सजायँ राष्ट्रपति विरुद्ध अपमानजनक टिप्पणी याःगु द्वपनय् ट्युनिसियाया छम्ह मनूयात मृत्युदण्डय सजायँ न्यंकूगु दु।

सामाजिक संजालय् राज्य सुरक्षाय् आक्रमण याःगु द्वपनय् वयात मृत्युदण्डया सजायँ न्यंकूगु रोयटर्सं जानकारी ब्यूगु दु।ट्युनिसियाली लीग फर ह्युमन राइट्सया प्रमुख व वया वकिलया शुक्रवाः थ्व फैसला ‘अजूचायापुगु’ जूगु धाःगु दु। २०२१ स राष्ट्रपति काइस सैदं फुक्क धया थें सत्ता कब्जा यायेधुंकाः अभिव्यक्ति स्वतन्त्रतायात कडा याःगु दु।

मृत्युदण्डया सजाय फयेधुंकूम्ह मनू ५६ दँया दैनिक ज्यालादारी साबेर चौचाने खः। वय्कःया वकिल औसामा बाउथल्जां रोयटर्सयात धाःगु दु, वय्कः छम्ह सामान्य नागरिक खः । वय्कःया औपचारिक शिक्षा म्हो जक दुगु खःसा वय्कःयात गिरफ्तार याये न्ह्यः राष्ट्रपति विरुद्ध आलोचनात्मक पोस्ट जक च्वयादीगु खः ।बौथाल्जां धाःगु दु, “नाबेउल अदालतया न्यायाधीशं फेसबुकय् तःगु छगू पोष्टया निंतिं वयात मृत्युदण्डया सजायँ ब्यूगु खः, थ्व छगू ग्यानापुगु व अभूतपूर्व निर्णय खः।”फैसलायात कयाः पुनरावेदन याःगु दु। न्याय मन्त्रालयं टिप्पणीया निंतिं याःगु इनापया तत्काल लिसः मब्यूगु खः।

ट्युनिसियाया अदालतं गबलें गबलें मृत्युदण्डया सजायँ बीगु यानाच्वंगु दु, तर स्वंगू दशकय् छुं नं कथंया मृत्युदण्डया सजायँ बीगु ज्या मजूनि। साबरया किजा जमाल चौचानें टेलिफोनपाखें रोयटर्सयात धाःगु दु, “जिमिसं पत्याः यायेमफु। “जिपिं गरिबीं ग्रस्त परिवार खः, आः गरिबीलिसें उत्पीडन व अन्याय नं वइ ।”थ्व फैसलां सामाजिक संजालय् कार्यकर्ता व आम ट्युनिसियावासीतय् दथुइ आलोचना व व्यंग्यया लहर ब्वलंगु खः। यक्वसिनं थुकियात राष्ट्रपति सैदया आलोचकतय्त ख्याच्वः बीगु पलाःया रुपय् काःगु खःसा थुज्वःगु कठोर निर्णयं अभिव्यक्ति स्वतन्त्रतायात अझ दमन याइगु व राजनीतिक तनाव अप्वइगु चेतावनी बिउगु खः।

सैदं निर्वाचित संसद भंग यानाः फरमानपाखें शासन यायेगु सुरु यायेधुंकाः अधिकारकर्मीतय्सं न्यायपालिकाया स्वतन्त्रता कमजोर जूगु धासें आलोचना यानाच्वंगु दु। विपक्षी दलतय्सं सैदया थ्व पलाःयात “कू” धाःगु दु।राष्ट्रपतिं “देशद्रोही” धकाः ब्रान्डिङ यानातःपिं अधिकांश विपक्षी नेतात थौंकन्हय् थीथी द्वपनय् जेलय् दु।

जापानय् न्हापांम्ह मिसा प्रधानमन्त्री दइगु जूगु दु। सत्तारुढ लिबरल डेमोक्र्याटिक पार्टीं पूर्व आर्थिक सुरक्षामन्त्री साना ताकाइचीयात न्हूम्ह नेता ल्यःगु दु।

