अमेरिकाया राष्ट्रपति डोनाल्ड ट्रम्पया इतिहासया ज्ञानयात कयाः न्ह्यसः तयादीम्ह न्युजिल्याण्डया राजदूतयात बर्खास्त याःगु दु।

बेलायतया निंतिं न्युजिल्याण्डया राजदूत फिल गोफं मंगलवाः रुस व अमेरिका दथुइ जूगु सम्झौतायात सन् १९३८ या म्युनिख सम्झौतालिसे तुलना यानादीगु खः। उगु सम्झौता कथं हिटलरं चेकोस्लोभाकियाया छुं ब्बः काःगु खः।

न्युजिल्याण्डया विदेशमन्त्री विन्सटन पिटर्सं उगु वक्तव्यया आलोचना यासें थ्व ‘तसकं निराशाजनक’ धापू जुगुलि पदय् च्वनेमज्यूगु धाःगु बेलायती विश्व च्यानल बीबीसीं जानकारी ब्यूगु दु। परराष्ट्रमन्त्री पिटर्सं राजदूतया धापू न्युजिल्याण्ड सरकारया धापू मखुगु धाःगु दु।

गोफ न्यूजिल्याण्डया राजनीतिज्ञ सन् २०२३ निसें बेलायतया निंतिं राजदूत जुयादी। बीबीसीं वय्कलं न्युजिल्याण्डया दकलय् तःधंगु शहर अकल्याण्डया निगु कार्यकाल मेयर जुयादीम्ह खः।

अमेरिकाया राष्ट्रपति डोनाल्ड ट्रम्पं विदेशमन्त्री नियुक्त याःम्ह मार्को रुबिओं युक्रेन युद्ध अमेरिका व रुस दथुइ जूगु ‘प्रोक्सी वार’ जूगु धका धाःगु दु।

बुधवाः अमेरिकाया च्यानल फक्सलिसे खँ ल्हासें रुबिओ धाःगु दु धका रुसी वल्र्ड च्यानल आरटीं जानकारी ब्यूगु दु। आरटीया कथं अमेरिकाया प्रशासनय् रुबिओं थुज्वःगु सार्वजनिक बयान बिउगु थ्व न्हापांगुखुसि खः।

वय्कलं अन्तर्वार्ताय् ट्रम्पं थःत शान्तिया निंतिं न्ह्यब्वयेगु कुतः यानाच्वंगु दावी नं यानादीगु दु। ट्रम्पं रुसी राष्ट्रपति पुटिनलिसे ९० मिनेटया फोन खँल्हाबल्हा व साउदी अरब व टर्कीइ अमेरिका व रुसी विदेशमन्त्री दथुइ उच्चस्तरीय भेटवार्ता लिपा रुबिओया थ्व टिप्पणी पिहां वःगु खः।

अमेरिकाया राष्ट्रपति डोनाल्ड ट्रम्पं रुसलिसेया युद्धपाखें बिस्युं वनाच्वंपिं युक्रेनीतय्त कानूनी रुपं बिस्यू वःपिनिगु सेवाः सुबिधा खारेज यायेगु योजना दयेकूगु दु।

रोयटर्सं ट्रम्पया प्रशासनया छम्ह उच्च अधिकारी व थ्व विषय परिचित स्वम्ह स्रोतयात उद्धृत यासें ट्रम्पया योजनाबारे बुखँ पिहगू खः। अप्रिल महिना न्ह्यः हे ट्रम्पं थ्व पलाः न्ह्याकेफुगु खँ धाःगु दु।

ट्रम्प प्रशासनया थ्व पलाः न्हापाया प्रशासनं राष्ट्रपति जो बाइडेनं युक्रेनीतय्त लसकुस यायेगु कुतः याःगुया बिल्कुल अःखः खः।

थ्व निर्णयं ट्रम्प प्रशासनयात युद्धपाखें बिस्युं वःपिं थ्यंमथ्यं २ लख ४० हजार युक्रेनीतय्त अमेरिकाय् देश निकाला यायेत ग्वाहालि जुइगु धाःगु दु।

युक्रेनया राष्ट्रपति भोलोदिमिर जेलेन्स्कीया गृहनगरय् च्वंगु छगू होटलय् रुसी क्षेप्यास्त्र आक्रमणय् लानाः प्यम्ह मनूत सीगु दु।

बेल्जियमया राजधानी ब्रसेल्सय् युरोपेली नेतातलिसे शिखर सम्मेलनया तयारी यानाच्वंगु इलय् युक्रेनया राष्ट्रपति जेलेन्स्कीयात रुसं आक्रमण याःगु बीबीसीं न्ह्यथंगु दु। आक्रमणय् लानाः मेपिं ३१ म्ह घाःपाः जूगु दु। युक्रेनया मध्य शहरय् च्वंगु छगू होटलय् क्षेप्यास्त्र प्रहार यानाः १३ गू अपार्टमेन्ट ब्लक व १२ गू पसः क्षति जूगु बीबीसीया रिपोर्टय् न्ह्यथनातःगु दु।

क्षेप्यास्त्र आक्रमणय् लाःगु होटलय् अमेरिका व बेलायतया स्वयंसेवक पिनिगु उपस्थित जूगु युक्रेनया राष्ट्रपति जेलेन्स्कीया धापू दु । वंगु स्वदँ न्ह्यःनिसें रुस व युक्रेन दथुइ युद्ध जुयाच्वंगु दु।

भारतया महाराष्ट्रय् भण्डारा जिल्लाय् च्वंगु म्याङ्गनीज ओरे इन्डिया लिमिटेडया स्वामित्वय् दूगु चिखाला खानीइ स्ल्याब कुतुं वनाः निम्ह मजदूर सीगु दुसा छम्ह घाःपाः जूगु दु।

सीम्हेसिगु सीम्ह पोष्टमार्टमया नितिं उपजिला अस्पतालय् तयातःगु जिल्ला विपद् व्यवस्थापन कक्षं जानकारी ब्यूगु दु । अथेहे, घाःपाः जूम्ह कर्मचारीयात वासः यायेगु नितिं भण्डारा जिल्लाया लक्ष्य अस्पताल छ्वःगु दु।

सीपिं ५० दँया विजय नन्दलाल व ४१ दँया अरुण जीवनलाल चोरमार जूगु विपद् व्यवस्थापन सेलं जानकारी ब्यूगु दु। घाःपाः जूम्ह ज्याकःमि शंकर सहदेव विश्वकर्मा जूगु जानकारी ब्यूगु दु। स्वम्हं ज्यामित खानिइ स्थायी कर्मचारी खः।