Display Style:
Column Style
बहिदार बाबु निगु भाषां दयेकिगु
नृपेन्द्रलाल श्रेष्ठ | सिल्लाथ्ज पुन्हि ११४० (फ्रेअवरी ९ २०२०)
नेवाः फिल्म ख्यलय् मदिक फिल्ममेकरया कथं म्हसीका वयाच्वम्ह निर्देशक बासु शाहीया निर्देशनय् न्हुगु संकिपा बहिदार दयेकीगु जूगु दु ।
हरि घेमोसु निर्मात जुया सुकुन्दा फिल्म्सं न्ह्यब्वये त्यःगु खः । नेपालभाषां शुटींग जुइगु थुगु संकिपायात लिपा खस भाषं नं डबिंग यायेगु खँ निर्देशक शाहीं यलया अक्षयश्वर महाविहारय् संकिपाया भिंसाइत इलय् जानकारी बियादिगु खः ।
उगु सकिपाया भिंसाइत ज्याझ्वलय् विशेष पाहाँ नांजाम्ह हास्य अभिनेता राजाराम पौड्यालं क्यामेरा अन यानादिगु खःसा वरिष्ठ सिनेपत्रकार विजयरत्न असंबरें भिंसाइतया क्ल्याप याना दीगु खः । अथेहे साइतय् नैंक्या निर्माता हरि घेमोसुं तछ्याना दिगु खः ।
मल्टिस्टार संकिपा कथं वइगु थुगु संकिपा खस नेपाली फिल्मया लोकंह्वापिं कलाकार लक्ष्मी गिरी, राजाराम पौड्याल, रवि डंगोल, सुरेन्द्र केसि व सुशील पोखरेल लगायत बाशु शाही, हरि घेमोसु व शोभा महर्जनपिन्स अभिनय यानादिगु खः ।
थुगु संकिपा सिनेमाटोग्राफि व एडिटिंग सोहन मानन्धरं यानादीत्यंगु दुसा पुजा शाहीया समाः, सावनदेव श्रेष्ठया संगीत, लक्ष्मण सेन्चुरीया द्धन्द्ध संयोजन द्यय । बहिदार बाबु संकिपा विशेष याना ल्याय्म्ह पुस्ताया नुगः साले कथं एक्शनं जाइगु खँ निर्माता व बाखं च्वमि हरि घेमोसुं जानकारी बियादिगु खः ।
नेपालभाषा स्टार म्युजिक भिडियो अवार्ड जुइगु
सुरज, लहनान्युज | पोहेलागा द्वादशी ११४० (जनवरी २१ २०२०)
संसार क्रियसन्सया ग्वसालय् नेपालभाषा स्टार म्यूजिक भिडियो अवार्डस् ११४० या ग्राण्ड फिनाले वइगु माघ १० गते शुक्रवा: जुइगु जूगु दु । येँया प्रज्ञाभवनय् जुइगु थुगु ज्याझ्वः शहरी विकास राज्यमन्त्री रामबीर मानन्धरया मू पाहांसुइ जुइगु ग्वसाः खलकं छगू पत्रकार सम्मेलन यानाः जानकारी ब्यूगु खः।
नेपालभाषा संकिपा ख्यलय् दकले यक्वः विधाय् अवार्ड बीत्यंगु न्हापांगु ज्याझ्वःकथं दावी जूगु थुगु ज्याझ्वलय् नीन्यागूलिं मयाक विधाय् अवार्ड लःल्हायेत्यंगु खःसा संसार लाइफ टाइम एचिभमेन्ट अवार्ड जनसंगीत श्रृष्टा अमरराज शर्मा राजाेपाध्याययात लःल्हायेत्यंगु खः । संसार सप्तरंगी सम्मान धाःसा कलाकार व निर्देशक पवन जोशी, बरिष्ठ संगीतकःमि मनराजा नकःमि, वरिष्ठ सिने पत्रकार विजयरत्न असंबरे, न्हापांम्ह मातृभाषाा संकिपाया नायक जय महर्जन, राजमति संकिपाया नकिं हिसिला महर्जन, वरिष्ठ गायक जुजुकाजी रंजित व मेकअप आर्टिष्ट सनमकुमार श्रेष्ठयात लःल्हाइगु जूगु दु ।
ज्याझ्वःया कजि स्वतन्त्र संसार महर्जनं ७ दुजः दुगु निर्णायक मण्डल दुगु जानकारी बिसें अनलाइन भोटिङ्ग व एसएमएस भोटिङ्गपाखें नं मत कयाः सर्वाेत्कृष्ट ल्ययेगु जानकारी बियादिलसा प्रोत्साहन सिरपा, पब्लिक च्वाइस अवार्ड , पपुलर अवार्ड, जुरि अवार्डपाखें हनीगु बिधा तनागु नं जानकारी बियादिल ।
