चीनं अन्तरिक्ष स्टेशनय् छ्वंगु प्यम्ह छुँ शुक्रवाः पृथ्वीइ लिहावःगु दु।ग्लोबल टाइम्सयात चिनियाँ विज्ञान प्रतिष्ठान (सीएएस) पाखे वःग जानकारी कथं, अन्तरिक्ष विज्ञान छ्यलेत नमूनाया गूगुगु ब्याचय् प्यम्ह छुँ छ्वंगु खः।

लिहावःपि प्यम्ह छुँ चिनियाँ वैज्ञानिकतय्छ लःल्हागु दु।चीनया अन्तरिक्ष स्टेशनं छ्वंगु उगु स्पेशशिपय् स्वम्ह अन्तरिक्ष यात्रीप्रि– झांग लू, वू फेई व झांग होंगझांगपि दुथ्याःगु खः।

सीएएसया कथं, अनुसन्धानकर्ता तय्स उगु छुँ तयेगु व्यवहार व प्रमुख शारीरिक व जैविक–रासायनिक सूचकया जाँच यायेगु याइ। परिक्षणया निति छ्वंगुलि निम्ह मिसा व निम्ह मिज तय्त छ्वःगु खः।

भारतया दक्षिण–पश्चिमी राज्य महाराष्ट्रया पुणे जिल्लास्थित मुम्बई–बेङ्गलुरु राष्ट्रिय राजमार्गय् नव ताँय् मिँच्याःगु ट्रकं सवारी साधनय् ठक्कर बिया च्याम्ह मनू सीउगु दु।

अथे उगु दुर्घटनाय् १५ म्ह घाःपा जूगु दु। स्थानीय प्रहरीया कथं घाःपाः जूपिन्त नापच्वंगु अस्पतालय् भर्ना याःगु दु सा घटनाया बारे थप अनुसन्धान जुयाच्वंगु दु।

क्रेमलिनया प्रवक्तां राष्ट्रपति भ्लादिमिर पुटिनया भारत भ्रमणया निंतिं रुसं ‘सक्रिय रुपं तयारी’ यानाच्वंगु धाःगु दु।

सन् २०२५ या अन्त्य न्ह्यः उच्चस्तरीय भ्रमण जुइगु अनुमान याःगु राज्य समाचार संस्था टासं जानकारी ब्यूगु दु। क्रेमलिनया प्रवक्ता दिमित्री पेस्कोभं सरकारी ट्यासयात धाःगु दु, “राष्ट्रपति पुटिनया भारत भ्रमणया निंतिं थौंकन्हय् जिपिं सक्रिय रुपं तयारी यानाच्वनागु दु, थुगु दँया अन्त्य न्ह्यः हे भ्रमण यायेगु योजना दु, अले थ्व तसकं सार्थक भ्रमण जुइगु विश्वास दु।”

भारतीय सञ्चारमाध्यमय् वःगु बुखँ कथं निगू देय् दथुइ डिसेम्बरय् श्रम गतिशीलता सम्झौता जुइगु सम्भावना दु। थुकिया बारे न्यंगु न्ह्यसलय् पेस्कोभं धाःगु दु, “जिमिसं आः हे छुं नं सम्झौता सार्वजनिक याये चाहे मजू, फुक्क खँ इलय् हे घोषणा जुइ।”स्थानीय संचार माध्यमया समाचार कथं प्रस्तावित श्रम सम्झौतापाखें भारतीय नागरिकतय्त रुसी श्रम मन्त्रालयया प्रत्यक्ष निगरानीइ कोटा प्रणाली अन्तर्गत दीर्घकालीन आधारय् आधिकारिक रुपं रुसय् ज्या यायेगु अवसर दइ।

राष्ट्रपति पुटिनया भारत भ्रमण सन् २०२१ लिपा न्हापांगुखुसि जुइगु अनुमान याःगु दु।थ्व स्वयां न्ह्यः थुगुसी सेप्टेम्बर १ तारिखय् चीनया तियान्जिनय् जूगु साङ्घाई सहयोग संगठनया शिखर सम्मेलनया झ्वलय् वय्कः व प्रधानमन्त्री नरेन्द्र मोदी दथुइ व्यक्तिगत भेटवार्ता जूगु खः।

भारत व रुस दथुइ सन् २००० अक्टोबर ३ तारिखय् ‘रणनीतिक साझेदारी सम्झौता’ जूगु खःसा थ्व सम्झौतां निगू देय् दथुइ राजनीतिक, आर्थिक व सुरक्षा स्वापूया निंतिं बल्लाःगु आधार दयेकूगु कथं कायेगु याः।

