Display Style:
Column Style
नृत्य निर्देशकया उद्घोषण तालीम क्वचाल
लहनान्यूज | ११३८ पोहेंलाथ्व पंचमि (डिसेम्वर २३, २०१७) यल
नृत्य निर्देशन थुज्वःगु श्रृजनात्मक ज्याय् संलग्न नृत्य निर्देशकपिं न्वःवायेगु ख्यलय् न्ह्यःने वये मफुबलय् राज्यतक्क थःगु खँ नं थ्यंके मफयाच्वंगु नृत्य निर्देशकपिन्सं धाःगु दु ।
नृत्य निर्देशक संघ नेपाल, यल कचाया ग्वसालय् जूगु छवाः यंकया उद्घोषण कला तालीमया समापन समारोहया वक्तापिन्सं थःगु खँ, थःगु समस्या सम्बन्धित थासय् बांलाक तयेफयेकेत न्वःवायेगु कला नं दयेमाःगु खँय् बः बिल ।
ज्याझ्वलय् नुगः खँ तयेगु झ्वलय् नृत्य निर्देशक संघ नेपालया केन्द्रिय मू छ्यान्जे नृपध्वज खत्रीं गुलिखे थासय् न्वःवायेमसः धाधां नृत्य निर्देशक थःपिन्सं हे थःत ल्यूने घ्वानाच्वंगु धयादिल । हरेक कार्यक्रम वा गतिविधिइ मेमेगु ख्यःया कलाकार, प्राविधिकपिन्त न्वःवायेत दबू उपलब्ध याकीगु अवस्थाय् नृत्य निर्देशकपिन्त धाःसा न्वःवाकेगु आवश्यकता हे महसूस मयाइगु खँय् खत्रीं कुंखिनादिल । माःथाय् माःकथं न्ह्याःवनाः थःगु नुगः खँ तयेफइगु अवस्थाय् राज्यं नं थःपिनिगु समस्याय् ध्यान बीगु खँय् खत्रीं बः बियादिल । उद्घोषण तालीमया प्रशिक्षक बिराजकाजी राजोपाध्यायं नृत्य निर्देशन थुज्वःगु श्रृजनात्मक ज्याय् संलग्न कलाकारपिन्सं सफल वक्ता वा उद्घोषक जुइगु बिचाः तःगु तसकं सकारात्मक विषय खःगु धयादिल । ललितपुर उद्योग वाणिज्य संघया न्वकू रुपकुमार शाक्यं हरेक ख्यलय् संलग्न व्यवसायी, पेशाकर्मी सकसिनं न्वःवायेगु कला सयेका हे तयेमाःगु खँय् बः बियादिल ।
यल महानगरपालिका वडा नं. ५ या वडाध्यक्ष विकासमान श्रेष्ठं हरेक ख्यलय् न्वःवायेगु कलाया आवश्यकता दइगु खँय् बः बियादिल । थःगु वडाबासीपिन्त नं उद्घोषण कलाया तालीम न्ह्याकेगु योजना वडाध्यक्ष श्रेष्ठं न्ह्यःने तयादिल । अथे हे संघया केन्द्रिय न्वकू संजय शर्मा राजोपाध्यायं संघया थीथी गतिविधि व योजनाया बारे जानकारी बियादिल । संघ यल कचाया नायः स्वजन रघुवंशीं यल कचाया भावी योजनाया जानकारी ब्युसें आः संस्थापाखें ताल सम्बन्धि कार्यशालाया ग्वसाः ग्वयेगु धयादिल । लिसें नायः रघुवंशीं संघं चर्या प्याखं सम्बन्धि हे थःगु ध्यान केन्द्रित यानाः न्ह्याःवनेगु नं धयादिल ।
समापन समारोह तालीमय् दुथ्याःपिं सकल प्रशिक्षार्थीपिन्त यल महानगरपालिका वडा नं. ५ या वडाध्यक्ष विकासमान श्रेष्ठं दसिपौ लःल्हानादिल । लिसें वडाध्यक्ष श्रेष्ठं प्रशिक्षक बिराजकाजी राजोपाध्याय व तालीमया नितिं थाय् उपलब्ध यानाब्यूम्ह प्रगती आदर्श ब्वनेकूया प्रधानाध्यापक रमेश शाक्ययात मतिनाया चिं नं लःल्हानादिल ।
ज्याझ्वलय् संमुक्ता शर्मा राजोपाध्यायं मन्जुश्री हुलाप्याखं अले राजीब बज्राचार्य, सुनिता महर्जन व श्रृजना माया तामाङपाखें नेवाः हुलाप्याखं नं न्ह्यब्वःगु खः । संघ यल कचाया छ्यान्जे अनुप शाक्यं लसकुस यानाद्यूगु ज्याझ्वलय् दांभरिं मजुना डंगोलं सुभाय् देछानादिल ।