नेवाः पत्रकार राष्ट्रिय दबू यल शाखां संयाेजन याःगु पत्रकार सम्मेलनय् संकिपा नाय: स्वतन्त्र संसार महर्जनया कजिंसुइ जुइत्यंगु थुगु अवार्ड ज्याझ्वःया सफलताया कामना यासें बरिष्ठ सिने पत्रकार विजयरत्न असंबरे, नेवाः पत्रकार राष्ट्रिय दबूया केन्द्रीय नायः सुरजवीर बज्राचार्य, नेवाः एचडी टेलिभिजनया प्रमुख नवीन जोशी, न्हापांगु नेवाः संकिपा सिलुया नायक जय महर्जन, नेपाल चलचित्र कलाकार संघया उपाध्यक्ष सानुकुमार ताम्राकार, अवार्ड ज्याझ्वःया सल्लाहकारपिं केशवराम सिंह व स्वयम्भूराज डंगोलं नुगःखँ तयादीगु खः ।
फेसबुक प्रोफाइल किपातय् अवार्ड ज्याझ्व:या फ्रेम तयाः द्वःछिंसिबें अप्वः लाइक दयेकेत ताःलाःपिं कलाकार राजु महर्जन व सरिता बज्राचार्यया नां नं सार्वजनिक याःगु उगु ज्याझ्वलय् ग्वाहालिमि उजय शाहीयात नं सम्मान याःगु खः ।
थुगु ज्याझ्वःया नितिं समयबजिनापं न्यासः तकाया टिकटया ब्यवस्था यानागु नं ग्वसाः खलकं धाःगु दु ।
चलचित्र संघया नायःयात भिंतुना देछाल
नृपेन्द्रलाल श्रेष्ठ | पोहेलागा चौथी ११४० (जनवरी १३ २०२०)
नेपाल चलचित्र संघया न्हुगु कार्यसमितिइ अध्यक्ष पदय् येँया जैसीदेगल युथ क्लबया सल्लाहकार मधुसूदन प्रधान निर्विरोध निर्वाचित जुयादिगुलि भिंतुना देछायेगु ज्या जुगु दु ।
छगु ज्याझ्वः यासे क्लवया दुजः राजेन्द्र मानन्धरं खादा न्ययेका नाप नायः राजेश प्रजापतिं स्वांमा क्वखायेका हनापौ लःल्हानदिगु खः ।
नव निर्वाचित प्रधानं नीन्याद्धः न्ह्यः शीवरात्री फिल्म ब्यानरपाखे पृथ्वी नाया संकिपा दयेका संकिपा ख्यलय् पलाः तयादिगु खः ।
गंगाया ‘स्वनिगःया नेवाः’ म्येचाः पिदन
अमिर मैया रञ्जित | पोहेलाथ्व पंचमी ११४० (दिसेम्वर ३१ २०१९)
गंगा देवी महर्जनया याकः सलं पिज्वःगु ‘स्वनिगःया नेवाः’ सिडी छगु ज्याझ्वः दथुइ येँया नाचघर जमलय् जनकवि दुर्गालाल श्रेष्ठं पितब्वज्या यानादीगु दु । लोककवि राजभाइ जकःमिं च्वयादीगु उगु म्येय् राजु सिंहजुं लय् तयादीगु यानादीगु खः ।
उगु ज्याझ्वलय् मूपाहाँ जनकवि श्रेष्ठं नेवाः मिस्तय्सं थःके दुगु प्रतिभा थः दुनेहे तंकाः सी माला च्वंगु दु तर म्ये हालामि गंगा छम्ह प्रतिभाशाली मिसापिनिगु दसु जुयाब्यूगु खँ धयादिल ।
अथेहे, ज्याझ्वलय् विशेष पाहाँ कथं येँ महानगरपालिकाया मेयर विद्या सुन्दर शाक्यं भाषा, साहित्य व संगीत धैगु झीगु सम्पदा खः थुकियात संरक्षण व सम्बद्र्धनया नितिं झीपिं प्रविधिनाप हिलावनेगु खँय् बः बियादिल ।
मचाराजा महर्जनया सभाधक्ष्यताय् जुगु उगु ज्याझ्वः सुरज वीर बज्राचार्य व विरेन्द्र शाक्यं न्ह्याकादीगु खः ।
किपाः नेवाः सूचना केन्द्र
चलचित्र विकास बोर्डया नायः भट्टराई मन्त
शोभा श्रेष्ठ | थिंलागा चतुर्थी ११४०
चलचित्र विकास बोर्डया नायः केशव भट्टराई मन्त ।
आईतबाः बहनी १०ः२० बजे भट्टराई मदुगु खः । छेँय् च्वनाच्वंबल उसाँय्स समस्या खनेदयाः ओम अस्पताल यंकूगु खःसा अस्पताल थ्यंबलय् वय्कःयात मृत घोषणा याःगु खः ।
विकास बोर्डया नायःलिसे अभिनेता व संकिपा निर्माता तकं खःम्ह भट्टराईं यात्रा, आफ्नो मान्छे, छोडी गए पाप लाग्ला, देवर बाबु, कर्मयोद्धा, सो सिम्पल, ब्रासलेट लिसेंया संकिपा दयेकूगु दु ।
थ्वयां न्ह्यःया नायः निकिता पौडेलं राजीनामा बीधुंकाः वंगु २०७५ चैत्र ४ गते तिनि भट्टराईयात विकास बोर्डया अध्यक्षय् नियुक्त याःगु खः ।
मदुम्ह भट्टराईया जहान व व काय् छम्ह दु ।
