सरकारं उद्योग वाणिज्य तथा आपूर्ति मन्त्रालयय् सचिव ह्यूउगु दु।

मन्त्रालयया सचिव दिनेश भट्टराईयात प्रधानमन्त्री तथा मन्त्रिपरिषद् कार्यालय सरुवा याउगु दु सा वयागु थासय् गणेश पाण्डेयात हःगु दु।

पाण्डे थ्व स्वया न्ह्यः भूमि व्यवस्था, सहकारी तथा गरिबी निवारण मन्त्रालय सचिव खः। प्रधानमन्त्री कार्यालय थःगु सरुवा जुगु धका सचिव भट्टराई न धाउगु दु।

धनुषाया इनर्वा स्टेशनय् तयातःगु नेपाली रेल थौंनिसे सञ्चालन जुइत्यंगु दु।

भारतया जयनगर जुया जनकपुरधाम–कुर्थातक न्ह्याइगु रेल थौनिसे हाकन जयनगरय् लिहावनेगु जुगु दु। रेल चले जूसा यात्रुपि धासा तयेगु योजना मदु धका नेपाल रेल्वे कम्पनीं धाउगु दु।

थौं सुथय् १० बजे इनर्वा स्टेशनपाखे वइगु रेल १ घण्टां जनकपुरधामय थ्यका व कुर्था वना वना जयनगर लिहावनिइ धका रेल्वे कम्पनीया महाप्रबन्धक निरन्जन झा न जानकारी बिउगु दु। थुगु रेल झीन्हु तक न्ह्याइ धका धाउगु दु।

यात्रुपिन्त तयेगु न्ह्यः रेल बालागु अवस्थाय् दु मदु स्वयेगु लागि थुगु  परीक्षण जुइत्यंगु धका धाउगु दु। थ्व बाहेक अतिक्रमण यानातःगु रेल मार्ग त्वत्येत नाप अनाधिकृत लँ बन्द यायेत, व कर्मचारीपिन्त अभ्यस्त दयकेगु उद्देश्यं रेल गुडे यायेत्यःगु खः। २०७७ असोज २ गते भारतय् न्याना हःगु नेपाली रेल धनुषाया इनर्वा स्टेशनय् तयातःगु खः।

प्रधानमन्त्री शेरबहादुर देउवां निम्ह मन्त्री थपे यायेगु तयारी याउगु दु।

वइगु सोमबाः तक मन्त्रीमण्डल विस्तार यायेगु तयारी याउगु दु। प्रधानमन्त्री देउवां रक्षा व उद्योग, वाणिज्य तथा आपूर्ति मन्त्री थप यायेत्यःगु खः।

आः उगु मन्त्रालयं कार्यभार देउवा थम्हेसिया कःघाना वयाच्वंगु खः। बाँकी केन्द्रीय सदस्य मनोनीत यायेगु न तयारी यानाच्वंगु दु। कांग्रेस सभापति देउवां बाँकी १७ म्ह केन्द्रीय सदस्य न मनोनीत यायेगु तयारी यायेत्यःगु दु।

नेपाली कांग्रेसया विधानं सभापति न ३३ म्ह केन्द्रीय सदस्य मनोनीत यायेगु व्यवस्था दु । थ्व स्वया न्ह्यः, देउवां १६ म्ह केन्द्रीय सदस्य मनोनीत याये धुकुगु दु।

वंगु २४ घण्टाया दुने देयन्यक ८३६ म्हेसित कोरोना संक्रमित पुष्टि जुगु दु।

कोरोना सक्रमित जूपि द्धःछि स्वया म्हो जुयावंगु दु। स्वास्थ्य तथा जनसंख्या मन्त्रालयया कथं पीसीआर व एन्टिजेन परीक्षणं वंगु २४ घण्टाय् जम्मा ८३६ म्हेसित संक्रमण पुष्टि जुगु दु।

४ हजार २६० म्हेसिगु पीसीआर परीक्षणय् ४९१ म्ह व २ हजार ३९४ म्हेसिगु एन्टिजेन परीक्षणय् ३४५ म्ह याना ८३६ म्हेसित संक्रमण पुष्टि जुगु खः।

अथेहे मन्त्रालयया कथं वंगु २४ घण्टाय् कोरोना संक्रमणं प्यम्हेसिगु ज्यान वंगु दु। १ हजार ८२६ म्ह संक्रमणमुक्त जुगु दु।

सत्तारुढ गठबन्धनया स्वगु प्रमुख दलया शीर्ष नेतापि दथुइ थौं शनिबाः छलफल जुगु दु।

प्रधानमन्त्रीया सरकारी निवास बालुवाटारय् प्रधानमन्त्री व नेपाली कांग्रेसया सभापति शेरबहादुर देउवा, नेकपा माओवादी केन्द्रया अध्यक्ष पुष्पकमल दाहाल प्रचण्ड व नेकपा एकीकृत समाजवादीया अध्यक्ष माधवकुमार नेपाल दथुइ छलफल जुगु दु।

वंगु छु ई अमेरिकी सहयोग परियोजना मिलेनियम च्यालेन्ज कम्प्याक्ट (एमसीसी) सम्झौता संसदं पारित यायेगु कि मयायेगु धइगु विषय सत्तारुढ गठबन्धन दथुइ विवाद जुगु खः।

नेपाली कांग्रेस व प्रधानमन्त्री शेरबहादुर देउवा थुगु सम्झौता संसदं याकन पारित यायेगु पक्षय् दुगु खः। तर माओवादी केन्द्रया अध्यक्ष प्रचण्ड व एकीकृत समाजवादीया अध्यक्ष नेपाल धासा एमसीसी सम्झौता संशोधनविना पारित यायेमज्यू धइगु अडानय् दु।