किशोर शाहीया नुगलय् ४दँ लिपा ‘तिमिला या जः’
राजेश बज्राचार्य | ने. सं. ११३८ कछलागा सप्तमि (नोभेम्वर १०, २०१७)
नेपालभाषा संगीत ख्यःया लोकंह्वाःम्ह गायक किशोर शाही थुगुसी छम्ह गायक जक मखुसे म्यूजिक भिडियोया कलाकारया म्हसिका ज्वनाः हाकन लुइगु जूगु दु । किशोर शाही व पुजा सुनुवारया सःलय् थ्वइगु ‘तिमिला या जः थ्व नुगलय्’ बोलया युगल म्येयात वंगु बुधवाः कुलेखानीया न्ह्याइपूगु लकसय् छाँयाकन क्वचाःगु दु ।
४दँ लिपा गायन क्षेत्रय् पुनरागमन यानादीम्ह किशोर शाहीया सः व अभिनययात कलाकार रोजिना सुवालं साथ बियादिइगु दुसा थुगु म्यूजिक भिडियोया निर्देशन विनोद बज्राचार्यं यानादीगु दु । अमन खड्गीया शब्दरचनाय् पिज्वःगु थुगु म्येयागु म्यूजिक भिडियो राजन शाक्यं सम्पादन यानादीगु खःसा क्यामेरा व छायाँकन शैलेस डंगोलजुं यानादीगु दु ।
‘संगीत व शब्दयात ल्वयेक लोकेशन मालेगु कुतः कथं कुलेखानीइ थुगु म्येया सुटिङ्ग क्वचाःगु खः, थुगु वाःलय् हे थीथी टेलिभिजनपाखें प्रसारण नं जुइ ।’ संचारकःमी एवं छायाँकनय् सक्रिय शैलेस डंगोलं लहनायात जानकारी बियादील । वयेकया धापूकथं परम्परागत शैलीसिबें संगीत व म्येयात बाँलाक्क न्ह्यब्वयेत लोकेशन मालेगु व थुकीइ लगानी यायेगु चलन विकास जुयाच्वंगुयात थुगु क्षेत्रय् उपलब्धीकथं नेवाः कलाकारपिन्स कैच्वंगु खनेदु ।
किपाः सुरेस खडगी
आराध्यालक्ष्मी खड्गीया “बाबुजी” म्यूजिक भिडियो पिहावल
लहनान्युज | तछलाथ्व षष्ठी ११४५, जेठ १८ आईतवाः
लोकंह्वाःम्ह कलाकार डान्सिङ क्वीन आराध्यालक्ष्मी खड्गीया दमदार अभिनय दुथ्याःगु खस नेपाली भाषाया म्यूजिक भिडियो “बाबुजी” पिहावःगु दु।
गायक अनु चौधरीया सः दुथ्याःगु थुगु म्येया च्वमि व लय् चिनामि उत्तम भण्डारी खःसा संगीत संयोजकलिसें मिक्सिङ व मास्तरिङ यानादीम्ह बाबुल गिरी खः। उत्तम श्रेष्ठ शिशिरं निर्देशन यानादीगु थुगु म्येया म्यूजिक भिडियोय् आराध्यालक्ष्मी खड्गीया लिसें श्रीकृष्ण निरौलाया मू भूमिका दुथ्याना च्वंगु दु।
विशाल थापा व टिमया निसेम्याटोग्राफी दुथ्याःगु थुगु म्यूजिक भिडियोय् मीन रावलं दृष्य सम्पादन यानादीगु दु। विशाल कैनीया कोरियोग्राफी दुथ्याःगु “बाबुजी” म्यूजिक भिडियो ओएसआर डिजिटल यूट्युब च्यानलपाखें सार्वजनिक जूगु दुसा थुगु म्यूजिक भिडियो डान्सिङ प्याट्रनया म्येया छगू उत्कृष्ट म्यूजिक भिडियो कथं धस्वायेत ताःलाःगु दु।
विमान दुने विमोचन व प्याराग्लाइडिङपाखें विश्व कीर्तिमान कायम यायेत ताःलाःम्ह “बाबुजी” म्यूजिक भिडियोया नकिं डान्सिङ क्वीन आराध्यालक्ष्मी खड्गीं निर्देशन व कोरियोग्राफीइ वल्र्ड बु कअफ रेकर्डय् नं नां तयादीगु दु।
