Display Style:
Column Style
म्यूजिक भिडियो अवार्डस् २०१९ ज्याझ्वः क्वचाल
लहनान्युज | सिल्लाथ्व सप्तमी ११४०
ताःई न्ह्यःनिसें नेवाः संकिपाया ख्यलय् सक्रिय जुया वयाच्वंम्ह स्वतन्त्र संसार महर्जनया संसार क्रियसन्सया ग्वसालय् जुयाच्वंगु नेपालभाषा स्टार म्यूजिक भिडियो अवार्डस् २०१९ ज्याझ्वःया समापन समारोह ज्याझ्वः क्वचाल ।
समापन समारोह ज्याझ्वलय् नेपाल सरकारया शहरी विकास राज्यमन्त्री रामवीर मानन्धर मूपाहाँकथं झायादीगु खःसा वय्कलं नेपालभाषा स्टार म्यूजिक भिडियो अवार्डस् २०१९ ज्याझ्वलय् संसार सप्तरंगी सम्मानं सम्मानित जूपिन्त हनापौ लःल्हानादीगु खः ।
नेपालभाषाया संकिपा व संगीतया ख्यलय् ज्वःमदुगु योगदान बियादीपिं आदिवासी संकिपा ख्यःया न्हापांम्ह हिरो जय श्रेष्ठ, नेपालभाषा संकिपा ख्यःया न्हापांम्ह पत्रकार विजयरत्न असंबरे, राजमति संकिपाया हिरोइन हिसिला महर्जन, नांजाःम्ह संगीतकार मनराजा नकःमि, नांजाःम्ह मेकपमाएन सनमकुमार श्रेष्ठ व नांजाःम्ह गायक जुजुकाजी रंजित व वरिष्ठ निर्देशक व कलाकार पवन जोशीयात मूपाहाँ मानन्धरं हनापौ लःल्हानादीगु खः ।
ज्याझ्वलय् लहना वाःपौया ब्यवस्थापक सुरेन्द्रभक्त श्रेष्ठयात ग्वाहालि यानादीगुलिं मतिनाया चिं लःल्हानादीगु खः ।
येँया भृकुटी मण्डपय् च्वंगु नेपा पर्यटन बोर्डया हलय् जूगु उगु ज्याझ्वलय् ख्यालि जुजु मदनकृष्ण श्रेष्ठ, यल महानगरपालिका वडा ल्याः २१ खोनाया वडाध्यक्ष रबिन्द्र महर्जन, नेपाल चलचित्र कलाकार संघया नायः रबिन्द्र खड्कापिन्सं नं नुगः खँ तयादीगु खः ।
येँय् मिस नेवाः पोखरापिन्त लसकुसयात
लहनान्युज | सिल्लाथ्व अष्टमी ११४०
मिस नेवाः पोखरा–११४० य् ब्वति कयाच्वंपिं कासामिपिन्त येँया चःमति नेवाः खलःपाखे लसकुस ज्याझ्वः याःगु दु ।
उगु कासाय् ब्वति कयाच्वंपिं नीन्याम्ह कासामिपिं अध्ययन भ्रमणया झ्वलय् नेवाः तजिलजिलिसें भाषा, कला, संस्कृति, संस्कारया बारे जानकारी कायेगु निति मिस नेवाः पोखराया ग्वसाः खलः नेवाः खलः कास्कीया मूछ्याञ्जे सुविन्द्र श्रेष्ठ, ज्याझ्वःया कजि विमल श्रेष्ठया नेतृत्वय् येँय् वःगु खः ।
थुगु मिस नेवाः पोखराया फाइनल कासा थ्व हे वइगु चैत ८ गते पोखरा सभागृहय् जुइ ज्याझ्वः दु ।
येँय् वःगु उगु पुचःयात चःमति नेवाः खलः, किपू नगरपालिकां लसकुस यासें स्थानीय जात्रा, पर्व, संस्कृतिया बारे नं जानकारी बिउगु खः ।
पञ्चकपाल चचा प्याखं पिदन (भिडियाे लिंकनापं)
सुरज, लहना न्यूज | चिल्लाथ्व तृतिया ११४० (फेब्रुअरी २७ २०२०)
प्रोजेक्ट बाजा नेपालं पञ्चकपाल चचा प्याखंया भिडियो सार्वजनिक याःगु दु । इतिल्हने सम्यक महादान पर्वया लसताय् थुगु भिडियो सार्वजनिक याःगु खः ।
