मनोरन्जन

Display Style:

Column Style

निमेश कपालीं त्याकल अनलाइन तबला कासा

सुरज, लहनान्युज | दिल्लाथ्व पुन्ही ११४०,असार २१ आइतवाः

वरिष्ठ तबला वादक रविनलाल श्रेष्ठया लुमन्तिइ जयश्री संगीत समाजं ग्वसाः ग्वःगु तबला वादन प्रतियोगिता निमेश कपालीं त्याकूगु दु । प्रतियोगिताया दकले बांलाःम्ह तबला वादक कपालीं अमेरिकाया टेक्ससय् च्वंगु School of Indian Percussion and Music पाखें लच्छिया अनलाईन कोर्ष छात्रवृत्ति व नगद १० द्वः त्याकादिल ।

अनलाईन तबला वादनया ग्रायण्ड फिनालेय् ल्यू लाःम्ह अजय चौधरीं नगद सिरपा ७ द्वः, लियांल्यू लाःम्ह अभय महर्जनं नगद ५ द्वः व दकले अप्वः भ्यूजया सिरपाः त्याकादीम्ह उजन डंगोलं नगद सिरपा ५ द्वः तकाः त्याकादीगु खः । नापं रुबि श्रेष्ठ लाखें हःपा सिरपा त्याकादीगु खःसा उत्कृष्ट १० म्हय् लाःपिं सत्येन्द्र भट्टराई, सपत शाक्य, निर्जल डंगोल, रोजमान महर्जन, राहुल शाक्य, आर्जल डंगोलं गुरु रविनलाल श्रेष्ठया जयश्री तालया सिडी व पुस्तक सफू दोहलपा कयादिल ।

प्रतियोगिताया न्हापांगु चरणय् ३ गू मिनेटया तबला वादनया भिडियोया नितिं आव्हान जूगु खः गुकी २५ म्ह तबला वादकपिन्सं भिडियो दुथ्याकाःदीगु खःसा थुगु हे पुचलं असारया न्हापांगु वालय् उत्कृष्ट १० म्ह ल्यज्या जूगु खः ।

न्हाप, ल्यू व लियांल्यू लाःपिं तबला वादकया ल्यज्या अमेरिकाय् च्वनाच्वनादीम्ह प्रसिद्ध भारतीय तबला वादक गौरीशंकर कर्माकरं यानादीगु खः । प्रतिस्पर्धाया लिच्वः निष्पक्ष जुइमा धकाः थथे यानागु ग्वसाः खलकं धाःगु दु । बांलापिं तबला बादक मालेगु हे थुगु ग्वसाःया तातुना जूगु खँ कँसे खुल्ला रुपं आयोजना यायेगु तातुना दुगु थुगु ग्वसाः कोरोना जोखिम व लकडाउनया हुनिं अनलाईनय् हिलागु खँ नं ग्वसाः खलकं कंगु दु ।

१० दँ न्ह्यः प्रसिद्ध तबलावादक अले गुरु रविनलाल श्रेष्ठया समर्पणय् वय्कःया शिष्यपिन्सं जयश्री संगीत समाज स्वंगु खः । गुरु श्रेष्ठं रचना याःगु जयश्री तालया हे नामय् थुगु समाजया नां तयागु नं ग्वसाः खलकं जानकारी बियादीगु खः ।

छधाः प्याखनय् कीर्तिलक्ष्मी जुया आशिष्मा म्हितिइगु

लहनान्युज | दिल्लाथ्व नवमी ११४०, असार १५ सोमवाः

नेपालभाषा एकेडेमीया ग्वसालय् थ्वः हे वइगु ने सं ११४० दिल्लाथ्व दशमि कुन्हु छगु छधा प्याखं ब्वज्या जुइ त्यःगु दु । नेपालभाषा एकेडेमीया सदस्य सचिव नेवाः न्ह्यलुवाः मल्ल के सुन्दरं जानकारी बियादीगु कथं थुगुसी थ्वः छधाः प्याखं ब्वः ज्या जक मजुसे कासाय् हे कथं जुइ माःगु खःसां कोरोना संक्रमण व लकडाउनया कारणं याना थथे लिकुने मालाच्वंगु खनेदुसाः एकेडेमीया ग्वसालय् जुइ त्यंगु थ्वः छधाः प्याखं ब्वज्या ताः लाकेगु लागि एकेडेमीया प्राज्ञ दुजः बीरप्रसाद भन्सारीया संयोजकत्वय् छगु पुचः निस्वःगु खः ।

