अमेरिकी राष्ट्रपति ज्याकुथिं इरानलिसे जुयाच्वंगु सम्भावित सम्झौताबारे लिपांगु निर्णय वयेत अझं छुं दिं पीमालीगु धाःगु दु।

छगू अन्तर्राष्ट्रिय सञ्चारमाध्यमया रिपोर्ट कथं, उगु सम्झौतां इरानया नेतृत्व तगिंपाखें औपचारिक स्वीकृति कायेत छुं ई कायेफइगु धयातःगु खः। रिपोर्टय् न्ह्यथनातःम्ह छम्ह वरिष्ठ अमेरिकी अधिकारीया कथं निगूलिं पक्षदथुइ सकारात्मक प्रगति जुयाच्वंगु दु व छुं दिंया दुने हे सम्झौता क्वचाइगु अपेक्षा यानातःगु दु। अथे खःसां, सम्झौता अझं लिपांगु अन्तिम चरणय् दूगुलिं फुक्क प्रक्रिया पूवने धुंकाः जक औपचारिक घोषणा यायेगु धयातःगु दु।

थुगु सम्भावित सम्झौतां क्षेत्रीय शान्ति नापं आणविक कार्यक्रमसम्बन्धी च्यूताःयात सम्बोधन यायेत ग्वाहालि जुइगु अपेक्षा यानातःगु दु। अथे खःसां, थुगु विषयय् विस्तृत सहमति सार्वजनिक धाःसा जूगु मदुनि। अमेरिकी राष्ट्रपति डोनाल्ड ट्रम्पं नापं थः प्रतिनिधिपिंत वार्ताय् धैर्यता व सावधानी छ्यलेत छ्याता बियागु धयादिल। वय्कलं निगूलिं पक्षं माक्वः ई कयाः बिचाः यानाः पाय्छि जुइगु निर्णयय् थ्यंकेमाःगु बिचाः प्वंकादिल।

लिसें, अमेरिकां इरानया बन्दरगातय्त तयातःगु नाकाबन्दी सम्झौता औपचारिक कथं स्वीकृत, प्रमाणित व ल्हाःचिं मतःतकया निंतिं यथावत् जुइगु जानकारी नापं ब्यूगु दु।

अमेरिका व इरान दथुइ शान्ति वार्ता न्ह्याइगु ह्वःताःया समाचार लिपा अन्तर्राष्ट्रिय चिकं बजारय् सोमबाः न्हूगु कारोबार न्ह्यानाः कच्चा चिकंया भाः थ्यंमथ्यं ५ प्रतिशतं कुहांवंगु दु।

मध्यपूर्व क्षेत्रय् तनाव म्हो जुइगु व आपूर्ति अवरोध चिलावनीगु आशाय् लगानीकर्ताया दथुइ बिक्री दबाब अप्वःगुलिं बजाः कुहांवःगु खनेदूगु खः। जुलाईलय् आपूर्ति जुइगु पश्चिम टेक्सास मध्यवर्ती कच्चा चिकं छगू ई ब्यारेलया ५.३५ अमेरिकी डलरं कुहांवनाः ९१.२५ अमेरिकी डलरय् थ्यंगु खः, थ्व थ्यंमथ्यं ५.५३ प्रतिशतं कुहांवंगु खः।

अथे हे ब्रेन्ट कच्चा चिकं नापं ५.५७ अमेरिकी डलरं कुहांवनाः छगू ब्यारेलय् ९७.९७ अमेरिकी डलर कुहांवंगु खः, थ्व थ्यंमथ्यं ५.३८ प्रतिशतं कुहांवंगु खः।अमेरिकी राष्ट्रपति डोनाल्ड ट्रम्पं शनिबाः इरानलिसेया शान्ति सम्झौता यक्वः हे क्वचाये धुंकूगु जूसां लिपांगु सहमतिया निंतिं अमेरिका, इरान लिसें मध्यपूर्वया मेमेगु देय्त दथुइ अझं सहलह जुइ ल्यं दनीगु धयादिल। प्रस्तावित योजना कथं ६० न्हुया युद्धविराम विस्तार, हर्मुज जलडमरूमध्य हाकनं चायेकेगु, इरानयात हाकनं चिकं मिइके बीगु व इरानया आणविक ज्याझ्वः बारे वार्ता यायेगु विषय दुथ्याना च्वंगु दु।

