भारतय् प्रयागराज महाकुम्भ मेलाय् भागदौड जुगुलि १५ म्ह स्वया अप्पोसिगु ज्यान वंगु आशङ्का याःगु दु। अथेहे यक्को घाःपाः जुगु दु धका भारतीय सञ्चार माध्यमं धाःगु दु।

वंगु चान्ह्यः कुम्भ मेलाय् उगु घटना जुगु खः।हलियकय् दकलय् तःधगु धार्मिक मेला मध्ये छगु कुम्भ मेलाय् म्वोल्हुइगु निति छकल्वं छगु करोड मनूतयेगु ब्बति दइगु भलसा कयातःगु खः।

उगु घटना जुइवं थौ जुइगु अमृत स्नान रद्ध जुगु दु।वंगु जनवरी १३ तारिखनिसे न्ह्यागु महाकुम्भय् आःतक १५ करोड मनूतय्स गङ्गाय् स्नान याये धुकुगु दु।

अमेरिकाया राष्ट्रपति डोनाल्ड ट्रम्पं रुसया राष्ट्रपति भ्लादिमिर पुटिन युक्रेननाप युद्ध क्वचायेकेगु निति वार्ता यायेत तयार मजुल धाःसा रुसयात अमेरिकां प्रतिबन्ध अप्पोकेगु जुइ धका धयादीगु दु।

राष्ट्रपति पद कःघाय् धुका पत्रकार सम्मेलनय् ट्रम्पं छगु न्ह्यसःया लिसः बिइगु झ्वलय् रुसयात अमेरिकां प्रतिबन्ध अप्पोकेगु खँ ल्ह्वःगु खः।

ट्रम्पं थःगु प्रशासनं युक्रेनया राष्ट्रपति जेलेन्स्कीनाप स्वापू दयाच्वंगु व याकन हे रुसया राष्ट्रपति पुटिननाप खँ ल्ह्यायेगु जुइ धका धयादीगु खः। ट्रम्पं उगु इलय्् थः राष्ट्रपति जुगु खःसा रुस व युक्रेन दथुइ युद्ध सुरु जुइ मखु धका धयादीगु खः।

डोनाल्ड ट्रम्पं ४७ म्ह अमेरिकाया राष्ट्रपति कथं शपथ ग्रहण याःगु दु।

वासिङटन डीसीस्थित यूएस क्यापिटल वन एरेनाय् जुगु छगु ज्याझ्वलय् प्रधानन्यायाधीश जोन रोबर्टसं ट्रम्पयात शपथ याकूगु खः।रिपब्लिकन पार्टीपाखे राष्ट्रपतीय निर्वाचनय् उम्मेदवार जूम्ह ट्रम्प डेमोक्रेटिक पार्टीया कमला ह्यारिसयात पराजितयासे ४७ म्ह राष्ट्रपति पदय् निर्वाचित जुम्ह खः।

राष्ट्रपतिया कथं ट्रम्पया थ्व निगुगु कार्यकाल खः। थ्व स्वया न्ह्यः सन् २०१६ य् राष्ट्रपति निर्वाचित जूगु खः।शपथ ग्रहण समारोहय् निवर्तमान राष्ट्रपति जो बाइडेन, पूर्वराष्ट्रपतिपि, उपराष्ट्रपति, मनोनीत जूपि मन्त्रीपि व उच्चपदस्थ अधिकारी तयेगु ब्बति दुगु खः।

तसकं चिकूगुलि शपथ ग्रहण समारोह खुल्ला थासय् मयागु खः।

अमेरिकाय् वःगु वाफसँया हुनिं शुक्रवाः स्वद्धः स्वया अप्वः उडान रद्द जूगु दु।

डेल्टा एयरलाइन्सं अटलान्टा अन्तर्राष्ट्रिय विमानस्थलया फुक्क प्यंगू रनवे निघौ स्वयां अप्वः ई बन्द जूगु जानकारी ब्यूगु दु। डेल्टाया छगू विमानया इन्जिनय् समस्या वयेवं अटलान्टा वनेगु उडान नं रद्द यायेमाःगु खः।

डलास–फोर्टवर्थ (टेक्सास) व शार्लोट डगलस (नर्थ क्यारोलिना)या उडानय् नं मौसम खराबया लिच्वः लाःगु दु। फ्लाइटएवेयरया कथं निगुलिं विमान स्थलय् १२०० स्वयां अप्वः उडान रद्द जूगु खः।अमेरिकाय् थ्व वाःया सुरुइ हे वा फय् वःगु खः।

अन म्हती नं न्याम्ह मनूत सीगु खःसा सलंसः उडान रद्द जूगु खः।गुलिखे थासय् तापक्रम शून्य डिग्री फारेनहाइट (–१८ डिग्री सेल्सियस) स्वयां च्वय् कुहां वयाः द्वलंद्वः मनूत विद्युतविहीन अवस्थाय् लाःगु खः।

गाजाय् वंगु अक्टोबर ७ य् आक्रमण याये धुका लडाक तय्स बन्धक दय्कातःम्ह छम्ह इजरायली बन्धकया सीम्ह लुगु दु धका इजरायली सेनां शुक्रवाः पुष्टि याःगु दु।

फरेन्सिक जाँच लिपा इजरायली सेनां हम्जा अल जायदना ‘हमासया कैदय् स्यागू ’ जानकारी वयकःया परिवारयात बिहीवाः धाःगु खः। सेनां वयकःया अबू युसुफया सीम्ह बुधवाः बरामद याना इजरायल हयागु घोषणा याःगु खः।

प्यालेस्टिनी लडाकू तयेस गाजाया सीमा नापं किबुट्ज होलिटपाखे काय् व अबूयात सन् २०२३ अक्टोबर ७ य् कब्जा काःगु खः। उमि नाप अपहरणय् लापि हम्जाया केँह व किजायात नोभेम्बर २०२३ य् छवाःया युद्धविरामया झ्वलय् रिहा याःगु खः।

हम्जा अल–जायदनाया भविष्यबारे बुधवाः अपुष्ट रिपोर्ट सार्वजनिक याःगु खः, तर शुक्रवाः सेनां वयकःया सीम्ह अवशेष म्हसिकागु खः धका पुष्टि याःगु खः।