ब्वज्या पुचःया दुजः विजयरत्न असंबरें जानकारी बियादीगु कथं आः ईलय् खनेदया च्वंगु विषम परिस्थितिइ छधाः प्याखं ब्वज्यायात गुलि तःजिक्क यायेमाःगु खः उलि तःजिक याये मखंसा थौंया प्रविधीया लिधंसा कया थ्वः ब्वज्या नेपाः च्यानल टेलिभिजन प्रत्यक्ष प्रसारण जुइगु जुगु दु ।

असार १६ कुन्हु जुइ त्यंगु थुगु ब्वज्या बागमति प्रदेश या कला,संस्कृति व साहित्य बिकास आर्थिक ग्वाहालिइ जुइत्यंगु खःसा ब्वज्या किपुया राराहिल स्कुलया नाटक घरय्् जुइ त्यःगु खः ।

छधा प्याखं ब्वज्याय् न्ह्यब्वइगु प्याखनय् रामकृष्ण खडगीया निर्देशनय् लोककवि राजभाई जकःमि च्वयादीगु “कीर्तिलक्ष्मी” आशिष्मा नकःमिं ऐतिहासिक पात्र कीर्तिलक्ष्मी जुया म्हितेत्यंगु दुसाः थुकिइ रामकृष्ण खड्गी, कृष्णभक्त महर्जन व उजय शाहीया मू भुमिका दु ।

नांजाम्ह संकिपाकःमि सुरेन्द्र तुलाधरया च्वसा व निर्देशन दुगु“डा कान्छाभाइ” प्याखनय् रन्जना सितिखु, रामराजा भाम , रोहन प्रजापति, अन्नपूर्ण दर्शनधारि अले नांजाम्ह साहित्यकार शशीकला मानन्धरं च्वयादीगु अले नांजाम्ह संकिपा कःमि आर्यम नकःमिया निर्देशनय् “चन्द्रहार” प्याखनय् नगिना जोशी, सुरज व्यन्जनकार, रुपेन्द्र श्रेष्ठ, रोजिना सुवाल, अन्नपुर्नेश्वरी श्रेष्ठ, सरस्वति मानन्धर दुथ्याना च्वंगु दु ।

थुगु ब्वज्याय् राजेश शाक्यया निर्देशनय् रङ्गकर्मि रामकृष्ण धिनां नं च्वयादीगु “थ्वपु कर्म”, सन्चारकःमि व रङ्गकर्मि कृष्ण प्रजापतिया च्वसा व निर्देशनय् “बुँख्याःचा”य् कृष्ण प्रजापति, गीता प्रजापति जुनु प्रजापति, सकुन्तला महर्जन, सिताराम माकः, नांजाम्ह कलाकःमि राजु स्यःस्यःया च्वसा व निर्देशनय् “तरकारी बन्जा” प्याखनय् भिमसेन रिसाल व सुरेश स्थापित म्हितादिगु दु

अथे साहित्यकार व सन्चारकःमि मीना बज्राचार्यया च्वसाः व वरिष्ठ रङ्गकर्मि व संकिपाकःमि पवन जोशीया निर्देशनय् “लिथु”प्याखनय् शोभा महर्जन, अन्नु महर्जन, यासिना महर्जन व च्वमि राजेन्द्रकुमार पुताया च्वसाय् रवि महर्जनया निर्देशनय् “थौकन्हे” नांयागु छपु छधाः प्याखं दुथ्याना च्वंगु दुसाः उके प्याखं म्वः कथं कृष्ण महर्जन, विनिता खड्गी, सुधा महर्जन, रोशन शाक्य व रजिन महर्जनं ब्वति कया च्वंगु दु ।

नांजाःम्ह कोरीयोग्राफर रोजिनं न्ह्याकल फेसबुक लाइभ टक शो

बिकाश | तछलागा पञ्चमी ११४०

राष्ट्रिय अले अन्तर्राष्ट्रिय फेसन व सौन्दर्य धेंधें बल्लाःया कोरियोग्राफी यानावःम्ह कोरीयोग्राफर रोजिन शाक्यं सामाजिक संजालयात दबूयात छ्यलाः लाईभ टक शो न्ह्याकूगु दु ।

