अमेरिकाया सिक्रेट सर्भिस अर्थात् गुप्तचर संस्थाया निर्देशक किम्बर्ली चिटल थःगु पदं राजीनामा बिउगु दु। राष्ट्रपतिया उम्मेदवार डोनाल्ड ट्रम्पयात गोली प्रहार याःगु घटना लिपा गोप्य सेवाया प्रमुख चितलं राजीनामा ब्यूगु खः।

बीबीसीया कथं नोभेम्बरय् जुइगु राष्ट्रपति चुनावय् रिपब्लिकन पार्टीया उम्मेदवार ट्रम्पयात लक्षित यानाः छुं दिं न्ह्यः जूगु आक्रमणयात थःगु मिसन एजेन्सीं पनेगु ज्याय् असफल जूगु स्वीकार याःगु दु। जुलाई १३ य् पेन्सिलभेनियाय् जूगु चुनावी सभाय् छम्ह बन्दुकधारीं ट्रम्पयात गोली क्ययेकूगु खः।

वयां याकनं हे चितलयात डेमोक्रेत रिपब्लिकनतय्सं पदं राजीनामा बीत दबाब ब्यूगु खः। चितलयात वर्तमान राष्ट्रपति जो बिडेनं एजेन्सीया प्रमुख नियुक्त याःगु खः। ट्रम्पया जवगु न्हाय्पंनय् गोलीं कयेकूगु खः। न्हाय्पं ठीक जुयाच्वंगु दु धका चिकित्सकं धाःगु दु।

हलिमयय् दकलय् धनीम्ह एलोन मस्कया कम्पनी टेस्लां वइगु दँय् मानवीय रोबोट उत्पादन व छ्यलीइगु ज्या न्ह्याकेत्यंगु दु।मस्कं सामाजिक सञ्जाल ‘एक्स’पाखें वइगु दँनिसें मानवीय रोबोटया उत्पादन व छ्यलाबुला बारे जानकारी ब्यूगु दु।

मस्कं थुज्वःगु रोबोट न्हापां टेस्लां छ्यलीगु व निदँ लिपा अर्थात सन् २०२६ य् जक मेमेगु कम्पनीयात मीइगु धका धाःगु दु। बीबीसीया समाचारय् थुगु दँनिसें टेस्लाया कारखानाय् अज्याःगु रोबोट छ्यलेगु योजना दुगु खँ न्ह्यथनातःगु दु, तर लिबाःगु दु। मस्कं थ्वसिबें न्ह्यः अज्याःगु रोबोटयात २० हजार डलरय् मीगु घोषणा याःगु खःसां थुकिया मू आःतक सार्वजनिक याःगु मदुनि।

थुपिं रोबोटतसें मनूत थें ज्या यायेफु। ‘होण्डा’ व ‘बोस्टन डायनामिक्स’ लिसेंया मेमेगु कम्पनीं नं थःगु हे कथंया मानवीय रोबोट विकास यानाच्वंगु दु। एलोन मस्कं धयाच्वंगु हरेक योजनायात धक्का बियाच्वंगुलिं रोबोट मानव योजना तकं वइगु दँतक पूवने मफइगु सम्भावना दु। सन् २०१९ य् वइगु दँनिसें सतकय् ‘सेल्फ ड्राइभिङ’ अर्थात अटोमेटिक ट्याक्सी चले जुइगु घोषणा जूसां नं थ्व घोषणा आःतक लागू जूगु मदुनि।

विद्युतीय सवारी साधनया माग म्हो जुयाच्वंगु इलय् टेस्लां कृत्रिम बुद्धिमत्ता अर्थात ‘कृत्रिम बुद्धिमत्ता’ (एआई), स्वचालित सवारी साधन व रोबोट थेंज्याःगु प्रविधिइ ध्यान बियाच्वंगु दु।

क्रोएसियाया छगू नर्सिङ होमय् जूगु गोलीकाण्डय् खुम्ह मनूत सीगु दु । जाग्रेबया पूर्वी भागय् लाःगु दारुवरय् च्वंगु छगू नर्सिङ होमय् अज्ञात पुचलं दुहां वनाः गोली चलेयाःगु अन्तर्राष्ट्रिय समाचार संस्था एएफपीं जानकारी ब्यूगु दु।

