गृहमन्त्री बालकृष्ण खाँण बागी उम्मेदवारया मनोनयन लितकायेकेगु निति चितवनया भरतपुरय् वंगु दु।

नेकपा माओवादी केन्द्रया भागय् भरतपुरया मेयर उम्मेदवार वःगुलि नेपाली कांग्रेसया कार्यकर्ता असन्तुष्ट जुगु दु।

असन्तुष्ट पक्षपाखे पूर्वसांसद तक जुयादीम्ह जगन्नाथ पौडलं मेयरय् बागी उम्मेदवारी बिउगु खः। सत्ता गठबन्धनं नेकपा माओवादी केन्द्रया रेनु दाहालयात उम्मेदवार दयकूगु खः।

सत्ता गठबन्धन दुने कांग्रेस कार्यकर्ता बागी उम्मेदवार जुगुलि गृहमन्त्री खाँण असन्तुष्टयात माने यायेगु निति भरतपुर वःगु खः। 

सत्ता गठबन्धनया प्रदेशस्तरीय संयन्त्रं कर्णाली प्रदेशया च्याःगु जिल्लाय् सोमबाः जक जिल्लास्तरय् भागबन्डा टुंग्ये याउगु दु।

उगु सहमति पालिकाय् धासा कायम याये मखुगु दु। सत्ता गठबन्धनया न्याउगु दलयो सहअस्तित्व स्वीकार यासे प्रदेशया ७९ मध्ये ६४ पालिकाय् सिट बाँडफाँट याना साझा उम्मेदवार थनेत प्रदेश संयन्त्रयात निर्देशन बिउगु खः।

तर, अधिकांश थासय् हे गठबन्धन दलपाखे बागी उम्मेदवारी बिउगु दु। प्रदेशया गुलि थासय् पालिकाया गठबन्धन दुने हे गठबन्धन याउगु दु।

गुलि थासय् गठबन्धन पिने प्रमुख दल एमाले नाप तालमेल याना उम्मेदवारी दर्ता याउगु दु।

यल महानगरपालिकाया मेयरया प्रत्यासी चिरिबाबु महर्जनविरुद्ध उजुरी तःगु दु।

न्यागु दलीय गठबन्धनपाखे मेयरया उम्मेदवार जुयादीम्ह महर्जनविरुद्ध २ अर्ब १५ करोड स्वया अप्पो बेरुजु फर्छ्योट मयाउगु धासे निर्वाचन अधिकृतया कार्यालय विरोधय् उजुरी वःगु खः।

यल वडा नम्बर १८ या गोपाल डंगोलं कार्यकालय् उगु बेरुजु दु धका उजुरी तःगु खः। महानगरपालिकाया बेरुजु महालेखा परीक्षकया प्रतिवेदनय् हे दु धासे महर्जनया उम्मेदवारी रद्द जुइमाः धइगु माग याउगु खः।

नेपाली पत्रकारपिनिगु अन्तर्राष्ट्रिय संस्था इन्जां त्रिभुवन विश्वविद्यालय शिक्षण अस्पताल महाराजगञ्जय् वासः यानाच्वंम्ह पत्रकार नारायण न्यौपानेयात १ लाख रुपैयाँ ग्वहालि याउगु दु।

इन्जाया एसिया उपाध्यक्ष पत्रकार न्यौपाने ताःईनिसे राष्ट्रिय समाचार समिति (रासस) य् ज्या यानावयाच्वम्ह खः।

आः शिक्षण अस्पतालय् उपचार याना वयाच्वम्ह न्यौपानेयात उगु रकम इन्जा ग्लोवलया सचिव दीपक रिजालं लल्हागु खः। पत्रकार न्यौपाने अझ न मेगु छु दिं अस्पतालय् च्वनाच्वनेमाः धका अस्पताल प्रशासनं जानकारी बिउगु दु।

लुँया भाः थौं गुसः क्वहावंगु दु। नेपाल सुन चाँदी व्यवसायी महासङ्घया कथं थौं लुँ तोला गुसः क्वहावया ९९ सय हजार ३ सय रुपैयाँ तोके याउगु दु।

अथेहे वहः स्थीर जुया थौं न १ हजार ३ सय ५० रुपैयाँय् हे कारोबार जुगु दु धका महासङ्घं धाउगु दु।