अमेरिकाया राष्ट्रपति डोनाल्ड ट्रम्प प्रशासनं नेपाःमिपिन्त ब्यूगु अस्थायी संरक्षित दर्जा अर्थात अमेरिकाय् च्वनेगु विशेष सुविधा खारेज यायेत्यंगु दु।

अनया संघीय पुनरावेदन अदालतं ट्रम्प प्रशासनया पक्षय् फैसला यायेधुंकाः टिपीएस सुविधा खारेज यायेगु निर्णय क्लियर जूगु बीबीसीं जानकारी ब्यूगु दु।थ्वलिसें टिपिएस सुविधा सहित अमेरिकाय् च्वनाच्वंपिं थ्यंमथ्यं ७ हजार नेपाःमित स्वदेश लिहाँ वनेमालीगु जूगु दु।

सन् २०१५ य् झिदँ न्ह्यः नेपालय् ब्वःगु विनाशकारी भुखाय्या हवाला बियाः उगु इलय् दस्तावेज विना च्वनाच्वंपिं नेपाःमितय्त अमेरिका सरकारं टिपिएस सुविधा ब्यूगु खः।उगु इलय् थ्यंमथ्यं १५ हजार नेपाःमि नागरिकं टिपिएस सुविधा काःगु खः। ट्रम्प प्रशासनं आप्रवासी व गैरकानूनी रुपं च्वनाच्वंपिं प्रति कडा नीति ज्वनाः वयाच्वंगु इलय् अमेरिकाया होमल्याण्ड सेक्युरिटी विभागं सुरुइ नेपाल, होन्डुरस व निकारागुआया नागरिकया टिपिएस सुविधा खारेज यायेगु निर्णय याःगु खः।

पुनरावेदन अदालतं म्हिगः फैसला याःगुलिं टिपीएस सुविधा खारेज यायेगु निर्णय बुखँय् स्पष्ट जूगु दु। टिपिएस धयागु अमेरिकाया आप्रवासन प्रणालि अन्तर्गत विशेष  परिस्थितिइ बीगु सुविधा खः। थ्व सुविधा प्राप्त याइपिं निश्चित देय्या नागरिकतय्त अस्थायी रुपं अमेरिकाय् च्वनेगु व ज्या यायेगु अनुमति बी।

परराष्ट्र सचिव अमृतबहादुर राईया सौहार्दपूर्ण ब्वनाय् भारतया विदेश सचिव विक्रम मिश्री नेपाःया निन्हुया औपचारिक भ्रमणय् आइतवाः थन थ्यंकः वइगु जुगु दु।

भ्रमणया झ्वलय् सचिव तय्गु दथुइ नेपाल–भारत साझेदारीया थी थी पक्षया लिसें कनेक्टिभिटी’, विकास ग्वाहालि व थवंथः भिं जुइगु थी थी विषय केन्द्रित जुयाः सहलह यायेगु परराष्ट्र मन्त्रालयं धाःगु दु।

थन च्वनादीबलय् भारतया विदेश सचिवं नेपाःया उच्च अधिकारीतलिसे नं नापलानादी। वय्कः सोमबाः येँय् नं लिहाँ झाइगु ज्याझ्वः दु।

दक्षिण कोरियाय् लगातार ७ महिनानिसें रोजगारी दर अप्वोगु दु।

दक्षिण कोरियाया तथ्यांक ब्यूरों सार्वजनिक याःगु तथ्यांक कथं दच्छिया न्हापांगु महिना जुलाई १५ दँ लिपा व स्वयां अप्वो उमेरया १ लख ७१ हजार मनूतय्सं रोजगारी लुइकूगु चिनियाँ समाचार एजेन्सी सिन्ह्वां जानकारी ब्यूगु दु।

थुकिं मुक्कं रोजगारीइ दुपिं मनूतय् ल्याः २ करोड ९२ लाख ९० हजार थ्यंगु दु। थ्व थगुनेया थ्व हे अवधिया तुलनाय् ०.६ प्रतिशतं अप्वोगु खः। तर वंगु लाया तुलनाय् वृद्धिदर म्हो जूगु खनेदु।