बुद्ध व बुद्ध शासनया रक्षकया रुपय् बौद्धमार्गीपिन्सं हनावयाच्वंम्ह ‘महांकाल बोधिसत्व’ आर्यावलोकितेश्वरया करुणाया बलया प्रतीककथं कायेगु याः । काल धायेबलय् मृत्यु बाय् ई खः । व सिबें महांकाल द्यः सीम्हय् विराजमान जुयाबिज्याइ । पञ्च कपाल वसपोलया हे छगू गुह्य रुप खः ।
सम्यक महादान पर्वया न्हापांगु दिनय् यल लायकुलिइ मुनाच्वंपिं स्वकुमिपिं थुगु चचाप्याखंया भिडियो स्वयाः अतिकं उत्साहित जूगु खःसा चचाप्याखं ललितपुर महानगरपालिका वडा १६ या अध्यक्ष निर्मलरत्न शाक्यपाखें सार्वजनिक जूगु खः ।
थुगु चचाप्याखं हुलादीम्ह राजिप बज्राचार्य खःसा म्ये हालादीम्ह सुमन कपाली, खिं व ताः थानादीम्ह लक्ष्मी डंगोल खः । प्याखं स्यनादीम्ह राजु शाक्य, फेस पेन्टिङ्ग यानादीम्ह बिजेन बज्राचार्य, कलर ग्रेडिङ्ग लाटोकोसेरो फिल्मस्या विजेश पौडेल, प्रोडक्सन म्यानेजर विश्वास बज्राचार्य, छायाँकन टोपी स्टुडियोया सागर आचार्य, सहायक छायाँकन अनुप पौडेल, साउण्ड व लाइटया ज्या ललितपुर साउण्ड एण्ड लाइट सर्भिसं याःगु खः ।
श्री वैशवर्ण महाविहार गुजिबहालय् छायाँकन जूगु थुगु म्ये प्रोजेक्ट बाजा नेपालया नायः फिरोज बज्राचार्यं संगीत संयोजन यानादीगु खःसा व भिडियो नं वयकलं हे निर्देशन यानादीगु खः । थुगु म्ये ज्योति रेकर्डसय् रेकर्डिङ्ग जूगु खः ।
थुगु भिडियो निर्माणय् सुरेशराज बज्राचार्य, मिलन तण्डुकार, बिपु श्रेष्ठ, सुमन महर्जन, स्वर्णिम महर्जन, ज्ञानमुनि शाक्य, रमिता बज्राचार्य, राजेन्द्र शाक्य, दिनेश शाक्य, विवेक शाक्य व अष्टमान शाक्यया ग्वाहालिया नितिं नं प्रोजेक्ट बाजा नेपालं सुभाय् देछाःगु दु ।
ज्याझ्वः सुरजवीर बज्राचार्य व मिला शाक्यं न्ह्याकादीगु खः ।
भिडियाे लिंक – https://youtu.be/p_Lsl73RHOM
सुदर्शन राजोपाध्याय भारतय् रत्न अवार्डपाखे सम्मानित
लहनान्युज | सिल्लागा द्धितिया ११४० (फ्रेअजरी ११ २०२०)
सङ्गीत ख्यलय् नाजाम्ह यलया वरिष्ठ सरोदवादक सुदर्शन राजोपाध्याय भारतय् राष्ट्रिय रत्न अवार्डपाखे सम्मानित जुयादिगु दु ।
स्वगु दशक न्ह्यःनिसे सङ्गीत ख्यलय् योगदान यानादिगु कदरयासे वरिष्ठ सरोदवादक राजोपाध्याययात भारतयो आँल इंडिया रियल फाँर कल्चरल एजुकेशन सोसायटी, गांधी पीस फाउंडेशन, नेपाल एवं युथ वर्ल्ड एण्ड सोशल मंच , राजस्थानया इंदौरय् विजय नगरया मंगल सिटीइ अन्तर्राष्ट्रिय सम्मेलनय् राष्ट्रिय रत्न अवार्ड एन्ड कन्फेरेशन २०२० पाखे सम्मान याःगु खः ।
थ्व स्वया न्ह्यः एनआरबी फाउण्डेशन एवं भव्या इन्टरनेशनलया ग्वसालय् राजस्थानया विवेकानन्द इन्स्टियुट अफ् टेक्नोलोजीय् न अन्तर्र्रािष्ट्रय सम्मेलनय् राजोपाध्याययात विविधता मे एकता राष्ट्रिय सम्मान २०२० पाखे सम्मान जुयादिगु खः ।
