वंगु २४ घण्टाया दुने देयन्यक थप ३४१ म्हेसित कोरोना संक्रमण पुष्टि जुगु दु।

१० हजार ४१६ म्हेसित पीसीआर परीक्षण याउगुलि ३१३ म्ह व २ हजार ८ सय २० म्हेसिगु एन्टीजेन परीक्षण याउगुलि २८ म्ह याना ३४१ म्हेसित कोरोना संक्रमण पुष्टि जुगु दु धका स्वास्थ्य तथा जनसंख्या मन्त्रालयलं धाउगु दु।

अथेहे वंगु २४ घण्टाय् स्वम्ह सीउगु दु सा ३७६ म्ह संक्रमणमुक्त जुगु दु।

शेयर कारोबार मापक नेप्से परिसूचक थौं ७९ अंकं घटे जुगु दु। नेप्से परिसूचक ७९ दशमलव २३ अंकं घटे जुया २ हजार २ सय ८२ अंकय् कुहावंगु दु।

आइतबाः २३ सयया लाइनय् कुहावया नेप्से परिसूचक छन्हु हे २२ सय लाइनय् थ्यंगु दु। नेप्से परिसूचक नाप ‘क’ वर्गया कारोबार मापन याइगु सेन्सेटिभ इन्डेक्स न १२ दशमलव ४७ अंकय् घटे जुगु दु। नेप्से व सेन्सेटिभ निगुलि हे घटे जुया कारोबार रकम करिब ४ अर्ब थ्यंगु दु। कारोबार रकम धासा आइतबाः स्वया अप्पो खः।

न्हिच्छियक ६२ हजार ८ सय ९ कारोबारपाखे २३३ कम्पनीया ९६ लाख ७९ हजार ७२ गु कारोबार जुगु दु। उकिइ कारोबार रकम ३ अर्ब ९९ करोड ५६ लाख ४ हजार १ सय ७८ रुपैयाँ जुगु खः। बजारय् यक्को अंकं घटे जूसा कम्पनीपिनिगु शेयर भाः थौं थहावंगु दु। गुहेश्वरी मर्चेन्ट फाइनान्सया शेयर भाः थौं सोमबाः ९ प्रतिशतं थहावंगु दु।

बोटलर्स नेपाल (तराई) ५ लशमव ४० प्रतिशत अर्थात छगु कित्ताय् ६२७ रुपैयाँ न थहावंगु दु सा युनिलिभरया ७ सय ४८ रुपैयाँ प्रतिकित्ता शेयर भाः थहावंगु दु। माउन्टेन इनर्जीया शेयर छगु कित्ता ३९ रुपैयाँ न थहावंगु दु।

यक्को शेयर भाः कुहावगु कम्पनीपि स्वाभिमान लघुवित्त, दिव्यश्वरी   हाइड्रो, नेशनल हाइड्रो, गुडबिल फाइनान्स, आँखुखोला जलविद्यतु् कम्पनी खनेदु। थुगु दक्को कम्पनीया शेयर भाः थौं सोमबाः ९ प्रतिशत स्वया अप्वो घटे जुगु दु।

नेपाली कांग्रेसया महाधिवेशनय् फोटो पत्रकारयात दुर्व्यवहार याउगु धासे पत्रकारपिन्स ‘क्यामेरा डाउन’ याउगु दु।

कांग्रेस केन्द्रीय निर्वाचन समितिया निर्देशनय् प्रहरीं अभद्र व्यवहार याउगु धासे फोटो पत्रकारपिन्स क्यामेरा बँय् तया विरोध याउगु खः।

थौं येँया राष्ट्रिय सभागृहस्थित मतदान केन्द्रय् पत्रकारपिन्त पिने छ्वयत स्वंगु व फोतो कायके मबिइगु धासे अथे बिरोध याउगु खः।

नेपाली कांग्रेसया १४ क्वःगु महाधिवेशन अन्तर्गत थौं जुइगु न्हुगु कार्यसमिति ल्ययेगु निति मतदानय् कांग्रेस वरिष्ठ नेता रामचन्द्र पौडेल ब्बति मकाइगु जुगु दु।

जारी महाधिवेशनय् संस्थापनइतरपाखे सभापतिया मंका उम्मेदवार तय मजुगुलि असन्तुष्ट जुया थौं जुइगु मतदान मवनेगु धका वयकःया सचिवालयं धाउगु दु।

२४ गते जुगु महाधिवेशन उलेज्या लिपा छु न समारोहय् सहभागी जुगु मदुनि।

नेपाली कांग्रेसया १४ क्वःगु महाधिवेशन अन्तर्गत न्हुगु नेतृत्व ल्ययेगुनिति मतदान सुरु जुगु दु।

मतदानया लागि भृकुटीमण्डप व राष्ट्रिय सभागृहय् व्यवस्था मिले याउगु दु। राष्ट्रिय सभागृहय् पार्टी केन्द्रीय कार्यसमिति, जनसम्पर्क समिति, भातृ व शुभेच्छुक संघसंस्था, कर्णाली प्रदेश व लुम्बिनी प्रदेशया मतदातापिन्स मतदान याइ।

प्रदेश २ व गण्डकी प्रदेशया मतदातापिन्स भृकुटीमण्डय् व प्रदेश १, बागमती व सुदूरपश्चिम प्रदेशया महाधिवेशन प्रतिनिधिया लागि भृकुटीमण्डप प्रदर्शनी हल दुने मतदान यायेगु व्यवस्था मिले याउगु दु।

महाधिवेशनपाखे सभापति नाप निम्ह उपसभापति, निम्ह महामन्त्री, च्याम्ह सहमहामन्त्री निर्वाचित जुइ। केन्द्रीय समितिइ थीथी क्लस्टरपाखे १२१ म्ह निर्वाचित जुइ। मतदानया लागि ४ हजार ७ सय ४३ म्ह प्रतिनिधिपिनिगु नां सार्वजनिक याउगु दु।