जुलाईलय् रोजगारी वृद्धिइ मू योगदानकर्ता ६० दँ व स्वयां अप्वः उमेरया मनूत खः, गुकी ३ लख ४२ हजार अप्वःगु दु।

बेलायत, फ्रान्स व जर्मनीं परमाणु वार्ता हाकनं न्ह्याके मफुत धाःसा इरानयात प्रतिबन्ध तयेगु ख्याच्वः ब्यूगु दु।

स्वंगू देसं संयुक्त राष्ट्र संघयात यदि इरानं थःगु परमाणु कार्यक्रमयात कयाः अगस्टया अन्त्यतक वार्ता मन्ह्याकल धाःसा उकियात हाकनं प्रतिबन्ध तयेगु खँ धाःगु बीबीसीं जानकारी ब्यूगु दु।

“ई–थ्री”या नामं नं म्हस्यूगु बेलायत, फ्रान्स व जर्मनीं इरानं वार्ता हाकनं मन्ह्याकूसा “स्न्यापब्याक संयन्त्र” न्ह्याकेत तयार दुगु धाःगु दु। स्न्यापब्याक संयन्त्र छगू थुज्वःगु प्रावधान खः गुकी इरानं आणविक सम्झौताया शर्त उल्लंघन याःगु खनेदत धाःसा सन् २०१५ न्ह्यःया संयुक्त राष्ट्र संघं तःगु फुक्क कडा प्रतिबन्ध स्वतः हे हाकनं लागू जुइ।

बेलायत, फ्रान्स व जर्मनीं अगस्टया अन्त्यतक वार्ता थप यायेगु प्रस्ताव तयागु धाःगु दुसा इरानं धाःसा छुं लिसः बिउगु मदुनि।वंगु महिनाय् इरानं थप वार्ताया निंतिं थःपिं तयार दुगु खँ धाःगु खः। तर थुकी आःया प्रतिबन्ध चीकेगु व देय्यात नागरिक आणविक कार्यक्रमयात मान्यता बीगु शर्तत तःगु दु।

इरानं सन् २०१५ य् “ई–थ्री” – अमेरिका, रुस व चीनलिसे आणविक सम्झौता यायेधुंकाः आणविक कार्यक्रमय् तयातःगु प्रतिबन्ध चीकूगु खः। थ्व सम्झौता अक्टोबरय् क्वचाइगु जूगु दु।

इराकय् क्लोरिन ग्यास लिक जुया ६०० म्ह तीर्थयात्री अस्पतालय् भर्ना इराकय् क्लोरिन ग्यास लिक जुया ६०० म्ह स्वयां अप्वो तीर्थयात्री अस्पतालय् भर्ना जुइमाःगु दु।

लः प्रशोधन केन्द्रय् क्लोरिन त्वने धुंकाः सासः ल्हायेत समस्या वया ६०० म्ह स्वयां अप्वो शिया तीर्थयात्रीतय्त छुं ईया निंतिं अस्पतालय् भर्ना याःगु अधिकारीपिन्त उद्धृत यासें अल जजीरा समाचार एजेन्सीं जानकारी ब्यूगु दु। मध्य व दक्षिणी इराकया निगू शिया पवित्र शहर नजफ व कर्बलाया दथुइ च्वंगु सतकय् उगु घटना जूगु खः।

थुगुसी लखौं शिया मुस्मां तीर्थयात्रीतय्सं कर्बलाया तीर्थयात्रा याइगु अनुमान याःगु दु।मेखे तीर्थयात्रीया सुरक्षाया जिम्मेवारी कयातःगु सुरक्षाकर्मीं धाःसा कर्बला–नजफ सतकया छगू वाटर स्टेशनपाखें क्लोरिन लिक जूगु धाःगु दु । दशकौंया द्वन्द्व व भ्रष्टाचारया कारणं इराकया आपालं पूर्वाधार जीर्ण अवस्थाय् लानाच्वंगु दु।

वंगु जुलाई महिनाय् पूर्वी क्षेत्रया कुट सहरया छगू सपिङ मलय् मिँ च्यानाः सच्छिम्हसिबें अप्वः मनूत सीगु खः । उकी मध्ये आपालं मनूत चःबिइ हे सीगु अधिकारीपिन्सं धाःगु दु।