अमेरिकी विदेशमन्त्री मार्को रुबियों इरानं हर्मुज जलडमरूमध्य हाकनं चायेकेत पलाः न्ह्याकूसा अमेरिका आणविक कार्यक्रम सम्बन्धी गम्भीर वार्ताय् दुहां वनेत तयार दूगु धयादीगु दु। थ्वहे दथुइ इरानया इस्लामिक क्रान्तिकारी गार्डं लिपांगु २४ घौया दुनेमा ३३ गः लःजहाज हर्मुज जलडमरूमध्ये पार याःगु जानकारी ब्यूगु दु, थुकिं उगु मार्ग आंशिक कथं सञ्चालनय् दूगु छुमां बिइ।

ऊर्जा विश्लेषकतय् कथं युद्ध न्ह्यः थें हे आपूर्ति याकनं सामान्य अवस्थाय् लिहां वयेत धाःसा थाकुनि, छाय् धाःसा उत्पादन संरचनाय् क्षति, छुं क्षेत्रय् उत्पादन अवरोध व ढुवानी समस्यात अझं पूवंकं ज्यंगु मदुनि । विश्लेषक तय्सं चिकं बजारय् आपूर्ति–माग असन्तुलन न्यंनाः च्वनीगु व भाः ताः ईतक च्वकाय् हे च्वने फइगु लिसें पूवंकं कुहां वनीगु अवस्था सन् २०२७ पाखे जक जुइफइगु धाःगु दु।

चिलीइ उत्तरी क्षेत्रय् ६.९ म्याग्निच्युडया भुखाय् ब्बःगु दु धका अमेरिकी भूगर्भ सर्वेक्षणं धाःगु दु।

अय्न अन आःतक छु न मानवीय क्षति वा भौतिक क्षति जुगु रिपोर्ट वःगु मदुनि।अमेरिकी निकायया कथं अटाकाया मरुभूमि क्षेत्रय्, काला सहर काख्रिब ३१ किलोमिटर तापाक्क, जमिन सतहपाखे करिब १०० किलोमिटर (६३ माइल) क्वय् भुखाय् ब्वःगु दु धका धाःगु दु।

चिकं जाःगु निगः चिनियाँ पानीजहाज स्ट्रेट अफ हर्मुज जलमार्गं पिहा वयेवं अमेरिका–इरान याकन क्वचाइगु भलसा अप्पोगु दु।

अमेरिकी राष्ट्रपति डोनाल्ड ट्रम्पं युद्ध याकन क्वचाइगु जुगु दु धका उपराष्ट्रपति जेडी भान्सं इराननाप वार्ताय् प्रगति जुगु दु उल्लेख याःगु दु।साउदी अरब, कतार व संयुक्त अरब इमिरेट्स (यूएई) या इनापय् ट्रम्पं इरानय् योजनाबद्ध सैन्य आक्रमण दिकूगु दु।

अरब नेतातय्स दक्को पक्ष स्वीकार्य सम्झौता जुइगु भलसा बिइव थुगु निर्णय काउगु दु धका अन्तर्राष्ट्रिय सञ्चारमाध्यमं धाःगु दु।

युक्रेन युद्ध तःगतिं न्ह्यानाच्वंबलय् रूसं देय्न्यंकंया द्वलंद्वः सैनिक सहभागी याकाः स्वन्हुतक तःधंक आणविक हतियार अभ्यास न्ह्याकूगु दु ।