लकडाउनय् दक्वं कथंया दबू ज्याझ्वःत ठप्प जुयाच्वंगु इलय् रोजिनं ‘स्पीक टू मी’ नां बियातःगु टक शो वगु ५वाः न्ह्यःनिसें न्ह्याकावःगु खः । उगु टक शो रोजिनया हे फेसबुक पेजपाखें नियमित रुपं शुक्रबाः व शनिबाः सनिलया ४ताः इलय् करिब घौछि न्ह्याइगु जुयाच्वंगु दु ।

विशेषतः फेसन, मोडलिङ, ब्युटी, संचार, अभिनय अले ब्यूटि कन्टेस्ट ख्यलय् उपलब्धी याःपिं व्यक्तित्वलिसेया खँल्हाबल्हाय् उम्ह मनूया उपलब्धी, क्यारिएर, व्यवसायिक यात्राया थीथी पक्षलिसें व्यक्तिगत जीवनया न्ह्यइपूगु पक्षया जःखः उगु टक शो केन्द्रित जुयाच्वंगु दु ।

ज्याझ्वःया न्हापांगु चरणय् व कथंया व्यक्तिलिसे खँल्हाबल्हा केन्द्रित दुसां बुलुहुँ थुकिया स्वरुपय् समाजया मेगु ख्यःया महत्वपूर्ण उपलब्धी हासिल याःपिं ल्यायम्हतयत नं कःघायेगु रोजिनं धाःगु दु ।

आःतक्क रोजिनं न्ह्याकावःगु ‘स्पीक टू मी’ ज्याझ्वलय् मिस कस्मोपोलिटन वर्ल्ड २०१९ प्रिया रानी लामा, मोडल अले मिस इको इन्टरनेसनल नेपाल २०१९ मुना गौचन, मोडल अले अभिनेत्री सुमी मोक्तान, मोडल अले मिष्टर ओसियन नेपाल २०१७ विवेक खड्का, मोडल अले अभिनेता एसराज गराच, मिस लिटिल प्रिन्सेस् इन्टरनेसनल २०१८ प्रितान्शा थापा, मेकअप आर्टिष्ट स्वस्तिका राजभण्डारी, फेसन डिजाइनर मनिश राईलिसे खँल्हाबल्हा जुइधुंकूगु दु ।

टेलिभिजन ज्याझ्वः न्ह्याकामिया रुपं थ्वयां न्ह्यः वि.सं. २०५८ सालय् च्यानल नेपालया धकिमय् नेपाली ख्यःलिसे सम्बन्धित निगू ज्याझ्वःत ‘सप्तरंगी’ व ‘सिनेबाइट्स’ न्ह्याकूम्ह रोजिन वि.सं. २०६० सालय् एनटिभि टु स दुहांवंगु खः ।

अन करिब ६दँतक्क फेसन ख्यः सम्बन्धी ज्याझ्वः ‘फेसन बज’ व संकिपा सम्बन्धी ज्याझ्वः ‘सिने सिज्लर’या न्ह्याकामि अले निर्माताया भूमिका निर्वाह याःगु खः ।

अथे हे छुं ई न्ह्यः तिनि ईमेज टेलिभिजनं प्रशारण जूगु अभियन सम्बन्धी टेलिभिजन रियालिटी शो नेसनल एक्टिङ कम्पीटिसनया ज्याझ्वः न्ह्याकामिया भाला नं वयकलं पूवंकादीगु खः।

वंगु १२दँ न्ह्यःनिसें रोजिन इमेज च्यानलय् नेपालभाषाया समाचार वाचकया रुपं ज्या यानाच्वंगु दु । लिसें फेसन पत्रकारिता, दबू ज्याझ्वःया उद्घोषण, फेसन कलेज अध्यापन लिसेंया ख्यलय् थःत निरन्तर सक्रिय दयेकावःगु दु ।

वरिष्ठ पत्रकार विजयरत्न असंबरें बुदिं हन

नृपेन्द्रलाल श्रेष्ठ | तछलाथ्व नवमी ११४०,जेठ १८ आइतवाः

नेपालय् कारोनां संक्रमित जूपिनिगु ल्याः न्हियान्हिथं अप्वया वया च्वंगु दुसाः संक्रमणपाखें सुरक्षित जुया च्वनेगु निंतिं सरकारं जारी यानातःगु लकडाउनया आदेशया ई नं थपे याना जेठ ३२ गतेतक थ्यंकुगु दु । थ्व लकडाउनं याना आपासिया ज्या दिना च्वंगु दु । अप्वोसिगु जीवनय् थुकिया लिच्वः कथं ल्हाम्हुतु हे चूमलाइगु लकस ब्वलना वःगु दु । उलिजक मखसे नखःचखः , धार्मिक व सामाजिक संस्कारया ज्याय् नं लिच्वः लानाच्वंगु दु । पाहाँचः¥हे , सक्वःया जात्रा, भ्वंतया जात्रा , जनबाहाद्यः सालेगु , बुंगद्यःसालेगु, बिस्का जात्रा निसें कया गुलिखे जात्राय् लिच्वः लाःगु दु ।

