कोरोना संक्रमणं छन्हुया दुने १२ म्हेसिगु ज्यान वंगु दु।

स्वास्थ्य मन्त्रालयपाखे प्रवक्ता डा. संगीता मिश्रां थौं नियमित प्रेस ब्रिफिङय् वंगु २४ घण्टाया दुने १२ म्ह सीउगु दु धका जानकारी बिउगु खः।

अथेहे वंगु २४ घण्टाया दुने देयन्यक थप ३ हजार ६३७ म्हेसित कोरोना भाइरस (कोभिड–१९) या संक्रमण पुष्टि जूगु दु धका धाउगु दु। स्वास्थ्य मन्त्रालयया कथं ६ हजार ४९९ म्हेसिगु पीसीआर परीक्षण याउगुलि २ हजार २०५ म्हेसित व ५ हजार ८३ म्हेसिगु एन्टीजेन परीक्षण याउगुलि १ हजार ४३२ म्ह याना ३ हजार ६३७ म्हेसिता कोरोना संक्रमण पुष्टि जूगु दु।

आःतक देयन्यक ६९ हजार २९१ म्ह सक्रिय संक्रमितपि दु सा ७ हजार ५५५ म्ह संक्रमणमुक्त जुगु दु।

क्यासिनोे रोयल्टी व नवीकरण बापत बाँकी दुगु बक्यौता मपूगु न्ह्यगू क्यासिनो कम्पनीयात बक्यौता बुझे यायेत सरकारं न्ह्यन्हुया दुने अल्टिमेटम बिउगु दु।

संस्कृति, पर्यटन तथा नागरिक उड्डयन मन्त्रालय मातहतया पर्यटन विभागं न्ह्यगु कम्पनीयात क्यासिनो रोयल्टी व नवीकरण बापत आव २०७७÷७८ तकया बाँकी बक्यौता बुझे यायेगु निति म्याद बिउगु खः।

न्ह्यगु कम्पनीपाखे ८७ करोड १५ लाख १५ हजार बक्यौता पूगु मदुनि। उकि मध्ये क्यासिनो सञ्चालन इजाजतपत्र कया तःगु निगु कम्पनी व आधुनिक मेसिन वा उपकरणया माध्यमपाखे जक म्हितिकिइगु सञ्चालनया इजाजत कयातःगु स्वंगु कम्पनी खः।

पर्यटन विभागं थःगु छगु आज सार्वजनिक सूचं जारी यासे पटक–पटक ताकेता यासे क्यासिनो कम्पनीं बक्यौता बुझे यायेत ताकेता यासा बक्यौता बुझे मयाउगु कम्पनीयात कानुनी कारबाही यायेगु चेतावनी बिउगु खः।

विभागया कथं बक्यौता बुझे मयापि क्यासिनो इजाजतपत्र कयातःपि कम्पनी होटेल याक एन्ड यति प्रालिं २० करोड ६८ लाख १५ हजार व ओरियन्टल होटल्स लिमिटेड (¥याडिसन होटेल) न १८ करोड ७६ लाख रुपैयाँ पुलेमाःनिगु खः।

अथेहे, क्यासिनो सञ्चालक ह्याप्पी आवर, रक इन्टरनेसनल व सेन्ट्रल मिडिया प्रालिं बक्यौता बुझे याउगु मदुनि। ह्याप्पी आवरं २१ करोड ५५ लाख, रक इन्टरनेसनलं ११ करोड ४५ लाख ८२ हजार ८४८ व सेन्ट्रल मिडियां १३ करोड ३९ लाख ५० हजार रुपैयाँ बुझे ल्यः दनिइगु खः।

प्रधानमन्त्री शेरबहादुर देउवा, नेकपा माओवादी केन्द्रया अध्यक्ष पुष्पकमल दाहाल प्रचण्ड व नेकपा एकीकृत समाजवादीया अध्यक्ष माधवकुमार नेपाल दथुइ भेटवार्ता जुगु दु।

