थौंनिसें ५न्हू तक्क ब्वंमियात कोरोना विरुद्धया खोप बिइत्यंगु दु ।

देय्यंकया ब्वनेकुथिइ भौतिक उपस्थितिइ पठनपाठन बन्द जूसा नं खोप बिइगु प्रयोजनया नितिं ब्वनेकु चालिगु जूगु दु । शिक्षा, विज्ञान तथा प्रविधि मन्त्रालयं खोप कायेगु त्वफिउपिं १२दँ निसें १७ दँ वैंशया ब्वंमियात माघ निसें २० तक्क ब्वनेकुथिइ हे खोपया व्यवस्था यायेत निर्देशन बिउगु खः ।

उगु हे कथं स्थानीय तहं सूचं जारी याना खोप कायेत आह्वान याःगु दु । येँ महानगरपालिकां ब्वनेकु खोप अभियान सञ्चालन जुयाच्वंगुलिं खोप कायेत त्वफिउपिं ब्वंमिया विवरण अद्यावधि यान ब्वनेकु व लिक्कसंया खोप केन्द्रय् खोप कायेत निर्देशन बिउगु दु ।

उकिया नितिं स्थानीय तहया वडाय् दूगु सामुदायिक सहरी स्वास्थ्य क्लिनिकलिसे समन्वय यायेत ब्वनेकुयात धाःगु दु । १२ दँ निसें १७ दँ वैंश पुचःया ब्वंमियात मोडर्ना खोप बियावःगु दु ।

थ्वयान्ह्यः २७ पुस निसें १५ माघ तक्क फुक्क ब्वनेकु बन्दया  निर्णय जूगुलिइ ताहाक याना माघ मसान्ततक्क कायम याःगु दु । खोप काःगु सुनिश्चित यायेधुंका परीक्षा सञ्चालन यायेगु सरकारया तयारी दु ।

दँय् दँसं माघ १६ गते सहिद दिवस प्रजातन्त्र स्थापना नाप पुनःस्थापनाय् थीथी स्वतन्त्रताया लागि जीवन आहुति बिइपि सहिदपिनिगु लुमन्तिइ थौं देयन्यक थीथी ज्याझ्वः याना सहिद दिवस हना वयाच्वंगु खः।

माघ १० निसे १६ गते तक थीथी ज्याझ्वः याना सहिद सप्ताह हना वयाच्वंगु खः। वि.सं. २०१२ निसे तत्कालीन येँ नगरपालिकाया संयोजकत्वय् दँय् दँसं माघ १६ गते सहिदपिनिगु लुमन्तिइ सहिद दिवस हनावया च्वंगु खः।

स्वतन्त्रताया माग यासे वि.सं. १९९७ य् सहिद शुक्रराज शास्त्रीयात माघ १० गते येँया टेकुया पचली, माघ १३ गते धर्मभक्त माथेमायात सिफलय् नाप गंगालाल श्रेष्ठ व दशरथ चन्दयात माघ १५ गते शोभाभगवतीइ राणाशासकं मृत्युदण्ड बिउगु खः।

थौं सःतूगु प्रतिनिधि सभाया बैठक स्थगित जूगु दु।

आः बैठक वइगु २६ गते जक च्वनिइगु जुगु दु। संसद् सचिवालयं छगु विज्ञप्ति पिकया कोभिड–१९ सङ्क्रमणया जोखिम यथावत् दुगु कारण बैठक स्थगित यानागु धका धाउगु दु।

प्रमुख प्रतिपक्षी दल नेकपा एमाले न लगातार अवरोध याउगु कारण संसद् बैठक नियमित कार्यसूची न्ह्यने यकेफुगु मदुनि। अथेहे, संसद् बैठक स्थगित जुगलि थौंया लागि सःतूगु कार्यव्यवस्था परामर्श समितिया बैठक न स्थगित जुगु दु।

सत्तारुढ गठबन्धनया बैठकं जेठ मशान्त दुने स्थानीय तहया निर्वाचन यायेत सरकार दुने सुझाव बिउगु दु।

थौं शनिबाः बहनि प्रधानमन्त्रीया सरकारी निवास बालुवाटारय् च्वंगु बैठकं जेठ मशान्त दुने स्थानीय तहया निर्वाचन यायेत सुझाव बिइगु निर्णय यानागु धका सञ्चार तथा सूचना प्रविधिमन्त्री ज्ञानेन्द्रबहादुर कार्की न जानकारी बिउगु दु।

मन्त्री कार्कीया कथं आः निर्वाचन आयोग नाप परामर्श याना सरकारं स्थानीय तहया निर्वाचनया मिति क्वछिइगु धका धाउगु दु ।

बैठकं स्थानीय तह निर्वाचन ऐन २०७३ संशोधन यायेमाःगु उकिया प्रक्रिया न्ह्यने यकेत सरकारयात सुझाव बिउगु दु धका मन्त्री कार्की न धाउगु दु।

ख्वपया सूर्यविनायकय् बसया ठक्करं मोटरसाइकलया लिउने च्वना वम्ह मिसा याउगु ज्यान वंगु दु।

बनेपां येँ वया च्वंगु बा ५ ख ३० २० नम्बरया बसं सूर्यविनायकया बाँसघारीइ बा ७० प ९१ ३८ नम्बरया मोटरसाइकलयात ठक्कर बिउगु मोटरसाइकलया लिउने च्वना वम्ह मिसा दोलखाया गौरीशंकर गाउँपालिका छेँ दुम्ह नलिञ्चोक च्वम्ह ४० दँ दुम्ह गंगा बस्नेतया ज्यान वंगु दु धका प्रहरीं धाउगु दु।

बस चालक काभ्रेया बनेपाया रवीन श्रेष्ठयात महानगरीय प्रहरी वृत्त जगाती ख्वपं ज्वंगु दु।