नेवाः तयगु मौलिक बाजं दाफा संस्कृतियात संरक्षण व सम्बद्र्धन यायेगु उद्देश्यं किपू नगरपालिकां किपूलिइ थीथी दाफा खलःपिन्त हार्माेनियम लल्हागु दु।

वंगु भदौ २४ गते थीथी १९ गु दाफा खलःपिन्त हार्माेनियम लल्हागु खः। किपू नगरपालिका वडा नं.२ भवन, देवढोकाय् जुगु छगु ज्याझ्वलय् किपू नगरपालिकाया मेयर रमेश महर्जन, उप–मेयर सरस्वती खड्का, प्रमुख प्रशासकीय अधिकृत कृष्णप्रसाद सापकोटा नाप किपू नगरपालिका वडा नं. १ या अध्यक्ष हर्ष महर्जन, वडा नं. २ या अध्यक्ष रमेशमान डंगोल, वडा नं. १० या अध्यक्ष अमन महर्जनंपिन्स हार्माेनियम लल्हानादीगु खः।

नेपाली कांग्रेसया १४ क्वःगु महाधिवेशनय् वरिष्ठ नेता रामचन्द्र पौडेल व पूर्वमहामन्त्री कृष्णप्रसाद सिटौलां छु न पदय् उम्मेदवारी बिउगु मदु।

शनिबाः बहनिया ५ बजे तक उम्मेदवारी मनोनयनया ई तोके यासा उमिसं उम्मेदवारी दर्ता याउगु मदु।

पौडेलं सभापतिइ शेखर कोइरालायात समर्थन याउगु दु सा सिटौलां वर्तमान सभापति शेरबहादुर देउवायात हे समर्थन याउगु दु।

पौडेलं शनिबाः छगु विज्ञप्ति जारी यासे १४ क्वःगु महाधिवेशन नेतृत्वया प्रतिस्पर्धाय् अलग जुइगु घोषणा याउगु दु।

नेपाली कांग्रेसया १४ क्वःगु महाधिवेशनय् सभापतिइ विमलेन्द्र निधि न उम्मेदवारी दर्ता याउगु दु।

थौं शनिबाः न्हिनय् भृकुटीमण्डपय् निर्वाचन समितिया कार्यालय वना उम्मेदवारी दर्ता याउगु खः। वयागु प्यानलपाखे उपसभापतिइ दिव्येश्वरी शाह व महामन्त्रीइ राजाराम कार्की न उम्मेदवारी दर्ता याउगु खः।

२५ दँ तक सभापति शेरबहादुर देउवानाप सहकार्य याना वयाच्वम्ह निधिं १४ क्वःगु महाधिवेशनय् वया सभापतिइ उम्मेदवारी बिउगु खः।

कांग्रेस सभापतिइ शेरबहादुर देउवां उम्मेदवारी दर्ता याउगु दु। देउवाया प्यानलपाखे उपसभापतिइ विजय गच्छदार व पूर्णबहादुर खड्कां उम्मेदवार बिउगु दु।

अथेहे महामन्त्रीइ डा. प्रकाशशरण महत व प्रदीप पौडेल उम्मेदवार जुगु दु। महत निवर्तमान सहमहामन्त्री खःसा पौडेल केन्द्रीय सदस्य खः। १४ क्वःगु महाधिवेशनय् सभापति शेरबहादुर देउवाया नाप पूर्वमहामन्त्री कृष्णप्रसाद सिटौलां थःगुपाखे ट महामन्त्रीइ पौडेलयात न्ह्यने यकूगु खः।

देउवा समूहपाखे मिसा कोटाय् सहमहामन्त्री महालक्ष्मी उपाध्याय डिना (मकवानपुर), आदिवासी जनजातिपाखे सहमहामन्त्री भीष्मराज आङ्देम्बे (पाँचथर), दलिपाखे सहमहामन्त्री मानबहादुर विश्वकर्मा (अर्घाखाँची), मधेशीपाखे सहमहामन्त्री महेन्द्र यादव (धनुषा), खस आर्यपाखे सहमहामन्त्री किशोरसिंह राठौर (बर्दिया), थारुपाखे सहमहामन्त्री उमाकान्त चौधरी (बारा), मुस्लिमपाखे सहमहामन्त्री फरमुल्लाह मन्सुर (बारा) व लिउनेलागु क्षेत्रया सहमहामन्त्रीइ जीवनबहादुर शाही (हुम्ला) यात उम्मेदवार दयकूगु दु। 

नेपाली कांग्रेसया प्रवक्ता विश्वप्रकाश शर्मां नेता प्रकाशमान सिंहया प्यानलपाखे महामन्त्रीइ उम्मेदवारी दर्ता याउगु दु।

पौडेल पक्षपाखे सभापतिया साझा उम्मेदवार छनोट यायेगुलि सहमति मजुगुलि नेता सिंहं सभापतिइ अलग्गै उम्मेदवारी बिउगु खः।

सिहया प्यानलय् उपसभापतिइ सुजाता कोइराला व महामन्त्रीइ शर्मां उम्मेदवारी दर्ता याउगु खः।

प्रवक्ता शर्मा ताःइनिसे सभापति शेरबहादुर देउवाया प्यानलय् च्वनाच्वम्ह खः।