मेखे अमेरिकी राष्ट्रपति डोनाल्ड ट्रम्पं मंगलवाः भारतलिसेया व्यापारिक वार्ता ‘सकारात्मक दिशाय् न्ह्यानाच्वंगु’ धयादीगु दु । वय्कलं भारतं रुसी चिकंया आयात म्हो याःगु दाबीयात नं दोहोरे यानादीगु दु।

पाकिस्तानया राजधानी इस्लामाबादया जिल्ला अदालत पिने मंगलवाः जूगु आत्मघाती विस्फोटय् लानाः १२ म्ह मनूत सीगु दुसा २७ म्ह घाःपाः जूगु आन्तरिक मामिला मन्त्री मोहसिन नकवीं संचारमाध्यमयात जानकारी ब्यूगु दु।

आपालं जिल्ला अदालत दुगु न्यायिक परिसरय् आत्मघाती विस्फोट जूगु वय्कलं धयादीगु दु।प्रहरी व उद्धार पुचः तत्काल घटनास्थलय् थ्यंकाः सीम्ह व घाःपाः जूपिन्त पाकिस्तान इन्स्टिच्युट अफ मेडिकल साइन्सय् यंकूगु खः।प्रहरीयात उद्धृत यासें घाःपाः जूपिंमध्ये गुलिखेया अवस्था गम्भीर जूगुलिं सीपिनिगु ल्याः अप्वइगु सम्भावना दूगु सिन्ह्वां जानकारी ब्यूगु दु।

प्रारम्भिक अनुसन्धान प्रतिवेदन कथं आक्रमणकारीत न्यायिक परिसरय् दुहां वनेत स्वःगु खःसां कडा सुरक्षा घेरा तोडे यायेमफुगुलिं अन्ततः परिसर पिने प्रहरीया गाडीइ आक्रमण याःगु खः।विस्फोटया हुनिं छुं सवारी साधनय् मिँ च्याःगु दुसा छुं सवारी साधनय् क्षति जूगु दु।

प्रहरीं घटनास्थलं आत्मघाती बम विस्फोटकपिनिगु म्हया अंग बरामद याःगु जानकारी ब्यूगु दुसा फोरेनसिक पुचलं आक्रमणकारीया पहिचान यायेगु प्रक्रिया न्ह्याकूगु दु।जिल्ला प्रशासनं अदालत परिसर खाली याःगु दुसा सुरक्षा विभागं उगु क्षेत्रय् मालेगु ज्या न्ह्याकूगु दु।

आक्रमणया जिम्मेवारी आःतक छुं नं पुचलं काःगु मदुनि । तर सुरक्षा स्रोतयात उद्धृत यासें सिन्ह्वां अफगानिस्तानय् च्वंगु प्रतिबन्धित तहरीक ए तालिबान पाकिस्तान (टीटीपी) पुचलं आक्रमण याःगु धाःगु दु।

थाइल्यान्डया सिमा लागाय् न्हूगु बारुदी सुरुङ् तःगु धइगु थाइल्यान्डया द्वपंयात अस्वीकार यासें कम्बोडियाया विदेश मन्त्रालयं विज्ञप्ति पितब्वःगु दु।

कम्बोडिया सरकारं विज्ञप्तिइ थाइल्यान्डया सीमाय् कम्बोडियां न्हूगु बारुदी सुरुङ तःगु द्वपंयात खण्डन व अस्वीकार यानातःगु खः।कम्बोडियाया गृहयुद्धया थ्यंमथ्यं स्वगू दशक निसें, कम्बोडिया–थाइल्यान्ड सीमाय् च्वंपिं अप्वःधइथें बारुदी सुरुङ कठिन भूभाग व सीमा लागाया स्थितिं यानाः अझ नं सफा मयाःगु थौंकन्हय् बिस्पोट जूगु जुइफूगु विषययात बेवास्ता यायेमज्यूगु नं विज्ञप्तिइ धयातःगु खः।

थथेहे मंकाः शान्ति घोषणापत्र दिकेगु थाइल्यान्डया निर्णय प्रति कम्बोडिया सरकार चिन्तित जूगु धासें “कम्बोडिया मंकाः घोषणापत्र कार्यान्वयन यायेत प्रतिबद्ध दूगु विज्ञप्तिइ धयातःगु खः।

थाइल्यान्डया प्रधानमन्त्री अनुतिन चार्नविराकुलं सीमा लागाया प्रेह विहार देगः लिक्क बारूदी सुरंग विस्फोट जुयाः निम्ह थाई सैनिक घाःपाः जूगुलिं सोमबाः निगू देय् दथुइया मंकाः शान्ति सम्झौता कार्यान्वयन स्थिगित यायेगु आदेश बियादीगु खः।