अफ्रिकन देशं फैलै जुगु कोरोना भाइरसया ओमिक्रोन भेरिएन्ट अप्वो फैलै जुगुलि आः नेपालय् न कडा यायेगु जुगु दु।

स्वास्थ्य संवेदनशीलतायात कया अध्यागमन विभागं ओमिक्रोन फैलै जुगु ६७ गु देशपाखे नेपाल वइपिन्त यात्रुयात न्ह्यन्हु अनिवार्य क्वारेन्टिनय् च्वनेमाःगु धका धाउगु दु।

मन्त्रिपरिषदं मंसिर १३ या निर्णय कथं जोखिमयुक्त माने यानातःगु देशपाखे नेपाल प्रवेशयाइपि यात्रुपिन्स न्ह्यन्हु थःगु हे खर्चय् होटल क्वारेन्टिनय् च्वनेमाःगु धका विभागं छगु सूचं जारी याउगु दु।

उगु देशपाखे वइपि यात्रुपिन्स आरटी–पीसीआर विधिपाखे परीक्षण यायेमाः। लिच्वः नेगेटिभ वःगु लिपा न्ह्यन्हु होम क्वारेन्टिनय् च्वनेमाः। पोजेटिम रिपोर्ट वंसा तोके याउगु आइसोलेसन केन्द्र वा अस्पताल छ्वयेगु धका विभागं म्हिगः शुक्रबाः छगु सूचं जारी यासे उल्लेख याउगु दु।

बागमती प्रदेशया खानेपानी, ऊर्जा तथा सिँचाइमन्त्री बसन्त मानन्धरयात थौं छगु ज्याझ्वः दथुइ भिंतुना बिउगु दु।

एकीकृत समाजवादी पार्टी १७ वडा व मंकाः समाज टाउन प्लानिग खुसिबुँ थौं छगु ज्याझ्वः यासे भिंतुना ज्याझ्वः याउगु खः।

उगु ज्याझ्वलय् मन्त्री मानन्धरं थःपिनिगु कार्यकाल दच्छि जक ल्यदनिइगु जुगुलि थःम्हेसिया चुनावया इलय् प्रतिबद्धा यानागु कथं ज्या यानाच्वनागु दु धका धयादीसे आः थःत न्हुगु जिम्मेवारी वंगु दु।

स्थानीयपि नाप मिले जुया ज्यायेगु धका धयादीगु खः। मन्त्री मानन्धर येँया ७ नम्वर कपाखे बागमती प्रदेशय् निर्वाचित जुगु खः।

नेपाल संगीत नाप नाट्य प्रज्ञा प्रतिष्ठानया संस्थापक उपकुलपतिलिसें नांजाम्ह रंगकःमि प्रचण्ड मल्ल मन्त।

मल्लं झिदँया दँय् वीरगञ्जय् क्यंगु रामलीला स्वये धुंका अभिनयपाखे नुगः क्वसायेकुम्ह नाट्य सम्राट बालकृष्ण समया ’नेपाल कला मण्डल’ नांयागु नाटकय् प्रचन्डमान मल्ल धका नां छुना थःगु कला यात्रा शुरु यानादीगु खः।

’फर्केर हेर्दा, जब घाम लाग्छ, पहाड चिच्याइरहेछ’ लगायतया निर्देशक प्रचण्ड मल्लं नेपाली चलचित्र विश्वास व प्रेमपिण्ड थेंज्यागु चर्चित फिल्मया कला निर्देशकया रुपय् नं ज्या यानादी धुकुम्ह खः।

छुं इ न्हयः निसें उसायँ मदयाच्वम्ह वय्कः वासः याकेगु झ्वलय् मीनभवनय् च्वंगु सिभिल अस्पतालय् शुक्रबार न्हिनय् मदुगु नेपाल संगीत तथा नाट्य प्रज्ञा प्रतिष्ठानया उपकुलपति हरिहर शर्मां जानकारी बियादीगु खः।

वय्कया अन्तिम संस्कार पशुपति आर्यघाटय् थौं हे जुउगु खः।मल्लं तत्कालीन नेपाल राजकीय प्रज्ञा प्रतिष्ठानय् ज्या यानादिबलय् दर्जनं मल्याकं नाटक निर्देशन यानादीगु खः। वय्कयात रंगमञ्च संयोजनय् सिद्धहस्त कथं कयातःगु दु।

वंगु २४ घण्टाया दुने देयन्यक थप २७४ म्हेसित कोरोना भाइरस संक्रमण पुष्टि जुगु दु।

७ हजार ६ सय ९१ म्हेसिगु पीसीआर परीक्षण याउगुलि २६९ म्ह व १ हजार ३ सय २५ म्हेसिगु एन्टिजेन परीक्षण याउगुलि २४ म्ह याना २७४ म्हेसित कोरोना भाइरसया संक्रमण खनेदुगु दु धका स्वास्थ्य तथा जनसंख्या मन्त्रालयं धाउगु दु।

अथेहे २४ घण्टाय् कोरोना संक्रमणं स्वह सीउगु दु सा २७० म्ह कोरोनामुक्त जुगु दु।

बुद्ध जन्मस्थल लुम्बिनीइ मिँच्याना छगु दर्जन उपहार पसः नष्ट जुगु दु।

वंगु चान्ह्यः १ः३० बजेति मिँ च्याना १२ गु उपहार पसः च्याउगु खः। माला, मूर्ति, ढाका, हस्तकला लगायतया पसलय् मिँ च्याना ७० लाख रुपैयाँ बराबर क्षति जुगु अनुमान याउगु दु।

उगु थासय् सच्छि मल्याक उपहार पसः दु। दमकल, प्रहरी व स्थानीयपिन्स मिँयात नियन्त्रणय हःगु खः।

घटनाया अनुसन्धान जुयाच्वंगु दु धका अनाया जिल्ला प्रहरी कार्यालय रुपन्देहीं धाउगु दु।