अमेरिकाया निजी अन्तरिक्ष कम्पनी स्पेसएक्सं मंगलवाः २१ गू स्टारलिंक भूउपग्रह प्रक्षेपण याःगु दु। स्पेसएक्स छगू एयरोस्पेस उत्पादक व अन्तरिक्ष यातायात कम्पनी खः गुकियात सन् २००२ य् एलोन मस्कं पलिस्था याःगु खः।

थुकिया आज्जु अन्तरिक्ष यात्राया खर्च म्ह्वः यायेगु खः। स्पेसएक्सया कथं पूर्वी ई कथं सुथय् ५ः१५ ता इलय् फ्लोरिडाया केप क्यानाभेरल स्पेस फोर्स स्टेशनं फाल्कन ९ रकेटय् च्वनाः उगु भूउपग्रह प्रक्षेपण याःगु खः।

लिपा स्पेसएक्सं २१ गू स्टारलिंक भूउपग्रह परिचालन याःगु पुष्टि याःगु खः, गुकी १३ गू डाइरेक्ट टु कल क्षमता दुगु भूउपग्रह दुथ्याः। स्टारलिङ्क धइगु निजी अन्तरिक्ष उडान कम्पनी स्पेसएक्सं दुर्गम थासय् म्हो खर्चय् इन्टरनेट बीगु निंतिं विकास याःगु भूउपग्रह नेटवर्कया नां खः।

स्टारलिङ्क भूउपग्रहया आयु अथे हे न्यादँ ति जुइ।स्पेसएक्सया कथं स्टारलिंकं पूर्ण रुपं उपलब्ध मजूगु थासय् तीव्र गतिया ब्रोडब्याण्ड इन्टरनेटया सुविधा हयेगु जुइ।

अमेरिकां निर्वासित जूपिं १०० म्हसिबें अप्वः भारतीय आप्रवासी ज्वनाः अमेरिकी वायुसेनाया विमान बुधवाः भारत थ्यंकूगु स्थानीय सञ्चारमाध्यमं जानकारी ब्यूगु दु।

जनवरी २० तारिखय् ट्रम्पं पदभार ग्रहण याये धुंकाः द्वलंद्वः भ्वँ मदुपिं आप्रवासीतय्त गिरफ्तार याःगु दु। गुलिखे अपराधया द्वपं नं लानाच्वंगु दु। उत्तरी शहर अमृतसरय् एएफपीया छम्ह फोटोग्राफरं अमेरिकी सैनिक विमान अवतरण जूगु खंगु खःसा उकी १०४ म्ह भारतीय आप्रवासी दुगु खँ भारतीय संचार माध्यमं धाःगु दु।

ट्रम्पया आप्रवासन सुधारया कार्यकारी आदेशं १ करोड १० लाख भ्वँ मदुपिं आप्रवासीतय्त लिच्वः लाकीगु अनुमान याःगु दु। न्हू दिल्लीं न वाशिंगटनं देश निकालायात कयाः विशेष टिप्पणी याःगु मदु। तर भारतय् च्वंगु अमेरिकी दूतावासया प्रवक्तां वाशिंगटनं “थःगु सीमायात कडा रुपं लागू यानाच्वंगु, आप्रवासन कानून कडा यानाच्वंगु व अवैध आप्रवासीतय्त चीकाच्वंगु” धाःगु दु।

भारत हलिमयया प्यंगुगु दकलय् तःधंगु अर्थतन्त्र खः व दकलय् अप्व सकल घरेलु उत्पादन (जीडीपी) वृद्धिदर दु, अथे जुसां दँय् दसं लखौं नागरिकत विदेशय् बांलाःगु अवसर मालेगु निंतिं देय् त्वःताः वनी। थुकिया प्रवासी समुदाय विश्वन्यंकं न्यनाच्वंगु दु, तर अमेरिका अझ नं ल्ययेगु गन्तव्य खः ।

अमेरिकी आप्रवासन व भन्सार प्रवर्तन (आइसीई) या तथ्यांक कथं सन् २०१८ निसें २०२३ तक ५ हजार स्वयां अप्वः भारतीयतय्त देसं देश निकाला याःगु खः।