न्याम्ह घटनास्थलय् हे सीगु खःसा वासः यायेगु झ्वलय् मेम्ह छम्ह सीगु खः। घटनाय् लानाः मेपिं आपालं घाःपाः जूगु दु । प्रहरीं थ्व घटनाय् दुथ्याःम्ह मनूयात ज्वने धुंकूगु धका धाःगु दु। प्रहरीया कथं गोली क्ययेकूम्ह अवकाश प्राप्त सैनिक प्रहरी अधिकृत खः।

थगुने जःलाखःला देय् सर्बियाय् गोली चलेजूगु इलय् राजधानी बेलग्रेडया छगू स्कुलय् जूगु नरसंहारय् १० म्ह मनूत सीगु खः। प्रधानमन्त्री आन्द्रेज प्लेन्कोभिचं सम्बन्धित निकाययात घटनाबारे विस्तृत छानबिन यायेत व थप घटना मजुइकेत आह्वान याःगु दु।

चिनियाँ कम्युनिष्ट पार्टीं केन्द्रीय सदस्यय् पूर्व विदेश व रक्षामन्त्रीयात बर्खास्त याःगु दु। पूर्व विदेशमन्त्री किन् झाङ व रक्षामन्त्री लि साङ्फुयात बिहीवाः च्वंगु पार्टीया केन्द्रीय बैठकं बर्खास्त यायेगु निर्णय याःगु खः।

निम्हं न्हापागु दँय् सरकारपाखे पिहावःगु खः। पार्टीं पीएलए रकेट बलया पूर्व कमान्डर लि यूचाउयात चिइकूगु खः। उमिसं पार्टीया अनुशासन व कानुन याःगु पालना मयागु धका धाःगु खः। भ्रष्टाचार याःगु धका पार्टीं शंका यागु खःसां आःतक आधिकारिक निकायपाखे पुष्टि जूगु मदुनि।

चिनियाँ राष्ट्रपति सी चिन फिङ सन् २०१२ य् पार्टीया नेतृत्वय् वने धुका भ्रष्टाचारविरुद्धय् कडा यानाच्वंगु खः। थुगु दँय् जक उच्च तहया ३६ म्ह कर्मचारी व उपमन्त्रीपिन्त अनुसन्धान याये धुकुगु दु। चीनया सत्तारुढ दल कम्युनिष्ट पार्टीय २०५ म्ह सदस्यीय केन्द्रीय कमिटी दु।

उगु कमिटीं न्ह्यावलय् न्यादँय् छकः च्वनिइगु विशेष बैठकं देय् या दीर्घकालीन सामाजिक व आर्थिक रणनीति तयार याइ। अथेहे पार्टीया उच्च तहया सदस्यपिनिगु बारेय् न निर्णय याइ।

बंगलादेशय् सरकारी जागिरय् आरक्षणया विरोधया झ्वलय् सीपिनिगु ल्याः २५ म्ह थ्यंगु दु।

विरोध प्रदर्शनय् सलंसः मनूत घाःपाः जूगु दु। बुधवाः प्रधानमन्त्री शेख हसिनां राष्ट्रया नामय् सम्बोधन यायेधुंकाः हिंसा अप्वःगु बीबीसीं जानकारी ब्यूगु दु।

प्रदर्शनकारीपिन्सं राजधानी ढाकालिसें आपालं थासय् मिँ तयाः तोडफोड याःगु दु। थाय्थासय् प्रहरीलिसे ल्वापु नं जूगु दु। हिंसा अप्वया वनेवं इन्टरनेट सेवा नं बन्द जूगु दु। स्कूल व कलेज अनिश्चितकाल तक बन्द जुयाच्वंगु दु।

आन्दोलनकारी तय्स सरकारी जागिरय् आरक्षण चीकेत माग याना वयाच्वंगु खः। छुं दिं न्ह्यः विश्वविद्यालयया विद्यार्थीपिन्सं सन् १९७१ य् पाकिस्तानविरुद्ध मुक्ति युद्ध ल्वानादीपिं सैनिकतय् मस्तय्त आरक्षण प्रणाली खारेज यायेमाःगु माग यासें विरोध प्रदर्शन न्ह्याकूगु खः। विरोध अप्वोया वन वं हिंसाय् हिगु खः।