Display Style:
Column Style
विश्वयुद्धय् हे निरन्तर जूगु अस्कर अवार्ड थुगुसी लिज्यात
आकाश राजोपाध्याय | बछलागा सप्तमी ११४०
सन् १९२९ निसें न्ह्यानाः आःतक्क छकः मद्यूसे निरन्तर न्ह्यानावःगु अस्कर अवार्ड ईतिहासय् हे न्हापांगु खुसी लिज्याःगु दु ।
निगूगु विश्वयुद्धया इलय् तकं निरन्तर जूगु अस्कर अवार्ड थुगुसी कोरोनाभाइरस (कोभिड १९) महामारीया हुनिं लिज्याःगु खः ।
२८ फेब्रुअरी २०२१य् जुइगु धयातःगु अस्कर अवार्ड समारोह आः प्यलाः लिपा जुइगु जूगु दु ।
अस्कर एकेडेमीं वंगु लाय् अद्यावधिक याःगु धलखय् थुगुसी रिलीज जूगु संकिपातयसं सन् २०२२या लागिं तकं नां दुतिनेफइगु धाःगु खः । निर्मातां थुगु दँया अन्तिमय् वा आकिवं रिलीज जूगु संकिपात नं अस्करय् वनेफइ धइगु विश्वाश याये फयेमा धकाः थुज्वःगु नियम दयेकूगु खः ।
लिसें नोमिनेशन क्याटगरी नं क्वकयाः २३ दयेकागु एकेडेमीं धाःगु दु ।
एकेडमीं महामारीयात ध्यानय् तयाः नियमय् छुं ह्यूपाः हःगु खः । थ्व ह्यूपाः स्थायी धाःसा मखु । थुगु न्हूगु नियम थुगुसीयात जक हे खः ।
अस्करया लागिं संकिपा दुतिनेगु प्रक्रिया मार्च(अप्रिलया अन्त्यपाखे न्ह्याइ । नोभेम्वर(डिसेम्बरया दथुइ नोमिनेशन शर्ट लिस्ट याइ सा निर्णायक दुजलं जनवरीइ भोटिङ्ग याइ ।
कोरोनाभाइरसया संक्रमण विश्वव्यापी रुपं न्यनाच्वंगु हुनिं गुगु नं देशय् संकपिा रिलीज जुइ मफुनि ।
माक्व ल्याखय् संकिपा नोमिनेशनया लागिं आवेदन मवःगुलिं अवार्ड ज्याझ्वः लिछ्यायेमाःगु धाःगु दु ।
कोरोनाभाइरस महामारीया हुनिं जेम्स बोन्डया ‘नो टाइम टु डाई’, मार्भेल स्टुडियोया ‘ब्ल्याक विडो’ व डिज्नीया ‘मुलन’ थुज्वःगु तःधंगु संकिपाया रिलीज तकं लिज्याःगु दु ।
लकडाउनय् च्वँच्वं हे सागरं सर्ट फिल्म दयेकल
विकाश | बछलाथ्व पुन्हि ११४०
कोरोना भाइरस कोभिड १९ या महामारीया कारणं करीब मुक्कं विश्व हे लकडाउनय् च्वनाच्वंगु इलय् नेपालय् नं व हे अवस्था दु ।
संक्रमण रोकथाम व नियन्त्रणया नितिं जुयाच्वंगु लकडाउनया हुनिं सकलें छेँय् लानाच्वंगु इलय् संचारकःमि लिसें कलाकार सागर महर्जनं छगू सर्ट फिल्म दयेकूगु दु ।
सकलें कलाकारलिसें फिल्मया सकल यूनिट थःथःगु हे छेँय् च्वनाः हे सर्ट फिल्म ‘लकडाउन, छेँय् हे बासं’ दयेकूगु खः ।
म्हसिकाया ब्यानरय् नेपालभाषाया सर्ट फिल्म लकडाउन ‘छेँय् हे बासं’ दयेकाः युट्युबपाखें सार्वजनिक याःगु खः ।
