Display Style:
Column Style
भारतं सगरमाथा थःगु दाबी यायेमाः,जी न्यूज
लहनान्युज | थिंंलागा आमै ११४१, पुस २९ बुधवाः
भारतीय च्यानल जी न्यूजं नेपाःया विषय हाकनं आपत्तिजनक रिपोर्ट प्रसारण याःगु दु।
नेपाःया दुगु हलिमय् तजाःगु सर्वोच्च शिखर सगरमाथा भारतं दाबी यायेमाःगु व उकिया नां हिलेमाःगु रिपोर्ट प्रसारण याःगु दु। प्रधानमन्त्री केपी शर्मा ओली नाप बालुवाटारय् अन्तर्वार्ता काःम्ह जी न्यूजया प्रधानसम्पादक सुधीर चौधरीं कालापत्थर वना आः भारतं सगरमाथा थःगु दाबी विश्वया न्ह्यने तयेमाःगु वः सगरमाथाया नां ‘राधानाथ सिकदर’ तयेमाःगु धका धाःगु दु।
राधानाथ सिकदरं न्हापागु पटक सगरमाथाया उचाइ नापे यागुलि सगरमाथाया नां वयागु हे नां तयेमाःगु धका चौधरीं धाःगु दु । थ्व स्वया न्ह्यः जी न्यूजं प्रधानमन्त्री केपी शर्मा ओली व नेपाःया लागि चिनियाँ राजदूत होउ यान्छी दथुइ कपोलकल्पित सम्वाद सहित आपत्तिजनक सामग्री प्रसारण याःगु दु। उकिया विरोधय् नेपाःया केबल अपरेटरहरुले जी सहितया छु भारतीय च्यानलपिन्स प्रसारणय् रोके याःगु दु।
हलिन्यक २४ घण्टाय् कोरोना ९३७१ म्ह मन्त
रमित | थिंंलागा आमै ११४१, पुस २९ बुधवाः
वःगु २४ घण्टाया दुने हलिन्यकं ९ हजार ३७१ म्हेसित कोरोना संक्रमित जुया सी गु दु ।
विश्व स्वास्थ्य संगठनया तथ्यांक कथं आःतक हलिन्यकं १९ लाख ४० हजार ३५२ म्ह सी धुकुगु दु।
संगठनया तथ्यांक वःगु २४ घण्टाया दुने ५ लाख ६६ हजार १८६ म्ह कोरोना संक्रमितपि थपे जुगु दु।
आःतक हलिन्यकं कोरोना संक्रमितपि ८ करोड ९७ लाख ७ हजार ११५ म्ह थ्यःगु दु।
भारतय् कृषि कानुनयात लिछ्यात
डंगोल | चर्तुदशी, थिंलागा ११४१ (२०७७ पौष २८ गते) मंगलबाः
भारतया सर्वोच्च अदालतें मोदी सरकारं हःगु कृषि कानुनयात लिछ्यायेगु क्वःछिउगु दु ।
केन्द्र सरकारं हःगु ३गू कृषि कानुन सम्बन्धी लाःगु रिटय् प्रधानन्यायाधीश एसए बोब्डे, न्यायाधीशपिं एएस बोपना व भी रामासुब्रमण्यमया संयुक्त इजालसले मेगु उजं मवतले
उगु कृषि कानूनयात निलम्बन यायेगु फैसला याःगु भारतीय सञ्चार माध्यमं धाःगु दु । अथेहे अदालतं आन्दोलन यानाच्वंपि लिसे खँल्हाःबल्हाः यायेत छगू कमिटीया नं सिफारिस याःगु दु ।
उगु कमिटिं आन्दोलन यानाच्वंपिं बुँज्यामिलिसे खँल्हाःबल्हा याना रिर्पाेत दयेकि । प्रधानन्याधी बोब्डें मंगलबार याःगु उजनय् थःगु जिउधनया क्षति पनेतया नितिं समितिया प्रस्ताव याःगु धाःगु दु ।
सरकारं हःगु ३गू न्हूगु कृषि कानूनया विरोधय् थीथी राज्यया बुँज्यामित वंगु ५ला निसें आन्दोलन यनावयाच्वंगु दु ।
ओमन जुजुया उजं
डंगोल | चर्तुदशी थिंलागा, ११४१ (२०७७ पौष २८ गते) मंगलबाः
ओमनया सुल्तान हैथम बिन तारेकं सत्ता हस्तान्तरण व न्हूम्ह राजकुमार नियुक्तिया प्रक्रिया न्ह्याकेत उजं बियादीगु दु ।
सुल्तानं थः उत्तराधिकारी नियुक्तिया लागिं न्हूगु कानुनी संयन्त्र तयार यायेत २गू शाही आदेश जारी यानादीगु दु ।
