बेलायतय् कोरोना भाइरस न्हुगु व अप्वो सङ्क्रामक समस्या उत्पन्न जुइवं भारत बेलायतय् जुयाच्वंगु दक्को उडानयात अस्थायी रूपं स्थगित यायेगु निर्णय याःगु दु।

बेलायतय् जुयाच्वंगु उडानयात अस्थायी रूपं यूरोपेली मुलुकपिन्स याये थे निर्णय भारत न याःगु खः। बेलायतय् कोभिड–१९ या आः याःगु अवस्थायात ध्यानय् तया भारत सरकारं बेलायतपाखे वनेगु दक्को उडानयात थुगु दँया डिसेम्बर ३१ तक स्थगित यायेगु निर्णय याःगु दु धका

उड्डयन मन्त्रालयं ट्वीटयासे जानकारी बिःगु दु। उडान स्थगित यायेगु निर्णय मङ्गलबार चान्ह्य १२ बजेनिसे लागु जुइ धका धाःगु खः।

भारतय् कोरोना संक्रमितपि छगु करोड स्वया अप्वो जुइ धुकुगु दु।

वःगु २४ घण्टाय् जक २५ हजार १५२ म्हेसित कोरोना भाइरसया संक्रमण पुष्टि जुइवं आः संक्रमितपि छगू करोड स्वया अप्वो जुगु दु।

भारतया स्वास्थ्य तथा परिवार कल्याण मन्त्रालयया कथं भारतय् थौं सुथय् तक कोरोना भाइरस संक्रमित जूपि छगु करोड ४ हजार ८२५ म्ह थ्यःगु दु।

अथेहे कोरोना संक्रमणं सीपि १ लाख ४५ हजार १३६ म्ह थ्यःगु दु। वःगु २४ घण्टाय् जक ३४७ म्ह सी धुकुगु दु।

भारतय् आःतक ९५ लाख ५० हजार ७१२ म्ह कोरोनामुक्त जुइ धुकुगु दु ।

विश्वन्यक कोरोना सीपि १६ लाख ४३ हजार स्वया अप्वो जुइ धुकुगु दु ।

विश्व स्वास्थ्य संठगनया तथ्यांक कथं आःतक १६ लाख ४३ हजार ३३९ म्ह कोरोना संक्रमितपि सी धुकुगु दु।

वःगु २४ घण्टाय् जक १२ हजार ४०७ म्ह कोरोना संक्रमितपि सी धुकुगु दु।

उगु हे इलय् ६ लाख ४२ हजार ७३८ म्ह कोरोना संक्रमितपि थपे जूगु दु।

थ्व नाप आःतक विश्वन्यकं कोरोना संक्रमितपि ७ कारोड २८ लाख ५१ हजार ७४७ म्ह थ्यःगु दु ।

फ्रान्सया राष्ट्रपति एमानुयल माक्रोंमा कोरोना संक्रमित जूगु दु।

राष्ट्रपति माक्रोंमा कोरोना खने दयेव तत्कालै कोरोना आरटीपीसीआर परीक्षण यायेवं पोजिटिभ खनेदुगु खः ।

राष्ट्रपतिया कार्यालय एलिजे प्यालेसपाखे जारी याःगुु विज्ञप्तीइ राष्ट्रपतियात कोरोना परीक्षण यागुलि पोजिटिभ खनेवं छवाःया लागि एकान्तवास च्वःगु पुष्टि बिहीवाः सुथय् पुष्टि जूगु दु।

कोरोना संक्रमण जुइवं माक्रों न डिसेम्बर २२ व २३ या दिं जुइगु लेबनानया भ्रमण आःया लागि रद्द याःगु दु ।