानय् न्हापांगु दिं शनिबार २गू लखःं खोप काःगु दु ।
म्ह्गिः १गू लखः ९१द्वः खोप बियागु अनया केन्द्रीय स्वास्थ्य मन्त्रालयं न्ह्यथंगु दु ।
खोप बियागुलिई छुं हे समस्या मवःगु भारतीय स्वास्थ्य मन्त्रालयं दाबी यासां दिल्लीइ खोप काःपिं छुं मनुत एलर्जीया समस्या क्यंगु भारतीय सञ्चारमाध्यमं न्ह्यथंगु दु ।
इमित स्थानीय प्रशासनया को निगरानी तयातःगु दु ।
थ्वहेदथुइ भारतया बायोटेकं कोभ्याक्सिन खोप बिइधुंका सुंयात नं तच्वय्क असर क्यनधासा उकियो क्षतिपूर्ति बिइगु घोषणा याःगु दु ।
खोप बिइ न्ह्यः फारमय् प्रतिकूल वा तच्वकं असर जूसा सरकारी अस्पताल व चिकित्सकपाखें वासः यानाबिइगु न्ह्यथंगु दु ।
अमेरिकां ५० गु राज्यय् सुरक्षा सतर्कता अप्वोकल
रमित | पोहेलाथ्व चौथी ११४१, माघ ४ आइतवाः
अमेरिकां ५० गु राज्यय् हे सुरक्षा सतर्कता अप्वोकुगु दु। वइगु बुधवाः जुइगु राष्ट्रपतिं सपथ काइगु ज्याझ्वः जुगुलि सम्भावित हिंसा रोके यायेत दक्को राज्यय् उच्च सुरक्षा सतर्कता अपने याःगु दु धका बीबीसी धाःगु दु।
राष्ट्रपति डोनाल्ड ट्रम्पया समर्थकपिन्स थ्व स्वया न्ह्यः संसद भवनय् हे आक्रमण याःगु खः व हाकन आक्रमण याये फइगु खतरा दुगुलि कारण सैनिक परिचालन सतर्कता अपने याःगु खबरय् उल्लेख याःगु दु ।
दक्को राज्यया संसद भवनय् थ्व स्वया न्ह्यः ट्रम्प समर्थकपिन्स प्रदर्शन याइगु सूचं वःगुलि सुरक्षा व्यवस्था तसकं कडा याःगु दु धका धाःगु दु।
राष्ट्रपति पदय् निर्वाचित जो बाइडेनं बुधवाः शपथ काइगुलि राष्ट्रपति ट्रम्पं औपचारिक रुपं बुगु स्वीकार यागु मदुनि। ट्रम्पविरुद्ध महाअभियोग तक दर्ता जुइ धुकुगुलि अमेरिकाय् सुरक्षा खतरा जुगु दु धका धाःगु खः।
