अमेरिकाया राष्ट्रपती निर्वाचनय् सर्वेक्षण कथं कमला ह्यारिस न्ह्यने अमेरिकाया राष्ट्रपतीया निर्वाचन याःगु लिपागु  ट्रम्प स्वया भचा जक न्ह्यने खनेदु।

एबीसी न्यूजया न्हुगु तथ्यांकया कथं बीबीसीं कमला ह्यारिस व ट्रम्प दथुइ १ प्रतिशतया फरक खनेदु धका धाःगु दु। कमलाया पक्षय् ४८ प्रतिशत मतदाता दु सा ट्रम्पया पक्षय् ४७ प्रतिशत दु।

कमला ह्यारिस जुलाईया लिपागु इलय् जक चुनावय् कुहावःगु खःसा ट्रम्प स्वया न्ह्यने खने दयाच्वंगु दु।

टर्कीया छगु उड्डयन कम्पनिइ आक्रमण जुगुलि न्याम्ह मनू सीउगु दु। अथेहे २२ म्ह घाःपाः जूगु दु। राजधानी अंकारापाखे ४० किलोमिटर तापाक्क आक्रमण जूूगु धका बीबीसीं धाःगु दु।

आक्रमणकारीत ट्याक्सीइ वया यःयः थे गोली चले याःगु खः।उगु घटना लिपा सार्वजनिक जूगु सिसिटिभी फुटेजय् खने दु धका धाःगु दु। उमिसं अन वना न्हापां बम विष्फोट याना वयालिपा गोली चले याःगु खः। थुगु घटना लिपा आक्रमणकारीं आत्मघाती बम विष्फोट याःगु खः।

स्थानीय सञ्चार माध्यमया कथं उगु कम्पनीइ १५ हजार मनूत ज्या याइ। टर्कीइ थ्व स्वया न्ह्यः न अन आक्रमण याःगु खः।वया लिउने चरमपन्थी सङ्गठन कुर्दिस्तान वर्कर्स पार्टी (पीकेके) या नां वःगु दु।

चीन चीन मानवयुक्त अन्तरिक्ष एजेन्सी (सीएमएसए) न शेन्झाउ–१९ क्रु अन्तरिक्ष यान व लङ मार्च–२ एफ क्यारियर रकेटया संयोजन प्रक्षेपण क्षेत्रय् सरेयाःगु दु।

सीएमएसएया कथं प्रक्षेपण थासय् सुविधा व उपकरण बालागु अवस्थाय् दु। अन थीथी पूर्व प्रक्षेपण समारोह जाँच व मंकाः परीक्षण योजना कथं याइगु जुगु दु।

निकट भविष्यय् उपयुक्त इलय् स्पेससिप प्रक्षेपण याइगु सीएमएसएं धाःगु दु।

हिजबुल्लाहं मंगलवाः इजरायली प्रधानमन्त्री बेन्जामिन नेतान्याहूया छेँय् लक्ष्य तया वंगु वालय् याःगु ड्रोन आक्रमणया जिम्मेवारी काःगु दु।

नापं, इजरायली सेनां थःपिनिगु लडाकुयात ज्वंगु न स्वीकार याःगु दु। बेरुतया दक्षिणी उपनगरय् इजरायलं खाली यायेत चेतावनी बिउगु छु ईलिपा हिजबुल्लाहया प्रवक्ता मोहम्मद अफिफं उगु थासय् पत्रकार सम्मेलन याःगु खः धका धाःगु दु।

एएफपीया छगु भिडियोय् पत्रकारया कथं पत्रकारतय्स त्वःतूगु छु ईलिपा हे सम्मेलन जुगु थासं सच्छिगु मिटर तापाक्क लक्ष्य तया इजरायलं आक्रमण याःगु खः। “हिजबुल्ला नेतान्याहूयात लक्षित याना याःगु कैसरिया अभियानया पूर्ण, दक्को व एकल जिम्मेवारी घोषणा याःगु दु,” अफिफं धाःगु दु।

नेतन्याहू न केन्द्रीय सहर कैसरियाय् च्वंगु थःगु निवासपाखे छगु ड्रोन प्रक्षेपण याये धुका थः व जहानयात स्यागू कुतः याःगु द्धपं हिजबुल्लायात ब्यूगु खः।

भारत व चीन दथुइ सीमा क्षेत्रय् सैन्य गस्तीया सम्बन्धय् सहमति जूगु दु। भारतीय प्रधानमन्त्री नरेन्द्र मोदी असोज २२–२३ य् जुइगु ब्रिक्स शिखर सम्मेलनय् ब्वति कायेत रुस वने न्ह्यः भारतीय विदेश मन्त्रालयं चीनलिसे वास्तविक नियन्त्रण रेखा (एलसी)य् गस्ती यायेगु सम्झौता जूगु जानकारी ब्यूगु खः।

भारतीय विदेश सचिव विक्रम मिश्रीं छगु पत्रकार सम्मेलन यासें ब्यूगु जानकारी कथं थ्व भारत व चीनदथुइ कूटनीतिक व सैन्यस्तरय् जूगु वार्ताया लिच्वः खः। तर थ्व सम्झौताया विवरण धाःसा सार्वजनिक याःगु मदुनि। तर गुलिसिनं थुकियात निगू देय्या स्वापू बांलाइगु संकेतया रुपय् काःगु दु।

नापं न्हापा न्हापा नं थज्याःगु सम्झौता जूगु खः, तर सीमा क्षेत्रय् भारत व चीन दथुइ तनाव क्वचाःगु मदुनि। भारतीय विदेशमन्त्री डा. एस.जयशंकरं निजी समाचार च्यानल एनडीटीभीया छगू ज्याझ्वलय् भारत व चीन दथुइ जूगु वार्ताय् तनाव म्हो यायेगु सहमति जूगु व वइगु दिनय् थुकिया सम्बन्धय् थप जानकारी सार्वजनिक यायेगु खँ धयादीगु दु।

लिसें वय्कलं सन् २०२० तक भारतं चीनलिसेया सीमाय् न्हापा गुलि गस्ती याइगु खः, अन तक गस्ती यायेफइगु खँ नं धयादीगु दु।वय्कलं धयादी, “२०२० न्ह्यःया एलसीया हैसियत पुनःस्थापना जुइ ।” थ्व छगू महत्वपूर्ण विकास खः। तर सम्बन्ध सामान्य यायेगु प्रक्रियाय्  थुकियात न्हापांगु पलाःया रुपय् कायेफइगु वय्कलं धयादीगु दु।