नेवाः तजिलजिइ धार्मिक व साँस्कृतिक महत्वया थज्यागु परम्पराया नापनापं सामाजिक महत्वया छगु परम्परा धइगु छम्ह मनूखँ दँय्दसं हनिगु धइगु थःगु जन्मन्हि हनेगु परम्परा नं खः । थुगुसी लकडाउनया ईलय् म्हिगः शनिवाः तछलाथ्व अष्टमी कुन्हु नेपालभाषाया संकिपा ख्यःया न्हापांम्ह पत्रकार कथं कयातःम्ह नांजाम्ह वरिष्ठ पत्रकार विजयरत्न असंबरेया जन्मन्हि लाःगु दु ।

वंगु चैत्र ११ गतेनिसें हे थःगु हे निवासय् च्वना लकडाउनया आदेश पालना याना वया च्वंम्ह वरिष्ठ पत्रकार असंबरें थःगु थ्व लकडाउनया ईयात गुकथं छ्यला च्वना अले थ्व ईलय् लाःगु थःगु जन्मन्हि गुकथं हना धइगु लहनान्युजया न्ह्यसलय् ,वयकलं “ थ्व लकडाउनया कारणं सकसियागु थें जिगु ज्याय् बामलाक्क हे लिच्वः लाःगु दु । अयसां न्हिन्हिं पत्रकारिताया थःगु कर्म हनेगु ज्याय् जिगु ल्हा धाःसा दिउगु मदु । निरन्तर रुपं नेवाः अनलाइनन्यूज व जनजाति खबरय् बुखँ अपडेट याना वया च्वनागु दु । मेगुला अथेहे खः ।

भचाभचा अध्ययन , भचाभचा फिल्म स्वयेगु नं याना । ” धका धाःसे थःगु जन्मन्हिया सन्दर्भय् , “ मेमेबले जूसा सगं कायेगु अले थीथी द्येके वनेगु याना जन्मन्हि हनेगु खः । थुगसिइ नं सुथय् सगं कयागुला जुहेजुल । लकडाउनया कारणं उलि द्येके वने मखन । कःसिइ हे तुं द्यः लुमंका पुज्यात जिमि तिरीमय्जु मीनां(बज्राचार्य) । जि याकचाः हे थः च्वना च्वनागु जःखः दुगु द्यः छक चाहिला वया । बुंगद्यःया थाय्तक थ्यंका वया । ” धका थःगु खँ थथे स्वाकल ।

थुगुसी लकडाउनया कारणं छेँय् च्वना च्वनागु ई जूगुलिं जन्मन्हिया झ्वलय् थप छता लसंहना कथं बहनी थः च्वनाच्वंगु छेँया परिवारलिसे जाना केक तानागु खँ नं पत्रकार असंबरें कन । थ्व झीगु संस्कृति खःला धइगु लहनान्युजया जिज्ञासाय् पत्रकार असंबरे, “ मखु । झीगु संस्कृति मखु । युवा पुस्तां नालाहःगु आयातित संस्कृति खः । झीगु संस्कृति कथं सुथय् गणेद्यः पुज्याना सगं कया । बहनी ल्याय्म्ह पुस्ताया मनतये कथं केक ताना जन्मन्हि हना । थथे केक तानागु थ्व जिगु जीवनय् दकले न्हापां खुसी खः । ”

थुकथं पत्रकार असंबरें लकडाउनया कारणं दकले न्हापांखुसी केक ताना ह्याप्पी बर्थ डे म्येलिसे जन्मन्हि हंगु खःसा थःगु तजिलजि झीसं न्हंकेमज्यु धका धाःसे थुकियात ई व परिस्थितिं बिउगु हिउपा धका पत्रकार असंबरे लहनान्युजयात जानकारी बियादिगु खः ।