“बाबुजी” म्यूजिक भिडियो सार्वजनिक ज्याझ्वलय् डान्सिङ क्वीन आराध्यालक्ष्मी खड्गीं धयादीगु दु, “जिपिं फुक्कसिगु मेहनतपाखें छगू उत्कृष्ट म्येया म्यूजिक भिडियो स्वकुमिपिन्त लःल्हानागु दु । प्रतिक्रियाया लिसेलिसें हःपाः व तिबःया भलस कयागु दु।
चीनय् नेपाली संस्कृति ब्वज्या
लहनान्युज | बछलागा त्रयोदशी ११४५, जेठ ११ आईतवाः
नेपाः व चीन दथुइ पर्यटन, कला व सांस्कृतिक प्रवद्र्धनया निंतिं थन साङ्गीतिक लिसें ‘अवार्ड’ ज्याझ्वः ग्वसाः ग्वःगु दु।
एसएमएस म्युजिक एण्ड इन्टरटेन्मेन्टया ग्वसाः नापं चङ्दोंसीगुइलिन फुक्सी एस्टे«ट म्यानेजमेन्ट व गुइलिन एलाइट एजुकेशन कन्सल्टिङया मंकाः ग्वसालय् क्वचाःगु स्वक्वःगु एसएमएस नेपाः व चीन सांस्कृतिक संरक्षण लिसें पर्यटन प्रवद्र्धन सम्मान लिसें सिरपाः, २०८१ म्हिगः बहनी क्वचागु खः। ज्याझ्वलय् नेपाः व चीनया थीथी कलाकार तय्सं थःगु प्रस्तुति ब्यूगु खः।
नेपाःया पाखें देविका वन्दना, कमल खत्री व राष्ट्रिय गतिशील कला समूहया कलाकार तय्सं थःगु विशेष साङ्गीतिक प्रस्तुति ब्यूगु खःसा चिनियाँ कलाकारतय्सं नं मौलिक हुलाप्याखं व म्ये प्रस्तुत याःगु खः।
ज्याझ्वलय् मू पाहाँ गुइलिन संयुक्त मोर्चा कार्यविभागया मन्त्री ब्लाङ सिएन फिङं निगूलिं देय् दथुया थ्व ज्याझ्वलं नागरिकस्तरय् तकं सबन्ध विस्ताय् थप ग्वाहालि जूगु धयादिल।
“दाइचा मैचा” व म्यूजिक भिडियो “मैचा छ बांलाका..”पिदन
लहनान्युज | बछलाथ्व अष्टमी ११४५, बैसाख २२ सोमवाः
ज्यापू सुनील (शुक्रराज महर्जन) र लक्ष्मी महर्जनया न्हापांगु न्ह्यब्वया ज्यापू सुनील (शुक्रराज महर्जन) या याकः च्वसाय् नेपालभाषाया म्येचाः “दाइचा मैचा” व नेपालभाषाया म्यूजिक भिडियो “मैचा छ बांलाका....” या लोक गायक बरिष्ठ म्ये हालामि÷लय चिनामि रत्न बेहोशीया मूपाहाँसुइ खपिन्छेँ त्वाःया भैरवलाछिइ छगू ज्याभ्mवःया दथुइ पितब्वज्या जुल।
वरिष्ठ संगीतकार जुगल डंगोल व संगीतकार अनिल तुलाधरया संगीत व संयोजन दुथ्यागु नेपालभाषाया म्येचा “दाइचा मैचा” ज्यापु सुनील व लक्ष्मी महर्जनया सः दुथ्यानाच्वंगु दु उकी मुक्कं खुपू म्ये दुथ्या। थुगु हे म्येचाःया छपू म्ये “मैचा छला बांलाका...” बोलया म्येया म्यूजिक भिडियो न पितब्वज्या जूगु खः।
वरिष्ठ निर्देशक सुरोज महर्जनं निर्देशन यानादिगु म्येया सिनेमाटोग्राफी÷सम्पादन सोहन मानन्धर जुयादीसा वरिष्ठ मेकअप कलाकार सनम कुमार श्रेष्ठ खः। पिदंगु म्यूजिक भिडियोया मू कलाकार स्रजल महर्जन व फेना महर्जन, श्यामलाल महर्जन, मीरा तण्डुकार, अन्जु तण्डुकार, कल्पना बडेल, मचा कलाकार मुनिच महर्जन, अदिती महर्जन, रिट्ना बडेल अभिनय याःगु खः।
उगु ज्याभ्mवलय् पाहाँ कथं झायादीपिं वरिष्ठ संगीतकार राजु सिंह, वरिष्ठ म्ये हालामि जुजुकाजी रंजित, संगीतकार जुगल डंगोल, निर्देशक सुरोज महर्जन नापं खपिन्छेँ त्वाःया त्वाः नायः राजमान अवालें भिंतुना न्वचु बियादीगु खः।