महाकुम्भ मेला २०२५ या झ्वलय् त्रिवेणी संगमय् स्नान यायेगु निति भारतया प्रधानमन्त्री नरेन्द्र मोदी उत्तर प्रदेशया प्रयागराज थ्यंकूगु दु।

प्रधानमन्त्रीं उत्तर प्रदेशया मुख्यमन्त्री योगी आदित्यनाथलिसे यमुना खुसिइ डुंगा यात्रा यानादीगु खः। प्रधानमन्त्रीं संगमय् स्नान याना गंगाय् पूजा याइगु ज्याझ्वः दुगु खः। पौष पूर्णिमा (२०२५ जनवरी १३) कुन्हु सुरु जूगु महाकुम्भ २०२५ हलिमयय् दकलय् तःधंगु आध्यात्मिक व सांस्कृतिक मेला खः। महाकुम्भं हलिंन्यंकंया भक्तजनतय्त आकर्षित याइगु दु।

महाकुम्भ वइगु फेब्रुअरी २६ गते महाशिवरात्री तक न्ह्याइ। थ्व स्वयां न्ह्यः २०२४ डिसेम्बर १३ य् प्रयागराज भ्रमणया झ्वलय् प्रधानमन्त्रीं आम जनताया निंतिं कनेक्टिभिटी, सुविधा, व सेवा सुधार यायेगु निंतिं १०० करोडया परियोजना घोषणा यानादीगु खः । वय्कलं ५५ अर्ब बराबरया १६७ गू विकास परियोजनाया उलेज्या यानादीगु खः।

उत्तर प्रदेशया मुख्यमन्त्री योगी आदित्यनाथलिसें निम्ह नेतातय्सं हनुमान द्यःया पूजा यानाः डिजिटल महाकुम्भ अनुभव केन्द्रया अवलोकन यानादीगु खः। 

यौन दुव्र्यवहारया किपा दयेकिइगु निति छ्यलिइगु आर्टिफिसियल इन्टेलिजेन्स (एआई) यात छ्यलिइगु कथं बाल यौन दुव्र्यवहारयात अपराध माने यायेगु बेलायतं घोषणा याःगु दु। एआई उपकरणविरुद्ध बेलायत सरकारं वंगु शनिवाः कानूनया घोषणा याःगु खः।

थ्व नाप एआईया दुरूपयोग याना बाल यौन दुव्र्यवहारय् किपा दयकेगु ज्यायात अपराध घोषणा याःगु बेलायत हलिन्यकया हे न्हापागु देय् जुगु दु। मस्ततय्त यौनिक किपा दय्केगु निति दयकातःगु आर्टिफिसियल इन्टेलिजेन्स (एआई) उपकरण तयेगु, सिर्जना यायेगु व वितरण यायेगु ज्यायात बेलायत सरकारं गैरकानूनी घोषणा याःगु दु धका गृहमन्त्री यवेट कूपर क्यना अन्तर्राष्ट्रिय समाचार संस्था एएफपीं धाःगु दु।

बेलायतय् दच्छि जक छगु अनुसन्धान यागुलि दँय् दँसं न्यागु लाख मस्त छु न छु कथं दुव्र्यवहारया सिकार जुगु क्यंगु दु।

अमेरिकाय् हाकन मेगु विमान दुर्घटना जुया न्ह्यम्ह म्हेसिगु ज्यान वंगु दु। पेन्सेलभेनियाया फिलाडेल्फिया शहरय् जुगु उगु विमान दुर्घटना जुया न्ह्यम्ह मनू सीगु दु सा १९ म्ह घाःपाः जुगु दु।

विमानय् च्वपि व लँय् च्वम्ह छम्ह मनू सीगु दु धका बीबीसीं धाःगु दुु। बिरामी ज्वना वंगु उगु विमानय् निम्ह पाइलट, छम्ह डाक्टर, स्वास्थ्यकर्मी, बिरामी व बिरामीया मां खः। उपि दक्को मेक्सिकन नागरिक खः।