अमेरिका व बेलायतं थःगु नागरिक तय्त गुलिफु उलि याकनं लेबनान त्वःतय्त इनाप याःगु दु।

ट्राभल एडभाइजरी जारी यासे अमेरिका व बेलायतं लेबनानया राजधानी बेरुतय् च्वपि थःपिनिगु नागरिक तय्त अन पिहावय्त इनाप याःगु खः।

नापं अमेरिकां असुरक्षा जुया वःगुलि हलियकं च्वपि थःपिनिगु नागरिकया लागि सुरक्षा सतर्कता जारी याःगु दु।

प्यालेस्टाइनी विद्रोही समूह हमास व इजरायल दथुइ जुयाच्वंगु युद्ध लिसे हिजबुल्लाहनापं तनाव जुया वयाच्वंगुलि अमेरिका व बेलायतं लेबनान त्वय्त थःगु नागरिक तय्त धाःगु दु धका बीबीसीं धाःगु दु।

उगु निगु देशं थःगु नागरिक तय्त लेबनानं यात्रा मयायेत चेतावनी बिःगु खः।

इजरायल व प्यालेस्टाइनी चरमपन्थी समूह हमास दथुइ जुयाच्वंगु ल्वापूइ आःतक ४ हजार ५०० म्ह सी धुकुगु दु धका अन्तर्राष्ट्रिय सञ्चार माध्यमं धाःगु दु ।

अथेहे इजरायली सेनां मंगलवाः चान्ह्यः गाजाया छगू अस्पतालय् आक्रमण याःगु दाबी याःगु दु । इजरायलया प्रधानमन्त्री बेन्जामिन नेतान्याहुं धाःगु इजरायली सेनां मखुसे हमास हे अस्पतालये आक्रमण याःगु धका धाःगु दु।

इजरायल डिफेन्स फोर्स (आईडीएफ) न अस्पतालय् आक्रमण याःगु द्धपः  इस्लामिक जिहादयात बियाच्वंगु दु । अल–अहली अल–अरबी बाप्टिस्ट अस्पतालय् इजरायलया हताःपाखे विस्थापित जूयाच्वंपि अन च्वना च्वंगु खः।

उगु थासय् आक्रमणय् लाना ५०० म्ह सीउगु दु धका इजरायलया स्वास्थ्य मन्त्रालयं धाःगु दु। भग्नावशेष चिइका सीपि लिकायेगु यानाच्वंगु दु।

इजिप्टया राष्ट्रपति अब्देल फत्ताह अल सिसी व अन भ्रमणय् वयाच्वंम्ह फ्रान्सेली विदेशमन्त्री क्याथरिन कोलोनां इजरायल–हमास द्वन्द्व दिकेगु उपायबारे सहलह याःगु दु।

सोमवाः कायरोय् निगु देय् दथुइ जुयाच्वंगु द्वन्द्वयात कया सहलह याःगु खः । गाजा पट्टीइ स्यना च्वंगु मानवीय अवस्था व गाजाय् च्वनाच्वपिन्त तत्काल मानवीय व राहत ग्वाहालि यायेगु खँ जुगु धका धाःगु दु ।

नागरिकतय्त घेराबन्दी, भोकमरी व विस्थापन थे जाःगु सजाय मयायेत न इनाप याःगु दु । फ्रान्सं गाजापट्टीइ मानवीय ग्वाहालिया लागि १० मिलियन युरो यायेगु न जानकारी बिःगु दु।

इजरायलं दक्षिण लेबनानय् हवाई आक्रमण सुरु याःगु दु । इजरायली लडाकु विमानं दक्षिणी लेबनानया मारवाहिन सहरया पिनेपाखे हवाई आक्रमण याःगु दु ।

लक्षित याःगु थासं कुँत्याः पिहावया च्वंगु खनेदु । इजरायलं दक्षिणपश्चिमी लेबनानया मारवाहिन व ब्लिडाया सीमावर्ती सहरपिने पाखे ४५ पटक आक्रमण याःगु धका धाःगु दु।

भारतीय प्रधानमन्त्री नरेन्द्र मोदीं कालापानी क्षेत्रय् भ्रमण याःगु दु। मोदी हेलिकप्टरं कालापानीइ वःगु खः।

वयकलं थःगु सामाजिक सञ्जाल ट्विटरय् थः कैलाश व पार्वतीकुण्डया दर्शन यानागु दु धका धासे उगु तस्बिर तःगु खः।

मोदीं कालापानी क्षेत्रमा तैनाथ भारतीय सेना, इन्डो–तिब्बत बोर्डर पुलिस, सशस्त्र सीमा बल व सुरक्षा अधिकारी तय्त नापलानां सहलह याःगु खः। भारतीय प्रधानमन्त्री मोदी वःगु उगु थाय् नेपाल–भारत सीमा क्षेत्रय् लाः। मोदीं भ्रमण याःगु  बारेय् नेपाःयात छु न औपचारिक जानकारी मदु धका जिल्ला प्रशासन कार्यालय दार्चुलां धाःगु दु।

सरकारं २०७७ साल जेठय् सार्वजनिक याःगु नेपाःया न्हुगु नक्साय् लिम्पियाधुरा, कालापानी, लिपुलेक क्षेत्र तक दुथ्याका तःगु खः। भारतं धाःसा उगु थाय् थःपिनिगु धका दाबी याना च्वंगु खः।