लेबनानया अधिकारीपिन्सं शनिवाः संयुक्त राष्ट्र संघं काफिलय् आक्रमण याःपिं २५ म्हसिबें अप्वः मनूतय्त कारवाहि याःगु दु।

उगु आक्रमणय् बलया निवर्तमान उपकमाण्डरलिसें निम्ह शान्ति सेना घाःपाः जूगु दु। घाःपाः जूपिंमध्ये नेपाली नागरिक व निवर्तमान फोर्स कमाण्डर चोकबहादुर ढकाल नं थःगु मिसन पूवंकाः छेँ लिहाँ वःम्ह खः।संयुक्त राष्ट्र संघ व लेबनानया अधिकारीपिन्सं उगु आक्रमणया भत्र्सना याःगु दु।

शनिवाः जूगु आकस्मिक सुरक्षा बैठक लिपा आन्तरिक मामिला मन्त्री अहमद अल हजरं संचारकःमिपिन्त धाःगु दु, “लेबनानया सेनाया गुप्तचर संस्थां २५ म्ह स्वयां अप्वः मनूत गिरफ्तार याःगु दु।

लेफ्टिनेन्ट ढकाल विमानस्थल वनाच्वंगु इलय् मध्यरातय् प्रदर्शनकारीतय्सं वयात रोके यानाः वयागु गाडीइ मिँ तःगु खः। वय्कलं थप धयादी, “थुपिं कैदीतय्सं आक्रमण याःगु मखु, तर अनुसन्धानं सु जिम्मेवार खः धइगु सीदइ।”थ्व बाहेक संयुक्त राष्ट्र संघया लेबनानय् च्वंगु अन्तरिम सेनां थःगु छगः सवारी साधनय् मिँ तयेधुंकाः अनुसन्धान यायेत आह्वान याःगु दु।

उपप्रवक्ता क्यान्डिस आर्डियलं एएफपीयात जानकारी ब्यूगु कथं निम्हम्ह नेपाली शान्तिसेना नं घाःपाः जुयाः अस्पतालय् भर्ना जूगु दु। प्रधानमन्त्री नवाफ सलामं उगु आक्रमणया घोर भत्र्सना याःगु दु।

संयुक्त राष्ट्र संघया लेबनानया विशेष संयोजक जीनिन हेनिस–प्लास्चार्ट व युनिफिलया कमाण्डर जनरल एरोल्डो लाजारोलिसे जूगु वार्ताय् वं अपराधीयात ज्वनेगु प्रतिबद्धता प्वंकूगु खः।

भारतया राजधानी न्हू दिल्लीइ जूगु भागदौडय् १८ म्ह मनूत सीगु दु। २५ म्ह घाःपाः जूगु दु। म्हिगः बहनी १३ व १४ प्लेटफर्मय् थ्यंमथ्यं ९ः३० ता इलय् घटना जूगु धाःगु दु।

उगु इलय् रेल स्टेशनय् मनूतय्गु तःधंगु भीड दुगु खः।थ्व घटना जूगुया मू निगू हुनि दु।

छगू– अप्वः भीडभाडया हुनिं यात्रुतय् त सासः ल्हाये थाकुगु खः । सुं सुं यात्रुत बेहोस जूगु खः। अनंलि भागदौड जुगु खः।

निगू – १३ ल्याःया प्लेटफर्मय् ट्रेन १६ ल्याःया प्लेटफर्मय् थ्यन धकाः घोषणा यात। अले यात्रुत अन थ्यंकेत खिचातानी यायेगु शुरु यात। अले मनूत तं चाल। रेल मन्त्रालयया प्रवक्ता दिलीपकुमारया कथं बहनी रेल स्टेशनय् प्रयागराज एक्सप्रेस व मगध एक्सप्रेसया आपालं यात्रुत मुनाच्वंगु खः।

सकसिनं थ्व न्हिच्छिया लिपांगु रेल तायेकाः सकलें रेलय् च्वनेत खिचातानी याःगुलिं भगदड जूगु धाःगु दु। घाःपाः जूपिन्त लोकनायक अस्पतालय् भर्ना याःगु दु।

अस्पतालया प्रमुख प्रशासक रितु सक्सेनां बीबीसी हिन्दीयात जानकारी ब्यूगु दु कि अस्पतालय् १५ म्ह मनूत सीधुंकूगु दु। तर भारतया मेमेगु समाचार च्यानलतसें सीपिनिगु ल्याः १८ म्ह थ्यंगु बुखँ ब्यूगु दु।

प्रधानमन्त्री नरेन्द्र मोदी, रक्षामन्त्री राजनाथ सिंह व रेलमन्त्री अश्विनी वैष्णवं भगदडय् लानाः ज्यान गुमेयापिंत शोक व्यक्त यासें घाःपाः जूपिं याकनं स्वास्थ्य लाभया कामना यानादीगु दु।

