Display Style:
Column Style
म्ये कासाय् १ लख सिरपाः
लहनान्यूज सम्वाददाता | ञलागा द्वादशि, ११३६ (सेप्टेम्बर २७, २०१६)
हलिं नेवाः दबू, नेपाः देय् मू कवःया ग्वसालय् जुइत्यंगु म्ये कासाय् १ लख तका सिरपाः बीगु जूगु दु ।
दबू, नेपाः कवलं येँय् छगू पत्रकार सम्मेलन यासें वइगु पुष १८ गते हलिंन्यंकया नेपाःमिपिनि दथुइ नेवाः म्ये कासा यायेगु जानकारी ब्यूगु खः । दबू, नेपाः कवःया छ्यान्जे रश्मिला प्रजापतिं कासाया न्हाप सिरपाः कथं ५०द्वः तका लिसें मुक्कं १ लख तका सिरपाः इनेगु जानकारी ब्यूगु खः ।
पत्रकार सम्मेलनय् ब्यूगु जानकारी कथं वइगु कार्तिक मसान्तया दुने दुतिंगु म्येया दथुइ निगू चरणय् ल्यज्या जुइ । ल्यज्याया न्हापांगु चरणय् मंसीर ४ गते नेपाःपाखें ब्वति काइपिं कासामिपिनि दथुइ ल्यज्या जुइसा नेपालं पिनेया कासामिपिनिगु अडिसन पुषया १० व ११ गते जुइ ।
कासाय् ब्वति कायेगु नितिं दुतिना फारम नं उगु हे पत्रकार सम्मेलनपाखें सार्वजनिक याःगु खः । हलिं नेवाः म्ये कासाया आधिकारीक फेसबुक पेजपाखें उगु फारम डाउनलोड याना कायेफइगु धाःगु दु ।
फारम अनलाइनया लिसें न्हिनसिया १ताः इलंनिसें ३ताः ईतक्कया दुने नेवाः देय् दबूया ज्याकुथिइ फारम दुतिनेफइगु नं धाःगु दु ।
- कासाय् नेवाः म्ये हालाः न्ह्याम्हेसिनं नं ब्वति कायेफइ
दबू, नेपाःया नायः पुष्कर माथेमां नेपालभाषाया संगीत ख्यलय् न्हूगु व उत्कृष्ट म्ये पितब्वयेगु लिसें सुलाच्वंगु प्रतिभायात दबूया विकास यायेगु तातुनां थुगु कासा जुइत्यंगु धयादिल । माथेमां हलिंया गुगु नं थासय् च्वनाच्वंपिं नेपाःमिपिन्सं नेवाः म्ये हालाः कासाय् ब्वति काय्फइगु धयादिल ।
कासाय् ब्वति कायेत म्ये धाःसा न्हूगु अले नेवाः हे जुइमाःगु नं माथेमां स्पष्ट यानाद्यूगु दु ।
कासाय् न्हाप, ल्यू, लियांल्यूया नापं बांलाःम्ह म्येच्वमि, लयचिनामिया सिरपाः नं बीगु जानकारी नं ब्यूगु दु ।
‘तंकाली’वइगु जुल
लहनान्यूज सम्वाददाता | ञलागा पञ्चमि ११३६ (सेप्टेम्बर २१ २०१६)
बज्र क्रिएसन प्रा.लि.या ब्यानरय् दय्केत्यंगु न्हूगु नेपालभाषाया संकिपा ‘तंकाली’या भिंगु साइत क्वचाःगु दु ।
येँय् छगू ज्याझ्वः यानाः तंकालीया भिंगु साइत याःगु खः । उगु ज्याझ्वलय् चलचित्र विकास बोर्डया नायः राजकुमार राईं क्लाय्प बियादीगु खःसा वरिष्ठ सिने पत्रकार विजयरत्न असंबरें क्यामेरा रोल यानाद्यूगु खः ।
संकिपाया सफलताया नितिं नेपालभाषा संकिपा समाजया नायः सुरेन्द्र तुलाधर, संकिपा वितरक गोपालकाजी कायस्थ, नेवाः फिल्म सोसाईटीया नायः लुःजः सिंहं भिन्तुना देछानादिल । संकिपाया सह–निर्देशक रवि महर्जनं लसकुस यानादीगु खः ।
ज्याझ्वलयु चलचित्र विकास बोर्डया नायः राईं नेवाःलिसें मेमेगु आदिवासी जनजाती संकिपात नं राज्यया प्रक्रियाय् दुहांवयाः संकिपा दय्कूसा राज्यपाखें उपलब्ध सुविधा उपभोग याय्खनीगु लिसें पहिचान नं दइगु खँ न्ह्यथनादिल ।
शैलेस डंगोलं निर्देशन यानादीत्यंगु संकिपाया थ्वहे वइगु कार्तिक २६ गतेनिसें सुटिङ न्ह्याइगु धाःगु दु । संकिपाय् सुरेश महर्जन व सलोना बज्राचार्यया मू भूमिका दुसा वरिष्ठ कलाकार गौतमरत्न तुलाधरया नं अभिनय स्वय्दइगु जूगु दु ।
म्येहालामि सुनिल बर्देवा मन्त
लहना न्यूज सम्वाददाता | ञलाथ्व द्वादशि, ११३६ मंगलबाः (सेप्टेम्बर १३ २०१६)
नांजाःम्ह पप म्येहालामि सुनिल बर्देवा थौं बहनी मन्त ।
मदुम्ह बर्देवाया छुं दिं न्ह्यःनिसें उसाँय् अवस्था स्यनाच्वंगु खः । उसाँय् आपाः हे स्यंगुलिं थौं न्हिनय् वयकःयात थौं न्हिनय् शिक्षण अस्पताल महाराजगंज यंकूगु खः
शिक्षण अस्पतालय् हे वासः यायेगु झ्वलय् वयकः मदुगु खः । वयकः थौं बहनी ८ः४५ताः पाखे मदुगु धाःगु दु ।
म्येहालामि बर्देवायात उसाँय् सम्बन्धि छु समस्या दुगु खः व धाःसा सीमदुनि ।
मदुम्ह बर्देवाया ‘गोरेटो अनि उस्तै छ गल्ली’, ‘जब म निन्द्रामा सपनी तिम्रो देख्छु’ लिसेंया म्येत लोकं व्हाः ।
