पेट्रोलियम पदार्थया भाः थकाउगु लितकायेमाः धासे नेकपा (क्रान्तिकारी माओवादी) निकट विद्यार्थी संगठन अखिल (क्रान्तिकारी) न विरोध प्रदर्शन याउगु दु।

थौं बुधबाः पेट्रोलियम पदार्थया भाः थकाउगुलि यलय् मसाल जुलुस पिकाउगु खः।

व स्वया न्ह्यः माइतीघर मण्डलाय् अखिल क्रान्तिकारीं पेट्रोलियम पदार्थय् भाः थकाउगु विरोधय् प्रदर्शन याउगु खः।

सरकारं थौं चान्ह्यनिसे लागू जुइगु कथं पेट्रोल, डिजेल व मतिकनय् लिटरं स्वतका थकाउगु खः।

स्वनिगलय् थप १ हजार १२३ म्हेसित कोरोना संक्रमण पुष्टि जुगु दु।

स्वास्थ्य मन्त्रालयया कथं थौं येँ जक ८६८ म्हेसित कोरोना सक्रमण जुगु दु। अथेहे, यलय् १७० म्ह व ख्वपय् ८५ म्हेसित कोरोना संक्रमण पुष्टि जुगु दु।

स्वास्थ्य मन्त्रालयया कथं मेमेगु जिल्लाय् कास्कीइ १३१, मोरङय् ११८, चितवनय् १०४, सुनसरीइ ८९ म्हेसित कोरोना संक्रमण पुष्टि जुगु दु।

अथेतु कैलालीइ ५८, तनहुँइ ३९, झापाय् ३६, मकवानपुरय् ३०, धनुषाय् २५, सर्लाही व बाँकेय् २३÷२३ म्हेसित, नवलपरासी पुर्वय् २१ व रुपन्देहीइ २० म्हेसित कोरोना संक्रमण खनेदुगु धका मन्त्रालयं धाउगु दु।

 पेट्रोलियम पदार्थया भाः थकाउगुलि विरोधय् धनगढीइ प्रधानमन्त्री शेरबहादुर देउवाया पुत्ला च्याकूगु दु।

नेकपा एमाले निकट विद्यार्थी संगठन अनेरास्ववियु व युवा संघ नेपाल कैलालीं पेट्रोलियम पदार्थया भाः थकाउगु धासे प्रधानमन्त्री शेरबहादुर देउवाया पुत्ला च्याकूगु खः।

नाप मुख्यमन्त्री व मन्त्रीपरिषद् कार्यालय न्ह्यने नाराबाजी याउगु खः। सरकारं मंगलबाःनिसे इन्धनया भाः थकाउगु तत्काल फिर्ता लितमकासा कडा आन्दोलन यायेगु चेतावनी तक बिउगु खः।

कोरोना संक्रमणं छन्हुया दुने १२ म्हेसिगु ज्यान वंगु दु।

स्वास्थ्य मन्त्रालयपाखे प्रवक्ता डा. संगीता मिश्रां थौं नियमित प्रेस ब्रिफिङय् वंगु २४ घण्टाया दुने १२ म्ह सीउगु दु धका जानकारी बिउगु खः।

अथेहे वंगु २४ घण्टाया दुने देयन्यक थप ३ हजार ६३७ म्हेसित कोरोना भाइरस (कोभिड–१९) या संक्रमण पुष्टि जूगु दु धका धाउगु दु। स्वास्थ्य मन्त्रालयया कथं ६ हजार ४९९ म्हेसिगु पीसीआर परीक्षण याउगुलि २ हजार २०५ म्हेसित व ५ हजार ८३ म्हेसिगु एन्टीजेन परीक्षण याउगुलि १ हजार ४३२ म्ह याना ३ हजार ६३७ म्हेसिता कोरोना संक्रमण पुष्टि जूगु दु।

आःतक देयन्यक ६९ हजार २९१ म्ह सक्रिय संक्रमितपि दु सा ७ हजार ५५५ म्ह संक्रमणमुक्त जुगु दु।

क्यासिनोे रोयल्टी व नवीकरण बापत बाँकी दुगु बक्यौता मपूगु न्ह्यगू क्यासिनो कम्पनीयात बक्यौता बुझे यायेत सरकारं न्ह्यन्हुया दुने अल्टिमेटम बिउगु दु।

संस्कृति, पर्यटन तथा नागरिक उड्डयन मन्त्रालय मातहतया पर्यटन विभागं न्ह्यगु कम्पनीयात क्यासिनो रोयल्टी व नवीकरण बापत आव २०७७÷७८ तकया बाँकी बक्यौता बुझे यायेगु निति म्याद बिउगु खः।

न्ह्यगु कम्पनीपाखे ८७ करोड १५ लाख १५ हजार बक्यौता पूगु मदुनि। उकि मध्ये क्यासिनो सञ्चालन इजाजतपत्र कया तःगु निगु कम्पनी व आधुनिक मेसिन वा उपकरणया माध्यमपाखे जक म्हितिकिइगु सञ्चालनया इजाजत कयातःगु स्वंगु कम्पनी खः।

पर्यटन विभागं थःगु छगु आज सार्वजनिक सूचं जारी यासे पटक–पटक ताकेता यासे क्यासिनो कम्पनीं बक्यौता बुझे यायेत ताकेता यासा बक्यौता बुझे मयाउगु कम्पनीयात कानुनी कारबाही यायेगु चेतावनी बिउगु खः।

विभागया कथं बक्यौता बुझे मयापि क्यासिनो इजाजतपत्र कयातःपि कम्पनी होटेल याक एन्ड यति प्रालिं २० करोड ६८ लाख १५ हजार व ओरियन्टल होटल्स लिमिटेड (¥याडिसन होटेल) न १८ करोड ७६ लाख रुपैयाँ पुलेमाःनिगु खः।

अथेहे, क्यासिनो सञ्चालक ह्याप्पी आवर, रक इन्टरनेसनल व सेन्ट्रल मिडिया प्रालिं बक्यौता बुझे याउगु मदुनि। ह्याप्पी आवरं २१ करोड ५५ लाख, रक इन्टरनेसनलं ११ करोड ४५ लाख ८२ हजार ८४८ व सेन्ट्रल मिडियां १३ करोड ३९ लाख ५० हजार रुपैयाँ बुझे ल्यः दनिइगु खः।