बुधबाः थौं न्हिनय् प्रधानमन्त्रीयात नापलाेिगु निति प्रचण्ड व नेपाल बालुवाटारय् वंगु खः। वयकःपि दथुइ करिब १ घण्टा खँल्हाबल्हा जुगु दु धका प्रधानमन्त्री देउवाया सचिवालय स्रोतं धाउगु दु।

उगु भेटधाटय् गृहमन्त्री बालकृष्ण खाँड व सञ्चार तथा सूचना प्रविधिमन्त्री ज्ञानेन्द्रबहादुर कार्की न सहभागी दुगु खः। मंगलबाः प्रधानमन्त्रीनाप जुगु भेटघाटय् निर्वाचन आयोगया पदाधिकारीपिन्सं स्थानीय तहया निर्वाचन जेठ ४ गते यायेत सरकारयात परामर्श बिउगु खः।

प्रधानमन्त्री देउवां गठबन्धनया छलफल यासे सरकारं मिति तोके यायेगु धका धाउगु दु। अथेहे वंगु यलय् प्रधानमन्त्री शेरबहादुर देउवां अमेरिकी सहयोग परियोजना मिलेनियम च्यालेन्ज कम्प्याक्ट (एमसीसी) पारित यायेगु तयारी याउगु खः।

राष्ट्रिय जनस्वास्थ्य प्रयोगशाला व राष्ट्रिय एड्स तथा यौन रोग नियन्त्रण केन्द्रया न्हापांम्ह निर्देशक वरिष्ठ प्याथोलोजिष्ट डा.विजय लाल गुरुवाचार्य मन्त।

डा. गुरुवाचार्य ८३ दँय् म्हिगः थःगु हे छेँ कुपण्डोलय् मदुगु खः।

तामाङ समुदायं थौं सोनम ल्होसार अथेधइगु न्हूदँयात लसकुस यानाः नखः हनाच्वंगु दु ।

तिब्बती परम्परा कथं माघ शुक्ल प्रतिपदाया दिंकुन्हु तामाङ समुदायं थ्व नखः हनेगु याः । थौंनिसें २८५८दँ क्यंगु दु । सा दँ पूवनाः धुँ दँ न्ह्याःगु कथं थौंया दिंयात स्वीकार यानातःगु दु ।

छुँ, सा, धुँ, खराचा, ड्रागन (मेघ), ताःहा, सल, भ्वाँ, माकः, चखुँ, खिचा व फा यानाः १२गू वर्गय् सोनाम ल्होसारयात ब्वःथलाःतःगु दु । तामाङ समुदायया बाहुल्यता दुगु वाग्मती प्रदेशया थीथी जिल्लाय् थ्व नखः हनेगु चलन दु ।

सरकारं थौं सोनम ल्होसारया लसताय् सार्वजनिक बिदा ब्यूगु दु । कोरोना संक्रमणया हुनिनं औपचारिक ज्याझ्वःत धाःसा प्रभावित जूगु दु । स्वयम्भू लागाया चैत्यय् सीमित मनूतय्गु ब्वतिइ पूजापाठ यायेगु ज्याझ्वः क्वःजिनाच्वंगु दु ।

थ्वहेदथुइ, राष्ट्रपति विद्यादेवी भण्डारीें सोनम ल्होसारया लसताय् भिंतुना हसना सार्वजनिक यानाद्यूसें सुख, शान्ति व समृद्धिया नितिं भिंतुनादीगु दु । मौलिक नखःचखः व संस्कृतियात म्वाकाः थवंथवय्या सद्भाव अप्वयेकेत झीगु मौलिक सभ्यताया विकास यायेमाःगु धयादीगु दु ।

अथेहे, प्रधानमन्त्री शेरबहादुर देउवां न भिंतुना हसना सार्वजनिक यानाः कोरोना संक्रमणयात मध्यनजर यानाः नखः हनेत इनाप यानादीगु दु ।