बहुमत दुगु पार्टीया नेता प्रधानमन्त्री जुइगु जापानी प्रचलन कथं वय्कः मेम्ह प्रधानमन्त्री जुइगु लगभग निश्चित जुइ धुंकूगु दु।ताकाइचीयात पूर्व प्रधानमन्त्री शिन्जो आबेया लिक्कया विश्वासपात्रया कथं कायेगु याः। आबे जापानया दकलय् ताः ई तक प्रधानमन्त्री जुम्ह नेता खः। वंगु प्यदँया दुने जापानय् प्यम्ह प्रधानमन्त्री जूगु दुसा ताकाइची न्याम्हम्ह प्रधानमन्त्री जुइत्यंगु खः।

ताकाइचीं पूर्व प्रधानमन्त्री जुनिचिरो कोइजुमी व वर्तमान कृषिमन्त्रीया काय् कोइजुमी शिन्जिरोयात बुकाः पार्टीया नेता जूगु खः। यदि कोइजुमीं राष्ट्रपतिया पद त्याकल धाःसा व देय्या दकलय् चीधिकःम्ह प्रधानमन्त्री जुइफु। न्हापांगु चरणया चुनावय् छम्ह नं उम्मेदवारं पूर्ण बहुमत मकाये धुंकाः शीर्ष निम्ह उम्मेदवार ताकाइची व कोइजुमी निगूगु चरणय् वन।

निगूगु चरणय् ताकाइचीं १८५ मत काःगु खःसा कोइजुमीं १५६ मत काःगु खः। प्रधानमन्त्रीया नितिं ताकाइचीया उम्मेदवारीयात कयाः याकनं हे संसदय् मतदान जुइत्यंगु दु। आःया प्रधानमन्त्री शिगेरु इशिबाया थासय् ताकाइचीं प्रधानमन्त्री जुइगु जूगु दु।जुलाई महिनाय् जूगु उच्च सदनया चुनावय् पार्टी पराजित जुइ धुंकाः इशिबाप्रति असन्तोष अप्वःगु दु।

देशय् अप्वया च्वंगु मुद्रास्फीतियात कयाः जनअसन्तोष अप्वःगु व विपक्षी दलतय्त समर्थन नं अप्वया वनाच्वंगु इलय् एलडीपीं नेतृत्व ताकाइचीयात लःल्हाःगु दु।ताकाइचीया नेतृत्वय् जनसमर्थन अप्वइगु व राजनीतिक अस्थिरतायात पनेगु एलडीपीया विश्वास दु।पार्टीया अध्यक्ष निर्वाचित जुइ धुंकाः वय्कलं धयादी, “जितः न्ह्यःने वइगु लँपु गुलि थाकुइ धइगु खँय् लय्तायेगु स्वयां नं चिन्तित जुयाच्वना।”

पर्पलेक्सिटी एआईया सीईओ अरविन्द श्रीनिवास युवा अर्बपतिया धलखय् लाःगु दु ।हुरुनया रिपोर्ट कथं वय्कः ३१ दँया उमेरय् २१,१९० करोड भारतीय सम्पत्तिलिसें भारतया दकलय् चीधिकःम्ह अर्बपति जुयादीगु दु।

सन् २०१७ य् इलेक्ट्रिकल इन्जिनियरिङय् डुअल डिग्री पूवंकूगु खःसा कम्प्युटर विज्ञानय् हिलेत थाकुसां नं पाइथन सयेकादीगु खः। नांजाःम्ह एआई विज्ञ जोशुआ बेन्गियोलिसे इन्टर्नशिप याये धुंकाः वय्कलं आर्टिफिसियल इन्टेलिजेन्स (एआई)य् पीएचडी यानादीगु खः।सन् २०२२ य् श्रीनिवासं डेनिस याराट्स, जोनी हो व एन्डी कोन्विन्स्कीलिसे जानाः पर्पलेक्सिटी एआईया सहसंस्थापक याःगु खः। कम्पनीं थःत गुगल सर्चया विकल्पया रुपय् स्थापित याःगु दु।

