विश्वन्यक कोरोना भाइरस सङ्क्रमित जूपि गूगु करोड स्वया अप्वो जुग दु। वःगु २४ घण्टाया दुने जक ७ लाख २२ हजार ८६२ म्हेसित कोरोना सङ्क्रमण पुष्टि जूगु दु।

थ्व नाप विश्वन्यक कोरोना सङ्क्रमित जूपि ९ करोड ७७ हजार म्ह थ्यःगु दु। आःतक सङ्क्रमण पुष्टि जूपि मध्ये ६ करोड ४४ लाख स्वया अप्वो सङ्क्रमणमुक्त जूगु दु।

थ्व कुल सङ्क्रमित जूपि ७१ प्रतिशत स्वया अप्वो खः। अथेहे १९ लाख ३४ हजार स्वा अप्वोे कोरोना सङ्क्रमणया कारण ज्यान वःगु दु। थ्व कुल सङ्क्रमितपि मध्ये निगु दशमलव १४ प्रतिशत खः।

आः विश्वन्यक निगु करोड ३६ लाख स्वया अप्वो सक्रिय सङ्क्रमित दु सा उकि मध्ये छगु लाख च्याद्धः गम्भीर बिरामी जुया च्वंगु दु।

अमेरिकी संसद भवन दुने बुधवाः ट्रम्प समर्थकपिनिगु आक्रमणपाखे घाइते जुम्ह छम्ह प्रहरीया ज्यान वःगु दु।

बुधवाः अमेरिकी राष्ट्रपति डोनाल्ड ट्रम्पया उक्साहट पूर्ण भाषण लिपा आक्रोशित समर्थकपि अमेरिकी संसद दुने दुहा वना व्यापक तोडफोड याःगु खः। प्रहरी कारबाहीपाखे प्रदर्शनकारीपि छम्ह मिसा नाप प्यम्ह मनूपिनिगु ज्यान वःगु खः । प्रहरीया कथं छम्ह संसद भवन दुने व स्वम्ह संसद भवनपिने सीगु खः।

क्यापिटोल प्रहरीं छगु वक्तव्य प्रकाशन यासे प्रहरी अधिकृत ब्रायन सिकनिक म्हिगः बिहीवाः चान्ह्य मदुगु खः। भीड नियन्त्रणय् खटे जुम्ह ब्रायनयात तत्कालै स्थानीय अस्पतालय् भर्ना याःगु खःसा क्यापिटोल प्रहरीं दुःख व्यक्त याःगु दु।