दक्षिण अफ्रिकाय् कोरोना सङ्क्रमितपि १० लाख स्वया अप्वो थ्यने धुकुगु दु ।

वःगु २४ घण्टाय् जक गुद्धःव न्यासः म्हेसित सङ्क्रमण पुष्टि जुगु दु। थ्व नाप दक्षिण अफ्रिकाय् कोरोना भाइरस सङ्क्रमितपि १० लाख प्यद्धः स्वया अप्वो थ्यःगु दु धका बीबीसीं धाःगु दु।

दक्षिण अफ्रिकाय् याकन फैलै जुइपि न्हगु कोरोना भाइरस पिहावःगु दु धका अनायापि अधिकारीपिन्स पुष्टि याःगु दु। न्हुगु प्रकारया भाइरस पिहावःगु नाप सङ्क्रमण याकन फैलै जुइवं राष्ट्रपति सिरिल रामाफोसा न भाइरस फैलै जुइक मबित कडा प्रतिबन्धया घोषणा यायेत्यःगु दु।

दक्षिण अफ्रिकाय् कोरोना सङ्क्रमणपाखे २६ हजार ७३५ म्ह सी धुकगु दु। दक्षिण अफ्रिका नाप सङ्क्रमितपि १० लाख स्वया अप्वो जुगु देशया धलखय् १८ गु थ्यःगु दु।

न्हुगु प्रकारया कोरोना भाइरस सङ्क्रमण युरोपेली देशय् खने दया वःगु दु । युरोपेली संघ अन्तर्गतया च्याःगु देशय् न्हुगु प्रकारया कोरोना भाइरस खनेदुगु पुष्टि जूगु दु धका विश्व स्वास्थ्य संगठन (डब्ल्यूएचओ) न धाःगु दु ।

डब्ल्यूएचआया युरोपेली क्षेत्रया क्षेत्रीय निर्देशक हन्स क्युग न थःगु कार्यालयया अवस्थायात गम्भीरतापूर्वक स्वया च्वनागु धका जानकारी बियादीगु दु। वयकलं न्हुगु प्रकार भाइरसया लागि रक्षात्मक व नियन्त्रणात्मक व्यवस्था कडाइया साथ पालना यायेमाःगुलि बःबियादीगु दु। कोरोना पुलागु भाइरस स्वया फरक लिच्व क्यना वया च्वंगु थुगु भाइरसं ल्याय्म्हपिन्त यक्को प्रभावित खने दयावयाच्वंगु जानकारी बियादीगु खः।

न्हुगु प्रकारया कोरोना खने दुगु च्याःगु देशया पहिचान जुया वःगु उगु देशया नां धाःसा उल्लेख याःगु मदुनि। वयकलं सामाजिक दूरी कायम यायेमाःगु, मास्क तये माःगु व सावः न बालाक्क ल्हासिलेगु वा स्यानिटाइजर बालाक्क छेय्लेयेगु लगायतया उपाययात कडाइया साथ अवलम्बन यायेत इनाप याःगु दु।

डब्ल्यूएचओ न दक्को अवस्थायात गम्भीरता पूर्वक स्वया च्वनागु दु धका निर्देशक क्लुग न सामाजिक सञ्जाल ट्वीटरयासे धयादीगु खः। विश्व स्वास्थ्य संगठनं वःगु दँ मार्च ११ निसे विश्वभरि कोरोना भाइरसया महामारी फैलै जुगु घोषणा याःगु खः । महामारी आः न जारी जुयाच्वंगु दु।

हकिङ्स विश्वविद्यालयं बिःगु जानकारी कथं आःतक विश्वन्यक न्ह्यःगु करोड ९७ लाख १२ हजार स्वया अप्वो मनू तयेत सङ्क्रमित जूगु दु सा १७ लाख ४७ हजार ७९० स्वया अप्वो मनू सी धुकुगु दु। थुगु भाइरस दकलय् अप्वो प्रभावित अमेरिका दुगु  व मेगु भारत व ब्राजिल  न प्रभावित जूगु धका विश्वविद्यालयं धाःगु दु।

बेलायतय् कोरोना भाइरसविरुद्ध न्हुगु वासःया परीक्षण सुरु जूगु दु। उगु वासः बेलायतया यूनिभर्सिटी कलेज (यूसीएलएच) य् परीक्षण जूयाच्वंगु दु ।

बेलायतया वैज्ञानिकपिन्स कोभिड–१९ पाखे आपतकालीन रक्षा यायेत वासः विकास यानागु व परीक्षण सुरु जूगु धका धाःगु दु। बेलायती औषधि कम्पनी एस्ट्राजेनेका न विकास थुगु एन्टिबडी उपचार वासः खासयाना कोरोनाभाइरस सङ्क्रमितपिनिगु सम्पर्कय् वःपि व खोप बिइत ढिला जुपिन्त उपयोगी जुइ धका दाबी याःगु दु।

सङ्क्रमित बिरामीपिन्त थुगु वासः बिइ वलय् कोभिडया गम्भीर बिमारी जुइपाखे बचे यायेत ग्वाहालि जुइ धका वैज्ञानिकपिन्स धाःगु दु धका बेलायती पत्रिका गार्जियन धाःगु दु।

आः थुगु वासः परीक्षण यायेगुलि लिपागु चरणय् थ्यने धुकुगु दु । थुगु चरणय् न्हापा झीम्ह मनू तयेत बिइगु धका धाःगु दु ।

वःगु २४ घण्टाय् जक भारतय् २३ हजार ६७ म्ह कोरोना संक्रमितपि थपे जूगु दु।

उगु हे इलय् ३३६ म्ह संक्रमितपि सी धुकुगु दु धका विश्व स्वास्थ्य संगठनं धाःगु दु।

भारतय् आःतक कोरोनाया कारण १ लाख ४७ हजार ९२ म्ह सी धुकुगु दु।

विश्व स्वास्थ्य संगठनया कथं आःतक भारतमा कुल कोरोना संक्रमितपि १ करोड १ लाख ४६ हजार ८४५ म्ह थ्यःगु दु।

कुवेतय् थौं निसे कोरोना भाइरस विरुद्धया खोप बिइगु सुरु याये त्यःगु दु ज्याथा ज्यथिपिन्त न्हापा व न्ह्यने खटे जुया ज्यायाना च्वपिन्त न्हापागु प्राथमिकताय् तया बिइ त्यःगु खः ।

खोप देशव्यापी रुपं दक्को नागरिकपिन्त बिइगु कुवेतया योजना दु। कुवेतं कोरोना भाइरस विरुद्धया न्हापागु चरणय् खोप म्हिगः हःगु धका धाःगु दु।

खोप बिइगु अभियान हे न्ह्याकगु धका अन याःम्ह स्वास्थ्य मन्त्री बसेल अल सबाह न जानकारी बिःगु खः । वयकलं दँ न्यक हे बिइगु जुइ धका धयादीगु खः।

खोप बिइ धुका थप मानवीय क्षति कम जुइगु व सङ्क्रमितपिनिगु कम जुइगु विश्वास दु धका स्वास्थ्य मन्त्री सबाह न धाःगु दु ।