मुक्कं ३ मिनेट ३६ सेकेन्ड ताःहाकःगु थुगु सर्ट फिल्मय् कलाकार सुरज व्यन्जनकार, सजिना महर्जन, रजनी खड्गी व सिमोन महर्जनं अभिनय याःगु दु ।
बाखं च्वयेगु, दृश्य सम्पादन व निर्देशनया ज्या सागरं याःगु दु ।
छायाङ्कन धाःसा कलाकारपिन्सं थःथःगु हे छेँय् नं हे थःके उपलब्ध श्रोत साधन छ्यलाः याःगु दु ।
छगू परिवार दथुइ जुयाच्वंगु खँल्हाबल्हाय् हे संकिपाया बाखं न्ह्याकातःगु दु ।
संकिपा स्वयेबलय् प्यम्ह कलाकार खँ ल्हानाच्वंगु दइ । तर कलाकारत दक्व थःथःगु हे छेँय् च्वनाः सुटिङ यानातःगु व वयकःपिं सुटिङया झ्वलय् नापलाःगु हे मदुगु धकिंया ल्यूनेया न्ह्यइपूगु बाखँ खः ।
संकिपां लकडाउनया अवस्थाय् होम क्वारेन्टाइनय् च्वनाच्वंगु छगू परिवार दथुइया खँल्हाबल्हापाखें लकडाउनया पूर्ण पालना यासें संक्रमणया नियन्त्रण व रोकथामय् योगदान बी धइगु हसना बीत स्वःगु दु ।
‘छेँय् जक च्वनाः दिक्क चाइगुलिसें मनोरोग अप्वइगु नं सम्भावना दु । सर्वसाधारणयात मनोरञ्जन बीगु लिसें सचेतना थनेगु आज्जुं थ्व सर्ट फिल्म दयेकागु खः’ निर्देशक महर्जनं धयादिल ।
आःया अवस्थाय् कला ख्यः व कलाकारपाखें नं समाजया लागिं छुं योगदान बीमाः धइगु बिचा यानाः संकिपा दयेकागु निर्देशक सागरया धापू खः ।
बलिउडया चर्चित अभिनेता ऋषि कपुर मन्त
लहनान्युज | बछलाथ्व सप्तमी ११४०, बैसाख १८ बिहिवाः
बलिउडया चर्चित अभिनेता ऋषि कपुर ६७ दँय् थौं बिहीवाः मन्त ।
क्यान्सर ल्वचं पीडित जुयाच्वम्ह ऋषि कपुर म्ह मफया म्हिगः बुधवाः अस्पताल भर्ना जुगु खः ।
परिवारं धाःगु कथं ऋषियात क्यान्सर व स्वासप्रश्वास सम्बन्धी समस्या दुगु धका धाःगु खः ।
अमेरिकाय् करिब दच्छि तक क्यान्सरया उपचार याना वःगु सेप्टेम्बर महिनाय् भारतय् लिहा वःगु खः ।
फेब्रुअरी महिनाय् हाकन स्वास्थ्यय् समस्या वःगुलि निकः तक अस्पताल भर्ना जुगु खः ।
बलिउड कलाकार इरफान खान मन्त
बछलाथ्व षष्ठी ११४० | विकाश
बलिवुड अभिनेता इरफान खान थौं मन्त । मुम्बइया कोकिलाबेन अस्पतालय् वासः यायेगु झ्वलय् वयकः मदुगु खः ।
मंगलबार उसाँयस समस्या खनेदयेधुंकाः वयकःयात कोकिलाबेन अस्पतालया आईसीयूस भर्ना याःगु खः ।
वयकःयात छु समस्या जूगु खः, छाय् आइसीयूस तल धइगु धाःसा सी मदुनि । परिवारं थुकिया बारे छुं हे धाःगु मदुनि ।
इरफानया छम्ह प्रवक्तां वयकःयात कोलोन इन्फेक्सन जूगु धाःगु बीबीसीं न्ह्यथंगु दु ।
वंगु ५ मार्चय् इरफानं ट्वीट यासें थःत न्यूरोएन्डोक्राइन ट्यूमर जूगु धाःगु खः ।