स्वगु दशक निसे सङ्गीत साधनाय् लगे जुयाच्वनादिम्ह सरोदवादक राजोपाध्याययात वःगु २०१९ जुलाई १५ य् राजस्थानया जगतपुराय् सुरेश ज्ञान विहार विश्वविद्यालय जुगु अन्तर्र्रािष्ट्रय मैत्री सम्मेलनय् इन्टरनेशनल इण्डियन बेस्टिज अवार्ड २०१९ लःल्हाःगु खः ।
राजोपाध्याययात सन् २०१३ य् भारतया पश्चिम बङ्गाल सरकारं सङ्गीत मञ्जरी उपाधि लःल्हाःगु खःसा सन् २०१५ य् गुजरातय् सुरिल साँझपाखे स्वर्णपत्र लःल्हाःगु खः ।
सरोदवादन राजोपाध्याय नेपालय् सन् २००२ जुगु रेडियो नेपालपाखे जिल्लाव्यापी सङ्गीत कासाय् न्हाप जुगु खःसा शास्त्र सम्मान २०१८, सेभ दि नेशन अवार्ड लगायतया सिरपाः नाप सम्मानित जुयादिइ धुकुगु दु ।
काठमाडौं मोडेल स्कुलय् हुलाप्याखं धेँधेँबल्लाः क्वचाल
नृपेन्द्रलाल श्रेष्ठ | सिल्लागा द्धितिया ११४० (फ्रेअजरी ११ २०२०)
काठमाडौं मोडेल स्कुलया ब्वमि मस्तय् दथुइ हुला प्याखं धेँधेँबल्लाः कासा जुगु दु । “काठमाडौं मोडेल ओपन डान्स कम्पिटीशन २०७६“ या नामं जुगु उगु धेँधेँ बल्लाःकासाय् अनया हे ब्वनेकुथिं अन ब्वनाच्वंपिं मस्तय् शैक्षिक क्षमताया लिसेलिसें इमिगु हे क्षमता न्ह्यब्बइगु कथंया हुलाप्याखं धेँधेँबल्लाः जूगु खः ।
ज्याझ्वलय् ब्वनेकुथिया निर्देशक राजेन्द्र महर्जनंसभापतित्वय् न्ह्याःगु खः । ज्याझ्वलय् चर्यानृत्य गुरू चन्द्रमान मुनिकार मूपाहाँ कथं झायादीगु उगु ज्याझ्वलय् विशेष पाहाँ जामनं गुभाजुया निर्देशक रवि साय्मि झायादीगु खः ।
१ तगिंनिसें ९ तगिंतकया ब्वमिपिनि दथुइ जूगु खः । कासाय् १ व २ तगिंया ब्वमिपिन्त छगू ब्वः, ३ निसें ५ तक निगु ब्वः व ६ निसें ९ तक यानां स्वब्वय् जुगु कासाय् न्हापांगु ब्वय् निर्वेश श्रेष्ठं त्याकेत ताःलाःगु खः। फस्ट रनर अप श्रिमिला महर्जन व सेकेण्ड रनरअपया उपाधी त्याकेत सविज्ञा श्रेष्ठ तालगु खः ।अथेहे निगूगु ब्वय् आकृति गुरूङ्गं धेँधेँबल्लाःया उपाधि त्याकेत ताःलाःगु खःसा फस्ट रनर अप व सेकेण्ड रनर अपया उपाधि छसि आकृति गुरूङ् व भावना आलेमगरं त्याकेत ताःलागु खः ।
स्वंगूगु ब्वया धेँधेँबल्लाः तसकं प्रतिस्पर्धात्मक जूगु खः । उगु ब्वया कासाय् दृष्टि महर्जन त्याकेत तालाःगु खः। फस्ट रनर अप जरिना मोक्तान व सेकेण्ड रनर अपया उपाधि असिम बोगटीं त्याकेत तालागु खः । उगु ज्याझ्वलय् कलाकारपिं रूपेन्द्र श्रेष्ठ, रेश्मी महर्जन व कोरियोग्राफर रिना महर्जन निर्णायकया जुयादिगु खः ।
कासाय् ताकेत तालाःपिन्त ब्वनेकुथिया प्रिन्सिपल भाजु रविन महर्जनं दसिपा, मूपाहाँ मुनिकार व विशेष पाहाँ रवि साय्मिं ट्रफि लःल्हाना दीगु खः । अथेहे ब्वनेकुथिया नेपाली विषयया स्यनामि हरिकुमार पौडेलं कासाय् त्याःपिन्त नगद पुरस्कार लःल्हाःनादिगु खः ।