रुसं अमेरिकालिसे युक्रेनया विषय वार्ता यायेत वार्ता पुचः तयार यायेगु सुरु याःगु दु। क्रेमलिनया प्रवक्ता दिमित्री पेस्कोभं युक्रेनया विषयस अमेरिकालिसे वार्ता यायेत प्रतिनिधिमण्डल दयेकेगु कुतः जुयाच्वंगु धाःगु दु।

लिसें वय्कलं रुसी राष्ट्रपति भ्लादिमिर पुटिन व अमेरिकी राष्ट्रपति डोनाल्ड ट्रम्प दथुइ तत्काल भेटवार्ताया ग्वसाः ग्वयेमाःगु आवश्यकता दुगु नं धयादीगु दु। वय्कलं युक्रेनयात कयाः आःतक नं ठोस वार्ता मजूगु स्पष्ट यानादीगु बीबीसीं जानकारी ब्यूगु दु।

रुसं वार्ताय् आपालं विषयत ल्ह्वनेमाःगु खँ धाःगु दु। तर राष्ट्रपति पुटिनं छुं भचा धैर्यता माःगु धासें आः हे रुसयात युद्धविराम अन्त्यया निंतिं तयार जूगु धायेमफइगु खँ धयादीगु दु। रुस व युक्रेन दथुइ ब्वलना च्वंगु द्वन्द्व ज्यंकेत अमेरिकां मध्यस्थकर्ताया भूमिका म्हिताच्वंगु दु।

युद्धविराम सम्झौताया सम्भावनाया बारे पुटिनलिसे जूगु फोन खँल्हाबल्हा लिपा म्हिगः ट्रम्प व युक्रेनया राष्ट्रपति भोलोदिमिर जेलेन्स्की दथुइ नं फोन खँल्हाबल्हा जूगु खः।

गुप्यालेस्टिनी विद्रोही समूह हमासं इजरायलनाप गाजाय् जुगु युद्धविराम सम्झौता कथं बन्धकतय्त त्वःतिइगु जुगु दु। हमासं सम्झौता कार्यान्वयन यायेगुलि थःपि प्रतिबद्ध दुगुलि इलय् हे बन्धकतय्त तयार दु धका धाःगु दु।

इजरायलं कन्ह्यः शनिवाः तक हमासं बन्धक दयकातःपिन्त मत्वःतूसा युद्धविराम क्वचाइ धका चेतावनी बिइ धुका सम्झौता कथं ज्या जुइ धका बीबीसीं धाःथु दु। थ्व स्वया न्ह्यः इजरायलं सम्झौता उल्लङ्घन याःगु द्धपः ब्युसे हमासं बन्दी त्वत्ये फइमखु धका चेतावनी बियावया च्वंगु खः।

तर इजरायली प्रधानमन्त्री बेन्जामिन नेतान्याहू न हमासं बन्धक रिहा मयात धाःसा गाजाय् युद्धविराम भङ्ग जुइ व हाकने ल्वापू तःच्वइ धका चेतावनी ब्यूगु खः।

अमेरिकाया राष्ट्रपति डोनाल्ड ट्रम्पं प्यालेस्टाइनीतय्त च्वनेत मबिइगु निति अस्वीकार याइगु देसयात बीगु ग्वाहालि बन्द यायेगु ख्याच्वः बियादीगु दु। थ्वसिबें न्ह्यः ट्रम्पं प्यालेस्टाइनीपिन्त इजिप्ट व जोर्डनय् स्थायी रुपं बसोबास याके बीमाःगु धाःगु खः।

तर, ट्रम्पया सुझाव प्रति जोर्डन व उगु क्षेत्रया मेमेगु देसं आपत्ति प्वंकेधुंकाः ट्रम्पं प्यालेस्टाइनीतय् निंतिं थःगु प्रस्तावयात स्वीकार मयाइपिन्त अमेरिकां ग्वाहालि व ग्वाहालि यायेगु बन्द यायेगु धाःगु खः। राष्ट्रपति ट्रम्पं प्यालेस्टाइनीपिन्त सुरक्षित थासय् स्थानान्तरण यायेगु व अमेरिकाया नियन्त्रणय् दूगु गाजा पट्टी पुनःनिर्माण यायेगु प्रस्ताव तया वयाच्वंगु खः।अथेहे, जोर्डनया जुजु अब्दुल्लाह द्वितीय नं वाशिंगटन डिसी थ्यंकूगु दु।

वय्कलं ह्वाइट हाउसय् राष्ट्रपति डोनाल्ड ट्रम्पलिसे नापलायेगु ज्याझ्वः तयातःगु दु। बीबीसीया कथं ट्रम्पं प्यालेस्टाइनीतय्त स्थायी रुपं बसोबास यायेगु व्यवस्था यायेत जुजु अब्दुल्लाहयात अनुनय यायेगु तयारी यानाच्वंगु दु । वय्कलं अमेरिकाया प्रस्तावय् जोर्डनलिसेंया मेमेगु देसं नं सहमति प्वंकीगु खँय् थः विश्वस्त जूगु धयादीगु बीबीसीं जानकारी ब्यूगु दु।