थगुने २०१९स इरफान लन्डनय् वासः याकाः भारत लिहांवःगु खः । लिहांवयेधुंकाः वयकःया कोकिलाबेन अस्पतालया चिकित्सकतयगु निगरानीइ वासः यायेगु लिसें रुटीन चेकअप नं याकावःगु खः ।
छुं दिं न्ह्यः तिनि वयकःया मां मदुगु खः । लकडाउनया हुनिं वयकलं थः मांयात सिथं यंकूगुलिइ तकं ब्वति कायेमखंगु खः । भिडियो कलया माध्यमं इरफान थः मांया अन्तिम यात्राय् स्वाःगु खः ।
स्टे होमया अवस्थाय् हे सरिश्माया न्हूगु म्यूजिक भिडियो पिहांवल
विकाश | चौलागा चतुर्दशी ११४०
अमेरिकाय् च्वनावःम्ह नांजाःम्ह म्येहालामि सरिश्मा अमात्यं स्टे होमया अवस्थाय् हे थःगु म्येया न्हूगु म्यूजिक भिडियो ‘ढुकढुक गर्ने दिलैमा’ सार्वजनिक यानादीगु दु ।
थौंकन्हय् अमेरिकाया मेरिल्यान्ड राज्यया बाल्टिमोरय् च्वनावःम्ह म्येहालामि अमात्यं थःगु छेँ दुनं हे भिडियो दयेकाः सार्वजनिक याःगु खः ।
हलिंन्यंक कोभिड १९या संक्रमण न्यनाच्वंगु अवस्थाय् अमेरिकाय् नं स्टे होम आदेश जारी जूगु दु । अमेरिकाय् लकडाउन मधाःसे स्टे होम धाःसा थ्व लकडाउन थुज्वःगु हे अवस्था खः ।
संक्रमण न्यंकेमबीत सकलें छेँय् हे च्वनाः भौतिक दुरी कायम याये धइगु हसना बीत थुगु म्यूजिक भिडियो दयेकागु म्येहालामि अमात्यं धयादिल ।
‘आःया अवस्थाय् समाजयात सुरक्षित व संक्रमणमुक्त दयेकेत छेँय् हे च्वने व छुं न छुं श्रृजनात्मक ज्या याये धइगु हसना बीत थुगु म्यूजिक भिडियो दयेकागु खः’ अमात्यं धयादिल ।
छेँय् दुने च्वनाः थम्हं सःगु श्रृजनात्मक ज्या यानाः समाजयात नं मनोरन्जन बीत अमात्यं सकसितं इनाप नं यानादिल ।
म्येया छायाङ्कन म्येहालामि अमात्यया हे छेँय् दुने यानातःगु दु । म्येया छायाङ्कनया लिसें पोस्ट प्रोडक्सनया दक्वं हे ज्या वयकःया छेँ दुनं हे याःगु खः ।
छायाङ्कनया लागिं समाः ला अमात्य थम्हं हे यानादिल । म्येया निर्देशनया नापं, क्यामेरा व भिडियो एडिटिङया ज्या म्येहालामि संजीप प्रधानं याःगु दु । म्येहालामि प्रधान सरिश्माया जहान खः ।
म्यूजिक भिडियोया निर्देशन, क्यामेरा, एडिटिङया ज्या यानाबलयया अनुभवया खँय् म्येहालामि प्रधानं धयादिल, ‘म्ये हाले हे अःपु खनी, थम्हं यानावयागु ज्या स्वयां पाःगु ख्यलय् ज्या यायेबलय् भचा थाकु हे खनी, तर न्ह्यइपुसे नं च्वन ।’
करीब १५दँ न्ह्यः हे रिलिज जूगु सरिश्माया एल्बम मधुरीमा २या थुगु म्येय् संगीत नांजाःम्ह संगीकार अनिल शाहीया दुसा जनक दिप पराजुलीं म्ये च्वयादीगु खः ।
