प्रधानमन्त्री शेरबहादुर देउवां सर्वदलीय बैठक सःतूगु दु। कन्ह्य न्हिनय् ४ बजेया लागि बैठक सःतूगुु दु सा छु विषयया लागि सःतूगु धका धाउगु मदुनि।

प्रधानमन्त्री देउवाया सचिवालय कथं बैठकय् प्रतिनिधिसभाय् प्रतिनिधित्व याइगु राजनीतिक दलया शीर्ष नेता व पूर्वप्रधानमन्त्रीपिन्त सःतूगु खः।

स्रोतं बिउगु जानकारी कथं प्रधानमन्त्री देउवां प्रतिनिधिसभा बैठक सञ्चालन व मिलेनियम च्यालेन्ज कर्पोरेसन (एमसीसी) सम्बन्धी सम्झौता अनुमोदन विषय संसदय् दुगु दलपि नाप छलफल यायेत्यंगु खः।

सरकारं संसद चालु अधिवेशनपाखे एमसीसी सम्झौता पारित यायेगु तयारी दु। तर नेकपा एमाले न थःपिनिगु सांसदपिन्त यानागु कारबाहीयात सभामुखं मान्यता मबिउगु धासे संसद अवरोध याना वयाच्वंगु खः।

अथेहे सत्तारुढ गठबन्धनय् दुपि नेकपा माओवादी केन्द्र, एकीकृत समाजवादी केन्द्र लगायतया दल एमसीसी सम्झौता गथे खः अथे पारित याये मज्यू धइगु पक्षय् दु।

वंगु २४ घण्टाया दुने देयन्यक १८९ म्हेसित कोरोना भाइरस संक्रमण पुष्टि जुगु दु।

स्वास्थ्य तथा जनसंख्या मन्त्रालयया कथं ५,४८३ पीसीआर परीक्षण याउगुलि १५८ म्ह व २,५१४ म्हेसित एन्टिजेन परीक्षण याउगुलि ३१ म्ह याना १८९ म्हेसित संक्रमण पुष्टि जुगु दु।

अथेहे कोरोना संक्रमणया कारण २४ घण्टाया दुने निम्ह सीउगु दु सा २५० म्ह संक्रमणमुक्त जुगु दु।

स्वनिगलय् थौंया तापक्रम २ दशमलव ६ डिग्री सेल्सियसय् कुहावंगु दु।

जल तथा मौसम विज्ञान विभागया कथं थौं येँया तापक्रम थुगु दँया दकलय् आःतकया हे कम मापन जुगु दु।

थ्व स्वया न्ह्यः शुक्रबाः स्वनिगलयया तापक्रम ३.४ डिग्री सेल्सियस खः। तापक्रम घटे जुगुलि स्वनियलय् ख्वाःगू बढे जुगु दु।

मौसमविदया कथं थौं चान्ह्य वाः वयेफु धका धाउगु दु।

नेपाली कांग्रेसया खुल्लापाखे केन्द्रीय सदस्यपिनिगु मत गणना सुरु जूगु दु।

१४ क्वःगु महाधिवेशन अन्तर्गत खुला केन्द्रीय सदस्यया लागि थौं ११ बजेनिसे पार्टी केन्द्रीय कार्यालय सानेपाय् सुरु जूगु दु। झी थाय् मत गणना सुरु जुगु दु धका निर्वाचनि समितिं धाउगु दु।

३५ म्हेसिगु निति जुुगु खुला केन्द्रीय सदस्य पदया लागि ९९ म्हेसिया उम्मेदवारी बिउगु खः।

ज्यापु संस्कृति विकास कोषं १८ क्वःगु राष्ट्रिय ज्यापु दिवसय् थीथी व्यक्तित्वपिन्त सिरपाःलिसें पदक व विशेष सम्मान याइगु ज्याझ्वः कन्ह्य येँया बसन्तपुरय् यायेत्यंगु दु।

सांस्कृतिक संगीत ख्यःपाखें ज्यापु प्रतिभा सिरपाः अनिल महर्जनयात, पत्रकारपाखे तेजनारायण महर्जनयात, खेलकुदपाखें टेबल टेनिस कासामि अनिता महर्जनयात, कलापाखें कलाकार रमेश महर्जनयात लःल्हाइगु जूगु दु।

अथेहे, ज्यापु युवा सम्मान मिस नेवाः ११३९ (ज्येष्ठ २०७६) नितु डंगोल, मिस नेवाः ११४१ (फागुन २०७७) या कृषा महर्जन, मिस नेवा वर्ल्ड २०२१ या थँहिति क्वाःबहाःया नेन्सी महर्जनयात लःल्हाइगु जूगु दु ।

ज्यापु सरस्वती पदक मध्यपुर थिमिया सुरेन्द्र विक्रम प्रजापतियात व ज्यापु रत्न भोटेबहाःया डा.रमेशमान सिंहयात लःल्हाइगु जूगु दु। अथेहे ज्यापु विशेष सम्मान सिक्किमया दिलिपकुमार प्रधानयात, मदनसेन बज्राचार्ययात, राजनलाल जोशी व नविनकुमार जोशीयात लःल्हाइगु जूगु दु ।

अथेहे ज्यापु सांस्कृतिक धरोहर सम्मान तीर्थमान महर्जनयात लःल्हाइगु जूगु दु।