किएभं ड्रोन आक्रमणत अप्वयेकाच्वंगु व राष्ट्रपति भ्लादिमिर पुटिन चीन भ्रमणय् वनेन्ह्यः जूगु थ्व अभ्यासयात रणनीतिक रूपं महत्त्वपूर्ण सङ्केतकथं स्वयातःगु खः। रूसी सेनां मङ्गलबाःनिसें मे १९ निसें २१ तक न्ह्याकीगु उगु अभ्यासय् आक्रमणया सम्भावित खतरा सामना यायेगु परिस्थितिइ आणविक शक्तिया तयारी व छ्यलाबुलासम्बन्धी परीक्षण याइगु धाःगु खः।

रक्षा मन्त्रालयया कथं थ्व अभ्यासं देय्या आणविक क्षमता व आपतकालीन अवस्थाया तयारीयात सुदृढ यायेत तातुना तयातःगु खः।रूसं युक्रेनय् थ्यंमथ्यं प्यदँस्वयां अप्वः इलंनिसें यानाच्वंगु आक्रमणया झ्वललय् मद्दिक आणविक ल्वाभः छ्यलेगु ख्याच्वः बियावयाच्वंगु खः। लिपांगु अभ्यास नं उगु हे पृष्ठभूमिइ वःगु खः, गन मस्को व पश्चिमी देय्दथुइया तनाव तच्वयाच्वंगु खः।रक्षा मन्त्रालयं पितब्वःगु विवरणकथं थ्व अभ्यासय् ६५ द्वःस्वयां अप्वः सैनिकत सहभागी जुइ।

लिसें न्हय्द्वः व ८०० ताजिया ज्यावः लिसें ल्वाभःया प्रणाली छ्यली, गुकिइ २०० स्वयां अप्वः मिसाइल प्रक्षेपण प्रणाली दुथ्याः। अभ्यासय् विमान, युद्धपोत, पनडुब्बी व आणविक पनडुब्बी नं सहभागी जुइगु धयातःगु खः ।थ्व हे झ्वलय् ब्यालेस्टिक व क्रुज मिसाइलतय्गु परीक्षण नं याइगु धाःगु खः, गुकिं रूसया आणविक प्रतिरोध क्षमता व तयारी अवस्था मूल्याङ्कन याइ ।

मन्त्रालयया कथं थ्व अभ्यासय् बेलारुसय् तैनाथ आणविक ल्वाभःलिसे सम्बन्धित मंकाः अभ्यास नं दुथ्याकातःगु खः । रूसं नाटोलिसेया सीमाय् च्वंगु थःगु सहयोगी बेलारुसय् न्हापा हे आणविक क्षमतायुक्त ओरेसनिक मिसाइल प्रणाली तैनाथ याना तये धुंकूगु खः। थ्वहे दथुइ, रुस–अमेरिका दथुइया लिपांगु प्रमुख आणविक ल्वाभः नियन्त्रण सम्झौता सिधःगु छलानिलालिपा थ्व अभ्यास याःगु खः।

उगु सम्झौता सिधये धुंकाः विश्वया निगू तःधंगु आणविक शक्ति देय् दथुइ औपचारिक नियन्त्रण संरचना कमजोर याःगु माने यानातःगु खः। पुटिनं मस्कोया आणविक शक्तिबारे आः नकतिनि धइथें याःगु कडा टिप्पणीतय्गु दथुइ थ्व अभ्यास सार्वजनिक याःगु खः । विश्लेषकतय्कथं थुकिं रूसया सैन्य तयारी व रणनीतिक दबाब निगुलिंयात प्रदर्शन याइगु तातना तयातःगु खः ।

थ्व अभ्यास राष्ट्रपति पुटिन चीनय् निन्हुया भ्रमणय् वनेन्ह्यः छघौनिघौ न्ह्यः जक घोषणा याःगु खः, गुकियात अन्तर्राष्ट्रिय कूटनीतिक सन्दर्भय् नं च्यूताः तयाः च्यूताः तयाः स्वयाच्वंगु खः।