२०२१य् जारी याःगु शाही आदेश कथं न्हूम्ह राजकुमारया शक्ति क्वःछीत कानुन दयेकेगु व कानुनी शासनया सिद्धान्त अले न्यायपालिकाया स्वतन्त्रतायात सम्मान यासें शासन न्ह्याकेगु व्यवस्था तालाकेमाः ।
नागरिकया अधिकार व स्वतन्त्रतायात अझ बल्लाकेत व मिसा मिजं दथुइया भेदभाव न्हंकेगु लिसेंया थीथी सामाजिक हितया विषय कःघायेत शाही आदेश वःगु खः ।
न्हूगु कानुनं सरकारया ज्याया प्रत्यक्ष निगरानी व अनुगमन यायेत विशेष संयन्त्र दयेकेत नं आदेश ब्यूगु बुखँय् न्ह्यथनातःगु दु ।
सरकारय् दुथ्याःपिं अधिकारीतय् प्रत्यक्षरुपं कार्यसम्पादन मूल्यांकन यायेगु व सुशासन कायम यायेगु शाही आदेशय् धयातःगु दु ।
ट्रम्पयात महाभियोग तयेगु
डंगोल | त्रयोदशी थिंलागा ११४१ (२०७७ पौष २७ गते) सोमबाः
अमेरिकी डेमोक्र्याट्स सांसदपिन्सं राष्ट्रपति डोनाल्ड ट्रम्पविरुद्ध महाअभियोग प्रक्रिया न्ह्याकेगु छुमां बिउगु दु ।
राष्ट्रपति ट्रम्पया समर्थकं वंगु वालय् अमेरिकी संसद भवनय् दुहाँवना हिंस्रक ज्यापहः याःगु धासें संसदया निगुलिं सदनं महाअभियोग तयेगु तयारी याःगु खः ।
राष्ट्रपति ट्रम्पं राजीनामा मबिउसा वा उपराष्ट्रपतिं संविधानया २५गूगु संशोधन याना बर्खास्त मयाःसा महाअभियोग तयेगु क्वयेय्या सदनया सभामुख न्यान्सी पेलोसीं ख्याच्वः बियादीगु खः ।
थ्वहे दथुइ न्हूम्ह निर्वाचित राष्ट्रपति जो बाइडेनं थःगु सच्छि दिंया ई दुने कोरोना भाइरसविरुद्धया मू नीतित अवलम्बन यायेगु धयादीगु दु ।
न्हू मन्त्रीमण्डल गठन जुइधुंका राष्ट्रपति बाइडेनं थःगु महत्वाकांक्षी योजनात न्ह्यब्वइगु धाःगु दु ।
अमेरिकाय् राष्ट्रपतिया निर्वाचनया लिपांगु लिच्वः वयेधुंका न्हूम्ह राष्ट्रपतिं कार्यकाल कःघानादीन्ह्यः बहालवाला राष्ट्रपतिं दैनिक प्रशासनिक ज्या जक न्ह्याके दइगु कानूनी मान्यता दु ।
तर राष्ट्रपति ट्रम्पं लिपांगु दिं याःगु छुं निर्णय विवादास्पद व दूरगामी लिच्वः लाकिगु कथंया दूगु धासें डेमोक्र्याटपिन्संं महाअभियोग तयेगु ख्याच्वः बिउगु खः ।
विशेष कथं चुनावी लिच्वःयात कया राष्ट्रपति ट्रम्पं असन्तुष्टि न्ह्यथनेधुंका वयेकया छचाखेरं विरोध जूगु खः ।
उगु हे झ्वलय् उपराष्ट्रपति माइक पेन्सं बाइडेनयात औपचारिक कथं राष्ट्रपति निर्वाचित जूगु घोषणा यायेगु झ्वलय् थः समर्थकयात ग्वाका संसद भवनय् अनाधिकृत कथं दुकाना दंगा न्यंकुगु ट्रम्पयात द्वपं दु । उगु ल्वापुइ लाना ६ म्ह सीगु दु ।
अमेरिकाय् थ्वयान्ह्यः २ म्ह बहालवाला राष्ट्रपतियात महाअभियोग तःगु खः । ट्रम्पयात थ्वयान्ह्यः थगुने नं महाअभियोग तयेगु प्रक्रिया न्ह्याकुगु खः ।
थ्वहे दथुइ वाइडेनया सपथ समारोहस उपराष्ट्रपति माइक पेन्स दुथ्यानादीगु धाःगु दु । राष्ट्रपति ट्रम्पं थ्वयान्ह्यः हे समारोहस दुमथ्यायेगु घोषणा यानादीधुंकुगु दु ।