थुकिं सर्च व एआईयात स्वानाः प्रयोगकर्ता तय्त अन्तरक्रियाशील लिसः व प्रमाणित स्रोतया जानकारि बिइ।गुगलया पूर्व अनुसन्धानकर्ता श्रीनिवासं थःगु म्हगस पूवंकेत गुगल थेंज्याःगु तःधंगु कम्पनी त्वःतेगु निर्णय याःगु खः।हुरुनं च्वःगु दु, “थ्व विचारं ज्या यात – मनूत बुलुहुँ परम्परागत लिंकय् आधारित मालेज्यापाखें समाधानमुखी भ्रमय् वन।

सन् २०२५ या मे महिनाय् पर्पलेक्सिटीं भारतया एयरटेललिसे साझेदारी यानाः ३६ करोड भारतीय प्रयोगकर्तातय्त पर्पलेक्सिटीइ निःशुल्क पहुँच बिउगु खः। थुकिं प्लेटफर्मया पहुँच यक्व हे अप्वयेकल। आः हलिंन्यंक थुकिया ३ करोड सक्रिय प्रयोगकर्तात दु।सन् २०२५ जुलाईतक पर्पलेक्सिटीया मूल्यांकन १८ अर्ब डलर थ्यंगुलिं एआई उद्योगय् कम्पनीयात अग्रणी थासय् लाकूगु खः।

च्याटजीपीटी लगायत कृत्रिम बौद्धिकता प्रविधिया विकास यायेगुलि न्ह्यने लानाच्वगु ओपनएआई नकतिनि हे शेयर मिइ धुकां हलिमय दकलय् थिकेगु निजी कम्पनी जुगु दु।

ब्लुमबर्गय् प्रकाशित बुखँ कथं, कम्पनीया लिपागु मूल्यांकन ५०० अर्ब अमेरिकी डलर थ्यःगु दु, एलन मस्को कम्पनी स्पेसएक्सयात तक लिउने लाकागु दु। स्पेसएक्सया लिपागु मूल्यांकन ३ सय ५० अर्ब अमेरिकी डलर खः।सन २०२५ य् सुरुइ एआईया अनुमानित मूल्यांकन ३०० अर्ब डलर खः।

च्याटजीपीटी थे जाःगु उत्पादन याये धुका उकिया लोकप्रियता व व्यावसायिक विस्तार याये धुका थुकिया भाः तसकं थां वःगु खः। कम्पनीं करिव १० अर्ब डलरया सेयर मिइगु अनुमति बिइ खःसां ६ दशमलव ६ अर्ब डलर जक मिइ फुउगु खः।

प्यालेस्टिनी विद्रोही समूह हमास इजरायलपाखे बन्धक दयकातःपि ल्यः दुपि दक्को रिहा यायेत तयार जुगु दु।

अमेरिकाया राष्ट्रपति डोनाल्ड ट्रम्पं इजरायल–अमेरिका दथुइ गाजा शान्ति सहमति पालना यायेत बिउगु ई दुने ल्यः दुपि बन्धक रिहा यायेत तयार जुगु धका धाःगु दु। तर हमासं इजरायल–अमेरिका दथुइ जुगु गाजा शान्ति सहमतीया छु बुँदाय् संसोधन जुइमाः धका बीबीसीं धाःगु दु।

हमासं बन्ध तय्त रिहा यायेगु घोषणा लिपा अमेरिकाया राष्ट्रपति ट्रम्पं गाजाय् आक्रमण दिकेत इजरायलयात इनाप याःगु दु। सामाजिक सञ्जाल टु«थय् च्वःगु दु ट्रम्पं हमास सहमतिया लँपुइ वःगु दु व थुकिइ गाजाय् शान्ति स्थापना जुइगु लँपु चाःगुलि आक्रमण दिकेत इजरायलयात इनाप याःगु खः।