निर्वाचन आयोगं राष्ट्रपति विद्यादेवि भण्डारीयात राष्ट्रियसभा निर्वाचनया प्रतिवेदन लल्हाःगु दु।

राष्ट्रियसभाय् वंगु १२ गते बुधबाः क्वचाउगु राष्ट्रियसभा निर्वाचनया लिच्वः नाप प्रतिवेदन आयोगं लल्हागु धका राष्ट्रपतिको कार्यालयं धाउगु दु।

निर्वाचन आयोगं राष्ट्रियसभा सभा निर्वाचनया लिच्वः नाप वार्षिक प्रतिवेदन लल्हागु खः।

सत्ता साझेदार जनता समाजवादी पार्टी (जसपा)या संघीय परिषद अध्यक्ष डा. बाबुराम भट्टराई न आलटाल मयासे एमसीसी संसदं पारित यायेमाः धका धाउगु दु।

थुगु बहानाय् सत्ता गठबन्धन त्वाः थले मज्यू धका धासे वयकलं सर्वसम्मतिं एमसीसी पारित यायेमाःगु धका थःगु धारणा सार्वजनिक याउगु दु। पूर्वप्रधानमन्त्री भट्टराई न सामाजिक सन्जालय् च्वंगु दु, ‘एमसीसी सम्झौतायात आलटाल मयासे सर्वसम्मतिं संसदपाखे पारित याये।

दक्को छपाः म्हुतू जनतायात थुइके, थुगु बहानाय् प्रतिगमनविरोधी गठबन्धन त्वाःमधलेमाः।’ सत्ता गठन्धनया प्रमुख घटक नेकपा माओवादी केन्द्र व नेकपा एकीकृत समाजवादी पार्टीया नेतापिन्स गथे खः अथे हे एमसीसी पारित याये मज्यु धका धयाच्वंगु खः।

प्रधानमन्त्री शेरबहादुर देउवां प्रतिनिधिसभाया चालु अधिवेशनय् हे अमेरिकी सहयोग सम्बन्धी परियोजना मिलिनियम च्यालेन्ज कम्प्याक्ट (एमसीसी) पारित याये माःगु थःत बाध्यता दु धका धाउगु दु।

प्रम देउवां एमसीसी पास मजूसा न्यागू दलीय गठबन्धन त्वाधइ धका चेतावनी तक बिउगु दु। सत्तारुढ न्यागु दलया बैठक तया स्थानीय निर्वाचन जेठ यायेगु सहमति यासे देउवां वया लिपा एमसीसीबारे छलफल याउगु खः।

बालुवाटारय् जुगु छलफलय् राष्ट्रिय जनमोर्चा बाहेक प्यंगु दलया शीर्ष नेतापि व कार्यदलया सदस्यपि झलनाथ खनाल, नारायणकाजी श्रेष्ठ व ज्ञानेन्द्रबहादुर कार्कीपि दुगु खः।

बैठकय् नेपाली कांग्रेसया सभापति नाप प्रधानमन्त्री देउवां १ फेब्रअरी तक अनुमोदन मजूसा अमेरिकां एमसीसी परियोजना लित यकिइ धका धासे संसदं अनुमोदन यायेमाः धका धाउगु खः।

संविधान सभा सदस्य नाप नेकपा एकीकृत समाजवादीया नेता डा. दुमन सिंह थापा मन्त।

डा.थापा ६२ दँय् ह्याम्स अस्पतालय् बहनि मदुगु खः। थापाया छु दिं न्ह्यः निगल जलास्येँ प्रत्यारोपण याउगु खः।

वयकः नेकपा एमालेपाखे अर्घाखाँची निर्वाचन क्षेत्र नम्बर २ पाखे संविधान सभा सदस्यय् निर्वाचित जुयादीगु खः।

यलया सुनाकोठीं खुया यकूगु बालकुमारी द्यःया मूर्ति बारे सूचं बिइम्हेसित न्यागु लाख पुरस्कार बिइगु घोषणा याउगु दु।

खुया यकूगु छवाः दय धुकल न द्यः मलूगुलि बालकुमारी गुथिं विशेष सूचं पिकया थथे घोषणा याउगु खः।

यल महानगरपालिका वडा २७ या वडाध्यक्ष बाबुराज महर्जनं विशेष सूचं बिउम्हेसित न्यागु लाख पुरस्कार बिइगु घोषणा याउगु दु। सुराकी बिइम्ह मनूया न गोपनीयता कायम जुइ धका वयकलं धाउगु दु।

वंगु आइतवाः माघ ९ गते यल महानगरपालिका–२७ य् च्वंगु  बालकुमारी द्यःया मूर्ति खुया यकूगु खः।